O krstime Jehovase svedokija kola više na propovedinena, ili kola čak cidinđe pe andi skupština, nane odbacime. Amen daja sa amendar te resa đi ko olengo vilo hem te pomožina len palem te oven paše e Jehovaja.

 Ako neko ćerđa ozbiljno greh odova na značini so odmah ka ovel isključimo. Ama, ako nesavo Svedoko na živini premalo e biblijake merilija hem na kajini pe aso odova so ćerela, tegani ov ka ovel isključimo. I Biblija jasno phenela: „Ciden tumendar okole kova grešini“ (1. Korinćanima 5:13).

 So ako o manuš kova tano isključimo isi le romni hem ćhave kola tane pana e Jehovase svedokija? Iako više na služinena zajedno e Jehovase, on tane hem ponodri jekh porodica. O rom hem i romni hem ponodri tane ko brako, sare mangena pe, poštujinena pe hem zajedno anena odluke.

 Okola soj tane isključime šaj te aven ko amare sastankija. Ako mangena šaj te dobinen duhovno pomoć ando starešine ki skupština. E starešinengo cilj tano te pomožinen lenđe te irinen pe e Jehovase. O isključime kola ćhinavena pe lošna navike hem počminena te živinen premalo e biblijake merilija, palem šaj te oven e Jehovase svedokija.