Ο Γράμμας σο Μπουτσσάντιλο κο Γαλάτες 6:1-18
6 Πφραλάλεν, ατζέ-ντα άμα εκ τζενό λιντάς εκ λάθος ντρομ χωρίς τι αγαβέλ-λες, κον τουμένταρ ισί πνευματικός τζενό* τι κερέλ ο πο λατσσό για τι διορθώνελ-λες κοβλέ γκίσαρ. Όμως, τθερέν τουμαρί γκοντί για μα τι περέν τουμέν-ντα κο πειρασμός.
2 Τι βοηθίνεν ο εκ ι γιαβερές κο δυσκολίες,* ντα αντικάς κα κερέν ο νόμος ι Χριστόσκο.
3 Άμα εκ τζενό πακιάλα ότι ισί σημαντικός ενώ νανέ, χουχαβέλα πο νεαυτός.
4 Αλλά ο κάθε εκ τι εξετάνελ σο κερέλα βοβ, ντα αντικάς κα τθερέλ λόγος τι χαιρίνελ σάντε οντουλένγκε σο κερέλα βοβ χωρίς τι συγκρίνελ-πες ι γιαβερέντζαρ.
5 Επειδή ο κάθε εκ κα τθερέλ πιρί ευθύνη.*
6 Ντα οντουβά σο σικλιόλα ο λάφι ι Ντεβλέσκο τι ντελ σαρέ πι λατσσέ πραγματένταρ οντουλέστε σο σικλιαρέλα.
7 Μα χουχάντιβεν: καέκ ναστί χουχαβέλα ι Ντεβλές. Σο σπειρίνελα ο τζενό, οντουβά κα γκίντελ,
8 σόσκε οντουβά σο σπειρίνελα ο μπέτι πράγματα σο μανγκέλα λέσκο σώμας κα γκίντελ μεριπέ πι σωμάσταρ. Αλλά οντουβά σο σπειρίνελα ο πράγματα σο μανγκέλα ο πνεύμας ι Ντεβλέσκο κα γκίντελ ζωή για πάντα κατά πνεύμας ι Ντεβλέσκο.
9 Οτθάρ, μα τι τσσιναβάς τι κεράς λατσσέ πράγματα, σόσκε άμα να κα τσσιναβάς,* κα γκίντας κο σωστός βακίτι.
10 Άρα, καζόμ ισί αμαρέ βαστέστε,* τι κεράς λατσσέ πράγματα σαριλένγκε αλλά πο μπουτ οντουλένγκε σο τθεράσα ι ίδια πίστη λέντζαρ.*
11 Ντικχέν καζόμ μπαρέ γραμματέντζαρ γραφιντόμ τουμένγκε ανταβά γράμμας μι βαστέσαρ.
12 Σαρέ οντουλά σο μανγκένα τι ντεν λατσσί εντύπωση κο γιαβερά ισί οντουλά σο αναγκάνενα-τουμέν τι κερέν περιτομή. Κερένα-λες ανταβά σάντε για μα τι τζαν λέντζαρ κόντρα ο γιαβερά σαρ τζάνα κόντρα οντουλέντζαρ σο μουτθαβένα ότι ο Χριστός μουλό οπράλ κι ντουκχένγκο κας.*
13 Οντουλά-ντα σο κερένα περιτομή να κερένα ο Νόμος, αλλά μανγκένα τι κερέν περιτομή τουμέν για τι ισαρέν-πες σο αναγκαντέ-τουμέν τι κερέν-λες ανταβά.
14 Με όμως ποτές να κα ισαράβας-μαν καεκχέ πραγμάσκε, αλλά σάντε αμαρέ Κυριόσκε, ι Ιησού Χριστόσκε, σο μουλό οπράλ κι ντουκχένγκο κας.* Μι γιακχίντε, αντράλ λέσκε μεριμάσταρ ο ντουνιάς μουλό* ντα με μουλόμ κο γιακχά κι ντουνιάσκε.
15 Οντουβά σο τθερέλα αξία νανέ άμα εκ τζενό κερντάς ή να κερντάς περιτομή, αλλά ότι λατσσάρντιλο κατά Ντεβέλ.*
16 Σαρέ οντουλά σο πφιρένα σωστά σαρ βακερέλα ανταβά κανόνας τι τθερέν ειρήνη, ντα ο Ντεβέλ τι τζιτζίνελ* λένγκε. Βον ισί ο Ισραήλ ι Ντεβλέσκο.
17 Από ακανά, καέκ μα τι ανέλ μάνγκε προβλήματα, σόσκε τθεράβα μι σωμάστε ο σημάδια σο τθερέλα εκ δούλος ι Ιησούσκο.
18 Πφραλάλεν, ο μπαρό λατσσιπέ αμαρέ Κυριόσκο, ι Ιησού Χριστόσκο, τι αβέλ αντρέ τουμαρέ γκίστε.* Αμήν.
Υποσημειώσεις
^ Γιαβέρσοϊ «κον τουμένταρ οδηγίντιβελα κατά πνεύμας ι Ντεβλέσκο».
^ Κι Πουρανί Μπαλαμανί βακέρντιβελας «Τι βάντεν ο πφαριπέ ο εκ ι γιαβερέσκο».
^ Κι Πουρανί Μπαλαμανί βακέρντιβελας «κα βάντελ πιρό φορτίος».
^ Γιαβέρσοϊ «άμα να κα παρατίνας-λεν».
^ Κι Πουρανί Μπαλαμανί βακέρντιβελας «καζόμ τθεράσα βακίτι».
^ Γιαβέρσοϊ «σο ισινάμ λέντζαρ τζενέ κι πίστη».
^ Γιαβέρσοϊ «ιμπλάντιλο κο κας».
^ Κι Πουρανί Μπαλαμανί βακέρντιβελας «αλλά (ότι ισί) νεβί δημιουργία».
^ Κι Πουρανί Μπαλαμανί βακέρντιβελας «(τι αβέλ) γιεκ τουμαρέ πνευμάσαρ».
