Ο Ευαγγέλιος σο Γραφιντάς ο Ιωάννης 20:1-31
20 Ο πρώτος ντιβές ι εβδομαδάκο, η Μαρία η Μαγδαληνή αβιλί ντιπ πρωί κο μεζάρι,* καζόμ ισινέ ατζέ καρανίκι, ντα ντικχλάς ότι ο μπαρ ταρτίντιλοας κατά μεζάρι.
2 Οτθάρ, γκιλί τθαβντιμάσαρ κο Σίμωνας Πέτρος ντα κο γιαβέρ μαθητής, οντουλέστε σο μανγκέλας-λες ο Ιησούς αντράλ πι γκίσταρ, ντα βακερντάς λένγκε: «Λιντέ ι Κυριός κατά μεζάρι ντα να τζανάσα κατέ τσσουντέ-λες».
3 Αζομάν ο Πέτρος ντα ο γιαβέρ μαθητής νασλέ για τι τζαν κο μεζάρι.
4 Βον ο ντούι αρχισάλε τι τθάβντεν γιεκ, όμως ο γιαβέρ μαθητής τθαβντισάλο πο σουγκό κατά Πέτρος ντα ερεσλό πο τζανγκλέ λέσταρ κο μεζάρι.
5 Κερντάς τελέ ντα ντικχλάς ο λινά κοτορά τι αβέν οτθέ, αλλά να ντινάς αντρέ.
6 Σοράν αβιλό ο Σίμωνας Πέτρος-ντα, ντινάς αντρέ κο μεζάρι ντα ντικχλάς ο λινά κοτορά τι αβέν οτθέ.
7 Ο κοτόρ σο ισινέας λέσκε σορέστε να ισινέ γιεκ ι γιαβερέ κοτορέντζαρ, αλλά ισινέ πακιαρντό γιαβερτθέ.
8 Αζομάν ντινάς αντρέ ο γιαβέρ μαθητής-ντα, οντουβά σο ερεσλόας πο τζανγκλέ κο μεζάρι, ντα ντικχλάς ντα πακιαντάς.
9 Σόσκε να αγαντέας ατζέκ οντουβά σο βακερέλας η Γραφή, ότι πρέπει τι ιστίλ κατά μουλέ.
10 Αντικάς, ο μαθητές βουρτισάλε πουμαρέ κχερέντε.
11 Όμως, η Μαρία ισινέ ατζέκ αβρί, πασέ κο μεζάρι ντα ροβέλας. Καζόμ ροβέλας, κερντάς τελέ για τι ντικχέλ αντρέ κο μεζάρι
12 ντα ντικχλάς ντουέ αγγελόν αντρέ κο παρνέ τι μπεσέν οτθέ σο ισινέ ανγκλέ ο σώμας ι Ιησούσκο, ο εκ οτθέ σο ισινέ λέσκο σορό ντα ο γιαβέρ οτθέ σο ισινέ λέσκε πιντρέ.
13 Ντα βον βακερντέ λάκε: «Τζουβλίε, σόσκε ροβέσα;» Βόι βακερντάς λένγκε: «Λιντέ μι Κυριός ντα να τζανάβα κατέ τσσουντέ-λες».
14 Κάνα βακερντάς-λες ανταβά, μπολντιντάς-πες παλάλ ντα ντικχλάς ι Ιησούς οτθέ, αλλά να αγαντάς ότι ισινέ βοβ.
15 Ο Ιησούς βακερντάς λάκε: «Τζουβλίε, σόσκε ροβέσα; Κάσκε ρόντεσα;» Βόι αμντίνελας ότι ισινέ ο κηπουρός, οτθάρ βακερντάς λέσκε: «Άμα τούι γκερντάν-λες γιαβερτθέ, κύριε, βάκερ μάνγκε κατέ τσσουντάν-λες ντα με κα λαβ-λες».
16 Ο Ιησούς βακερντάς λάκε: «Μαρία!» Βόι μπολντιντάς-πες ντα βακερντάς λέσκε κο εβραϊκά: «Ραββουνί!» (σο μανγκέλα τι βακερέλ «Δάσκαλε!»).
17 Ο Ιησούς βακερντάς λάκε: «Μα αστάρ-τουτ οπρά-μάνταρ, σόσκε να νικλιντόμ ατζέ κο Ντατ. Τζα όμως μι πφραλέντε ντα βάκερ λένγκε: “Νικλιάβα μι Νταντέστε σο ισί τουμαρό-ντα Ντατ ντα μι Ντεβλέστε σο ισί τουμαρό-ντα Ντεβέλ”».
18 Οτθάρ, γκιλί η Μαρία η Μαγδαληνή ντα βακερντάς κο μαθητές: «Ντικχλόμ ι Κυριός!» Ντα μουτθαντάς λένγκε σο βακερντάας λάκε.
19 Πριν τι περέλ ο κχαμ οντουβά ντιβές, ο πρώτος ντιβές ι εβδομαδάκο, ντα καζόμ ο πόρτες ισινέ κλειδωμέ οτθέ σο ισινέ ο μαθητές σόσκε νταρένας κατά Ιουδαίοι, αβιλό λέντε ο Ιησούς ντα βακερντάς λένγκε: «Ειρήνη τι αβέλ τουμέντε».
20 Αφού βακερντάς-λες ανταβά, σικαντάς λένγκε πο βαστά ντα πο παΐδια. Αζομάν ο μαθητές χαιρισάλε σο ντικχλέ ι Κυριός.
21 Ο Ιησούς βακερντάς λένγκε ατζέκ εκ φαρ: «Ειρήνη τι αβέλ τουμέντε. Σαρ ο Ντατ μπουτσσαντάς μαν, αντικάς με-ντα μπουτσσαβάβα τουμέν».
22 Ντα κάνα βακερντάς-λες ανταβά, πφουντιντάς οπρά-λέντε ντα βακερντάς λένγκε: «Λεν άγιος πνεύμας.
23 Άμα κα συγχωρίνεν ο αμαρτίες εκχέ τζενέσκε, λέσκε αμαρτίες συγχωρισάλε. Άμα να κα συγχωρίνεν ο αμαρτίες εκχέ τζενέσκε, λέσκε αμαρτίες να συγχωρισάλε».
24 Ο Θωμάς όμως, εκ κατά Δώδεκα σο βακέρντιβελας Δίδυμος, να ισινέ λέντζαρ κάνα αβιλό ο Ιησούς.
25 Οτθάρ, βακερένας λέσκε ο γιαβερά μαθητές: «Ντικχλάμ ι Κυριός!» Αλλά βοβ βακερντάς λένγκε: «Άμα να κα ντικχάβ λέσκε βαστέντε ο σημάδι κατά καρφιά ντα άμα να κα τσσουβάβ μο δάχτυλος κο σημάδι ντα μο βας λέσκε παϊδίντε, να κα πακιάβ».
26 Οχτώ ντιβεσά πο σοράν, λέσκε μαθητές ισινέ πάλι αντρέ κο κχερ ντα ο Θωμάς ισινέ λέντζαρ. Ο Ιησούς αβιλό λέντε, παρόλο σο ο πόρτες ισινέ κλειδωμέ, ντα βακερντάς: «Ειρήνη τι αβέλ τουμέντε».
27 Σοράν βακερντάς κο Θωμάς: «Τσσουβ το δάχτυλος ακατέ ντα ντικχ μο βαστά, ντα αν το βας ντα τσσουβ-λες μι παϊδίντε ντα μα βάκερ ότι να ιστίντιλομ κατά μουλέ,* αλλά τι τθερές πίστη».
28 Ο Θωμάς βακερντάς λέσκε: «Μο Κύριος ντα μο Ντεβέλ!»
29 Ο Ιησούς βακερντάς λέσκε: «Επειδή ντικχλάν-μαν πακιαντάν; Ευτυχισμέ ισί οντουλά σο να ντικχλέ αλλά πακιάνα».
30 Ισί μπαγιά ότι ο Ιησούς κερντάς μπουτ γιαβερά-ντα θαύματα ανγκλάλ κο μαθητές, σο νανέ γραμμέ ανταλέ βιβλιόστε.*
31 Όμως, ανταλά γραφισάλε για τι πακιάν ότι ο Ιησούς ισί ο Χριστός, ο Τσσαβό ι Ντεβλέσκο, ντα επειδή πακιάνα, τι τθερέν ζωή αντράλ λέσκε ναβέσταρ.
