Sarinenđe amenđe valjani čisto pani. Sar đala o vreme „i kriza ando pani ka ovel sa pobari sose o pani sa pobuter valjani e manušenđe“, phenela o Antonio Guteres, o generalno sekretari ando Ujedinjena nacije. Milijarde manuša ko sveto već nane len dovoljno čisto pani.

 Da li iked ka ovel amen dovoljno pani, ja celo životi ka ovel amen odova problemi? So phenela i Biblija?

So i Biblija phenela kotar pani?

 I Biblija phenela so jekh dive više na ka ovel kriza ando pani. Sarine ka ovel amen čisto pani.

 „Ki pustinja ka oven panja hem potokija ka oven ki pusto phuv. Andi šuki phuv ka ovel jezero, andi trošali phuv ka oven izvorija ando pani“ (Isaija 35:6, 7).

 Sose šaj te verujina ko akava e Devleso obećanje? Dikh so i Biblija phenela ando odova sar tani i phuv ćerdi.

So i Biblija phenela andi phuv hem ando kružno tok ando pani?

 „[O Devel] na stvorinđa [i phuv] bizo razlog, već ćerđa la ađahar te šaj o manuša te živinen upro late“ (Isaija 45:18).

 „[O Devel] ćedela o kapke ando pani hem vazdela len upre, i para ovela boršim, a palo odova on perena ando oblakija, bare boršima perena upro manuša“ (Jov 36:27, 28).

 „Ka dav tumen boršim ko pravo vreme, hem i phuv ka bijani, a o voćke ka den po plod“ (Levitska 26:4).

 O Devel obećinđa so ka blagoslovini e Izraelcen, kola ćerđe buti e phuvjaja, ađahar so ka del len pani hem so olenge njive but ka bijanen. Ov đanela so valjani amenđe boršim ko pravo vreme te bi i phuv bijani.

 Odova so o Devel ćerđa e Izraelcenđe, pana hari ka ćerel hem e manušenđe ki celo phuv (Isaija 30:23). Akana ko but phuvja nane dovoljno pani hem o problemi ovela sa pobaro hem pobaro. Odova so na perela dovoljno boršim tano samo jekh problemi. So i Biblija vaćeri, kova tano o rešenje aso odova problemi?

Sar ka rešini pe o problemi e panjeja?

 I Biblija mothovi so prekalo po Kraljevstvo o Devel ka rešini sa o problemija ki phuv, so uključini hem o problemi e panjeja (Matej 6:9, 10). E Devleso Kraljevstvo tano jekh vladavina koja ando nebo ka vladini upri celo phuv (Danilo 2:44; Otkrivenje 11:15). Isto ađahar, odova Kraljevstvo ka cidel hem avera problemija sebepi kola nane amen dovoljno pani, a odova nijekh manušikani vlast našti te ćerel.

 Problemi: Sebepi o klimatska promene ovela šukipe ki celo phuv. Isto ađahar, ovena bare oluje, uštela o pani ando more hem odolese ovena but bare poplave.

 Rešenje: E Devleso Kraljevstvo ka obnovini sa o prirodna procesija ki phuv te šaj oj te oporavini pe. O Devel obećini: „Dikh, sa nevo ćerava!“ (Otkrivenje 21:5). Othe kaj hine baro šukipe, ka ovel baro pani hem othe kaj niko na živini, o biljke ka barjon (Isaija 41:17-20). O Isus Hrist, sar Kralj ando Devleso Kraljevstvo, ka ovel le kontrola upro prirodna sile ki phuv.

 Problemi: O pohlepna manuša kola na razmislinena ando posledice, zagadinena o reke, o jezerija hem i phuv. Sebepi odova nane dovoljno čisto pani.

 Rešenje: O Devel ka obnovini i phuv hem o reke, o jezerija, o morija ka oven čista. I phuv ka ovel raj. Ki Biblija pisini: „Ka radujini pe i pustinja hem i šuki phuv, ka radujini pe i phuv koja tani pusto hem ka cvetoni sar o šafran“ (Isaija 35:1).

 Problemi: O manuša ko lošno način koristinena o pani hem sebepi odova trošini pe pobuter pani nego so valjani.

 Rešenje: Ked ka vladini e Devleso Kraljevstvo upri phuv, tegani e Devlesi volja ka ćerel pe, a na okova so o sebična manuša mangena (Matej 6:9, 10). E Devleso Kraljevstvo ka sikavi sa e manušen sar valjani te živinen. Ko Isaija 11:9 pisini: „I phuv ka ovel pherdi đandipaja ando Jehova“. a Odolese so ka oven sikavde ando Jehova hem sebepi olengo mangipe premalo Devel hem premalo sa o buća so ćerđa, o manuša ko jekh najšukar način ka brininen pe kotar phuv.

•    Ako mangeja te đane pobuter so ka ćerel e Devleso Kraljevstvo, dikh o članko „So e Devleso Kraljevstvo ka ćerel?“

•    Čitin Isaija 35. poglavlje hem sikljov sar ka izgledini amaro životi ked ka ovel raj ki phuv.

•    Dikh o video Sose o Devel ćerđa i phuv? hem sikljov so o Devel mangela te ćerel e phuvjaja hem e manušencar.