Ο Γράμμας σο Μπουτσσάντιλο κο Γαλάτες 1:1-24
1 Ανταβά γράμμας μπουτσσάντιβελα μάνταρ κατά Παύλος σο ισινόμ απόστολος. Να κερντέ-μαν απόστολος ο τζενέ ούτε μπουτσσάντιλομ κατά τζενέ. Μπουτσσάντιλομ κατά Ιησούς Χριστός ντα κατά Ντεβέλ, σο ισί αμαρό Ντατ ντα σο τζουβντιαρντάς ι Χριστός κατά μουλέ.
2 Με ντα σαρέ ο πφραλά σο ισί μάντζαρ κεράσα σελιάμι* κο κχανγκιριά κι Γαλατία:
3 Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.
4 Βοβ ντινάς πι ζωή αμαρέ αμαρτιένγκε για τι σώνελ-αμέν ανταλέ πφιρνέ* ντουνιάσταρ* αντικάς σαρ μανγκέλα ο Ντεβέλ σο ισί αμαρό Ντατ.
5 Κο Ντεβέλ τι αβέλ η δόξα για πάντα. Αμήν.
6 Ναστί αγαβάβα σαρ αβέλα-πες τι νασέν αζόμ σουγκό ντουρ Οντουλέσταρ σο τραμπιντάς-τουμέν ι Χριστόσκε μπαρέ λατσσιμάσαρ ντα τι ασουνέν γιαβερά λατσσέ αμπέρια.
7 Αλλά να υπαρχίντιβενα γιαβερά λατσσέ αμπέρια. Υπαρχίντιβενα τζενέ σο χουχαβένα-τουμέν ντα μανγκένα τι αλλάνεν ο λατσσέ αμπέρια ι Χριστόσκε.
8 Όμως, ατζέ-ντα άμα εκ τζενό αμένταρ ή εκ άγγελος κατά ουρανός κα μουτθαβέλας τουμένγκε γιαβερά λατσσέ αμπέρια οντουλένταρ σο μουτθαντάμ τουμένγκε αμέν, τι τθερέλ αρμάν οπρά-πέστε.
9 Σαρ βακερντάμ πο τζανγκλέ, βακεράβα ακανά-ντα: Κον μουτθαβέλα τουμένγκε γιαβερά λατσσέ αμπέρια οντουλένταρ σο δεχτιντέν, τι τθερέλ αρμάν οπρά-πέστε.
10 Προσπαθίναβα τι κεράβ ο γκι ι τζενένγκο ή ι Ντεβλέσκο; Άμα μανγκάβας τι κεράβ ο γκι ι τζενένγκο, να κα αβάβας δούλος ι Χριστόσκο.
11 Πφραλάλεν, μανγκάβα τι τζανέν ότι ο λατσσέ αμπέρια σο μουτθαντόμ τουμένγκε νανέ κατά τζενέ,
12 ούτε λιντόμ-λεν τζενένταρ ούτε σικλιλόμ-λεν τζενένταρ, αλλά σικαντάς-λεν μάνγκε ο Ιησούς Χριστός.
13 Σίγουρα, ασουντέν σο κεράβας κάνα ισινόμας κι Ιουδαιόνγκι θρησκεία, ότι τζάβας μπαρί κόντρα κι κχανγκιρί κι Ντεβλέσκι για τι καταστραφίναβ-λα.
14 Ντα τζάβας-λεν πο λατσσές κι Ιουδαιόνγκι θρησκεία μπουτέ γιαβερέ Ιουδαιόνταρ σο ισινέ μι ηλικιάτε ντα μανγκάβας σαρέ μι γκίσαρ τι κεράβ σαρέ οντουλά σο σικλιαρντέ-αμέν αμαρέ νταντά.
15 Αλλά ο Ντεβέλ, σο κερντάς τι μπιάντιβαβ,* τραμπιντάς-μαν πι μπαρέ λατσσιμάσαρ. Βοβ μανγκλάς
16 τι μουτθαβάβ με ο λατσσέ αμπέρια κο τζενέ σο ισί γιαβερέ τθεμένταρ για τι σικλιόν λέσκε Τσσαβέσκε. Κάνα τραμπιντάς-μαν τι κεράβ-λες ανταβά, να γκιλόμ τι πουτσάβ καεκχέ τζενές.
17 Ντα να γκιλόμ κι Ιερουσαλήμ, οντουλέντε σο ισινέ απόστολοι πριν μάνταρ, αλλά γκιλόμ κι Αραβία ντα σοράν βουρτισάλομ κι Δαμασκός.
18 Σοράν, κάνα νακχλέ τριν μπρεσά, γκιλόμ κι Ιερουσαλήμ κο Κηφάς* ντα μπεσλόμ λέσαρ 15 ντιβεσά.
19 Αλλά να ντικχλόμ καεκχές κατά γιαβερά απόστολοι, ντικχλόμ σάντε ι Ιακωβός, ι Κυριόσκε πφραλές.
20 Ο Ντεβέλ τζανέλα ότι σαρέ ανταλά σο γραφίναβα τουμένγκε ισί μπαγιά.
21 Σοράν, γκιλόμ διάφορε τθανέντε σο ισί κι Συρία ντα κι Κιλικία.
22 Αλλά ο κχανγκιριά κι Ιουδαία σο ισινέ ενωμέ ι Χριστόσαρ να τθερένας-μαν ντικχλό.
23 Βον ασουνένας σάντε ακαβά: «Οντουβά σο τζάλας αμέντζαρ κόντρα ντα μανγκέλας τι καταστραφίνελ αμαρί θρησκεία* ακανά μουτθαβέλα ο λατσσέ αμπέρια».
24 Οτθάρ, αρχισάλε τι δοξάνεν ι Ντεβλές κάνα ασουντέ μάνγκε.
Υποσημειώσεις
^ Γιαβέρσοϊ «μπουτσσαβάσα χαιρετίσματα».
^ Γιαβέρσοϊ «γκεραλέ, μπίλατσσε».
^ Κι Πουρανί Μπαλαμανί βακέρντιβελας «σο χωριντάς-μαν κατά περ μι νταγιάκο».
^ Βακέρντιβελας Πέτρος-ντα.
^ Κι Πουρανί Μπαλαμανί ισινέ ο λάφι «πίστη».
