Ο Ευαγγέλιος σο Γραφιντάς ο Ιωάννης 15:1-27
15 »Με ισινόμ η αληθινή ρεζ ντα μο Ντατ ισί ο γεωργός.
2 Καβά κλαδίς μάντε να κερέλα καρπός τσσινέλα-λες, ντα καβά κλαδίς κερέλα καρπός κερέλα-λες πάκι για τι κερέλ πο μπουτ καρπός.
3 Τουμέν ακανά ισινέν πάκι αντράλ κατά λάφι σο βακερντόμ τουμένγκε.
4 Ατσσόν ενωμέ μάντζαρ ντα με κα ατσσάβ ενωμέ τουμέντζαρ. Σαρ ο κλαδίς ναστί κερέλα καρπός κορκορό άμα να κα ατσσόλ κι ρεζ, τουμέν-ντα ναστί κερένα άμα να κα ατσσόν ενωμέ μάντζαρ.
5 Με ισινόμ η ρεζ ντα τουμέν ισινέν ο κλαδιά. Κον ατσσόλα ενωμέ μάντζαρ ντα με ενωμέ λέσαρ, βοβ κερέλα μπουτ καρπός, σόσκε μπι μιρό τουμέν ναστί κερένα ούτε εκ πράγμας.
6 Άμα εκ τζενό να ατσσόλα ενωμέ μάντζαρ, φουρτίντιβελα αβρί σαρ κλαδίς ντα σουκιόλα. Ντα ανταλά κλαδιά γκίντενα-λεν ντα φουρτίνενα-λεν κι γιακ* ντα πφαμπόνα.
7 Άμα κα ατσσόν τουμέν ενωμέ μάντζαρ ντα μο λάφια κα ατσσόν τουμέντε, μανγκέν σο ντέλα τουμαρό γκι ντα κα αβέλ-πες τουμένγκε.
8 Μο Ντατ δοξάντιβελα κάνα κερένα μπουτ καρπός ντα σικαβένα ότι ισινέν μο μαθητές.
9 Σαρ μανγκλάς-μαν ο Ντατ, αντικάς μανγκλόμ-τουμέν με-ντα. Ατσσόν μι μανγκιμάστε.
10 Άμα κα κερέν μο εντολές, κα ατσσόν μι μανγκιμάστε, σαρ κερντόμ με ο εντολές ι Νταντέσκε ντα ατσσάβα λέσκε μανγκιμάστε.
11 »Βακερντόμ-λεν τουμένγκε ανταλά για τι αβέλ μι χαρά αντρέ τουμέντε ντα τι πφερντιόν χαρά.
12 Ακαγιά ισί μι εντολή, μανγκέν ο εκ ι γιαβερές αντικάς σαρ μανγκλόμ-τουμέν με.
13 Καέκ να τθερέλα πο μπαρί αγάπη ανταλάταρ, τι ντελ πι ζωή πι αμαλένγκε.*
14 Τουμέν ισινέν μο αμαλά άμα κερένα μο εντολές.
15 Από ακανά να βακεράβα ότι ισινέν δούλοι, σόσκε ο δούλος να τζανέλα σο κερέλα λέσκο κύριος. Αλλά βακεράβα ότι ισινέν μο αμαλά, σόσκε σαρέ οντουλά σο ασουντόμ μι Νταντέσταρ μουτθαντόμ-λεν τουμένγκε.
16 Να τραμπιντέν-μαν τουμέν, αλλά με τραμπιντόμ-τουμέν για τι τζαν ντα τι κερέν καρπός ντα τι ατσσόλ τουμαρό καρπός, ντα αντικάς σο-ντα τι μανγκέν κατά Ντατ μι ναβέστε τι ντελ-λες τουμέντε.
17 »Ανταλά βακεράβα-λεν τουμένγκε για τι μανγκέν ο εκ ι γιαβερές.
18 Άμα ο ντουνιάς μισίνελα-τουμέν, τι τζανέν ότι πο τζανγκλέ μισιντάς μαν.
19 Άμα ισινένας σαρ ο ντουνιάς, ο ντουνιάς κα μανγκέλας ανταβά σο ισί λέσκο. Αλλά επειδή να ισινέν σαρ ο ντουνιάς ντα με τραμπιντόμ-τουμέν κατά ντουνιάς, οτθάρ μισίνελα-τουμέν ο ντουνιάς.
20 Ντεν-τουμέν γκοντί οντουβά σο βακερντόμ τουμένγκε: Ο δούλος νανέ πο μπαρό πι κυριόσταρ. Άμα γκιλέ κόντρα μάντζαρ, τουμέντζαρ-ντα κα τζαν κόντρα. Άμα ντινέ καν μιρέ λαφίστε, τουμαρέστε-ντα κα ντεν καν.
21 Αλλά σαρέ ανταλά κα κερέν-λεν κόντρα τουμέντε ιτιρί μι ναβέσταρ, σόσκε να τζανένα Οντουλές σο μπουτσσαντάς-μαν.
22 Άμα να αβιλόμας ντα να κερντόμας λένγκε λάφι, βον να κα τθερένας αμαρτία. Αλλά ακανά ναστί βακερένα ότι να τθερένα αμαρτία.
23 Κον μισίνελα μαν μισίνελα μι Νταντές-ντα.
24 Άμα να κερντόμας ανγκλά-λέντε ο πράγματα σο καέκ γιαβέρ να κερντάς, βον να κα τθερένας αμαρτία. Αλλά ακανά ντικχλέ-μαν ντα μισιντέ εμ μαν εμ μι Νταντές.
25 Αλλά ανταβά αβιλό-πες για τι νικιόλ μπαγιά ο λάφι σο ισί γραμμέ κο Νόμος σο τθερένα βον: “Μισιντέ-μαν σινανέ”.
26 Κάνα κα αβέλ ο βοηθός σο κα μπουτσσαβάβ τουμένγκε κατά Ντατ, ο πνεύμας ι αληθειάκο σο αβέλα κατά Ντατ, βοβ κα σικαβέλ κον ισινόμ.
27 Σοράν κα σικαβέν τουμέν-ντα κον ισινόμ, σόσκε ισινέν μάντζαρ κατά αρχή.
