Ο Γράμμας σο Μπουτσσάντιλο κο Γαλάτες 2:1-21
2 Σοράν, κάνα νακχλέ 14 μπρεσά, με ντα ο Βαρνάβας γκιλάμ πάλι κι Ιερουσαλήμ, ντα λιντάμ αμέντζαρ ι Τιτός-ντα.
2 Γκιλόμ πάλι οτθέ επειδή ο Κύριος σικαντάς μάνγκε τι τζαβ. Οτθέ κερντόμ λάφι σάντε ι πφραλέντζαρ σο οδηγίνενα ι κχανγκιρί ντα βακερντόμ λένγκε σο λατσσέ αμπέρια μουτθαβάβα κο τζενέ σο ισί γιαβερέ τθεμένταρ. Κερντόμ-λες ανταβά για τι αβάβ σίγουρος ότι να κερντόμ σινανέ ο έργος ι Ντεβλέσκο.
3 Ατζέ-ντα ι Τιτός, σο ισινέ μάντζαρ, καέκ να αναγκαντάς-λες τι κερέλ περιτομή, παρόλο σο ισί Μπαλαμό.
4 Ανταβά πρόβλημας αβιλό ιτιρί κατά ψεύτικα πφραλά σο τσσουντέ-πες αντρέ κι κχανγκιρί για τι ντικχέν σο κεράσα. Μανγκένας τι κερέν ζιάνι κι ελευθερία σο τθεράσα σαρ μαθητές ι Χριστόσκε, ι Ιησούσκε, για τι κερέν-αμέν τι αβάς δούλοι κο Νόμος.
5 Αμέν ούτε εκ φαρ* να κερντάμ παλάλ ντα να ντινάμ-λεν καν, για τι ατσσόν τουμέν κι αλήθεια σο ισί κο λατσσέ αμπέρια.
6 Αλλά ο πφραλά σο ντικχίντιβενας μπουτ σημαντικοί ντα οδηγίνενας ι κχανγκιρί να βακερντέ μάνγκε κάτι νεβό. Σο-ντα τι ισινέ βον να τθερέλα σημασία μάνγκε, σόσκε ο Ντεβέλ να κρίνελα ι τζενέν οντουλέσταρ σο ντικχίντιβελα αβριάλ.
7 Οντουλά πφραλά ντικχλέ ότι ντιντιλέ μάντε-ντα ο λατσσέ αμπέρια για τι βακεράβ-λεν κο τζενέ σο να κερντέ περιτομή, σαρ ντιντιλέ κο Πέτρος ο λατσσέ αμπέρια για τι βακερέλ-λεν κο τζενέ σο κερντέ περιτομή.
8 Οντουβά σο ντινάς κο Πέτρος ι ζορ τι αβέλ απόστολος κο τζενέ σο κερντέ περιτομή ντινάς μάντε-ντα ι ζορ τι αβάβ απόστολος κο τζενέ σο ισί γιαβερέ τθεμένταρ.
9 Ντα αγαντέ ότι ο Ντεβέλ σικαντάς μάνγκε μπαρό λατσσιπέ, οτθάρ-ντα ο Ιάκωβος, ο Κηφάς* ντα ο Ιωάννης σο ισί σαρ κολόνες ι κχανγκιριάκε, ντινέ κο Βαρνάβας ντα μάντε πουμαρό δεξίς βας για τι σικαβέν ότι κα κεράς γιεκ λέντζαρ ο έργος, ντα αντικάς αμέν τι τζας κο τζενέ σο ισί γιαβερέ τθεμένταρ ντα βον κο τζενέ σο κερντέ περιτομή.
10 Μανγκλέ αμένταρ σάντε τι τθεράς αμαρέ γκοντιάτε ι τσορορέν, ντα προσπαθιντόμ σαρέ μι γκίσαρ τι κεράβ-λες ανταβά.
11 Κάνα ο Κηφάς* αβιλό κι Αντιόχεια, κερντόμ λέσαρ λάφι ξεκάθαρα, σόσκε οντουβά σο κερντάς ισινέ σίγουρα λάθος.
12 Πριν τι αβέν μερικά μουρσά κατά Ιάκωβος, χάλας γιεκ τζενέντζαρ σο ισινέ γιαβερέ τθεμένταρ. Αλλά κάνα αβιλέ βον, τσσιναντάς τι κερέλ-λες ανταβά ντα να κερέλας λέντζαρ παρέα, σόσκε νταρέλας οντουλένταρ σο κερντέ περιτομή.
13 Ο γιαβερά-ντα Ιουδαίοι κερντέ γιεκ λέσαρ ανταβά μπέτι πράγμας.* Ατζέ-ντα ο Βαρνάβας επηρεασάλο λένταρ ντα κερντάς-λες βοβ-ντα ανταβά.
14 Αλλά κάνα με ντικχλόμ ότι οντουλά σο κερένας να ισινέ αντικάς σαρ βακερέλα η αλήθεια σο ισί κο λατσσέ αμπέρια, βακερντόμ κο Κηφάς* ανγκλάλ σαριλέντε: «Τούι, παρόλο σο ισινάν Ιουδαίος, να τζουβντιόσα σαρ ο Ιουδαίοι αλλά σαρ ο τζενέ σο ισί γιαβερέ τθεμένταρ. Αφού τούι κερέσα-λες ανταβά, σαρ αβέλα-πες τι τσσουβές ι τζενέν σο ισί γιαβερέ τθεμένταρ τι κερέν οντουλά σο ισί σικλέ τι κερέν ο Ιουδαίοι;»
15 Αμέν σο ισινάμ Ιουδαίοι, ντα όχι αμαρτωλοί σαρ ο τζενέ σο ισί γιαβερέ τθεμένταρ,
16 τζανάσα ότι εκ τζενό να βακέρντιβελα δίκαιος κατά Ντεβέλ επειδή κερέλα σο βακερέλα ο Νόμος, αλλά σάντε επειδή τθερέλα πίστη κο Ιησούς Χριστός. Πακιαντάμ κο Χριστός Ιησούς για τι βακέρντιβας δίκαιοι επειδή τθεράσα πίστη κο Χριστός ντα όχι επειδή κεράσα σο βακερέλα ο Νόμος, σόσκε καέκ να κα βακέρντιβελ δίκαιος κατά Ντεβέλ επειδή κερέλα σο βακερέλα ο Νόμος.
17 Άμα κο γιακχά κι τζενένγκε ντικχίντιβασα αμαρτωλοί επειδή μανγκάσα τι βακέρντιβας δίκαιοι αντράλ κατά Χριστός, ανταβά να μανγκέλα τι βακερέλ ότι ο Χριστός τσσουβέλα-αμέν τι αμαρτίνας.
18 Άμα χτίναβα πάλι οντουλά σο περαντόμας, σικαβάβα ότι να ντάβα καν κο Νόμος.
19 Επειδή αντράλ κατά Νόμος, ελευθερωσάλομ κατά* Νόμος για τι τζουβντιάβ ι Ντεβλέσκε.
20 Ιμπλάντιλομ κο κας γιεκ ι Χριστόσαρ. Τσσιναντόμ τι τζουβντιάβ μάνγκε, αλλά τζουβντιάβα αντικάς σαρ μανγκέλα ο Χριστός.* Ακανά τζουβντιάβα ντα σικαβάβα πίστη κο Τσσαβό κι Ντεβλέσκο, σο μανγκλάς-μαν ντα ντινάς πι ζωή μάνγκε.
21 Να κεράβα πέρα ο μπαρό λατσσιπέ ι Ντεβλέσκο, σόσκε άμα η δικαιοσύνη αβέλα αντράλ κατά Νόμος, ο Χριστός σινανέ μουλό.
Υποσημειώσεις
^ Κι Πουρανί Μπαλαμανί βακέρντιβελας «εκ σαάτι».
^ Βακέρντιβελας Πέτρος-ντα.
^ Βακέρντιβελας Πέτρος-ντα.
^ Γιαβέρσοϊ «Ο γιαβερά-ντα Ιουδαίοι αβιλέ γιεκ λέσαρ σαρ οντουλά σο ισί ντουέ μουένγκε».
^ Βακέρντιβελας Πέτρος-ντα.
^ Γιαβέρσοϊ «μουλόμ κο πράγματα σο τθερένα τι κερέν με το».
^ Κι Πουρανί Μπαλαμανί βακέρντιβελας «Να τζουβντιάβα (ακανά) με, αλλά ο Χριστός τζουβντιόλα αντρέ μάντε».
