Ο Ευαγγέλιος σο Γραφιντάς ο Ιωάννης 10:1-42
10 «Μπαγιά, μπαγιά βακεράβα τουμένγκε: Οντουβά σο να τσσουβέλα-πες κι μαντρίν κι μπρακένγκι κατά πόρτα, αλλά νικλίλα ο ντουβάρι για τι τσσουβέλ-πες, ισί τσορ.*
2 Αλλά οντουβά σο τσσουβέλα-πες κατά πόρτα ισί ο τσομπάνης ι μπρακένγκο.
3 Λέσκε πουτρέλα ο τζενό σο ισί κι πόρτα, ντα ο μπρακέ ασουνένα λέσκο βίκος. Ντα ντέλα βίκος πιρέ μπρακέν λένγκε ναβέσαρ ντα νικαβέλα-λεν αβρί.
4 Κάνα νικαβέλα αβρί σαρέ πι μπρακέν, τζάλα ανγκλά-λένταρ ντα ο μπρακέ αβένα παλά-λέστε, σόσκε αγαβένα λέσκο βίκος.
5 Να κα τζαν παλάλ κο ξένος, αλλά κα νασέν λέσταρ, σόσκε να αγαβένα λέσκο βίκος».
6 Ο Ιησούς βακερντάς λένγκε ανταβά παράδειγμας,* αλλά βον να αγαβένας σο βακερέλας λένγκε.
7 Οτθάρ, ο Ιησούς βακερντάς πάλι: «Μπαγιά, μπαγιά βακεράβα τουμένγκε: Με ισινόμ η πόρτα ι μπρακένγκε.
8 Σαρέ οντουλά σο αβιλέ ντα κερντέ-πες ότι ισί σαρ μάντε ισί τσορά. Αλλά ο μπρακέ να ασουντέ-λεν.
9 Με ισινόμ η πόρτα. Κον κα τσσουβέλ-πες μάνταρ κα σώντιβελ, ντα κα τσσουβέλ-πες ντα κα νικιόλ ντα κα αρακχέλ τι χαλ.
10 Ο τσορ αβέλα σάντε για τι τσορέλ ντα τι τσσινέλ ντα τι καταστραφίνελ. Με αβιλόμ για τι τθερέν ζωή ο τζενέ ντα τι τθερέν-λα μπερεκέτι.
11 Με ισινόμ ο λατσσό τσομπάνης. Ο λατσσό τσομπάνης ντέλα πι ζωή* ι μπρακένγκε.
12 Ο τζενό σο ποκίντιβελα για τι κερέλ ι μπουτί ντα νανέ ο τσομπάνης ντα ο μπρακέ νανέ λέσκε, κάνα ντικχέλα τι αβέλ ο ρουβ* μουκχέλα ι μπρακέν ντα νασέλα. Ντα ο ρουβ καπτίνελα-λεν ντα τρουγίνελα-λεν.
13 Ο τζενό πι μπουτί κερέλα ντα να πφαμπόλα ι μπρακένγκε.
14 Με ισινόμ ο λατσσό τσομπάνης. Τζανάβα μι μπρακέν ντα μο μπρακέ τζανένα μαν,
15 σαρ ο Ντατ τζανέλα μαν ντα με τζανάβα ι Νταντές. Ντα ντάβα μι ζωή* ι μπρακένγκε.
16 »Γιαβερέ-ντα μπρακέν τθεράβα, σο νανέ ανταλέ μαντρινάταρ. Λεν-ντα πρέπει τι τσσουβάβ-λεν αντρέ, ντα κα ασουνέν μο βίκος ντα κα αβέν εκ κοπάδι, εκ τσομπάνης.
17 Οντουλέσκε μανγκέλα-μαν ο Ντατ, σόσκε ντάβα μι ζωή,* για τι λαβ-λα πάλι.
18 Καέκ να λέλα-λα μάνταρ, αλλά με ντάβα-λα από κορκορό. Τθεράβα ο δικαίωμας τι νταβ-λα ντα τθεράβα ο δικαίωμας τι λαβ-λα πάλι. Ανταγιά εντολή λιντόμ μι Νταντέσταρ».
19 Πάλι ο Ιουδαίοι βακερένας γιαβερά πράγματα ο εκ κατά γιαβέρ ιτιρί λέσκε λαφίνταρ.
20 Μπουτ τζενέ βακερένας: «Τθερέλα δαιμονάς ντα ισί ντινιλό. Σόσκε ασουνένα-λες;»
21 Γιαβερά βακερένας: «Ανταλά νανέ λάφια δαιμονισμέ τζενέσκε. Αβέλα-πες εκ δαίμονας τι πουτρέλ γιακχά κορορένγκε;»
22 Οντουβά βακίτι κερένας κι Ιερουσαλήμ ο Μπαρέ Ντιβεσά ι Ναόσκε. Ισινέ βεν,
23 ντα ο Ιησούς πφιρέλας κο ναός, κι Σολομωντάσκο διάδρομος ι κολονέντζαρ.
24 Αζομάν ο Ιουδαίοι γκιντισάλε ντονταλάι λέσταρ ντα βακερένας λέσκε: «Κάνα κα βακερές αμένγκε κον ισινάν; Άμα τούι ισινάν ο Χριστός, βάκερ-λες αμένγκε».
25 Ο Ιησούς βακερντάς λένγκε: «Βακερντόμ-λες τουμένγκε, αλλά να πακιάνα. Οντουλά σο κεράβα μι Νταντέσκε ναβέστε σικαβένα κο τζενέ κον ισινόμ.
26 Τουμέν όμως να πακιάνα, σόσκε να ισινέν μο μπρακέ.
27 Μο μπρακέ ασουνένα μο βίκος, ντα με τζανάβα-λεν ντα αβένα παλά-μάντε.
28 Ντάβα-λεν ζωή για πάντα ντα να κα καταστραφίντιβεν ποτές, ντα καέκ να κα καπτίνελ-λεν μι βαστέσταρ.
29 Οντουβά σο ντινάς-μαν μο Ντατ ισί πο μπαρό σαρέ κατά γιαβερά πράγματα, ντα καέκ ναστί καπτίνελα ι μπρακέν κατά βας ι Νταντέσκο.
30 Με ντα ο Ντατ ισινάμ εκ».*
31 Ο Ιουδαίοι λιντέ πάλι μπαρά για τι φουρτίνεν λέσκε.
32 Ο Ιησούς βακερντάς λένγκε: «Σικαντόμ τουμένγκε μπερεκέτι λατσσέ πράγματα κατά Ντατ. Καλέσκε ανταλένταρ φουρτίνενα μάνγκε μπαρά;»
33 Ο Ιουδαίοι βακερντέ λέσκε: «Να φουρτίνασα τούκε μπαρά εκχέ λατσσέ πραγμάσκε, αλλά επειδή τζάσα κόντρα κο Ντεβέλ τι λαφίντζαρ. Παρόλο σο ισινάν τζενό, κερέσα-τουτ ντεβέλ».
34 Ο Ιησούς βακερντάς λένγκε: «Νανέ γραμμέ κο Νόμος σο τθερένα τουμέν: “Με βακερντόμ: «Ισινέν σαρ ντεβέλ»”;
35 Ο Ντεβέλ βακερντάς οντουλένγκε σο κρίντιλε λέσκε λαφίσταρ “ισινέν σαρ ντεβέλ”, ντα οντουβά σο βακερέλα η Γραφή ναστί αλλάνελα.
36 Αλλά με ισινόμ σο αγιαντάς-μαν ο Ντατ ντα μπουτσσαντάς-μαν κο ντουνιάς. Άρα, σαρ αβέλα-πες τι βακερέν μάνγκε: “Τζάσα κόντρα κο Ντεβέλ τι λαφίντζαρ”, επειδή βακερντόμ: “Ισινόμ Τσσαβό ι Ντεβλέσκο”;
37 Άμα να κεράβα οντουλά σο κερέλα μο Ντατ, μα πακιάν-μαν.
38 Αλλά άμα κεράβα-λεν, ατζέ-ντα άμα να πακιάνα μαν, πακιάν οντουλά σο κεράβα, για τι σικλιόν ντα μα τι τσσιναβέν τι σικλιόν ότι ο Ντατ ισί ενωμέ μάντζαρ ντα με ενωμέ ι Νταντέσαρ».
39 Οτθάρ, γκιλέ πάλι τι ασταρέν-λες, αλλά νασλό λένγκε βαστένταρ.
40 Ντα γκιλό πάλι κι γιαβέρ μπάντα κατά Ιορδάνης, κο τθαν σο μπολέλας κι αρχή ο Ιωάννης, ντα μπεσλό οτθέ.
41 Ντα μπουτ τζενέ γκιλέ λέστε ντα βακερένας: «Ο Ιωάννης να κερντάς καέκ θαύμας, αλλά σαρέ λέσκε λάφια σο τθερένας τι κερέν ανταλέ τζενέσαρ ισινέ μπαγιά».
42 Ντα μπουτ τζενέ οτθέ πακιαντέ λέστε.
Υποσημειώσεις
^ Γιαβέρσοϊ «τσορνό».
^ Γιαβέρσοϊ «ανταγιά παραβολή».
^ Γιαβέρσοϊ «ψυχή».
^ Γιαβέρσοϊ «λύκος».
^ Γιαβέρσοϊ «ψυχή».
^ Γιαβέρσοϊ «ψυχή».
^ Γιαβέρσοϊ «ενωμέ».
