Ko 24. februar 2022. berš i Rusija napadinđa e Ukrajina. Sebepi odova, bute manušengo životi tano ki opasnost hem odolese but đene morandilje te našen andi pi phuv. a

 „Svugde šundilje o bombe hem o eksplozije. Našti te opisujinav me lafencar kobor but darandiljam. Ked šunđam so organizujinena pe o vozija kolencar šaj te naša, odmah našljam. Celo amaro životi valjanđam te pakujina ko jekh tikno ranco. Leljam samo amare dokumentija, iljačija, pani hem diso hajbase. Sa mukhljam hem đi pana eksplodirinena hine o bombe amen đeljam ki železničko stanica“ (Natalija, ando Harkov, Ukrajina).

 Đi o zadnjo trenutko mislinđam so na ka ovel maribe. Ko razna thana ki diz šundilje o eksplozije hem o đamija tresinđe. Odlučinđum te našav hem leljum samo o osnovna buća. Ko 8.00 sabalje pođinđum hem leljum vozi đi o Lavov, a palo odova autobuseja đeljum đi ki Poljska“ (Nadija, ando Harkov, Ukrajina).

Ko akava članko ka vaćera ando akala pućiba:

•  Sose ćaće o manuša morandilje te našen?

•  Kuri šaj o izbeglice te arakhen nada?

•  Šaj li i Biblija pana avdije te pomožini e izbeglicenđe?

 Sose ćaće o manuša morandilje te našen?

 O manuša morandilje te našen andi Ukrajina sebepi so i Rusija napadinđa la. Ama, i Biblija mothovi pana disave razlogija sose asavke buća desinena pe ko celo sveto:

•   O manušikane vlastija našti te obezbedinen sa so valjani e manušenđe. Okola soj tane ki vlast but putija ko lošno način koristinena po autoritet (Propovednik 4:1; 8:9).

•   O Satana o Beng, kova tano „akale svetoso vladari“ lošno utičini ko manuša. I Biblija phenela: „Celo sveto tano ko e Lošnonese vasta“ (Jovan 14:30; 1. Jovanova 5:19).

•   Iako već beršencar isi amen razna problemija, akana živinaja ko but pharo vreme aso kova i Biblija phenđa soj tane poslednja dive (2. Timoteju 3:1). Ko poslednja dive ka oven mariba, prirodna katastrofe, bokhalipe, nabormipe hem sebepi akava, podijekh puti o manuša mora te našen (Luka 21:10, 11).

 Kuri šaj o izbeglice te arakhen nada?

 I Biblija mothovi so amaro Stvoritelj, o Jehova, b tano pherdo mangipe hem isi le saosećanje premalo manuša kola morandilje te mukhen pe ćhera (Ponovljeni zakoni 10:18). Ov obećini so ka rešini sa o problemija kola o izbeglice isi len. Odova ka ćerel prekali pi nebesko vlast, koja vićini pe e Devleso Kraljevstvo, kova ka uništini sa o manušikane vlastija (Danilo 2:44; Matej 6:10). Prekalo odova Kraljevstvo, o Jehova ka uništini e Benge (Rimljanima 16:20). Odova Kraljevstvo ka vladini upri celo phuv hem ka cidel sa o podele kola o manuša ćerđe. Sa o manuša ka oven sar jekh porodica. Više niko na ka našel palem ando po ćher. Sar so phenela i Biblija: „Svako ka bešel tali pi drakh hem tali pi smokva hem niko na ka daravi len, sose odova phenđa o Jehova, o Komandanti upro sa o vojske“ (Mihej 4:4).

 Jedino e Devleso Kraljevstvo šaj zauvek te rešini e manušenge problemija. Prekalo po Kraljevstvo o Jehova ka cidel sa o problemija kola ćerena o manuša te našen. Te dikha disave primerija:

•   Maribe. „[O Jehova] ćhinavi o mariba ki celo phuv“ (Psalam 46:9). Ako mangeja te đane sar o Devel ka ćhinavi sa o mariba, dikh o članko „Kako će zavladati mir u svetu?“

•   Nasilje. „[O Jehova] ka izbavini len ando manuša kola mangena te povredinen len hem kola mučinena len“ (Psalam 72:14). Ako mangeja te đane sar šaj o manuša te menjinen pe lošna stavija hem ponašibe, dikh o časopis „Ked i mržnja više na ka ovel“.

•   Ćororipe. „Sose [o Jehova] ka izbavini e ćororen kola rodena lestar pomoć“ (Psalam 72:12). Ako mangeja te đane sar o Devel ka cidel o ćororipe, dikh o članko „Da li je moguće ostvariti pravedan ekonomski sistem?“

•   Bokhalipe. „Ki phuv ka ovel pherdo điv“ (Psalam 72:16). Ako mangeja te đane sar o Devel ka rešini akava problemi, dikh o članko „Da li je moguć svet bez gladi?“

 Šaj li i Biblija pana avdije te pomožini e izbeglicenđe?

 Šaj. Uzo odova so dela len nada, i Biblija šaj te pomožini lenđe te ikljon ko krajo e problemencar kola isi len avdije.

 So phenela i Biblija: „Ma brininen tumen nisose, nego sa tumare brige vaćeren e Devlese ki molitva, celone vileja molinen tumen olese hem zahvalinen tumen olese. Hem e Devleso mir, kova tano upreder odova so o manuš šaj te haljol, ka arakhi tumaro vilo hem tumari godi“ (Filipljanima 4:6, 7).

 So značini odova: Ki koja god situacija te ove, molin e Devle te del tut mir. Dikh o članko „Filipljanima 4:6, 7: ’Ne brinite se ni za što.‘“