Ο Ευαγγέλιος σο Γραφιντάς ο Ιωάννης 6:1-71
6 Σοράν ανταλέσταρ, ο Ιησούς νασλό για τι τζαλ κι γιαβέρ μπάντα κι Ντεριαβάκι κι Γαλιλαία σο βακέρντιβελας εμ Τιβεριάδα.
2 Ντα τζάνας παλά-λέστε μπουτ τζενέ, σόσκε ντικχένας ο θαύματα σο κερέλας κάνα σαστιαρέλας ι νασφαλέν.*
3 Οτθάρ, ο Ιησούς νικλιντάς εκχέ βεσέστε ντα μπεσλό οτθέ γιεκ πι μαθητέντζαρ.
4 Ισινέ πασέ ο Πάσχας, ο μπαρό ντιβές ι Ιουδαιόνγκο.
5 Κάνα ο Ιησούς βαντιντάς πο γιακχά ντα ντικχλάς τι αβέν κάρινγκ λέστε μπουτ τζενέ, βακερντάς κο Φίλιππος: «Κατάρ κα κινάς μαντρό για τι χαν βον;»
6 Αλλά βακερντάς-λες ανταβά για τι δοκιμάνελ-λες, σόσκε ο Ιησούς τζανέλας σο κα κερέλας.
7 Ο Φίλιππος βακερντάς λέσκε: «Διακόσια δηνάρια-ντα τι ντας για τι κινάς μαντρέ, να κα ερεσέν για τι λελ ο κάθε εκ ατζέ-ντα εκ στάλα».
8 Εκ λέσκε μαθητένταρ, ο Ανδρέας, ο πφραλ σο τθερέλας ο Σίμωνας Πέτρος, βακερντάς λέσκε:
9 «Ισί ατθέ εκ τσσαβορό σο τθερέλα παντς μαντρέ τζοβιάταρ ντα ντούι χουρντέ ματσσέ. Αλλά σο ισί ανταλά αζόμ μπουτέ τζενένγκε;»
10 Ο Ιησούς βακερντάς: «Τσσουβέν ι τζενέν τι μπεσέν». Ισινέ μπαρί τσαρ οντουλέ τθανέστε, οτθάρ μπεσλέ οτθέ. Ο μουρσά ισινέ πασέ παντς χιλιάδες.
11 Ο Ιησούς λιντάς ο μαντρέ, κερντάς εκ προσευχή για τι βακερέλ ευχαριστώ κο Ντεβέλ ντα ιλιαντάς-λεν οντουλέντε σο μπεσένας οτθέ. Κερντάς-λες ανταβά εμ ι χουρντέ ματσσέντζαρ, ντα χαλέ σαρέ καζόμ μανγκένας.
12 Κάνα όμως τσαλιλέ, βακερντάς πι μαθητένγκε: «Γκίντεν οντουλά σο ατσσιλέ, για μα τι τζαλ χαμέ τίποτα».
13 Οτθάρ, γκιντιντέ-λεν ντα πφερντέ 12 σεβλιά* οντουλένταρ σο μουκχλέ ο τζενέ σο χαλέ κατά παντς μαντρέ τζοβιάταρ.
14 Κάνα ο τζενέ ντικχλέ ο θαύμας σο κερντάς, βακερένας: «Μπαγιά βοβ ισί ο Προφήτης σο κα αβέλας κο ντουνιάς».
15 Αζομάν ο Ιησούς τζανέλας ότι κα αβένας ντα κα καπτίνενας-λες για τι κερέν-λες βασιλιάς, οτθάρ γκιλό πάλι κο βες για τι αβέλ ντιπ κορκορό.
16 Κάνα αράτιλο, λέσκε μαθητές γουλίστιλε κι ντεριάβ,
17 τσσουντέ-πες εκχέ βαρκάτε ντα νασλέ για τι τζαν κι γιαβέρ μπάντα κι ντεριαβάκι, κι Καπερναούμ. Πελόας καρανίκι ντα ο Ιησούς να γκιλόας ατζέ λέντε.
18 Κι ντεριάβ αβιλίας φουρτούνα, σόσκε πφούντελας ζουρανί μπαρμπάλ.
19 Όμως, κάνα νασλέας ι βαρκάσαρ πασέ παντς ή σιοβ χιλιόμετρα,* ντικχλέ ι Ιησούς τι πφιρέλ οπράλ κι ντεριάβ ντα τι αβέλ πασέ κι βάρκα ντα νταρασάλε.
20 Βοβ όμως βακερντάς λένγκε: «Με ισινόμ. Μα νταρέν!»
21 Αζομάν λιντέ-λες χαράσαρ αντρέ κι βάρκα, ντα μπουτ σουγκό η βάρκα ερεσλί κο τθαν σο τζάνας.
22 Ο γιαβέρ ντιβές ο μπουτ τζενέ σο ατσσιλέας κι γιαβέρ μπάντα κι ντεριαβάκι ντικχλέ ότι να ισινέ βάρκα οτθέ. Πο τζανγκλέ ισινέ εκ χουρντί βάρκα, αλλά ο Ιησούς να τσσουντάας-πες αντρέ ανταλάτε γιεκ πι μαθητέντζαρ, σόσκε βον νασλέας κορκορέ.
23 Όμως, ερεσλέ βάρκες κατά Τιβεριάδα πασέ κο τθαν σο χαλέας ο τζενέ ο μαντρό σοράν κατά προσευχή σο κερντάας ο Κύριος για τι βακερέλ ευχαριστώ κο Ντεβέλ.
24 Οτθάρ, κάνα ντικχλέ ο τζενέ ότι να ισινέ οτθέ ο Ιησούς ντα λέσκε μαθητές, τσσουντέ-πες πουμαρέ βαρκέντε ντα γκιλέ κι Καπερναούμ τι ρόντεν ι Ιησούσκε.
25 Κάνα αρακχλέ-λες κι γιαβέρ μπάντα κι ντεριαβάκι, βακερντέ λέσκε: «Ραββί, κάνα αβιλάν ατθέ;»
26 Ο Ιησούς βακερντάς λένγκε: «Μπαγιά, μπαγιά βακεράβα τουμένγκε: Να ρόντενα μάνγκε επειδή ντικχλέν θαύματα, αλλά επειδή χαλέν κατά μαντρέ ντα τσαλιλέν.
27 Μα κερέν μπουτί ι χαμπέσκε σο χαλάντιβελα, αλλά ι χαμπέσκε σο να χαλάντιβελα ντα ντέλα ζωή για πάντα. Ανταγιά ζωή κα ντελ-λα τουμέντε ο Τσσαβό ι τζενέσκο. Σόσκε οπρά-λέστε ο Ντατ, ο Ντεβέλ, τσσουντάς πι σφραγίδα ότι κερέλα λέσκο γκι».
28 Οτθάρ βακερντέ λέσκε: «Σο χρειαζίντιβελα για τι κεράς οντουλά σο μανγκέλα ο Ντεβέλ;»
29 Ο Ιησούς βακερντάς λένγκε: «Ακαβά ισί σο μανγκέλα ο Ντεβέλ: Τι σικαβέν πίστη οντουλέστε σο μπουτσσαντάς βοβ».
30 Αζομάν βακερντέ λέσκε: «Σο θαύμας κα κερές, για τι ντικχάς-λες ντα τι πακιάς-τουτ; Σο κα κερές;
31 Αμαρέ παππούδες χαλέ ο μάννα κι έρημος, σαρ ισί γραμμέ: “Ντινάς-λεν τι χαν μαντρό κατά ουρανός”».
32 Αζομάν ο Ιησούς βακερντάς λένγκε: «Μπαγιά, μπαγιά βακεράβα τουμένγκε: Να ντινάς-τουμέν ο Μωυσής ο μαντρό κατά ουρανός, αλλά μο Ντατ ντέλα-τουμέν ο αληθινός μαντρό κατά ουρανός.
33 Σόσκε ο μαντρό ι Ντεβλέσκο ισί οντουβά σο γουλίλα κατά ουρανός ντα ντέλα ζωή κο ντουνιάς».
34 Οτθάρ, βον βακερντέ λέσκε: «Κύριε, ντε-αμέν πάντα ανταβά μαντρό».
35 Ο Ιησούς βακερντάς λένγκε: «Με ισινόμ ο μαντρό ι ζωγιάκο. Κον αβέλα μάντε να κα μποκχάλιβελ ποτές, ντα κον σικαβέλα πίστη μάντε να κα μερέλ πανίσκε ποτές.
36 Όμως, σαρ βακερντόμ τουμένγκε, αν-ντα ντικχλέν-μαν, να πακιάνα.
37 Σαρέ οντουλά τζενέ σο ντέλα-μαν ο Ντατ κα αβέν μάντε, ντα να κα πάλνταβ καεκχές σο αβέλα μάντε.
38 Σόσκε να γουλίστιλομ κατά ουρανός για τι κεράβ σο μανγκάβα με, αλλά σο μανγκέλα οντουβά σο μπουτσσαντάς-μαν.
39 Ανταβά μανγκέλα οντουβά σο μπουτσσαντάς-μαν, μα τι χασαράβ καεκχές σαρέ οντουλένταρ σο ντινάς-μαν αλλά τι τζουβντιαράβ-λεν κο τελευταίος ντιβές.
40 Σόσκε ανταβά μανγκέλα μο Ντατ, τι τζουβντιόλ για πάντα κον δεχτίνελα ι Τσσαβές ντα σικαβέλα πίστη λέστε, ντα με κα τζουβντιαράβ-λες κο τελευταίος ντιβές».
41 Αζομάν ο Ιουδαίοι γκρινιάνενας σόσκε βακερντάας: «Με ισινόμ ο μαντρό σο γουλίστιλο κατά ουρανός».
42 Ντα βακερένας: «Ανταβά νανέ ο Ιησούς, ο τσσαβό ι Ιωσηφίσκο, σο τζανάσα λέσκε νταντές ντα λέσκε νταγιά; Σαρ βακερέλα ακανά: “Γουλίστιλομ κατά ουρανός”;»
43 Ο Ιησούς βακερντάς: «Μα γκρινιάνεν.
44 Καέκ ναστί αβέλα μάντε άμα να κα ταρτίνελ-λες πασέ μάντε ο Ντατ σο μπουτσσαντάς-μαν, ντα με κα τζουβντιαράβ-λες κο τελευταίος ντιβές.
45 Ισί γραμμέ κο Προφήτες: “Σαριλέν κα σικλιαρέλ-λεν ο Ιεχωβά”.* Κον ασουντάς ι Νταντές ντα σικλιλό λέσταρ αβέλα μάντε.
46 Νανέ ότι ντικχλάς καέκ τζενό ι Νταντές. Αλλά σάντε οντουβά σο ισί κατά Ντεβέλ, βοβ ντικχλάς ι Νταντές.
47 Μπαγιά, μπαγιά βακεράβα τουμένγκε: Κον πακιάλα τζουβντιόλα για πάντα.
48 »Με ισινόμ ο μαντρό ι ζωγιάκο.
49 Τουμαρέ παππούδες χαλέ ο μάννα κι έρημος αλλά μουλέ.
50 Ανταβά ισί ο μαντρό σο γουλίλα κατά ουρανός. Κον χάλα ανταλέσταρ να κα μερέλ.
51 Με ισινόμ ο τζουβντό μαντρό σο γουλίστιλο κατά ουρανός. Άμα εκ τζενό κα χαλ ανταλέ μαντρέσταρ, κα τζουβντιόλ για πάντα. Ντα ο μαντρό σο κα νταβ με ισί μο σώμας για τι τζουβντιόλ ο ντουνιάς».
52 Αζομάν ο Ιουδαίοι χάνας-πες λαφίντζαρ ο εκ ι γιαβερέσαρ ντα βακερένας: «Σαρ μπορίνελα βοβ τι ντελ-αμέν τι χας λέσκο σώμας;»
53 Ντα ο Ιησούς βακερντάς λένγκε: «Μπαγιά, μπαγιά βακεράβα τουμένγκε: Άμα να κα χαν ο σώμας ι τζενέσκε Τσσαβέσκο ντα να κα πιν λέσκο ρατ, να τθερένα ζωή αντρέ τουμέντε.
54 Κον χάλα μο σώμας ντα πίλα μο ρατ τζουβντιόλα για πάντα, ντα με κα τζουβντιαράβ-λες κο τελευταίος ντιβές.
55 Σόσκε μο σώμας ισί αληθινός χαμπέ ντα μο ρατ ισί αληθινός πιπέ.
56 Κον χάλα μο σώμας ντα πίλα μο ρατ ατσσόλα ενωμέ μάντζαρ, ντα με ενωμέ λέσαρ.
57 Σαρ ο τζουβντό Ντατ μπουτσσαντάς-μαν ντα με τζουβντιάβα ιτιρί ι Νταντέσταρ, αντικάς-ντα οντουβά σο χάλα μαν κα τζουβντιόλ ιτιρί μάνταρ.
58 Ανταβά ισί ο μαντρό σο γουλίστιλο κατά ουρανός. Νανέ σαρ αζομάν σο χαλέ τουμαρέ παππούδες αλλά μουλέ. Κον χάλα ανταβά μαντρό κα τζουβντιόλ για πάντα».
59 Ανταλά βακερντάς-λεν καζόμ σικλιαρέλας εκχέ συναγωγιάτε κι Καπερναούμ.
60 Μπουτ λέσκε μαθητένταρ, κάνα ασουντέ-λεν ανταλά, βακερντέ: «Σο λάφια ισί ανταλά; Κον μπορίνελα τι ασουνέλ-λεν;»
61 Αλλά ο Ιησούς τζανέλας αντρέ πέστε ότι λέσκε μαθητές γκρινιάνενας οντουλέσκε σο βακερντάας, οτθάρ βακερντάς λένγκε: «Ανταβά κερέλα-τουμέν τι χασαρέν τουμαρί πίστη;*
62 Ντα σο κα αβέλ-πες άμα κα ντικχέν ι τζενέσκε Τσσαβές τι νικλίλ οτθέ σο ισινέ ανγκλέ;
63 Ο πνεύμας ισί σο ντέλα ζωή. Ο σώμας να κερέλα τίποτα. Ο λάφια σο βακερντόμ τουμένγκε με ισί πνεύμας ντα ισί ζωή.
64 Αλλά ισί μερικοί τουμένταρ σο να πακιάνα». Σόσκε ο Ιησούς τζανέλας κατά αρχή καλά τζενέ να πακιάνας ντα κον κα ντέλας-λες λέσκε ντουσμανίνγκε* βαστέντε.
65 Σοράν βακερντάς: «Οντουλέσκε βακερντόμ τουμένγκε ότι καέκ ναστί αβέλα μάντε άμα να μουκχλάς-λες ο Ντατ».
66 Ιτιρί ανταλέσταρ, μπουτ λέσκε μαθητένταρ βουρτισάλε κο πράγματα σο μουκχλέας παλά-πουμέντε ντα τσσιναντέ τι πφιρέν λέσαρ.
67 Οτθάρ, ο Ιησούς βακερντάς κο Δώδεκα: «Μα τι μανγκένα τι τζαν τουμέν-ντα;»
68 Ο Σίμωνας Πέτρος βακερντάς λέσκε: «Κύριε, κάστε τι τζας; Τούι τθερέσα λάφια σο ντένα ζωή για πάντα.
69 Αμέν πακιαντάμ ντα τζανάσα ότι τούι ισινάν ο Άγιος σο μπουτσσάντιλο κατά Ντεβέλ».
70 Ο Ιησούς βακερντάς λένγκε: «Με να τραμπιντόμ τουμέν σο ισινέν δώδεκα; Όμως, εκ τανό τουμένταρ ισί σαρ ο Μπενγκ».*
71 Βακερέλας ι Ιουδάσκε, σο λέσκο ντατ ισινέ ο Σίμωνας ο Ισκαριώτης, σόσκε βοβ κα ντέλας-λες λέσκε ντουσμανίνγκε βαστέντε, παρόλο σο ισινέ εκ κατά Δώδεκα.
Υποσημειώσεις
^ Γιαβέρσοϊ «κάνα κερέλας λατσσές ι πασλέ, αμπορεμέ τζενέν».
^ Γιαβέρσοϊ «κοφίνες».
^ Κι Πουρανί Μπαλαμανί βακέρντιβελας «πασέ 25 ή 30 στάδια».
^ Γιαβέρσοϊ «τι περέν».
^ Γιαβέρσοϊ «εχθρόνγκε».
^ Γιαβέρσοϊ «ισί διάβολος». Ανταβά λάφι μανγκέλα τι βακερέλ «οντουβά σο χαλαβέλα ο λατσσό ναβ εκχέ γιαβερέσκο».
