Ο Ευαγγέλιος σο Γραφιντάς ο Ιωάννης 16:1-33
16 »Βακερντόμ-λεν τουμένγκε ανταλά για μα τι χασαρέν τουμαρί πίστη.*
2 Ο τζενέ κα πάλντεν-τουμέν κατά συναγωγή. Αβέλα ο σαάτι σο κον κα μουνταρέλ-τουμέν κα αμντίνελ ότι ντινάς άγια υπηρεσία κο Ντεβέλ.
3 Αλλά βον κα κερέν-λεν ανταλά σόσκε να τζανένα ούτε ι Νταντές ούτε μαν.
4 Όμως, βακερντόμ-λεν τουμένγκε ανταλά ντα αντικάς, κάνα κα αβέλ ο σαάτι τι αβέν-πες, τι ντεν-τουμέν γκοντί ότι βακερντόμας-λεν τουμένγκε.
»Να βακερντόμ-λεν τουμένγκε κατά αρχή, σόσκε ισινόμας τουμέντζαρ.
5 Όμως, ακανά τζάβα Οντουλέστε σο μπουτσσαντάς-μαν, αλλά καέκ τουμένταρ να πουτσέλα-μαν: “Κατέ τζάσα;”
6 Αλλά επειδή βακερντόμ-λεν τουμένγκε ανταλά, τουμαρό γκι πφερντιλό στεναχώρια.
7 Όμως, βακεράβα τουμένγκε ι αλήθεια: Λατσσιπέ κα κερέλ τουμένγκε σο νασάβα. Σόσκε άμα να νασλόμ, ο βοηθός να κα αβέλ τουμέντε. Άμα νασλόμ όμως, κα μπουτσσαβάβ-λες τουμένγκε.
8 Ντα κάνα κα αβέλ βοβ, κα σικαβέλ ντιπ λατσσές κο ντουνιάς σο ισί αμαρτία, σο ισί δικαιοσύνη ντα σο ισί Ντεβλέσκι κρίση.
9 Πρώτα σο ισί αμαρτία, σόσκε ο ντουνιάς να σικαβέλα πίστη μάντε.
10 Σοράν σο ισί δικαιοσύνη, επειδή τζάβα κο Ντατ ντα να κα ντικχέν-μαν ατζέκ φαρ.
11 Ντα σοράν σο ισί Ντεβλέσκι κρίση, σόσκε ο άρχοντας ανταλέ ντουνιάσκο κρίντιλο.
12 »Τθεράβα μπουτ ατζέ τι βακεράβ τουμένγκε, αλλά ναστί νταϊντίνενα-λεν ακανά.
13 Όμως, κάνα κα αβέλ ο βοηθός, σο ισί ο πνεύμας ι αληθειάκο, κα γκερέλ-τουμέν σαρί κι αλήθεια, σόσκε να κα κερέλ λάφι από κορκορό, αλλά κα βακερέλ οντουλά σο ασουνέλα ντα κα μουτθαβέλ τουμένγκε οντουλά σο κα αβέν-πες.
14 Ο βοηθός κα δοξάνελ-μαν, σόσκε κα λελ οντουλέσταρ σο ισί μιρό ντα κα μουτθαβέλ-λες τουμένγκε.
15 Σο-ντα τθερέλα ο Ντατ ισί μιρό. Άκ’ σόσκε βακερντόμ ότι ο βοηθός λέλα οντουλέσταρ σο ισί μιρό ντα μουτθαβέλα-λες τουμένγκε.
16 Ατζεχάνικ να κα ντικχέν-μαν, ντα πάλι, ατζεχάνικ κα ντικχέν-μαν».
17 Αζομάν μερικοί λέσκε μαθητένταρ βακερντέ ο εκ κο γιαβέρ: «Σο μανγκέλα τι σικαβέλ ανταβά σο βακερέλα αμένγκε: “Ατζεχάνικ να κα ντικχέν-μαν, ντα πάλι, ατζεχάνικ κα ντικχέν-μαν” ντα “επειδή τζάβα κο Ντατ”;»
18 Ντα βακερένας: «Σο μανγκέλα τι σικαβέλ ι λαφίσαρ “ατζεχάνικ”; Να τζανάσα καλέ πραγμάσκε κερέλα λάφι».
19 Ο Ιησούς αγαντάς ότι μανγκένας τι πουτσέν-λες ντα βακερντάς λένγκε: «Βακερένα ο εκ κο γιαβέρ σο μανγκένα τι σικαβέν μο λάφια: “Ατζεχάνικ να κα ντικχέν-μαν, ντα πάλι, ατζεχάνικ κα ντικχέν-μαν”;
20 Μπαγιά, μπαγιά βακεράβα τουμένγκε: Τουμέν κα ροβέν ντα κα ντεν βίκος ζουρανές, αλλά ο ντουνιάς κα χαιρίνελ. Τουμέν κα στεναχωρίντιβεν, αλλά τουμαρί στεναχώρια κα αβέλ χαρά.
21 Κάνα εκ τζουβέλ μπιανέλα, τθερέλα ντουκχ σόσκε αβιλό λάκο σαάτι. Κάνα όμως κα μπιανέλ ι μαξιμίς, να ντέλα-πες γκοντί ι στεναχώρια σόσκε χαιρίνελα σο αβιλό εκ τζενό κο ντουνιάς.
22 Αντικάς τουμέν-ντα ακανά τθερένα στεναχώρια. Αλλά κα ντικχάβ-τουμέν πάλι ντα τουμαρό γκι κα χαιρίνελ, ντα καέκ να κα λελ τουμαρί χαρά.
23 Οντουβά ντιβές να κα πουτσέν-μαν τίποτα. Μπαγιά, μπαγιά βακεράβα τουμένγκε: Σο-ντα τι μανγκέν κατά Ντατ, κα ντελ-λες τουμέντε μι ναβέστε.
24 Μέχρι ακανά να μανγκλέν τίποτα μι ναβέστε. Τι μανγκέν ντα κα λεν, για τι πφερντιόν χαρά.
25 »Βακερντόμ-λεν τουμένγκε ανταλά παραδειγματέντζαρ.* Αβέλα ο σαάτι σο να κα κεράβ τουμέντζαρ λάφι παραδειγματέντζαρ, αλλά κάνα κα κεράβ τουμέντζαρ λάφι ι Νταντέσκε κα νταβ-τουμέν τι αγαβέν ντιπ λατσσές.
26 Οντουβά ντιβές κα μολίνεν ι Νταντές μι ναβέστε. Ανταλέσαρ να μανγκάβα τι βακεράβ ότι κα μολίναβ με ι Νταντές τουμένγκε.
27 Ο Ντατ μανγκέλα-τουμέν αντράλ πι γκίσταρ, σόσκε τουμέν μανγκλέν-μαν αντράλ τουμαρέ γκίσταρ ντα πακιαντέν ότι αβιλόμ κο ναβ κι Ντεβλέσκο.
28 Αβιλόμ κο ντουνιάς κο ναβ κι Νταντέσκο. Ακανά μουκχάβα ι ντουνιάς ντα τζάβα κο Ντατ».
29 Ο μαθητές βακερντέ λέσκε: «Άκ’! Ακανά ντινάν-αμέν τι αγαβάς ντιπ λατσσές το λάφια, σόσκε να βακερντάν-λεν παραδειγματέντζαρ.
30 Ακανά αγαβάσα ότι τζανέσα-λεν σαρέ ντα να χρειαζίντιβελα τι πουτσέν-τουτ. Ανταλέσταρ αμέν πακιάσα ότι αβιλάν κατά Ντεβέλ».
31 Ο Ιησούς βακερντάς λένγκε: «Ακανά πακιάνα;
32 Ντικχέν! Αβέλα ο σαάτι, ντα αβιλό μπίλιμα, σο κα τρουγίντιβεν ο κάθε εκ πι κχερέστε ντα κα μουκχέν-μαν κορκορό. Αλλά να ισινόμ κορκορό, σόσκε ο Ντατ ισί μάντζαρ.
33 Βακερντόμ-λεν τουμένγκε ανταλά για τι τθερέν ειρήνη αντράλ μάνταρ. Κο ντουνιάς κα τθερέν στεναχώρια, αλλά μα νταρέν! Με νικιντόμ ι ντουνιάς».
