E Jehovase svedokija na slavinena o rođendanija sose o Devel na prihvatini asavke proslave. Iako nigde ki Biblija na pisini so na valjani te slavina o rođendanija, oj pomožini amenđe te haljova sar o Devel dikhela upro lende. Akana ka dikha štar razlogija sose na slavinaja o rođendanija hem disave načelija andi Biblija.

1.   O rođendanska proslave avena ando paganija. Premali knjiga Funk & Wagnalls Standard Dictionary of Folklore, Mythology, and Legend, o manuša verujinđe so ko nekaso rođendan „o lošna duhija avena te napadinen e osoba kaso tano rođendan“ hem so „o amala kola avena ko rođendan hem olenge šuže želje šaj te zaštitinen odola osoba“. I knjiga The Lore of Birthdays mothovi so ko purano vreme o dive ked neko bijandilo hine „važno te šaj te ćerel pe o horoskop“ kova temeljinđa pe ki astrologija. Ki akija knjiga pana pisini so „o rođendanska momolja, sar so verujinđe o manuša, isi len moć te ispuninen o želje“.

    Ki aver strana, i Biblija osudini i magija, o vračanje, o spiritizam ja slična buća. Koro late pisini: „O Jehova, tumaro Devel, na mukhela tumen odova te ćeren“ (Ponovljeni zakoni 18:14; Galatima 5:19-21). Jekh razlog sose o Devel osudinđa e manušen ko purano Vavilon hine sose bavinđe pe e astrologija, so hine jekh oblik ando gatanje (Isaija 47:11-15). E Jehovase svedokonenđe nane najvažno te đanen kotar avela svako običaj, ama ked e Devleso Lafi vaćeri odolestar, on ićerena pe ko odova.

2.   O prva hrišćanija na slavinđe o rođendanija. I World Book Encyclopedia phenela so o prva hrišćanija „mislinđe so o rođendanska proslave avena ando paganija“. I Biblija mothovi so o apostolija hem avera kas o Isus sikavđa tane but šukar primer kova valjani te oponašina (2. Solunjanima 3:6).

3.   O Isus zapovedinđa amenđe te setina amen ko dive ked mulo, a na ko dive ked bijandilo (Luka 22:17-20). Akava na iznenadini amen sose ki Biblija pisini: „O dive ked mereja tano pošukar nego o dive ked bijanđoveja“ (Propovednik 7:1). Sa đi na mulo, o Isus dinđa sa pestar te ovel le šukar anav anglo Devel hem ađahar o dive ked mulo hine považno ando dive ked bijandilo (Jevrejima 1:4).

4.   Nigde ki Biblija na vaćeri pe so jekh e Devleso sluga slavinđa po rođendan. Ki Biblija vaćeri pe ando duj rođendanija, ama o solduj rođendanija slavinđe o manuša kola na služinđe e Jehovase hem o solduj događaja na hine mothovde sar diso šukar (Postanak 40:20-22; Marko 6:21-29).

 Sar sa o šukar roditeljija, hem o Svedokija prekalo celo berš mothovena so mangena pe ćhaven ađahar so ćinena lenđe poklonija hem ćerena lenđe druženja.On trudinena pe te oponašinen e Devle kova na ađićeri disavi posebno prilika te del šukar buća pe ćhavenđe (Matej 7:11). O ćhave ando Jehovase svedokija na mislinena so olenđe diso falini. Aće so phenena disave olendar:

•   „Maje tano pošukar ked dobinava poklon ked na očekujinava le“ (Tami, 12 berš).

•   „Iako na dobinava poklonija aso mo rođendan, me roditeljija ćinena maje poklonija but putija ko berš. Odova sviđini pe maje sose tegani but iznenadinena man“ (Gregori, 11 berš).

•   „Ako mislinena so i pravo žurka trajini deš minutija hem so valjani tumenđe samo disave kolačija hem muzika, tegani na đanena soj tani pravo žurka. Aven koro mande ćhere hem ka dikhen soj tani pravo žurka!“ (Erik, 6 berš).