So i Biblija vaćeri ando bokhalipe ko sveto?
„Nane bokhalipe ko sveto.“ Akala lafija mothovena so bi o vladarija ko sveto mangena – nijekh manuš ki phuv te na ovel bokhalo. a Ama, da li iked ka avel o vreme ked niko na ka ovel bokhalo? So i Biblija phenela?
Ki Biblija pisini so ko amaro vreme ka ovel bokhalipe
I Biblija mothovi so ko amaro vreme, kova vićini pe „poslednja dive“, ka oven bokhalipa (2. Timoteju 3:1). O Devel nane odgovorno aso bokhalipa ko sveto, već ov upozorinđa amen so odova ka ovel (Jakovljeva 1:13). Dikh duj e biblijake proročanstvija.
„Ka oven bokhalipa [. . .] ko razna thana“ (Matej 24:7). Akava e biblijako proročanstvo mothovi so ka oven bokhalipa ko razna thana. Akana sigende o stručnjakija kotar proizvodnja andi hrana phenđe: „Ked vaćeri pe ando bokhalipe, i situacija ko sveto tani sa pološno“. b Ko but phuvja milionija manuša nane len dovoljno hrana. Sebepi odova, but olendar merena.
„Tegani dikhljum jekhe kale graste hem upro leste e jahače kova hine le vaga ko vas“ (Otkrivenje 6:5). Ko akava proročanstvo, o kalo gras hem oleso jahači predstavinena o bokhalipe ko poslednja dive. c I vaga ko vas ando jahači služini te merini pe i hrana. Đi o jahači jašini, šunđola o glaso kova phenela so i hrana ka ovel but skupo hem upozorini e manušen te štedinen o osnovna namirnice (Otkrivenje 6:6). Akava proročanstvo mothovi savo tano o stanje ko sveto avdije, ked but manuša nane len dovoljno hrana.
Da li ka avel o krajo ando bokhalipe?
O stručnjakija phenena so ki amari phuv isi dovoljno hrana sarinenđe. Tegani, soj tano o problemi? Sose avela đi o bokhalipe? Hem so i Biblija phenela, so o Jehova d ka ćerel te rešini akava problemi?
O problemi: O manuša tane bokhale sose ko sveto isi ćororipe hem nepravda. O vlastija odova našti te ciden.
O rešenje: Pana hari, jekh savršeno vlast – e Devleso Kraljevstvo, ka zamenini e manušengi vlast (Danilo 2:44; Matej 6:10). Avdije, but manuša kola tane ćorore nane len uvek so te han. Ama, ked ka vladini e Devleso Kraljevstvo odova na ka ovel ađahar. I Biblija phenela ando Isus Hrist, kova tano Kralj ando Devleso Kraljevstvo: „Ov ka izbavini e ćororen kola rodena lestar pomoć, e ponizno manušen hem sa okolen kola nane len nikas te pomožini len. [. . .] Ki phuv ka ovel pherdo điv hem o najuće bregija ka oven pherde điveja“ (Psalam 72:12, 16).
O problemi: Sebepi o mariba ovela i ekonomsko kriza. Odolese, o manuša nane len dovoljno hrana.
O rešenje: „[O Jehova] ćhinavi o mariba ki celo phuv. Ov phagela o luk hem o koplje, tharela o bojna vorda“ (Psalam 46:9). O Devel ka uništini o oružje hem okolen so ćerena te oven mariba. Tegani, sarine ka ovel len dovoljno hrana. Ki Biblija pisini: „Ka niconen o pravednikija, ki celo phuv ka vladini o mir“ (Psalam 72:7).
O problemi: O klimatska promene hem o prirodna katastrofe uništinena o usevija hem mudarena e životinjen.
O rešenje: O Devel ka kontrolišini o prirodna sile, hem ka ćerel te oven odgovarajuća uslovija ki phuv te šaj te proizvodini pe i hrana. I Biblija phenela: „[O Jehova] smirini i oluja hem o morska talasija smirinena pe [. . .] Ov andi pustinja ćerela te ovel jezero hem andi šuki phuv te ikljol o pani. Uduri ka ćhivel te živinen o bokhale. [. . .] On sejinena o njive hem sadinena o vinogradija kola but bijanena“ (Psalam 107:29, 35-37).
O problemi: O pohlepna manuša proizvodinena i hrana koja nane šukar aso manušengo sastipe hem na dena hrana e manušenđe kase ćaće valjani.
O rešenje: E Devleso Kraljevstvo ka uništini sa okolen soj tane pohlepna hem nepoštena (Psalam 37:10, 11; Isaija 61:8). I Biblija ando Jehova phenela so ov „dela i pravda e mučime manušenđe [. . .] dela maro e bokhalenđe“ (Psalam 146:7).
O problemi: Svako berš ko sveto fordela pe but hrana.
O rešenje: Ked ka vladini e Devleso Kraljevstvo, i hrana ka ovel šukar raspodelimi. Ked hine ki phuv o Isus na fordinđa i hrana. Na primer, jekhvar parvarđa pobuter ando 5 000 manušen. Palo odova phenđa pe učenikonenđe: „Ćeden sa so aćhilo, ništa te na fordel pe“ (Jovan 6:5-13).
Odolese so e Devleso Kraljevstvo ka cidel o problemija kola anena đi o bokhalipe, sa o manuša ka uživinen ki šukar hem sasti hrana (Isaija 25:6). Ako mangeja te đane ked e Devleso Kraljevstvo ka ćerel akava, čitin o članko „Ked e Devleso Kraljevstvo ka počmini te vladini upri phuv?“
a I Agenda 2030 koja usvojinđe o phuvja kola tane članice ando Ujedinjena nacije ko 2015. berš.
b O zajedničko izveštaj andi Organizacija asi hrana hem poljoprivreda ando Ujedinjena nacije, o Međunarodno fond aso poljoprivredno razvoj, e Ćhavorengo fond ando Ujedinjena nacije, Svetsko program asi hrana ando Ujedinjena nacije, hem Svetsko zdravstveno organizacija.
c Ako mangeja te đane pobuter ando štar jahačija kotar Otkrivenje, dikh o članko „Šta predstavljaju jahači Apokalipse?“
d Jehova tano e Devleso lično anav (Psalam 83:18). Dikh o članko „Koj tano o Jehova?“
Dikhen hem akava
OSNOVNA BIBLIJAKE SIKLJOVIBA
Soj tano e Devleso Kraljevstvo?
Ði hine ki phuv, o Isus vaćerđa ando Kraljevstvo pobuter nego li andi bilo koja aver tema. O manuša vekonencar molinena pe te avel o Kraljevstvo.
