Ο Γράμμας σο Μπουτσσάντιλο κο Γαλάτες 4:1-31
4 Βακεράβα ότι, άμα οντουβά σο κα λελ ι κληρονομιά ισί ατζέ χουρντό τσσαβό, νανέ πο οπρέ εκχέ δουλόσταρ, παρόλο σο ισί λέσκε σαρέ ο πράγματα.
2 Αλλά ισί τελάλ τζενένταρ σο κερένα κουμάντος λες ντα λέσκο κχερ μέχρι κο ντιβές σο τραμπιντάς λέσκο ντατ.
3 Αντικάς αμέν-ντα, κάνα ισινάμας χουρντέ, ισινάμας δούλοι σόσκε ντικχάας ο πράγματα σαρ ντικχέλα-λεν ο ντουνιάς.
4 Αλλά κάνα ερεσλό ο βακίτι σο τραμπιντάς ο Ντεβέλ, βοβ μπουτσσαντάς πι Τσσαβές, σο μπιάντιλο τζουβλιάταρ ντα ισινέ τελάλ κατά Νόμος,
5 για τι κινέλ οντουλέν σο ισινέ τελάλ κατά Νόμος, ντα αντικάς τι ελευθερώνελ-λεν. Ανταβά κερέλα-αμέν τι αβάς λέσκε τσσαβέ.*
6 Επειδή ισινέν τσσαβέ ι Ντεβλέσκε, ο Ντεβέλ τσσουντάς αμαρέ γκίστε ο άγιος πνεύμας σο ντινάς πι Τσσαβέστε, ντα ανταβά πνεύμας ντέλα βίκος: «Αββά,* Ντάντε!»
7 Άρα, ακανά να ισινέν δούλοι, αλλά τσσαβέ ι Ντεβλέσκε. Ντα άμα ισινέν τσσαβέ ι Ντεβλέσκε, βοβ κα ντελ-τουμέν κληρονομιά-ντα.
8 Όμως, κάνα να τζανένας ι Ντεβλές, ισινένας δούλοι ι ψεύτικε ντεβλένγκε.
9 Αλλά ακανά τζανένα ι Ντεβλές, ή κα μπορίνενας τι βακερέν, ακανά τζανέλα-τουμέν ο Ντεβέλ. Σαρ αβέλα-πες τι βουρτίνεν παλάλ ντα τι μανγκέν τι υπηρετίνεν πάλι σαρ δούλοι ο άχρηστα πράγματα ι ντουνιάσκε;
10 Ισί σημαντικά τουμένγκε μερικά ντιβεσά, μασεκά, βακίτια ντα μπρεσά, οτθάρ-ντα γιορτάνενα-λεν.
11 Νταράβα μα τι γκιλέ χαμέ σαρέ οντουλά σο κερντόμ για τι βοηθίναβ-τουμέν.
12 Πφραλάλεν, μολίναβα-τουμέν τι αβέν σαρ ισινόμ με, επειδή με-ντα ισινόμας σαρ ισινέν τουμέν. Να αδικιντέν-μαν καεκχέ πραγμάστε.
13 Σαρ τζανένα, τθεράβας πρώτη φαρ ι ευκαιρία τι μουτθαβάβ τουμένγκε ο λατσσέ αμπέρια επειδή ισινόμας νασφαλό.*
14 Ντα παρόλο σο αντάς τουμένγκε προβλήματα μο νασφαλιπέ, να κερντέν-μαν πέρα ούτε τζουνγκασάλεν μάνταρ,* αλλά δεχτιντέν-μαν σαρ τι ισινόμας άγγελος ι Ντεβλέσκο ή ο Χριστός Ιησούς.
15 Κάι ισί οντιά ευτυχία σο τθερένας; Ισινόμ σίγουρος ότι, άμα αβέλας-πες, κα νικαβένας ντα κα ντένας-μαν τουμαρέ γιακχά.
16 Μήπως αβιλόμ τουμαρό ντουσμάνι* επειδή βακεράβα τουμένγκε ι αλήθεια;
17 Βον κερένα σο νακχέλα λένγκε βαστένταρ για τι τσσίντεν λένταρ τουμέν, αλλά να μανγκένα τουμαρό λατσσιπέ. Μανγκένα τι λεν-τουμέν ντουρ μάνταρ για τι αβέν λέντζαρ.
18 Όμως, ισί λατσσό τι πφαμπόλ τουμένγκε εκ τζενό ντα τι μανγκέλ τουμαρό λατσσιπέ, όχι σάντε κάνα ισινόμ με οτθέ τουμέντζαρ, αλλά πάντα.
19 Μο τσσαβορέ, ιτιρί τουμένταρ, τθεράβα πάλι ντουκχ σαρ ι ντουκχ εκχέ τζουβλιάκι σο μπιανέλα. Ανταγιά ντουκχ να κα νασέλ μάνταρ μέχρι τι τθερέν ο χαρακτήρας ι Χριστόσκο.
20 Ανταγιά στιγμή κα μανγκάβας τι αβάβ τουμέντζαρ ντα τι κεράβ λάφι γιαβερέ τροπόσαρ, επειδή να τζανάβα σο τι κεράβ τουμέντζαρ.
21 Βακερέν μάνγκε, τουμέν σο μανγκένα τι αβέν τελάλ κατά Νόμος: Να ασουνένα ο Νόμος;
22 Για παράδειγμας, ισί γραμμέ ότι ο Αβραάμ τθερέλας ντουέ τσσαβέν, εκχές κατά υπηρέτρια ντα εκχές πι ρομνιάταρ σο να ισινέ υπηρέτρια.
23 Αλλά οντουβά σο ισινέ κατά υπηρέτρια μπιάντιλο κανονικά, ντα ο γιαβέρ, σο ισινέ λέσκε ρομνιάταρ, μπιάντιλο αντράλ κατά λάφι σο ντινάς ο Ντεβέλ.
24 Ανταλά πράγματα σικαβένα κάτι γιαβέρ, σόσκε ανταλά τζουβλιά μανγκένα τι βακερέν ντούι συμφωνίες. Η εκ τανί ανταλένταρ αβιλί-πες κο βες Σινά ντα σαρέ οντουλά σο ισί τελάλ ανταλέ συμφωνιάταρ ισί δούλοι. Ανταγιά συμφωνία ισί σαρ η Άγαρ.
25 Η Άγαρ μανγκέλα τι βακερέλ ο Σινά, σο ισί εκ βες κι Αραβία. Βόι ισί σαρ η Ιερουσαλήμ-ντα αντιβές, σόσκε η Ιερουσαλήμ ντα σαρέ οντουλά σο τζουβντιόνα οτθέ* ισί δούλοι.
26 Αλλά η Ιερουσαλήμ σο ισί οπρέ ισί σαρ αμαρί ντάι ντα νανέ δούλη.
27 Ισί γραμμέ: «Τι χαιρίνες μπουτ, τζουβλίε σο ναστί κερέσα τσσαβέν. Τι ντες βίκος κατά χαρά, παρόλο σο να τθερέας ποτές ντουκχά μπιανιμάσκε. Επειδή η τζουβέλ σο ισί κορκορί τθερέλα πο μπουτ τσσαβέν κατά τζουβέλ σο τθερέλα ρομές».
28 Τουμέν, πφραλάλεν, ισινέν τσσαβέ ι Ντεβλέσκε αντράλ κατά λάφι σο ντινάς ο Ντεβέλ, σαρ ισινέ ο Ισαάκ-ντα.
29 Αζομάν, οντουβά σο μπιάντιλο κανονικά τζάλας κόντρα οντουλέσαρ σο μπιάντιλο κατά άγιος πνεύμας, ο ίδιος αβέλα-πες ακανά-ντα.
30 Όμως, σο βακερέλα η Γραφή; «Πάλντε ι υπηρετριά ντα λάκε τσσαβές, σόσκε λάκο τσσαβό να κα λελ κληρονομιά γιεκ ι τσσαβέσαρ σο τθερέλα η τζουβέλ σο νανέ υπηρέτρια».
31 Άρα, πφραλάλεν, αμέν να ισινάμ τσσαβέ εκχέ υπηρετριάκε, αλλά ισινάμ τσσαβέ ι τζουβλιάκε σο νανέ υπηρέτρια.
Υποσημειώσεις
^ Γιαβέρσοϊ «λέσκε υιοθετιμέ τσσαβέ».
^ Εβραϊκός ή αραμαϊκός λάφι σο μανγκέλα τι βακερέλ «Ντάντε!»
^ Γιαβέρσοϊ «πασλό, αμπορεμέ».
^ Γιαβέρσοϊ «ούτε τσσουνγκιαρντέν-μαν».
^ Γιαβέρσοϊ «εχθρός».
^ Κι Πουρανί Μπαλαμανί βακέρντιβελας «(ντα) λάκε τσσαβέ».
