Ο Ευαγγέλιος σο Γραφιντάς ο Ιωάννης 5:1-47
5 Σοράν ανταλέσταρ, αβέλας-πες εκ μπαρό ντιβές ι Ιουδαιόνγκο, ντα ο Ιησούς γκιλό κι Ιερουσαλήμ.
2 Οτθέ κι Ιερουσαλήμ, κι Πόρτα κι Μπρακένγκι, ισί εκ τθαν πανίσαρ σο βακέρντιβελα κο εβραϊκά Βηθζαθά ντα τθερέλα παντς διάδρομοι κολονέντζαρ.
3 Αντρέ ανταλέντε ισινέ ζαντιμέ* μπουτ τζενέ σο ισινέ νασφαλέ,* ισινέ κορορέ, ναστί πφιρένας ντα τθερένας σουκέ* μουσιά ή πιντρέ.
4 ——
5 Ισινέ οτθέ εκ τζενό-ντα νασφαλό 38 μπρεσά.
6 Ο Ιησούς, ντικχλάς ανταλέ τζενές ζαντιμέ οτθέ ντα τζανέλας ότι ισινέ νασφαλό μπουτ βακίτι, οτθάρ-ντα βακερντάς λέσκε: «Μανγκέσα τι αβές λατσσές;»
7 Ο νασφαλό βακερντάς λέσκε: «Να τθεράβα καεκχές, κύριε, τι τσσουβέλ-μαν αντρέ κάνα ιζράλα ο πανί, αλλά κάνα τζάβα τι τσσουβάβ-μαν, εκ γιαβέρ γουλίλα πο τζανγκλέ μάνταρ».
8 Ο Ιησούς βακερντάς λέσκε: «Ίστι! Λε το μιντέρι* ντα πφιρ».
9 Ντα οντιά στιγμή ο τζενό αβιλό λατσσές, ντα λιντάς πο μιντέρι* ντα πφιρέλας.
Οντουβά ντιβές ισινέ Σάββατος.
10 Οτθάρ, ο Ιουδαίοι βακερένας κο τζενό σο αβιλό λατσσές: «Ισί Σάββατος ντα νανέ σωστός τι ακχαρές ο μιντέρι».*
11 Βοβ όμως βακερντάς λένγκε: «Οντουβά σο κερντάς-μαν λατσσές, βοβ βακερντάς μάνγκε: “Λε το μιντέρι* ντα πφιρ”».
12 Βον πουτσλέ-λες: «Κον ισί ο τζενό σο βακερντάς τούκε: “Λε-λες ντα πφιρ”;»
13 Αλλά ο τζενό σο αβιλόας λατσσές να τζανέλας κον ισινέ, σόσκε ο Ιησούς νασλόας ντα χασάρντιλοας αντρέ κο μπουτ τζενέ σο ισινέ οτθέ.
14 Σοράν, ο Ιησούς αρακχλάς-λες κο ναός ντα βακερντάς λέσκε: «Ντικχ! Αβιλάν λατσσές. Μα αμάρτινε γιαβέρ, για μα τι αβέλ-πες τούκε κάτι πο γκεραλό».*
15 Ο τζενό νασλό ντα βακερντάς κο Ιουδαίοι ότι ο Ιησούς ισινέ οντουβά σο κερντάς-λες λατσσές.
16 Οντουλέσκε τζάνας κόντρα ο Ιουδαίοι κο Ιησούς, σόσκε κερέλας ανταλά πράγματα Σάββατος.
17 Αλλά βοβ βακερέλας λένγκε: «Μο Ντατ κερέλα μπουτί μέχρι ακανά, με-ντα κεράβα μπουτί».
18 Οτθάρ, ο Ιουδαίοι μανγκένας ατζέ πο μπουτ τι μουνταρέν-λες, σόσκε εμ κερέλας μπουτί Σάββατος εμ βακερέλας ότι ο Ντεβέλ ισί λέσκο Ντατ, ντα αντικάς κερέλας πο νεαυτός εκ ι Ντεβλέσαρ.
19 Οτθάρ, ο Ιησούς βακερντάς λένγκε: «Μπαγιά, μπαγιά βακεράβα τουμένγκε: Ο Τσσαβό ναστί κερέλα ούτε εκ πράγμας κορκορό, αλλά σάντε σο ντικχέλα τι κερέλ ο Ντατ. Σο-ντα πράγματα κερέλα Βοβ, οντουλά κερέλα ι ίδιε τροπόσαρ ο Τσσαβό-ντα.
20 Σόσκε ο Ντατ μανγκέλα αντράλ πι γκίσταρ ι Τσσαβές ντα σικαβέλα λέσκε σαρέ οντουλά σο κερέλα βοβ ντα κα σικαβέλ λέσκε ατζέ πο μπαρέ πράγματα ανταλένταρ, για τι ατσσόν τουμέν πουταρντέ μόσαρ.
21 Σαρ ο Ντατ ιστικιαρέλα ι μουλέν ντα ντέλα-λεν ζωή, αντικάς ο Τσσαβό-ντα ντέλα ζωή οντουλέντε σο μανγκέλα.
22 Σόσκε ο Ντατ να κρίνελα ούτε εκχέ τζενές, αλλά τσσουντάς ι Τσσαβές τι κρίνελ σαριλέν,
23 για τι σεβάνεν σαρέ ι Τσσαβές σαρ σεβάνενα ι Νταντές. Κον να σεβάνελα ι Τσσαβές να σεβάνελα ι Νταντές σο μπουτσσαντάς-λες.
24 Μπαγιά, μπαγιά βακεράβα τουμένγκε: Κον ασουνέλα μο λάφι ντα πακιάλα Οντουλές σο μπουτσσαντάς-μαν τζουβντιόλα για πάντα, ντα να κρίντιβελα αλλά νακχλάς κατά μεριπέ κι ζωή.
25 »Μπαγιά, μπαγιά βακεράβα τουμένγκε: Αβέλα ο σαάτι, ντα αβιλό μπίλιμα, σο ο μουλέ κα ασουνέν ι Ντεβλέσκε Τσσαβές τι ντελ-λεν βίκος ντα οντουλά σο κα ντεν καν κα τζουβντιόν.
26 Σόσκε σαρ ο Ντατ τθερέλα ζωή αντρέ πέστε,* αντικάς ντινάς κο Τσσαβό-ντα τι τθερέλ ζωή αντρέ πέστε.
27 Ντα ντινάς-λες ι ζορ τι κρίνελ, σόσκε ισί Τσσαβό τζενέσκο.
28 Μα σαστίνεν ανταλέσταρ, σόσκε αβέλα ο σαάτι σο σαρέ οντουλά σο ισί κο μεζάρια* κα ασουνέν τι ντελ-λεν βίκος
29 ντα κα νικιόν. Οντουλά σο κερντέ λατσσέ πράγματα κα ιστίν για τι τζουβντιόν ντα οντουλά σο κερντέ μπέτι πράγματα κα ιστίν για τι κρίντιβεν.
30 Με ναστί κεράβα ούτε εκ πράγμας κορκορό. Σαρ ασουνάβα, κρίναβα, ντα κρίναβα δίκαια, σόσκε να κεράβα σο μανγκάβα με, αλλά σο μανγκέλα οντουβά σο μπουτσσαντάς-μαν.
31 »Άμα σάντε με κεράβα λάφι μάνγκε κο τζενέ, μο λάφια νανέ μπαγιά.
32 Γιαβέρ κερέλα λάφι μάνγκε κο τζενέ, ντα τζανάβα ότι λέσκε λάφια ισί μπαγιά.
33 Τουμέν μπουτσσαντέν μουρσέν κο Ιωάννης, ντα βοβ βακερντάς ι αλήθεια.
34 Όμως, με να τθεράβα ανάγκη ο λάφια σο ισί τζενέσταρ, αλλά βακεράβα-λεν ανταλά για τι σώντιβεν τουμέν.
35 Βοβ ισινέ λυχνάρι σο πφαμπόλας* ντα λέλας-πες, ντα τουμέν για χάνικ βακίτι μανγκλένας τι χαιρίνεν μπουτ κο φως λέσκο.
36 Αλλά με τθεράβα κάτι πο σημαντικός οντουλέσταρ σο βακερντάς ο Ιωάννης, σόσκε ο μπουτιά σο ντινάς-μαν μο Ντατ τι κεράβ, ανταλά μπουτιά σο κεράβα, σικαβένα ότι μπουτσσαντάς-μαν ο Ντατ.
37 Ντα ο Ντατ σο μπουτσσαντάς-μαν βακερντάς κον ισινόμ. Τουμέν ποτές να ασουντέν λέσκι φωνή ντα να ντικχλέν λέσκο μούι,
38 ντα λέσκο λάφι να ατσσόλα αντρέ τουμέντε, σόσκε να πακιάνα οντουλές σο μπουτσσαντάς βοβ.
39 »Τουμέν ρόντενα μπουτ λατσσές κι Γραφή, σόσκε αμντίνενα ότι αντράλ λάταρ κα τθερέν ζωή για πάντα. Ντα η Γραφή ισί σο κερέλα λάφι μάνγκε κο τζενέ.
40 Όμως, τουμέν να μανγκένα τι αβέν μάντε για τι τζουβντιόν.
41 Να μανγκάβα ισαριπέ κατά τζενέ,
42 αλλά τζανάβα λατσσές ότι να τθερένα ι αγάπη ι Ντεβλέσκι αντρέ τουμέντε.
43 Με αβιλόμ μι Νταντέσκε ναβέστε, αλλά να δεχτίνενα-μαν. Άμα εκ γιαβέρ κα αβέλας πιρέ ναβέστε, λες κα δεχτίνενας-λες.
44 Σαρ αβέλα-πες τουμέν τι πακιάν, κάνα λένα ισαριπέ ο εκ κατά γιαβέρ ντα να μανγκένα τι λεν ο ισαριπέ σο αβέλα κατά μοναδικός Ντεβέλ;
45 Μα αμντίνεν ότι με κα κατηγορίναβ-τουμέν κο Ντατ. Οντουβά σο κατηγορίνελα-τουμέν ισί ο Μωυσής, σο τθερένα λέσκε τουμαρί μπέσα.*
46 Άμα πακιάνας ι Μωυσής, κα πακιάνας μαν-ντα, σόσκε βοβ γραφιντάς μάνγκε.
47 Αλλά άμα να πακιάνα οντουλά σο γραφιντάς βοβ, σαρ κα πακιάν μιρέ λάφια;»
Υποσημειώσεις
^ Γιαβέρσοϊ «ξαπλωμέ».
^ Γιαβέρσοϊ «πασλέ, αμπορεμέ».
^ Γιαβέρσοϊ «μπανγκέ».
^ Γιαβέρσοϊ «κρεβάτι».
^ Γιαβέρσοϊ «κρεβάτι».
^ Γιαβέρσοϊ «κρεβάτι».
^ Γιαβέρσοϊ «κρεβάτι».
^ Γιαβέρσοϊ «μπίλατσσο, κακός».
^ Γιαβέρσοϊ «τθερέλα αντρέ πέστε ο δώρος ι ζωγιάκο».
^ Ανταλά ισί ο μεζάρια ι μουλένγκε σο τθερέλα-λεν ο Ντεβέλ πι γκοντιάτε. Ο λάφι «μεζάρι» βακέρντιβελα εμ «λιμόρι».
^ Γιαβέρσοϊ «ισινέ αλαντό λυχνάρι».
^ Κι Πουρανί Μπαλαμανί ισινέ ο λάφι «ελπίδα».
