Ο Ευαγγέλιος σο Γραφιντάς ο Ιωάννης 9:1-41
9 Καζόμ τζάλας, ντικχλάς εκχέ τζενές σο μπιάντιλοας κορορό.
2 Ντα λέσκε μαθητές πουτσλέ-λες: «Ραββί, κον αμαρτιντάς, βοβ ή λέσκο ντατ ντα λέσκι ντάι, ντα μπιάντιλο κορορό;»
3 Ο Ιησούς βακερντάς: «Ούτε βοβ αμαρτιντάς ούτε λέσκο ντατ ντα λέσκι ντάι, αλλά ανταβά αβιλό-πες για τι σικάντιβελ σο μπορίνελα τι κερέλ ο Ντεβέλ λέσκε.
4 Αμέν πρέπει τι κεράς ι μπουτί Οντουλέσκι σο μπουτσσαντάς-μαν καζόμ ισί ατζέ ντισάρα. Αβέλα η ιράτ, οτθάρ καέκ ναστί κα κερέλ μπουτί.
5 Καζόμ ισινόμ κο ντουνιάς, ισινόμ ο φως ι ντουνιάσκο».
6 Αφού βακερντάς-λεν ανταλά, τσσουνγκιαρντάς τελέ ντα κερντάς τσικ, τσσουντάς ι τσικ κο γιακχά κι τζενέσκε
7 ντα βακερντάς λέσκε: «Τζα τι τθοβές-τουτ κο πανί Σιλωάμ» (σο μανγκέλα τι βακερέλ «οντουβά σο μπουτσσάντιλο»). Ντα βοβ γκιλό ντα τθοντάς-πες, ντα κάνα βουρτισάλο παλάλ ντικχέλας.
8 Αζομάν ο γείτονες ντα οντουλά σο ανγκλέ ντικχένας-λες τι μανγκέλ λοβέ βακερένας: «Ακαβά νανέ σο μπεσέλας ντα μανγκέλας λοβέ;»
9 Μερικοί βακερένας: «Βοβ ισί». Γιαβερά βακερένας: «Νάα, μοιάζελα λέστε». Ο τζενό βακερέλας: «Με ισινόμ».
10 Οτθάρ, πουτσλέ-λες: «Ντα σαρ πουτάρντιλε το γιακχά;»
11 Βοβ βακερντάς: «Ο τζενό σο βακέρντιβελα Ιησούς κερντάς τσικ ντα τσσουντάς-λα μι γιακχίντε ντα βακερντάς μάνγκε: “Τζα κο Σιλωάμ ντα τθοβ-τουτ”. Οτθάρ, γκιλόμ, τθοντόμ-μαν ντα ντικχλόμ».
12 Αζομάν βακερντέ λέσκε: «Κάι ισί οντουβά τζενό;» Βοβ βακερντάς: «Να τζανάβα».
13 Γκερντέ κο Φαρισαίοι ι τζενές σο ανγκλέ ισινέ κορορό.
14 Ισινέ Σάββατος κάνα ο Ιησούς κερντάς ι τσικ ντα πουταρντάς λέσκε γιακχά.
15 Οτθάρ, ανταγιά φαρ πουτσλέ-λες ο Φαρισαίοι-ντα σαρ αρχισάλο τι ντικχέλ. Βοβ βακερντάς λένγκε: «Τσσουντάς τσικ μι γιακχίντε, τθοντόμ-μαν ντα ντικχάβα».
16 Αζομάν μερικοί Φαρισαίοι βακερένας: «Νανέ κατά Ντεβέλ ανταβά τζενό, σόσκε να κερέλα ο Σάββατος». Γιαβερά βακερένας: «Σαρ αβέλα-πες εκ τζενό σο ισί αμαρτωλός τι κερέλ ασακέ θαύματα;» Ντα γιαβερά βακερέλας ο εκ ντα γιαβερά ο γιαβέρ.
17 Ντα βακερντέ ατζέκ εκ φαρ κο κορορό: «Τούι σο βακερέσα, αφού τιρέ γιακχά πουταρντάς;» Βοβ βακερντάς: «Ισί προφήτης».
18 Όμως, ο Ιουδαίοι να πακιαντέ ότι ανγκλέ ισινέ κορορό ντα ακανά ντικχέλας. Οτθάρ, ντινέ βίκος λέσκε νταντές ντα λέσκε νταγιά.
19 Ντα πουτσλέ-λεν: «Ανταβά ισί τουμαρό τσσαβό, σο βακερένα ότι μπιάντιλο κορορό; Σαρ ντικχέλα ακανά;»
20 Βον βακερντέ: «Αμέν τζανάσα ότι ανταβά ισί αμαρό τσσαβό ντα ότι μπιάντιλο κορορό.
21 Αλλά σαρ αβέλα-πες ακανά τι ντικχέλ να τζανάσα. Ντα να τζανάσα κον πουταρντάς λέσκε γιακχά. Λες πουτσέν. Μπαρό τσσαβό ισί. Βοβ τι κερέλ λάφι πέσκε».
22 Λέσκο ντατ ντα λέσκι ντάι βακερντέ-λεν ανταλά επειδή νταρένας κατά Ιουδαίοι, σόσκε ο Ιουδαίοι τθερένας βακερντό ότι, άμα καέκ τζενό κα μουτθαβέλας ότι ο Ιησούς ισινέ ο Χριστός, κα πάλντενας-λες κατά συναγωγή.
23 Άκ’ σόσκε λέσκο ντατ ντα λέσκι ντάι βακερντέ: «Μπαρό τσσαβό ισί. Λες πουτσέν».
24 Οτθάρ, ντινέ βίκος ατζέκ εκ φαρ ι τζενές σο ισινέ ανγκλέ κορορό ντα βακερντέ λέσκε: «Ντε δόξα ι Ντεβλές. Αμέν τζανάσα ότι ανταβά τζενό ισί αμαρτωλός».
25 Βοβ βακερντάς: «Να τζανάβα άμα ισί αμαρτωλός. Ακαβά όμως τζανάβα: Ισινόμας κορορό, αλλά ακανά ντικχάβα».
26 Ντα βακερντέ λέσκε: «Σο κερντάς τούκε; Σαρ πουταρντάς το γιακχά;»
27 Βοβ βακερντάς λένγκε: «Ακανά βακερντόμ-λες τουμένγκε, αλλά να ντινέν σημασία. Σόσκε μανγκένα τι ασουνέν-λες πάλι; Μα τι μανγκένα τι αβέν τουμέν-ντα μαθητές λέσκε;»
28 Αζομάν βακερντέ λέσκε χωρίς σεβασμός: «Τούι ισινάν μαθητής λέσκο. Αμέν ισινάμ μαθητές ι Μωυσίσκε.
29 Αμέν τζανάσα ότι ο Ντεβέλ κερντάς λάφι κο Μωυσής, αλλά ανταβά τζενό να τζανάσα κατάρ ισί».
30 Ο τζενό βακερντάς λένγκε: «Σαστίναβα σο τουμέν να τζανένα κατάρ ισί αλλά πουταρντάς μο γιακχά.
31 Τζανάσα ότι ο Ντεβέλ να ασουνέλα αμαρτωλόν, αλλά άμα εκ τζενό νταρέλα κατά Ντεβέλ ντα κερέλα οντουβά σο μανγκέλα, λες ασουνέλα-λες.
32 Κατά πουρανέ μπρεσά να ασούντιλο ποτές ότι εκ τζενό πουταρντάς ο γιακχά εκχέ τζενέσκε σο μπιάντιλο κορορό.
33 Άμα βοβ να ισινέ κατά Ντεβέλ, ναστί κα κερέλας ούτε εκ πράγμας».
34 Βον βακερντέ: «Τούι μπιάντιλαν σαστό αντρέ κι αμαρτία, ντα σικλιαρέσα αμέν;» Ντα φουρτιντέ-λες αβρί!
35 Ο Ιησούς λιντάς αμπέρι ότι φουρτιντέ-λες αβρί, ντα κάνα αρακχλάς-λες, βακερντάς: «Πακιάσα κο Τσσαβό κι τζενέσκο;»
36 Βοβ βακερντάς: «Κον ισί, κύριε, για τι πακιάβ λέστε;»
37 Ο Ιησούς βακερντάς λέσκε: «Ντικχλάν-λες. Ισί ανταβά σο κερέλα τούσαρ λάφι».
38 Βοβ βακερντάς: «Πακιάβα λέστε, Κύριε». Ντα πελό κοτσίντζαρ ανγκλά-λέστε.
39 Ντα ο Ιησούς βακερντάς: «Αβιλόμ ανταλέ ντουνιάστε για τι κρίντιβεν ο τζενέ, ντα αντικάς τι ντικχέν οντουλά σο να ντικχένα ντα τι κορόλιβεν οντουλά σο ντικχένα».
40 Ο Φαρισαίοι σο ισινέ λέσαρ ντα ασουντέ-λεν ανταλά βακερντέ λέσκε: «Μα τι ισινάμ αμέν-ντα κορορέ;»
41 Ο Ιησούς βακερντάς λένγκε: «Άμα ισινένας κορορέ, να κα τθερένας αμαρτία. Ακανά όμως βακερένα: “Ντικχάσα”. Οτθάρ, τουμαρί αμαρτία ατσσόλα τουμέντε».
