Ko vestija stalno šunaja ando mariba ko razna thana, sar o manuša vaćerena lošno averendar sebepi o predrasude ja čak sar napadinena jekh jekhe sebepi so nane isto nacija.

•   „Sebepi o maribe maškaro Izrael hem i Gaza, ko društvena mreže o manuša sa pobuter mothovena kobor mrzinena jekh jekhe“ (The New York Times, 15. novembar 2023).

•   „Ando 7. oktobar, o manuša pobuter nego iked angleder mothovena so mrzinena jekh jekhe hem sebepi o predrasude sa pobuter tane nasilna“ (Denis Fransis, predsednik andi generalno skupština ando Ujedinjena nacije, 3. novembar 2023).

 I mržnja sebepi o predrasude, o nasilje hem o mariba nane ništa nevo. Ki Biblija vaćeri pe okolendar kola ko purano vreme „[fordinđe] pe okrutna lafija sar strele“ hem kola podstakninđe avere manušen ko maribe hem ko nasilje (Psalam 64:3; 120:7; 140:1). Ama, i Biblija mothovi so i mržnja koja avdije dikhaja isi la but važno značenje.

 I Biblija mothovi duj razlogija sose avdije isi odobor mržnja.

1.  1. I Biblija mothovi so ko poslednja dive ko but manuša „o mangipe ka šudrol“ (Matej 24:12). Umesto te mothoven mangipe, o manuša avdije isi len osobine kola anena đi i mržnja (2. Timoteju 3:1-5).

2.  2. But bari mržnja ko sveto mothovi so o Beng utičini upro manuša. I Biblija phenela so „celo sveto tano ko e Lošnonese vasta“ (1. Jovanova 5:19; Otkrivenje 12:9, 12).

 Isto ađahar, i Biblija mothovi so pana hari o Devel ka cidel o uzrok andi mržnja. Uzo odova, ov ka cidel sa i patnja koja ulji sebepi i mržnja. Ki Biblija pisini:

•   O Devel „ka kosel svako asvi kotar olenge jaćha hem na ka ovel više meribe, ni muke, ni rojbe, ni dukha. Sa so hine angleder nakhlja“ (Otkrivenje 21:4).