Ο Γράμμας σο Μπουτσσάντιλο κο Εφέσιοι 3:1-21
3 Οτθάρ με, ο Παύλος, ισινόμ κι φυλακή ι Χριστόσκε, ι Ιησούσκε, ντα τουμένγκε σο ισινέν γιαβερέ τθεμένταρ.
2 Σίγουρα, ασουντέν ότι ντιντιλί μάντε η ευθύνη τι βοηθίναβ-τουμέν τι λεν ο μπαρό λατσσιπέ ι Ντεβλέσκο.
3 Βα, ο Ντεβέλ μουτθαντάς μάνγκε ο γκεραντό πράγμας,* σαρ γραφιντόμ τουμένγκε πο τζανγκλέ χάνικ λαφίντζαρ.
4 Κάνα κα διαβάνεν-λεν ανταλά, κα μπορίνεν τι αγαβέν οντουλά σο τζανάβα ι γκεραντέ πραγμάσκε* σο τθερέλα τι κερέλ ι Χριστόσαρ.
5 Ανταβά γκεραντό πράγμας* να μουτθάντιλο κο τζενέ σο τζουβντιόνας ανγκλέ σαρ μουτθάντιλο ακανά αντράλ κατά άγιος πνεύμας λέσκε αποστολόνγκε ντα λέσκε προφητένγκε σο ισί άγιοι.
6 Ο γκεραντό πράγμας* ισί ακαβά: Ο τζενέ σο ισί γιαβερέ τθεμένταρ κα λεν ι κληρονομιά σο λέλα ο Χριστός Ιησούς σαρ μαθητές λέσκε ντα κα αβέν μέρη εκχέ σωμάσκε. Ντα κα λεν γιεκ αμέντζαρ ο πράγματα σο ντινάς-αμέν πο λάφι ο Ντεβέλ αντράλ κατά λατσσέ αμπέρια.
7 Χάρη κο μπαρό λατσσιπέ κι Ντεβλέσκο, αβιλόμ υπηρέτης σο βοηθίνελα-τουμέν τι αγαβέν ανταβά γκεραντό πράγμας.* Βοβ κερντάς μάνγκε ανταβά δώρος κάνα ντινάς-μαν πι ζορ.
8 Ο Ντεβέλ ντινάς μάντε, σο ισινόμ ο πο χουρντό σαρέ κατά άγιοι, ανταβά μπαρό λατσσιπέ για τι μουτθαβάβ κο τθεμά ο λατσσέ αμπέρια ότι κατά Χριστός αβένα αζόμ μπουτ ευλογίες* σο ναστί γκιντιόνα
9 ντα για τι κεράβ ι κάθε εκχές τι ντικχέλ καλέ τροπόσαρ σικαντάς ο Ντεβέλ, σο λατσσαρντάς-λεν σαρέ, ο γκεραντό πράγμας* σο να μουτθαβέλας-λες μπουτ βακίτι.
10 Ανταβά αβιλό-πες ακανά, ντα αντικάς οντουλά σο κερένα κουμάντος κο ουρανός τι σικλιόν, αντράλ κατά κχανγκιρί, ι σοφία ι Ντεβλέσκι σο σικάντιβελα μπουτέ τροπόντζαρ.
11 Ανταβά συμφωνίνελα λέσκε σκοπόσαρ σο ατσσόλα για πάντα ντα σο τθερέλα τι κερέλ ι Χριστόσαρ, ι Ιησούσαρ, σο ισί αμαρό Κύριος.
12 Αντράλ κατά πίστη σο τθεράσα κο Χριστός, κεράσα λάφι χωρίς τι νταράς ντα προσευχίντιβασα κο Ντεβέλ χωρίς τι τσσιναβέλ-αμέν τίποτα.
13 Οτθάρ, μανγκάβα τουμένταρ μα τι χασαρέν τουμαρί ζορ ιτιρί κατά στεναχώριες σο νακχάβα με τουμένγκε, σόσκε ανταλά στεναχώριες ανένα τουμένγκε δόξα.
14 Οντουλέσκε, περάβα τελέ κοτσίντζαρ για τι προσευχίντιβαβ κο Ντατ,
15 σο χάρη λέσταρ υπαρχίντιβελα* η κάθε φαμιλί σο ισί κο ουρανός ντα κι πφουβ.
16 Κο Ντεβέλ σο ισί μπαρό* προσευχίντιβαβα τι κερέλ-τουμέν τι αβέν ζουρανέ αντρέ τουμαρέ γκίστε, αντράλ κατά ζορ σο ντέλα λέσκο πνεύμας.
17 Ντα προσευχίντιβαβα τι μπεσέλ ο Χριστός τουμαρέ γκίστε μανγκιμάσαρ σόσκε τθερένα πίστη λέστε. Μακάρι τι αβέν σταθεροί κο θεμέλιος, σαρ εκ μπαρό δέντρος σο ισί λατσσές ριζωμέ.
18 Αντικάς, γιεκ σαρέ ι αγιόντζαρ τι μπορίνεν τι αγαβέν ντιπ λατσσές καζόμ μπουγλί ντα μπαρί ντα βουτσσί ντα αχόρτ ισί η αλήθεια
19 ντα τι σικλιόν ι αγάπη ι Χριστόσκι, σο ισί πο οπρέ οντουλένταρ σο τζανάσα, για τι πφερντιόν κάθε λατσσέ πραγμάσαρ σο ντέλα ο Ντεβέλ.*
20 Ο Ντεβέλ, σο λέσκι ζορ ισί αμέντζαρ, μπορίνελα μπαγιά τι κερέλ ατζέ πο μπουτ σαρέ οντουλένταρ σο μανγκάσα λέσταρ ή αγαβάσα.
21 Οτθάρ, λέστε τι αβέλ η δόξα αντράλ κατά κχανγκιρί ντα αντράλ κατά Χριστός Ιησούς σαρέ κο γενιές για πάντα. Αμήν.
Υποσημειώσεις
^ Γιαβέρσοϊ «ο άγιος μυστικός».
^ Γιαβέρσοϊ «ι άγιε μυστικόσκε».
^ Γιαβέρσοϊ «Ανταβά άγιος μυστικός».
^ Γιαβέρσοϊ «Ο άγιος μυστικός».
^ Γιαβέρσοϊ «ανταβά άγιος μυστικός».
^ Κι Πουρανί Μπαλαμανί ισινέ ο λάφι «χουλανιπέ».
^ Γιαβέρσοϊ «ο άγιος μυστικός».
^ Γιαβέρσοϊ «σο λέσταρ λιντάς πο ναβ».
^ Γιαβέρσοϊ «σο τθερέλα μπαρί δόξα».
^ Ντικχίντιβελα ότι μανγκέλα τι βακερέλ ο ιδιότητες ι Ντεβλέσκε.
