Ο Γράμμας σο Μπουτσσάντιλο κο Εφέσιοι 1:1-23
1 Ανταβά γράμμας μπουτσσάντιβελα μάνταρ κατά Παύλος, σο ισινόμ απόστολος ι Χριστόσκο, ι Ιησούσκο, αντικάς σαρ μανγκέλα ο Ντεβέλ. Ανταβά γράμμας ισί ι αγιόνγκε κι Έφεσος σο ισί πιστοί μαθητές ι Χριστόσκε, ι Ιησούσκε:
2 Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.
3 Δοξασμέ τι αβέλ ο Ντεβέλ σο ισί ο Ντατ αμαρέ Κυριόσκο, ι Ιησού Χριστόσκο, σόσκε σαρ μαθητές ι Χριστόσκε ντινάς-αμέν κο ουρανός κάθε ευλογία σο αβέλα κατά άγιος πνεύμας.
4 Βοβ τραμπιντάς-αμέν για τι αβάς ενωμέ ι Χριστόσαρ πριν τι μπιάντιβεν τζενέ κι πφουβ, ντα αντικάς τι σικαβάς αγάπη ντα τι αβάς άγιοι ντα ντιπ σωστοί λέσκε γιακχίντε.
5 Τραμπιντάς-αμέν πο ανγκλέ για τι κερέλ-αμέν πο τσσαβέ* αντράλ κατά Ιησούς Χριστός, αντικάς σαρ μπεϊντίνελα* ντα μανγκέλα.
6 Ανταβά αβέλα-πες για τι δοξάνεν ο τζενέ ι Ντεβλές σο σικαντάς αμένγκε μπαρό λατσσιπέ αντράλ πι αγαπημέ Τσσαβέσταρ.
7 Λέσκο Τσσαβό ντινάς πι ζωή σαρ λύτρος, ντα αντικάς ελευθερώντιβασα αντράλ λέσκε ρατέσταρ. Βα, αμαρέ αμαρτίες συγχωρίντιβενα, σόσκε ο Ντεβέλ σικαβέλα αμένγκε μπουτ μπαρό λατσσιπέ.
8 Ο Ντεβέλ πφερντάς-αμέν ανταλέ μπαρέ λατσσιμάσαρ, κερντάς-αμέν τι αβάς γκοντιαβέρ σαρέ κο πράγματα ντα τι αγαβάς ντιπ λατσσές σαρέ ο πράγματα
9 ντα μουτθαντάς αμένγκε ο γκεραντό πράγμας* σο τθερέλα τι κερέλ λέσκε σκοπόσαρ. Ανταβά γκεραντό πράγμας συμφωνίνελα οντουλέσαρ σο μπεϊντίνελα ντα τθερέλα πι γκοντιάτε τι κερέλ.
10 Τθερέλα πι γκοντιάτε εκ τρόπος για τι τσσουβέλ ο πράγματα εκχέ σειράτε, ντα ανταβά κα αβέλ-πες κο τέλος κι βακιτίσκο σο τραμπιντάς. Αντικάς κα γκίντελ σαρέ ο πράγματα γιεκ για τι αβέν ενωμέ ι Χριστόσαρ, ανταλά σο ισί κο ουρανός ντα ανταλά σο ισί κι πφουβ.
11 Ισινάμ ενωμέ ντα τραμπιμέ για τι λας ι κληρονομιά γιεκ λέσαρ, σόσκε τραμπίντιλαμ πο τζανγκλέ αντικάς σαρ τθερέλας πι γκοντιάτε ο Ντεβέλ σο κερέλα σαρέ ο πράγματα αντικάς σαρ αποφασίνελα ντα μανγκέλα.
12 Αντικάς, αντράλ αμένταρ σο πακιαντάμ* πρώτοι κο Χριστός ντιντιόλα ισαριπέ ντα δόξα κο Ντεβέλ.
13 Αλλά τουμέν-ντα πακιαντέν* λέστε αφού πρώτα ασουντέν ι αλήθεια, ο λατσσέ αμπέρια ότι ο Ντεβέλ σώνελα-τουμέν. Αφού πρώτα πακιαντέν, ο Ντεβέλ αντράλ κατά Χριστός τσσουντάς πι σφραγίδα οπρά-τουμέντε ι άγιε πνευμάσαρ σο ντινάς πο λάφι τι ντελ.
14 Ο άγιος πνεύμας σικαβέλα αμένγκε ότι σίγουρα κα λας οντουβά* σο ντινάς πο λάφι ο Ντεβέλ τι ντελ-αμέν. Ανταβά κερντάς-λες ο Ντεβέλ για τι ντελ ο λύτρος ντα τι ελευθερώνελ πι λαός, ντα αντικάς κα λελ ισαριπέ ντα δόξα.
15 Οτθάρ με-ντα, από αζομάν σο ασουντόμ ότι τθερένα πίστη κο Κύριος Ιησούς ντα ότι σικαβένα αγάπη σαρέ ι αγιόνγκε,
16 να τσσιναβάβα τι βακεράβ ευχαριστώ κο Ντεβέλ τουμένγκε. Τσσουβάβα-τουμέν συνέχεια μι προσευχιέντε,
17 για τι ντελ-τουμέν ο Ντεβέλ αμαρέ Κυριόσκο, ι Ιησού Χριστόσκο, ο δοξασμέ Ντατ, ζορ σο κα κερέλ-τουμέν τι αβέν γκοντιαβέρ ντα τι αγαβέν οντουλά σο σικαβέλα καζόμ σικλιόνα ντιπ λατσσές λέσκε.
18 Βοβ πουταρντάς τουμαρέ γιακχά* για τι σικλιόν καγιά ελπίδα ντέλα-τουμέν, καλά μπαρέ ευλογίες* βακερντάς ότι κα ντελ σαρ κληρονομιά κο άγιοι
19 ντα καζόμ μπαρί ισί η ζορ σο σικαντάς αμένγκε κο πιστοί. Ανταγιά μπαρί ζορ σικάντιλι
20 κάνα τζουβντιαρντάς ι Χριστός κατά μουλέ ντα τσσουντάς-λες τι μπεσέλ δεξιά πέσταρ κο ουρανός.
21 Βοβ ισί μπουτ πο οπρέ σαρέ κατά κυβερνήσεις, οντουλένταρ σο κερένα κουμάντος, οντουλένταρ σο τθερένα ζορ, οντουλένταρ σο ισί βασιλιάδες ντα οντουλένταρ σο τθερένα μπαρό ναβ, όχι σάντε ανταλέ ντουνιάστε,* αλλά οντουλέστε-ντα σο κα αβέλ.
22 Ο Ντεβέλ τσσουντάς σαρέ ο πράγματα τελάλ λέσκε πιντρένταρ ντα κερντάς-λες τι αβέλ σαρέ κο πράγματα σορό ι κχανγκιριάκο.
23 Η κχανγκιρί ισί λέσκο σώμας ντα ισί πφερντί σαρέ ι πραγματέντζαρ σο τθερένα τι κερέν λέσαρ. Βοβ κερέλα σαρέ ο πράγματα τι αβέν σαστέ.
Υποσημειώσεις
^ Γιαβέρσοϊ «για τι υιοθετίνελ-αμέν ντα τι αβάς λέσκε τσσαβέ».
^ Γιαβέρσοϊ «αρέζελα λέσκε».
^ Γιαβέρσοϊ «ο άγιος μυστικός».
^ Κι Πουρανί Μπαλαμανί βακέρντιβελας «σο τθεράας ελπίδα».
^ Γιαβέρσοϊ «τθερένας ελπίδα».
^ Κι Πουρανί Μπαλαμανί βακέρντιβελας «ι κληρονομιά».
^ Κι Πουρανί Μπαλαμανί βακέρντιβελας «τουμαρέ γκίσκε γιακχά».
^ Κι Πουρανί Μπαλαμανί ισινέ ο λάφι «χουλανιπέ».
