Sar e Jehovase svedokija, trudinaja amen amari porodica te ovel ko jekhipe. Ama hem averenđe pomožinaja ko odova. Poštujinaja e Devle kova ćerđa i porodica (Postanak 2:21-24; Efešanima 3:14, 15). Ki Biblija, ov dinđa but savetija kola pomožinena e manušenđe ko celo sveto te ovel len šukar hem bahtalo brak.

 Daja sa amendar te ićera amen ko savetija ando Devleso Lafi, sose pomožinena amenđe te ova pošukar roma, romnja hem roditeljija (Poslovice 31:10-31; Efešanima 5:22 – 6:4; 1. Timoteju 5:8). O mudra savetija ando Devleso Lafi pomožinena hem e porodicenđe ko kola nane sare ki isto religija (1. Petrova 3:1, 2). Aće so phenđe disave manuša kaso bračno drug ulo e Jehovaso svedoko:

•   „O prva šov berš ko amaro brak, stalno svađinđam amen hem hijam le razočarime. Palo odova so i Ivet ulji e Jehovaso svedoko, ulji pana poljubazno hem hine la pobuter strpljenje. Amen aćhiljam ko brako samo sose oj but menjinđa pe“ (Klaur, Brazil).

•   „Hić na mangljum mo rom, o Čansa, te proučini i Biblija e Jehovase svedokonencar sose mislinđum so on rasturinena e porodicen. Ama, dikhljum so i Biblija but pomožinđa amenđe ko amaro brak“ (Agnes, Zambija).

 Ked propovedinaja amen vaćeraja e manušencar odolestar sar šaj o mudra savetija ando Devleso Lafi te pomožinen len:

•   Mudro te birinen kasa ka khuven ko brak

•   Sar te nakhen o prvo berš ko brak

•   Šukar te slažinen pe e roditeljencar ando po bračno drug

•   Sar te trošinen o pare

•   Te ćhinaven te svađinen pe

•   Te oprostinen

•   Sar te vaspitinen pe ćhaven

 Podijekh puti, ja. Na primer, i kompanija Sofres ko 1998. berš, istražinđa hem premalo rezultatija kola objavinđa ko svako bišto brak hine ozbiljna problemija sose jekh olendar ulo Svedoko.

 O Isus prorekninđa so okola kola ićerena pe ko olese sikljoviba disavo puti ka ovel len problemija ki porodica (Matej 10:32-36). Premalo istoričar Vil Djurant, ko Rimsko carstvo „o hrišćanija hine optužime so rasturinena o porodice“, a a disave phenena so e Jehovase svedokija avdije ćerena isto odova. Da li odova značini so o Svedokija ćerena te oven problemija ki porodica?

 Ko jekh slučaj ko kova e Jehovase svedokija hine optužime so rasturinena e porodicen, ki presuda ando Evropsko sudo aso e manušenge pravija hine phendo so o članija andi porodica kola nane Svedokija često ćerena problemija sose na mangena „te prihvatinen hem te poštujinen odova so hem avera ki porodica isi len pravo te birinen ko so ka verujinen hem ki koja religija ka oven“. Odova Sudo pana phenđa: „Ađahar tano ko sa o brakija ko kola o rom hem i romni nane ki isto religija, a na samo ko Jehovase svedokija“. b Čak ked avera maltretirinena len sebepi olenge verovanja, e Jehovase svedokija šunena o savet andi Biblija: „Nikase ma irinen lošnipe aso lošnipe. . . Ako šaj, kobor tano đi tumende, oven ko mir sa e manušencar“ (Rimljanima 12:17, 18).

 O Svedokija ićerena pe ko biblijake smernice te venčinen pe „samo ko Gospod“, avere lafencar te khuven ko brak e osobaja andi pi religija (1. Korinćanima 7:39). Akija zapovest tani ando Devleso Lafi hem korisno tani. Na primer, ko članko kova hine objavimo ko 2010. berš, ko časopis kova vaćeri ando brak hem andi porodica (Journal of Marriage and Family) pisini so „ked o rom hem i romni tane ki isto religija hem ked ićerena pe ko ista sikljoviba“ šaj te ovel len pošukar brak. c

 Ama, e Jehovase svedokija na podstakninena okolen kola tane ki olengi religija te aćhaven pe romnja ja pe rome sose nane Svedoko. Ko Devleso Lafi pisini: „Ako jekh phral isi le romni koja na verujini ko Gospod, hem oj mangela te živini oleja, ma te mukhel la. Isto ađahar, ako i romni isi la rom kova na verujini ko Gospod hem ov mangela te živini olaja, ma te mukhel le“ (1. Korinćanima 7:12, 13). E Jehovase svedokija ićerena pe ki akija zapovest.