Ο Ευαγγέλιος σο Γραφιντάς ο Ιωάννης 3:1-36
3 Ισινέ εκ Φαρισαίος σο βακέρντιβελας Νικόδημος ντα ισινέ άρχοντας ι Ιουδαιόνγκο.
2 Βοβ αβιλό κο Ιησούς αντρέ κι ιράτ ντα βακερντάς λέσκε: «Ραββί, τζανάσα ότι αβιλάν κατά Ντεβέλ σαρ δάσκαλος, σόσκε καέκ ναστί κερέλα ανταλά θαύματα σο κερέσα τούι άμα νανέ λέσαρ ο Ντεβέλ».
3 Ο Ιησούς βακερντάς: «Μπαγιά, μπαγιά βακεράβα τούκε: Άμα εκ τζενό να κα μπιάντιβελ πάλι,* ναστί κα ντικχέλ ι Βασιλεία ι Ντεβλέσκι».
4 Ο Νικόδημος βακερντάς λέσκε: «Σαρ αβέλα-πες τι μπιάντιβελ εκ τζενό κάνα ισί πφουρό; Αβέλα-πες τι ντελ αντρέ κο περ πι νταγιάκο δεύτερη φαρ ντα τι μπιάντιβελ;»
5 Ο Ιησούς βακερντάς: «Μπαγιά, μπαγιά βακεράβα τούκε: Άμα εκ τζενό να κα μπιάντιβελ κατά πανί ντα κατά πνεύμας, ναστί κα νακχέλ κι Βασιλεία κι Ντεβλέσκι.
6 Σο μπιάντιλο κατά τζενό ισί τζενό, ντα σο μπιάντιλο κατά πνεύμας ισί πνεύμας.
7 Μα σάστινε σο βακερντόμ τούκε ότι πρέπει τι μπιάντιβεν πάλι.
8 Η μπαρμπάλ πφούντελα κατέ μανγκέλα, ντα ασουνέσα-λα, αλλά να τζανέσα κατάρ αβέλα ντα κατέ τζάλα. Ανταβά αβέλα-πες κάσαρ-ντα μπιάντιλο κατά πνεύμας».
9 Ο Νικόδημος βακερντάς: «Σαρ μπορίνενα τι αβέν-πες ανταλά;»
10 Ο Ιησούς βακερντάς: «Ισινάν δάσκαλος κο Ισραήλ, αλλά να τζανέσα-λεν ανταλά;
11 Μπαγιά, μπαγιά βακεράβα τούκε: Οντουλένγκε σο τζανάσα κεράσα λάφι ντα οντουλένγκε σο ντικχλάμ βακεράσα, αλλά τουμέν να δεχτίνενα οντουλά σο βακεράσα.
12 Άμα να πακιαντέν κάνα βακερντόμ τουμένγκε πραγματένγκε σο ισί κι πφουβ, σαρ κα πακιάν άμα κα βακεράβ τουμένγκε πραγματένγκε σο ισί κο ουρανός;
13 Ατζέ, καέκ να νικλιντάς κο ουρανός εκτός κατά τζενέσκο Τσσαβό, σο γουλίστιλο κατά ουρανός.
14 Ντα σαρ ο Μωυσής κι έρημος βαντιντάς κο κας ι σαπές, αντικάς ο Τσσαβό ι τζενέσκο-ντα πρέπει τι βαντίντιβελ,
15 για τι τζουβντιόλ για πάντα κον πακιάλα λέστε.
16 »Επειδή ο Ντεβέλ μανγκλάς ι ντουνιάς αζόμ μπουτ σο ντινάς πι μοναδικέ Τσσαβές, για μα τι καταστραφίντιβελ κον σικαβέλα πίστη λέστε, αλλά τι τζουβντιόλ για πάντα.
17 Σόσκε ο Ντεβέλ να μπουτσσαντάς πι Τσσαβές κο ντουνιάς για τι κρίνελ βοβ ι ντουνιάς, αλλά για τι σώντιβελ ο ντουνιάς αντράλ λέσταρ.
18 Κον σικαβέλα πίστη λέστε να κα κρίντιβελ. Κον να σικαβέλα πίστη κρίντιλο μπίλιμα, σόσκε να σικαντάς πίστη κο ναβ κι μοναδικέ Τσσαβέσκο σο τθερέλα ο Ντεβέλ.
19 Ο τζενέ κα κρίντιβεν σόσκε ο φως αβιλό κο ντουνιάς, όμως βον μανγκλέ ο καρανίκι ντα όχι ο φως, σόσκε οντουλά σο κερένας ισινέ πφιρνικανέ.*
20 Κον κερέλα μπέτι πράγματα μισίνελα ο φως ντα να αβέλα κο φως, για μα τι σικάντιβεν οντουλά σο κερέλα.
21 Κον όμως κερέλα σο-ντα ισί μπαγιά αβέλα κο φως, για τι σικάντιβελ ότι οντουλά σο κερέλα αβιλέ-πες αντικάς σαρ μανγκέλα ο Ντεβέλ».
22 Σοράν, ο Ιησούς ντα λέσκε μαθητές γκιλέ κο γκαβά σο ισί κι Ιουδαία, ντα βοβ μπεσλό χάνικ βακίτι οτθέ λέντζαρ ντα μπολέλας.
23 Αλλά ο Ιωάννης-ντα μπολέλας κι Αινών πασέ κο Σαλείμ, σόσκε ισινέ μπερεκέτι πανί οτθέ, ντα ο τζενέ αβένας ντα μπολντιόνας.
24 Σόσκε ο Ιωάννης να τσσουβντιλόας ατζέ κι φυλακή.
25 Ο μαθητές ι Ιωαννίσκε χαλέ-πες λαφίντζαρ εκχέ Ιουδαιόσαρ για το κανόνες σο βακερένας σαρ τι αβέν πάκι.
26 Ντα γκιλέ κο Ιωάννης ντα βακερντέ λέσκε: «Ραββί, οντουβά σο ισινέ τούσαρ κι γιαβέρ μπάντα κατά Ιορδάνης, σο κερντάν λάφι λέσκε κο τζενέ, ντικχ! μπολέλα, ντα σαρέ τζάνα λέστε».
27 Ο Ιωάννης βακερντάς: «Καέκ τζενό ναστί λέλα τίποτα άμα να ντιντιλό λέστε κατά ουρανός.
28 Τουμέν ασουντέν σο βακερντόμ: “Με να ισινόμ ο Χριστός, αλλά μπουτσσάντιλομ πο τζανγκλέ λέσταρ”.
29 Κον τθερέλα ι μποριά ισί ο τζαμουτρό. Αλλά ο αμάλ* ι τζαμουτρέσκο, κάνα μπεσέλα ντα ασουνέλα-λες, λέλα μπαρί χαρά κατά τζαμουτρέσκι φωνή. Οτθάρ, με-ντα ισινόμ πφερντό χαρά.
30 Βοβ πρέπει τι κερέλ πο μπουτ πράγματα ντα με πο χάνικ».
31 Οντουβά σο αβέλα οπράλ ισί πο οπρέ σαρέ κατά γιαβερά. Οντουβά σο ισί κατά πφουβ ισί κατά πφουβ ντα κερέλα λάφι πραγματένγκε σο ισί κι πφουβ. Οντουβά σο αβέλα κατά ουρανός ισί πο οπρέ σαρέ κατά γιαβερά.
32 Βακερέλα οντουλέσκε σο ντικχλάς ντα ασουντάς, αλλά καέκ να δεχτίνελα οντουλά σο βακερέλα.
33 Κον δεχτιντάς λέσκε λάφια τσσουντάς πιρί σφραγίδα* ότι ο Ντεβέλ βακερέλα ι αλήθεια.
34 Οντουβά σο μπουτσσάντιλο κατά Ντεβέλ βακερέλα ο λάφια ι Ντεβλέσκε, σόσκε Βοβ ντέλα ο πνεύμας μπερεκέτι.*
35 Ο Ντατ μανγκέλα ι Τσσαβές ντα ντινάς σαρέ ο πράγματα λέσκε βαστέστε.
36 Οντουβά σο σικαβέλα πίστη κο Τσσαβό τζουβντιόλα για πάντα. Οντουβά σο να ντέλα καν ι Τσσαβές να κα τζουβντιόλ, αλλά η μπαρί χολί ι Ντεβλέσκι ατσσόλα οπρά-λέστε.
Υποσημειώσεις
^ Ή μπέκιμ «να κα μπιάντιβελ οπράλ».
^ Γιαβέρσοϊ «γκεραλέ, μπίλατσσε».
^ Γιαβέρσοϊ «φίλος».
^ Γιαβέρσοϊ «Κον δεχτιντάς λέσκε λάφια σικαντάς μπαγιά».
^ Γιαβέρσοϊ «να ντέλα ο πνεύμας χάνικ χάνικ».
