Ο Ευαγγέλιος σο Γραφιντάς ο Ιωάννης 21:1-25
21 Σοράν ανταλέσταρ, ο Ιησούς σικαντάς-πες πάλι κο μαθητές κι Ντεριάβ κι Τιβεριάδα αντικάς:
2 Ισινέ γιεκ ο Σίμωνας Πέτρος, ο Θωμάς (σο βακέρντιβελας Δίδυμος), ο Ναθαναήλ κατά Κανά σο ισί κι Γαλιλαία, ο τσσαβέ ι Ζεβεδαιόσκε ντα ντούι γιαβερά μαθητές λέσκε.
3 Ο Σίμωνας Πέτρος βακερντάς λένγκε: «Τζάβα τι ασταράβ ματσσέν». Βον βακερντέ λέσκε: «Αβάσα τούσαρ». Οτθάρ, νικίστιλε αβρί ντα τσσουντέ-πες κι βάρκα, αλλά οντιά ιράτ να ασταρντέ τίποτα.
4 Όμως, οτθέ σο τζάλας τι ντισιόλ, ο Ιησούς ατσσιλό πασέ κι ντεριάβ, αλλά ο μαθητές να αγαντέ ότι ισινέ βοβ.
5 Αζομάν ο Ιησούς βακερντάς λένγκε: «Μο τσσαβέ, τθερένα τίποτα χαμάσκε;»* Βον βακερντέ: «Νάα!»
6 Βοβ βακερντάς λένγκε: «Τσσουβέν ο δίχτυ κι δεξιά μπάντα κατά βάρκα ντα κα αρακχέν». Ντα τσσουντέ-λες, αλλά ναστί ταρτίνενας-λες σόσκε ο ματσσέ ισινέ αζόμ μπουτ.
7 Αζομάν ο μαθητής σο μανγκέλας-λες ο Ιησούς βακερντάς ι Πετρόσκε: «Ο Κύριος ισί!» Ντα ο Σίμωνας Πέτρος, κάνα ασουντάς ότι ισινέ ο Κύριος, ιριντάς πο αβραϊνέ σέα, σόσκε ισινέ νανγκό,* ντα πελό κι ντεριάβ.
8 Αλλά ο γιαβερά μαθητές αβιλέ ι χουρντέ βαρκάσαρ ντα ταρτίνενας ο δίχτυ ι ματσσέντζαρ, σόσκε να ισινέ ντουρ, σάντε πασέ 90 μέτρα.*
9 Κάνα νικίστιλε κατά βάρκα, ντικχλέ οτθέ ανγκαρά σο πφαμπόνας ντα οπρά-λέντε ματσσό ντα μαντρό.
10 Ο Ιησούς βακερντάς λένγκε: «Ανέν μερικά κατά ματσσέ σο ασταρντέν ακανά».
11 Οτθάρ, ο Σίμωνας Πέτρος νικλιντάς κι βάρκα ντα ταρτιντάς αβρί ο δίχτυ σο ισινέ πφερντό 153 μπαρέ ματσσέντζαρ. Ντα παρόλο σο ισινέ αζόμ μπουτ, ο δίχτυ να πφαράντιλο.
12 Ο Ιησούς βακερντάς λένγκε: «Ελάν τι χαν». Καέκ κατά μαθητές να κοτίνελας τι πουτσέλ-λες: «Κον ισινάν;» σόσκε τζανένας ότι ισινέ ο Κύριος.
13 Ο Ιησούς αβιλό ντα λιντάς ο μαντρό ντα ντινάς-λες λέντε. Ανταβά κερντάς ι ματσσέσαρ-ντα.
14 Ανταγιά ισινέ η τρίτη φαρ σο σικαντάς-πες ο Ιησούς κο μαθητές από αζομάν σο ιστίντιλο κατά μουλέ.
15 Κάνα χαλέ, ο Ιησούς βακερντάς κο Σίμωνας Πέτρος: «Σίμωνα, σο ισινάν τσσαβό ι Ιωαννίσκο, μανγκέσα-μαν πο μπουτ ανταλένταρ;» Βοβ βακερντάς λέσκε: «Βα, Κύριε, τούι τζανέσα ότι μανγκάβα-τουτ αντράλ μι γκίσταρ». Ο Ιησούς βακερντάς λέσκε: «Πάρβαρ μι μπρακέν».
16 Πάλι βακερντάς λέσκε: «Σίμωνα, σο ισινάν τσσαβό ι Ιωαννίσκο, μανγκέσα-μαν;» Βοβ βακερντάς: «Βα, Κύριε, τούι τζανέσα ότι μανγκάβα-τουτ αντράλ μι γκίσταρ». Ο Ιησούς βακερντάς λέσκε: «Αράκχαβ μι μπρακορέν».
17 Βακερντάς λέσκε ατζέκ εκ φαρ: «Σίμωνα, σο ισινάν τσσαβό ι Ιωαννίσκο, μανγκέσα-μαν αντράλ τι γκίσταρ;» Ι Πετρόσκο γκι πφανγκιλό σο πουτσλάς-λες ατζέκ εκ φαρ: «Μανγκέσα-μαν αντράλ τι γκίσταρ;» Οτθάρ βακερντάς λέσκε: «Κύριε, τούι τζανέσα-λεν σαρέ. Τούι τζανέσα ότι μανγκάβα-τουτ αντράλ μι γκίσταρ». Ο Ιησούς βακερντάς λέσκε: «Πάρβαρ μι μπρακορέν.
18 Μπαγιά, μπαγιά βακεράβα τούκε: Κάνα ισινάνας πο τερνό, ιριαβέας-τουτ κορκορό ντα τζάας κάι μανγκέας. Αλλά κάνα κα πφουρίλιβες, κα πουτρές το μουσιά ντα εκ γιαβέρ κα ιριαβέλ-τουτ ντα κα γκερέλ-τουτ οτθέ σο να μανγκέσα».
19 Βακερντάς-λες ανταβά για τι σικαβέλ σο μεριμάσαρ κα δοξάνελας ι Ντεβλές. Σοράν βακερντάς λέσκε: «Μα τσσίναβ τι αβές παλά-μάντε».
20 Ο Πέτρος μπολντιντάς-πες ντα ντικχλάς τι αβέλ παλά-λέντε ο μαθητής σο μανγκέλας-λες ο Ιησούς, οντουβά σο μπολντιντάας-πες κάρινγκ λέσκε γκεσίστε* καζόμ χάνας ντα βακερντάας: «Κύριε, κον ισί οντουβά σο κα ντελ-τουτ τι ντουσμανίνγκε* βαστέντε;»
21 Κάνα ντικχλάς-λες ο Πέτρος, βακερντάς κο Ιησούς: «Κύριε, ντα ακαλέσκε σο κα αβέλ-πες;»
22 Ο Ιησούς βακερντάς λέσκε: «Άμα με μανγκάβα τι ατσσόλ βοβ τζουβντό μέχρι τι αβάβ, τουτ σο χάλα-τουτ ανάγκη; Τούι μα τσσίναβ τι αβές παλά-μάντε».
23 Ντα πφιρντιλό αντρέ κο πφραλά ο λάφι ότι οντουβά μαθητής να κα μερέλας. Όμως, ο Ιησούς να βακερντάς λέσκε ότι να κα μερέλας, αλλά βακερντάς: «Άμα με μανγκάβα τι ατσσόλ βοβ τζουβντό μέχρι τι αβάβ, τουτ σο χάλα-τουτ ανάγκη;»
24 Βοβ ισί ο μαθητής σο βακερέλα-λεν ανταλά ντα γραφιντάς-λεν ανταλά, ντα τζανάσα ότι λέσκε λάφια ισί μπαγιά.
25 Ισί μπουτ γιαβερά-ντα πράγματα σο κερντάς ο Ιησούς, σο άμα κα γραφίντιβενας ντιπ σαρέ, αμντίναβα ότι σαρό ο ντουνιάς να κα τθερέλας μπερεκέτι τθαν για τι ερεσέν σαρέ ο βιβλία σο κα γραφίντιβενας.
Υποσημειώσεις
^ Γιαβέρσοϊ «τθερένα ιτς ματσσέ;»
^ Γιαβέρσοϊ «λοκχές ιριαντό».
^ Κι Πουρανί Μπαλαμανί βακέρντιβελας «200 πήχεις».
^ Ο λάφι «γκέσι» βακέρντιβελα εμ «κολίν».
^ Γιαβέρσοϊ «εχθρόνγκε».
