Ο Γράμμας σο Μπουτσσάντιλο κο Γαλάτες 3:1-29
-
Οντουλά σο βακερέλα ο Νόμος τι κεράς ντα η πίστη (1-14)
-
Ο δίκαιος κα τζουβντιόλ σόσκε τθερέλα πίστη (11)
-
-
Ο Ντεβέλ να ντινάς πο λάφι κο Αβραάμ αντράλ κατά Νόμος (15-18)
-
Ο προσάγγονος ι Αβρααμίσκο ισί ο Χριστός (16)
-
-
Κατάρ αβιλό ο Νόμος ντα σόσκε (19-25)
-
Τσσαβέ ι Ντεβλέσκε σόσκε τθερένα πίστη (26-29)
-
Ο προσάγγονα ι Αβρααμίσκε ισί οντουλά σο ισί ι Χριστόσκε (29)
-
3 Γαλάτες, να τθερένα γκοντί! Κον ισί οντουβά σο χουχαντάς-τουμέν, παρόλο σο σικλιαρντάμ-τουμέν ντιπ λατσσές ότι ο Ιησούς Χριστός ιμπλάντιλο κο κας;
2 Σάντε ακαβά μανγκάβα τι σικλιάβ τουμένταρ: Λιντέν ο άγιος πνεύμας επειδή κερντέν σο βακερέλα ο Νόμος ή επειδή πακιαντέν οντουλά σο ασουντέν;
3 Να τθερένα ιτς γκοντί; Αφού κι αρχή οδηγίντιβενας κατά άγιος πνεύμας, σαρ αβέλα-πες ακανά τι οδηγίντιβεν κατά τζενένγκε σκέψεις;
4 Σινανέ τσσιντιντέν αζόμ μπουτ πράγματα; Ισινόμ σίγουρος ότι να τσσιντιντέν-λεν σινανέ.
5 Μήπως ο τζενό σο πουτρέλα τουμένγκε ο ντρομ για τι λεν ο άγιος πνεύμας ντα κερέλα θαύματα τουμέντε, κερέλα-λες ανταβά επειδή κερένα σο βακερέλα ο Νόμος ή επειδή πακιαντέν οντουλά σο ασουντέν;
6 Ισί σαρ ο Αβραάμ σο «σικαντάς πίστη κο Ιεχωβά,* ντα βακέρντιλο δίκαιος».
7 Τουμέν σίγουρα τζανένα ότι οντουλά σο τθερένα πίστη ισί τσσαβέ ι Αβρααμίσκε.
8 Ο Ντεβέλ σικαντάας αντρέ κι Αγία Γραφή ότι ο τζενέ σο ισί γιαβερέ τθεμένταρ κα βακέρντιβενας δίκαιοι αντράλ κατά πίστη. Ντα μουτθαντάς πο τζανγκλέ ακαλά λατσσέ αμπέρια κο Αβραάμ: «Αντράλ τούταρ κα ευλογίντιβεν σαρέ ο τθεμά».
9 Άρα, οντουλά σο τθερένα πίστη ευλογίντιβενα γιεκ ι Αβρααμίσαρ σο τθερέλας πίστη.
10 Σαρέ οντουλά σο ντένα μπέσα κο Νόμος τθερένα αρμάν οπρά-πουμέντε, σόσκε ισί γραμμέ: «Αρμάν τθερέλα οπρά-πέστε ο τζενό σο να κερέλα συνέχεια σαρέ οντουλά σο ισί γραμμέ κο βιβλίος* κι Νομόσκο».
11 Ντα ντικχίντιβελα ντιπ λατσσές ότι ο Νόμος να κερέλα καεκχές τι βακέρντιβελ δίκαιος κατά Ντεβέλ, επειδή ισί γραμμέ ότι «ο δίκαιος κα τζουβντιόλ σόσκε τθερέλα πίστη».
12 Ο Νόμος να βασίντιβελα κι πίστη. Αλλά «κον κερέλα ανταλά πράγματα κα τζουβντιόλ αντράλ ανταλένταρ».
13 Ο Χριστός κιντάς-αμέν ντα αντικάς ελευθερωντάς-αμέν κατά αρμάν ι Νομόσκι. Λιντάς βοβ ι αρμάν οπρά-πέστε αντίς τι λας-λα αμέν, σόσκε ισί γραμμέ: «Αρμάν τθερέλα οπρά-πέστε κάθε τζενό σο ιμπλάντιβελα οπράλ καστέστε».
14 Ανταβά αβιλό-πες για τι αβέλ η ευλογία ι Αβρααμίσκι οπράλ κο τθεμά αντράλ κατά Χριστός Ιησούς, ντα αντικάς τι λας ο άγιος πνεύμας σο ντινάς πο λάφι ο Ντεβέλ τι ντελ-αμέν επειδή τθεράσα πίστη.
15 Πφραλάλεν, κα βακεράβ τουμένγκε εκ παράδειγμας: Κάνα αβέλα-πες εκ συμφωνία, ατζέ-ντα τζενένταρ, καέκ ναστί χαλαβέλα-λα ούτε τσσουβέλα γιαβερά λάφια λάτε.
16 Ο Ντεβέλ ντινάς πο λάφι κο Αβραάμ ντα λέσκε προσαγγονίστε. Να βακερέλα «ντα τι προσαγγονίντε», σαρ τι κερέλας λάφι μπουτέ τζενένγκε. Αλλά βακερέλα «ντα τι προσαγγονίστε», σόσκε κερέλας λάφι εκχέ τζενέσκε, ι Χριστόσκε.
17 Βακεράβα ακαβά-ντα: Ο Νόμος, σο αβιλό 430 μπρεσά σοράν, να χαλαβέλα ι συμφωνία σο κερντάας ο Ντεβέλ πο τζανγκλέ ούτε κερέλα-λα μα τι νικιόλ μπαγιά.
18 Άμα η κληρονομιά κα αβέλας αντράλ κατά Νόμος, να κα αβέλας επειδή ο Ντεβέλ ντινάς πο λάφι. Αλλά ο Ντεβέλ ντινάς λατσσιμάσαρ ι κληρονομιά κο Αβραάμ επειδή ντινάας πο λάφι λέστε.
19 Άρα, σόσκε ντιντιλό ο Νόμος; Ντιντιλό σοράν για τι κερέλ ο αμαρτίες τι ντικχίντιβεν, μέχρι τι αβέλ ο προσάγγονος σο λέστε ντινάας πο λάφι ο Ντεβέλ. Ο Νόμος ντιντιλό κατά άγγελοι κο βαστά οντουλέσκε σο βοηθίνελας κι συμφωνία.*
20 Κάνα εκ συμφωνία αβέλα-πες σάντε εκχέσταρ, να χρειαζίντιβελα τι αβέλ οντουβά σο βοηθίνελα κι συμφωνία. Αντικάς ισί ι Ντεβλέσαρ-ντα. Σάντε βοβ ντινάς πο λάφι.
21 Άρα, τζάλα κόντρα ο Νόμος κο λάφι σο ντινάς ο Ντεβέλ; Σίγουρα όχι! Άμα ο τζενέ λιντέας εκ νόμος σο κα μπορίνελας τι ντελ ζωή, κα βακέρντιβενας δίκαιοι αντράλ κατά νόμος.
22 Αλλά η Γραφή κερντάς σαρέ ι τζενέν τι αβέν πφαντέ κι αμαρτία, ντα αντικάς οντουλά σο σικαβένα πίστη κο Ιησούς Χριστός τι λεν ι ευλογία σο ντινάς πο λάφι ο Ντεβέλ.
23 Όμως, πριν τι αβέλ η πίστη, αμέν ισινάμας αρακχαντέ τελάλ κατά Νόμος καζόμ ισινάμας πφαντέ λέστε ντα μπεσάας τι αβέλ η πίστη σο κα σικάντιβελας.
24 Ο Νόμος γκερντάς-αμέν* κο Χριστός για τι βακέρντιβας δίκαιοι αντράλ κατά πίστη.
25 Αλλά ακανά σο αβιλί η πίστη, να χρειαζίντιβασα ο Νόμος για τι οδηγίνελ-αμέν.
26 Σαρέ τουμέν ισινέν τσσαβέ ι Ντεβλέσκε σόσκε τθερένα πίστη κο Χριστός Ιησούς.
27 Επειδή σαρέ τουμέν σο μπολντιλέν κο Χριστός μοιάζενα κο Χριστός.*
28 Να τθερέλα σημασία άμα ισινέν Ιουδαίοι ή Μπαλαμέ, δούλοι ή ελεύθεροι, μουρσά ή τζουβλιά, σόσκε σαρέ τουμέν σαρ μαθητές ι Χριστόσκε, ι Ιησούσκε, ισινέν εκ.
29 Ντα άμα ισινέν ι Χριστόσκε, ισινέν μπαγιά προσάγγονα ι Αβρααμίσκε ντα κα λεν ι κληρονομιά σο ντινάς πο λάφι ο Ντεβέλ.
Υποσημειώσεις
^ Κι Πουρανί Μπαλαμανί ισινέ ο λάφι «μεσίτης». Ισί οντουβά σο βοηθίνελα τι συμφωνίνεν ο ντούι μπάντες.
^ Κι Πουρανί Μπαλαμανί ισινέ ο λάφι «παιδαγωγός». Ισινέ οντουβά σο αρακχαβέλας ι χουρντέ τσσαβέν.
^ Κι Πουρανί Μπαλαμανί βακέρντιβελας «ιριντέν ι Χριστός».