Ο Ευαγγέλιος σο Γραφιντάς ο Ιωάννης 7:1-52
7 Σοράν ανταλέσταρ, ο Ιησούς μπεσλό κι Γαλιλαία, σόσκε να μανγκέλας τι τζαλ κι Ιουδαία επειδή ο Ιουδαίοι ρόντενας κάνα κα αβέλας πο λατσσές τι μουνταρέν-λες.
2 Όμως, ισινέ πασέ ο Μπαρέ Ντιβεσά ι Τσαντιρίνγκε σο κερένας ο Ιουδαίοι.
3 Οτθάρ, λέσκε πφραλά βακερντέ λέσκε: «Νας ακατάρ ντα τζα κι Ιουδαία, για τι ντικχέν το μαθητές-ντα οντουλά σο κερέσα.
4 Σόσκε καέκ να κερέλα κάτι γκεραντές κάνα μανγκέλα τι τζανέν-λες σαρέ. Αφού κερέσα ανταλά πράγματα, σίκαβ-τουτ κο ντουνιάς».
5 Όμως, λέσκε πφραλά να πακιάνας λέστε.
6 Ντα ο Ιησούς βακερντάς λένγκε: «Νανέ ατζέ μο βακίτι, αλλά τουμένγκε ισί πάντα σωστός ο βακίτι.
7 Ο ντουνιάς να μισίνελα τουμέν, μαν όμως μισίνελα-μαν σόσκε σικαβάβα ότι οντουλά σο κερέλα ισί πφιρνικανέ.*
8 Τουμέν τζαν τι κερέν ο μπαρέ ντιβεσά. Με να τζάβα ατζέκ οτθέ, σόσκε ο βακίτι μάνγκε ατζέ να αβιλό ντιπ».
9 Κάνα βακερντάς-λεν λένγκε ανταλά, μπεσλό κι Γαλιλαία.
10 Όμως, κάνα λέσκε πφραλά γκιλέ τι κερέν ο μπαρέ ντιβεσά, γκιλό βοβ-ντα αποτσοράλ.
11 Οτθάρ, ο Ιουδαίοι ρόντενας λέσκε κο μπαρέ ντιβεσά ντα βακερένας: «Κατέ ισί βοβ;»
12 Ντα μπουτ τζενέ κερένας λέσκο λάφι αποτσοράλ. Μερικοί βακερένας: «Ισί λατσσό τζενό». Γιαβερά βακερένας: «Νανέ. Χουχαβέλα ι ντουνιάς».
13 Όμως, καέκ λένταρ να κερέλας λέσκο λάφι ανγκλάλ κο τζενέ, σόσκε νταρένας κατά Ιουδαίοι.
14 Κο μασκάρ κι μπαρέ ντιβεσένγκο, ο Ιησούς γκιλό κο ναός ντα σικλιαρέλας.
15 Ντα ο Ιουδαίοι ατσσόνας πουταρντέ μόσαρ ντα βακερένας: «Σαρ τζανέλα βοβ ι Γραφή* αφού να σπουδαντάς;»*
16 Αζομάν ο Ιησούς βακερντάς λένγκε: «Ανταλά σο σικλιαράβα με νανέ μιρέ, αλλά οντουλέσκε σο μπουτσσαντάς-μαν.
17 Άμα εκ τζενό μανγκέλα τι κερέλ οντουβά σο μανγκέλα ο Ντεβέλ, κα αγαβέλ άμα ο σικλιαριπέ ισί κατά Ντεβέλ ή άμα με βακεράβα μιρέ λάφια.
18 Κον βακερέλα πιρέ λάφια μανγκέλα τι ντιντιόλ η δόξα λέστε. Αλλά κον μανγκέλα τι ντιντιόλ η δόξα οντουλέστε σο μπουτσσαντάς-λες, βοβ βακερέλα ι αλήθεια ντα νανέ αδικία λέστε.
19 Να ντινάς-τουμέν ο Μωυσής ο Νόμος; Όμως, καέκ τουμένταρ να ντέλα καν κο Νόμος. Σόσκε μανγκένα τι μουνταρέν-μαν;»
20 Ο τζενέ βακερντέ: «Τθερέσα δαιμονάς. Κον μανγκέλα τι μουνταρέλ-τουτ;»
21 Ο Ιησούς βακερντάς λένγκε: «Εκ πράγμας κερντόμ ντα σαρέ σαστισάλεν.
22 Όμως, σκεφτίνεν ακαβά: Ο Μωυσής ντινάς-τουμέν ι περιτομή, σο νανέ κατά Μωυσής αλλά τουμαρέ παππουδένταρ, ντα κερένα ατζέ-ντα Σάββατος περιτομή.
23 Άμα κερένα περιτομή εκχέσκε Σάββατος για τι ντεν καν κο Νόμος κι Μωυσίσκο, σαρ αβέλα-πες τι χολιάνεν μάνγκε μπουτ σο κερντόμ ντιπ λατσσές εκχέ τζενές Σάββατος;
24 Μα κρίνεν οντουλέσταρ σο ντικχίντιβελα αβριάλ, αλλά τι κρίνεν δίκαια».
25 Αζομάν μερικοί οντουλένταρ σο μπεσένας κι Ιερουσαλήμ βακερένας: «Ακαβά νανέ σο μανγκένα τι μουνταρέν ο τζενέ;
26 Ντικχέν! κερέλα λάφι ανγκλάλ κο τζενέ ντα να βακερένα λέσκε τίποτα. Μα τι πακιαντέ ο άρχοντες ότι βοβ ισί ο Χριστός;
27 Όμως, ακαβά τζανάσα κατάρ ισί, αλλά κάνα κα αβέλ ο Χριστός, καέκ να κα τζανέλ κατάρ ισί».
28 Αζομάν, ο Ιησούς σαρ σικλιαρέλας κο ναός, βακερντάς ζουρανές: «Εμ μαν τζανένα εμ-ντα κατάρ ισινόμ τζανένα. Ντα να αβιλόμ από κορκορό, αλλά Οντουβά σο μπουτσσαντάς-μαν τζουβντιόλα μπαγιά, ντα τουμέν να τζανένα-λες.
29 Με τζανάβα-λες, σόσκε αβιλόμ λέσκε ναβέστε, ντα Βοβ μπουτσσαντάς-μαν».
30 Οτθάρ, ρόντενας κάνα κα αβέλας πο λατσσές τι ασταρέν-λες, αλλά καέκ να κερντάς-λες, σόσκε ατζέ να αβιλόας λέσκο σαάτι.
31 Αλλά μπουτ οντουλένταρ σο ισινέ οτθέ πακιαντέ λέστε ντα βακερένας: «Κάνα κα αβέλ ο Χριστός, μήπως κα κερέλ πο μπουτ θαύματα ανταλέ τζενέσταρ;»
32 Ο Φαρισαίοι ασουντέ ι τζενέν τι βακερέν αποτσοράλ ανταλά πράγματα σο τθερένας τι κερέν λέσαρ. Βον γιεκ ι μπαρέ ιερεόντζαρ,* μπουτσσαντέ τζενέν σο αρακχαβένας ο ναός για τι ασταρέν-λες.
33 Αζομάν ο Ιησούς βακερντάς: «Κα αβάβ χάνικ ατζέ τουμέντζαρ πριν τι τζαβ Οντουλέστε σο μπουτσσαντάς-μαν.
34 Κα ρόντεν μάνγκε αλλά να κα αρακχέν-μαν, ντα οτθέ σο ισινόμ με τουμέν ναστί αβένα».
35 Οτθάρ, ο Ιουδαίοι βακερντέ ο εκ ι γιαβερέσκε: «Κάι σκεφτίνελα τι τζαλ ανταβά τζενό ντα αμέν να κα αρακχάς-λες; Μα τι σκεφτίνελα τι τζαλ κο Ιουδαίοι σο ισί τρουγιμέ αντρέ κο Μπαλαμέ ντα τι σικλιαρέλ ι Μπαλαμέν;
36 Σο μανγκένα τι βακερέν λέσκε λάφια: “Κα ρόντεν μάνγκε αλλά να κα αρακχέν-μαν, ντα οτθέ σο ισινόμ με τουμέν ναστί αβένα”;»
37 Ο τελευταίος ντιβές, σο ισί ο πο σημαντικός ντιβές ι μπαρέ ντιβεσένγκο, ο Ιησούς ιστίντιλο οπρέ ντα βακερντάς ζουρανές: «Άμα εκ τζενό μερέλα πανίσκε, τι αβέλ μάντε ντα τι πιλ.
38 Οντουλέσκε σο πακιάλα μάντε γραφίντιλο: “Αντρά-λέσταρ κα τθάβντεν λενιά τζουβντέ πανίσκε”».
39 Όμως, ανταλά λάφια τθερένας τι κερέν ι Ντεβλέσκε πνευμάσαρ σο κα λένας-λες οντουλά σο πακιαντέ λέστε. Ατζέ να ντιντιλόας ο πνεύμας, σόσκε ο Ιησούς ατζέ να δοξάντιλοας.
40 Μερικοί κατά τζενέ σο ασουντέ ανταλά λάφια βακερένας: «Βοβ ισί μπαγιά ο Προφήτης».
41 Γιαβερά βακερένας: «Βοβ ισί ο Χριστός». Μερικοί όμως βακερένας: «Κατά Γαλιλαία αβέλα ο Χριστός;
42 Να βακερέλα η Γραφή ότι ο Χριστός αβέλα οντουλένταρ σο αστάρντιβενα κατά Δαβίδ ντα κατά Βηθλεέμ σο ισινέ ο γκαβ ι Δαβιδίσκο;»
43 Οτθάρ, ο τζενέ τθερένας διχόνοια ιτιρί λέσταρ.
44 Ατζέ, μερικοί μανγκένας τι ασταρέν-λες, αλλά καέκ να κερντάς-λες.
45 Αζομάν οντουλά σο αρακχαβένας ο ναός βουρτισάλε κο μπαρέ ιερείς ντα κο Φαρισαίοι, ντα βον πουτσλέ-λεν: «Σόσκε να αντέν-λες;»
46 Βον βακερντέ: «Ποτές να κερντάς λάφι αντικάς γιαβέρ τζενό».
47 Ντα ο Φαρισαίοι βακερντέ: «Μα τι χουχάντιλεν τουμέν-ντα;
48 Πακιαντάς καέκ κατά άρχοντες ή κατά Φαρισαίοι λέστε;
49 Ακαλά τζενέ όμως, σο να τζανένα ο Νόμος, τθερένα αρμάν οπρά-πουμέντε».
50 Ο Νικόδημος, σο αβιλόας λέστε εκ γιαβέρ φαρ ντα ισινέ λένταρ, βακερντάς λένγκε:
51 «Κρίνελα αμαρό Νόμος εκχέ τζενές άμα πρώτα να ασουντάς-λες ντα να σικλιλό σο κερντάς;»
52 Βον βακερντέ λέσκε: «Μα τι ισινάν τούι-ντα κατά Γαλιλαία; Ρόντε ντα κα ντικχές ότι καέκ προφήτης να κα νικιόλ κατά Γαλιλαία».*
Υποσημειώσεις
^ Γιαβέρσοϊ «γκεραλέ, μπίλατσσε».
^ Κι Πουρανί Μπαλαμανί ισινέ ο λάφι «γράμματα».
^ Δηλαδή κο σχολεία κι θρησκειάκε.
^ Μπερεκέτι πουρανέ ντα σωστές Γραφές να τθερένα ο εδάφια 7:53 μέχρι 8:11.
