•  Sar e Jehovase svedokija odlučinena da li disavo praznik valjani te slavinen ja na?

•  Da li e Jehovase svedokija mangena pe porodica iako na slavinena disave praznikija?

•  Da li e Jehovase svedokija zabraninena averenđe te slavinen disave praznikija?

 Angleder te odlučinen da li valjani disavo praznik te slavinen, e Jehovase svedokija najangleder rodena te dikhen so i Biblija vaćeri odolestar. Disave praznikija hem proslave nane premalo e biblijake sikljoviba. E Jehovase svedokija na slavinena asavke praznikija hem proslave. Ama, aso disave avera proslave, svako Svedoko kokri valjani te anel i odluka. Tegani, o cilj ando svako Svedoko tano te arakhi i čisto savest hem anglo Devel hem anglo manuša (Dela apostolska 24:16).

 Angleder te odlučinen da li te đan ki disavi proslava ja ko disavo praznik, e Jehovase svedokija razmislinena ando akala pućiba. a

•   Da li tano odova praznik premalo biblijake sikljoviba?

   E biblijako načelo: „’Ikljoven odothar hem odvojinen tumen olendar‘, phenela o Jehova, ’hem ma pipinen ništa soj tano melalo‘ “ (2. Korinćanima 6:15-17).

   E Jehovase svedokija mangena te ićeren pe so podur ando sikljoviba kola o Devel osudini hem odolese na ićerena pe ko praznikija hem ko proslave kola temeljinena pe ko buća soj tane dinde tele:

   O praznikija kolencar slavinena pe avera devela. O Isus phenđa: „E Jehovase, te Devlese, klanin tut hem samo olese služin“ (Matej 4:10). E Jehovase svedokija ićerena pe ki odija zapovest hem odolese na slavinena Božić, Uskrs, niti Prvi maj. Odola praznikija avena ando proslave kolencar slavinđe pe avera devela, a na o Jehova. Isto ađahar, e Jehovase svedokija na slavinena hem disave avera praznikija ando kola akana hari ka vaćera.

  •  Kvanza. O anav Kvanza „avela ando lafi matunda ja kvanza ki svahili ćhib kova značini ’prva plodija‘ hem odova mothovi so akava praznik avela ando vreme ked o manuša ćerđe proslave sebepi i žetva ki Afrika“ (Encyclopedia of Black Studies). Disave manuša mislinena so i Kvanza nane versko praznik, ama ki Encyclopedia of African Religion pisini so odova praznik tano sar jekh proslava ki koja o prva plodija „dinđe pe e devlenđe hem e mulenđe sar znako andi zahvalnost“. Odothe pana pisini so „i zahvalnost e mulenđe tani važno deo ando afro-američko praznik Kvanza“.

  •  O praznik ando maškar andi jesen. Akava praznik ićeri pe „ki čast andi boginja ando mesec“ (Holidays, Festivals, and Celebrations of the World Dictionary). Tegani tano o običaj o đuvlja te klaninen pe odola boginjaće (Religions of the World–A Comprehensive Encyclopedia of Beliefs and Practices).

  •  Nav Ruz. „Akava praznik avela ando zoroastrizam hem ov tano sveto dive ko zoroastrijsko kalendari. . . Ko podne ko dive ando Nav Ruz, premalo zoroastrijsko kalendari, uzi proslava ađićeri pe o Duh ando podne, kova tano penđardo sar Rapitvin, kas o Duh ando jevend fordinđa ko podzemlje“ (Organizacija Ujedinjenih nacija aso obrazovanje, asi nauka hem kultura – UNESKO).

  •  Šabe Jalda .Premali knjiga Sufism in the Secret History of Persia, akija proslava, ked slavini pe i najbari rat ko berš, „tani povezimi e devleja andi svetlost, Mitra“. Isto ađahar, phenela pe so o Rimljanija hem o Grkija slavinđe e devlen ando kham hem so akava praznik verovatno tano povezimo odoleja. b

  •  O Dive andi zahvalnost. Sar i Kvanza, hem akava praznik tano povezimo e proslavencar andi žetva, kolencar dinđa pe čast bute devlenđe. Sar đelo o vreme, „i hrišćansko crkva počminđa te ićeri pe ko akala običaja“ (A Great and Godly Adventure–The Pilgrims and the Myth of the First Thanksgiving).

   O praznikija kola temeljinena pe ko sujeverje hem ko verovanje ki sreća. Ki Biblija pisini so okola „kola irinena i sofra e devlese andi sreća“ aćhavena e Jehova (Isaija 65:11). Odolese, e Jehovase svedokija na slavinena akala praznikija:

  •  Ivanjdan (Noć Ivana Kupale). „O manuša verujinena so odova dive i priroda mukhela pi moć hem so ako hijan hrabro hem ako isi tut sreća tu šaj te dobine odija moć“ (The A to Z of Belarus). Ko početko, o paganska narodija (o narodija kola na služinđe e ćaćutne devlese) slavinđe odova so o dive tano najbaro. Ama, „ked o paganija ulje hrišćanija odova praznik ulo deo andi jekh crkveno slava [Sveti Jovan Krstitelj]“ (Encyclopedia of Contemporary Russian Culture).

  •  Lunarno Nevo berš (kinesko Nevo berš ja korejsko Nevo berš). „Tegani sarinenđe ki porodica hem e amalenđe tano najvažno te oven bahtale, te mothoven so poštujinena pe devlen hem e duhonen hem te čestitinen jekh jekhese nevo berš uzo najšuže želje“ (Mooncakes and Hungry Ghosts–Festivals of China). Isto ađahar, ked slavini pe Korejsko Nevo berš tegani „ćerena pe razna ritualija ki čast e mulenđe, ćerena pe razna ritualija kolencar uspudinena pe o lošna duhija hem proreknini pe so ka ovel ki budućnost“ (Encyclopedia of New Year’s Holidays Worldwide).

   O praznikija kola temeljinena pe ko verovanje so i duša niked na merela. Ki Biblija pisini so i duša šaj te merel (Jezekilj 18:4). Odolese, e Jehovase svedokija na slavinena o praznikija kola temeljinena pe ko verovanje so i duša niked na merela. Disave olendar tane:

  •  O Dive ando mule (Zadušnice). Premali New Catholic Encyclopedia ko akava dive o manuša „setinena pe ko pe mangle kola mulje“. „Ko srednjo veko (ando 500. berš pa sa đi o 1500. berš) verujinđa pe so o duše ando čistilište šaj te pojavinen pe sar duhija, veštice, žabe. . . okolenđe kola ćerđe lenđe diso lošno.“

  •  Ćingming (o Dive ando pretkija) hem o Praznik ando bokhalo duho. Akala duj praznikija ićerena pe ki čast e mulenđe. Premali knjiga Celebrating Life Customs Around the World–From Baby Showers to Funerals ko Ćingming o manuša tharena „o habe, o pibe hem o papirna pare, te šaj o mule te ovel len sa so valjani lenđe“. Isto ađahar, ki odija knjiga pisini so „đi trajini o Masek ando bokhalo duho, a posebno ki rat ando pherdo mesec, i veza maškaro mule hem đivde tani but pozorali nego ki bilo koja aver rat hem odolese tano važno te ćere sa so valjani te smirine e mulen.“

  •  Čuseok. Premali knjiga The Korean Tradition of Religion, Society, and Ethics, ko akava praznik „e mulenđe dela pe o habe hem o pibe“. Odova ćerela pe sose verujini pe so „i duša živini palo meribe.“

   O praznikija kuri isi okultizam. I Biblija phenela: „Maškaro tumende ma te ovel nijekh kova bi pe ćhave ja pe ćhaja tharela ki jag sar žrtva, ni kova bi gatini, ni kova bi ćerela mađije, ni kova bi prorokujini premalo znakija, ni o vračarija, ni ko bi fordela o mađije, ni ko bi vićini e duhonen, ni ko bi vaćeri so ka ovel ki budućnost, ni ko bi pućela e mulen. Sose ko god ćerela diso ađahar ov tano odvratno e Jehovase“ (Ponovljeni zakoni 18:10-12). E Jehovase svedokija na mangena te ovel len nisavi veza odole bućencar hem odolese na slavinena i Rat ando veštice hem akala praznikija soj tane dinde tele:

  •  Sinhalsko Nevo berš hem tamilsko Nevo berš. „Tegani ćerena pe disave aktivnostija sose o astrologija računinđe so odova vreme tano najšukar“ (Encyclopedia of Sri Lanka).

  •  Songkran (tajlandsko Nevo berš). O anav ando akava azijsko praznik avela ando sanskritsko lafi. . . kova značini „kretanje“ ja „promena“ hem odova praznik mothovi so o kham khuvđa ko sazvežđe ando Ovan“ (Food, Feasts, and Faith–An Encyclopedia of Food Culture in World Religions).

   O praznikija kola avena ando Mojsijeso zakon, ama kola više na važinena sebepi e Isusesi otkupno žrtva. Ki Biblija pisini: „O Hrist tano kraj ando zakoni“ (Rimljanima 10:4). E hrišćanenđe hem avdije koristinena o načelija ando Mojsijeso zakon, kova tano dindo e Izraelcenđe. Ama, on na slavinena o praznikija kola ko purano vreme slavinđe pe sose odola praznikija mothovđe so ka avel o Mesija. O hrišćanija verujinena so o Mesija već alo. Ki Biblija pisini so sa odova tano samo „senka ando odova so avela, ama odova soj tano ćaće tano o Hrist“ (Kološanima 2:17). Sebepi so odola praznikija više na važinena hem uključinena disave običaja kola nane premali Biblija, e Jehovase svedokija na slavinena akala praznikija:

  •  Hanuka. Ked slavinena akava praznik o manuša obeležinena o posvećenje ando hram ko Jerusalim. Ama, i Biblija phenela so o Hrist „ulo prvosveštenik hem so khuvđa ko pobaro hem posavršeno šatori [ja ko hram] kova na čerđe o manušikane vasta hem kova na arakhi pe ki phuv“ (Jevrejima 9:11). O hrišćanija verujinena so odova duhovno hram menjinđa odova hram ko Jerusalim.

  •  Roš Hašana. Akale praznikoja slavini pe o početak ando nevo berš premalo jevrejsko kalendari. Ko purano vreme, ko akava praznik e Devlese dinđe pe posebna žrtve (Brojevi 29:1-6). Ama, sebepi so o Isus već dinđa amenđe po životi sar žrtva, o životinjska žrtve nane len nisavi vrednost anglo Devlese jaćha (Danilo 9:26, 27).

•   Da li odova praznik povezini e manušen ando različita religije?

   E biblijako načelo: „So isi len zajedničko o verniko hem o neverniko? Hem so e Devleso hram isi le e idolencar?“ (2. Korinćanima 6:15-17).

   Iako e Jehovase svedokija trudinena pe te oven ko mir sarinencar hem poštujinena svakoneso pravo te verujini ko odova so mangela, on na slavinena o praznikija kolencar povezinena pe o manuša ando različita religije.

   O praznikija ki čast ando disavo manuš ja kola podstakinena te učestvujini pe ki versko služba ando avera religije. Ked o Devel legarđa pe narodo ki Obećimi phuv, ki koja avera manuša služinđe avere devlenđe, ov phenđa lenđe: „Ma ćer savez olencar ni olenge devlencar. . . Ako bi služineja olenge devlenđe, odova bi ovela zamka tuće“ (Izlazak 23:32, 33). Odolese, e Jehovase svedokija na slavinena akala praznikija:

  •  Loj Kratong. Ko akava praznik, kova slavini pe ko Tajland, „o manuša ćerena ćare ando lišće, ano lende ćhivena o momolja hem o mirišljava štapićija, a palo odova odola ćare mukhena te đan ko pani hem ađahar verujinena so on legarena sa o bibahtalipe. Tegani setinena pe ko otisak ando pro kova o Buda aćhavđa (Encyclopedia of Buddhism).

  •  O Dive ando pokajanje. O državno zvaničnik andi Papua Nova Gvineja, kase lafija tane citirime ko novine The National, phenela so „odova državno praznik tano premali hrišćansko vera. Odova dive pomožini e manušenđe te oven pošukar hrišćanija“.

  •  Vesak. „Akava dive tano najvažno ko budizam hem oleja slavini pe o dive ked o Buda bijandilo, ulo prosvetitelj hem mulo“ (Holidays, Festivals, and Celebrations of the World Dictionary).

   O proslave kola avena ando običaja kola nane premali Biblija. O Isus phenđa e versko vođenđe ko odova vreme: „Sebepi tumare adetija peravđen e Devleso Lafi.“ Isto ađahar, o Isus phenđa so sa odova so ćerena nane le nisavi vrednost anglo Devlese jaćha sose olenge sikljoviba temeljinena pe ko manušikane zapovestija (Matej 15:6, 9). E Jehovase svedokija ozbiljno dikhena ko odova upozorenje hem odolese na slavinena but verska praznikija.

  •  Bogojavljenje (O dive ando Trin kraljija, Timkat). Tegani slavini pe o dive ked o astrologija alje ko Isus, ili o dive ked o Isus krstinđa pe. Ađahar, „disave praznikija kola slavinđe pe ko nilaj ki čast ando devela ando reke hem potokija, ulje hrišćanska“ (The Christmas Encyclopedia). O Timkat, jekh aver slično praznik, „but vreme tano deo andi versko tradicija“ (Encyclopedia of Society andCulture in the Ancient World).

  •  Bari Gospojina. Akava praznik avela ando verovanje so e Isusesi daj, i Marija, đelji ko nebo ko telo. Premali knjiga Religion and Society–Encyclopedia of Fundamentalism, „o prva hrišćanija na verujinđe ko odova hem nigde ki Biblija na vaćeri pe odolestar“.

  •  Bezgrešno začeće Blažene Device Marije. „Odija ideja so i Marija hine oslobodimi ando greho kotar trenutko ked aćhilji khamni na arakhi pe ko Devleso lafi. Odova sikavi i crkva“ (New Catholic Encyclopedia).

  •  Korizma (O Uskršnjo post). Premali New Catholic Encyclopedia akava period ando pokajanje hem post počminđa „ko štarto veko“, pobuter ando 200 berš palo odova so o pisibe andi Biblija hine završimo. Ko prvo dive andi Korizma „tano običaj o manuša ki Čisto sreda [Pepelnica] te ćhoren praho upro peste. Odova običaj ićeri pe pana ando sabor ko Beneventu 1091.“

  •  Meskel (Praznik ando krst). Akava praznik avela andi Etiopija hem oleja slavini pe „o dive ked arakhlja pe o krst (ko kova o Isus hine kovimo). Tegani tharela pe jag hem ćhelela pe okolo i jag“ (Encyclopedia of Society and Culture in the Medieval World, o tekst ki zagrada tano deo ando citati ki enciklopedija). E Jehovase svedokija na koristinena o krst.

•   Da li odole praznikoja vazdela pe disavo manuš, disavi organizacija ja o nacionalno simboli?

   E biblijako načelo: „Ađahar phenela o Jehova: ’Nek ovel prokleto o manuš kova uzdajini pe upro manuša, kova oslonini pe upri manušesi snaga, a oleso vilo tano dur ando Jehova‘ “ (Jeremija 17:5).

   Iako e Jehovase svedokija mangena e manušen hem molinena pe olenđe, on na učestvujinena ko akala događaja hem proslave:

   O praznikija kolencar slavini pe disavo vladari ja disavo važno manuš. Ki Biblija pisini: „Ma uzdajinen tumen ko manuš, kova tano sar o dah ko nakh. Savi tani korist olestar?“ (Isaija 2:22). Odolese, e Jehovase svedokija na primer, na slavinena o rođendan ando disavo vladari.

   Pozdravljanje zastave. E Jehovase svedokija na pozdravinena i zastava. Sose? Odolese so ki Biblija pisini: „Arakhen tumen ando idolija!“ (1. Jovanova 5:21). Disave manuša na mislinena soj tano o idolopoklonstvo ako pozdravineja i zastava. O istoričar Karlton Hejz pisinđa: „Aso patriote, i zastava tani glavno versko simboli hem glavno predmet ando obožavanje.“

   O praznikija ja o proslave kolencar slavinena pe o svecija. So ulo ked jekh manuš klaninđa pe e Petarese? Ki Biblija pisini: „O Petar vazdinđa le vaćerindoj: ’Ušti! Me hijum samo manuš sar tu‘ “ (Dela apostolska 10:25, 26). Ni o apostol Petar, ni avera apostolija na manglje o manuša te mothoven lenđe čast hem odolese e Jehovase svedokija na učestvujinena ko proslave kolencar vazdela pe disavo manuš. Disave ando odola proslave tane:

  •  Sa o svecija. „Akava praznik slavini pe ki čast sa e sveconenđe. . . Na đanela pe kotar avela odova praznik“ (New Catholic Encyclopedia).

  •  O praznik andi amari Gospa ando Gvadalupe. Akale praznikoja dela pe čast „e zaštitnikose ando Meksiko“. Disave verujinena so o zaštitnik ando Meksiko tani i Marija, e Isusesi daj. Verujini pe so oj pojavinđa pe jekhe manušese 1531. (The Greenwood Encyclopedia of Latino Literature).

  •  Imendan. „Ko akava dive slavini pe o sveco premalo kova o ćhavoro dobinđa anav ked krstinđa pe“, pisini ki knjiga Celebrating Life Customs Around the World–From Baby Showers to Funerals. Odothe pana pisini so „odova dive hem o verska običaja tane povezime“.

   O proslave ando politička hem društvena pokretija. Ki Biblija pisini: „Pošukar tano te uzdajine tut ko Jehova nego ko manuša“ (Psalam 118:8, 9). E Jehovase svedokija na mangena te aćhaven utisak so on mislinena so o manuša ka rešinen o problemija ko sveto, a na o Devel hem odolese na slavinena E ternengo dive ja E đuvljengo dive. Odola praznikija tane povezime e organizacijencar kola borinena pe te ovel pošukar ko sveto. Odolese amen na ićeraja ni o praznik O dive ked o ropstvo ćhinavđa ja slična praznikija. Amen verujinaja so samo e Devleso Kraljevstvo šaj te cidel sa o podele ko sveto (Rimljanima 2:11; 8:21).

•   Da li odova praznik vazdela dijekh narodo upro aver?

   E biblijako načelo: „O Devel na dikhela koj tano ko, nego kotar svako narodo prihvatini sarinen kola darana olestar hem ćerena odova soj tano pravedno“ (Dela apostolska 10:34, 35).

   Iako e Jehovase svedokija poštujinena i phuv ki koja živinena, on na učestvujinena ko proslave kolencar disavo narodo vazdela pe upro avera narodija, sar soj tane:

   O praznikija kolencar vazdela pe i vojska. O Isus niked na hine aso maribe, već pe učenikonenđe phenđa: „Mangen tumare dušmanen hem molinen tumen okolenđe kola progoninena tumen“ (Matej 5:44). Odolese, e Jehovase svedokija na slavinena o praznikija kolencar dela pe čast e vojskaće. Disave ando odola praznikija tane:

  •  O Dive ando Anzak. „O anzak tano skraćeno lafi aso vojna trupe ki Australija hem ko Nevo Zeland. Sar đelo o vreme, odova dive ulo praznik ked setinena pe ko manuša kola mulje đi braninđe pi phuv“ (Historical Dictionary of Australia).

  •  O Dive ando veteranija (o Dive ando setibe, ja o Dive ando primirje). Akala praznikija slavinena pe ki čast ando „veteranija hem ando sa okola kola mulje đi borinđe pe asi pi phiv“ (Encyclopædia Britannica).

   Važna datumija ki istorija andi disavi phuv ili o dive ked disavi država ulji nezavisno. O Isus phenđa ando pe učenikija: „On nane deo akale svetoso, sar so me na hijum deo akale svetoso“ (Jovan 17:16). Iako e Jehovase svedokija mangena te đanen i istorija andi pi phuv, on na mangena te učestvujinen ko akala praznikija:

  •  O Dive andi Australija. Premali knjiga Worldmark Encyclopedia of Cultures and Daily Life, akale praznikoja slavini pe „o dive ked ko 1788. o engleska vojnikija vazdinđe pi zastava hem ked i Australija ulji olengi kolonija.“

  •  O Dive ando Gaj Foks. Akava tano „državno praznik hem ko akava dive o manuša setinena pe sar propadinđa o plan ando Gaj Foks hem ando avera katolikija kola manglje te mudaren e kralje Džejms I hem te peraven i zgrada ando britansko parlamenti ko 1605.“ (A Dictionary of English Folklore).

  •  O Dive andi nezavisnost (o Dive andi državnost). Ko disave phuvja, tegani o manuša slavinena „o dive ked olengi država hine oslobodimi andi vlast kotar disavi aver država“ (Merriam-Webster’s Unabridged Dictionary).

•   Da li ko odova praznik o manuša ponašinena pe nemoralno, bizi lađ hem sar mangena?

   E biblijako načelo: „Sose dosta tano angleder so ćerđen sa odova so ćerena o manuša ko sveto – ćerđen razna lošna buća bizi lađ, na hine tumen kontrola upro tumare želje, but piljen, ćerđen neobuzdana zabave, pijanke hem služinđen avere devlenđe“ (1. Petrova 4:3).

   E Jehovase svedokija ićerena pe ko akava načelo hem odolese na učestvujinena ko proslave kuri but pijela pe hem svašta ćerela pe. E Jehovase svedokija uživinena te družinen pe pekle amalencar hem tegani šaj, ama nane obavezno te ovel o alkohol. Ako hem isi alkohol, tegani svako đanela pi granica. On ićerena pe ko savet andi Biblija: „Bilo te han, bilo te pijen, bilo diso aver te ćeren, sa ćeren e Devlese ki slava“ (1. Korinćanima 10:31).

   Odolese, e Jehovase svedokija na đana ko karnevalija hem na učestvujinena ko praznikija kola uključinena o ponašibe kova i Biblija osudini. Jekh asavko praznik tano o Purim. Ko purano vreme, tegani slavinđa pe o dive ked o Jevreja hine oslobodime ko panđto veko ang. n. e, a akana tano sar „i jevrejsko verzija Mardi gra ja o karnevali ked o manuša uravena o kostimija (o murša uravena đuvljikane šeja), ponašinena pe sar mangena, pijena hem pištinena“ (Essential Judaism).

 Ja. I Biblija sikavi e manušen te mangen hem te poštujinen pe porodica ki bilo koja religija on te oven (1. Petrova 3:1, 2, 7). Haljovaja so ked neko ovela e Jehovaso svedoko hem više na slavini disave praznikija kola angleder slavinđa, olese familijaće šaj te ovel but pharo. Ama, e Jehovase svedokija trudinena pe te vaćeren pe familijaja hem te mothoven lenđe so mangena len. On trudinena pe te objasninen sose anđe asavki odluka hem posetinena len ko avera prilike.

 Na. On poštujinena svakoneso pravo te verujini ko odova so ov mangela (Isus Navin 24:15). E Jehovase svedokija poštujinena sa e manušen, bizo obzir ki koja religija tane on (1. Petrova 2:17).