Γράμμας σο Μπουτσσάντιλο κο Κολοσσαείς 2:1-23
2 Μανγκάβα τι τζανέν καζόμ μπαρό αγώνας κεράβα τουμένγκε, οντουλένγκε σο ισί κι Λαοδίκεια ντα σαρέ οντουλένγκε σο να ντικχλέ-μαν.*
2 Βακεράβα-λες ανταβά για τι λοκχιόλ λένγκο γκι,* τι αβέν ενωμέ μανγκιμάσαρ ντα τι τθερέν σαρέ ο ευλογίες* σο αβένα κατά σιγουριά σο τθερένα επειδή αγαβένα ι αλήθεια. Αντικάς, κα τζανέν ντιπ λατσσές ο γκεραντό πράγμας* ι Ντεβλέσκο, σο ισί ο Χριστός.
3 Αντράλ λέσταρ, μπορίνασα τι ντικχάς ο γκεραντέ θησαυροί σο ισί σαρί η σοφία ντα οντουλά σο τζανέλα ο Ντεβέλ.
4 Βακεράβα-λες ανταβά για μα τι χουχαβέλ-τουμέν καέκ τζενό πφιρνιμάσαρ.
5 Παρόλο σο να ισινόμ τουμέντζαρ, μι γκοντί* ισί τουμέντε. Χαιρίναβα σο ντικχάβα τι κερέν ο πράγματα εκχέ σειράσαρ ντα τι τθερέν πίστη κο Χριστός σαρέ τουμαρέ γκίσαρ.
6 Αντικάς σαρ δεχτιντέν ι Χριστός Ιησούς, ι Κυριός, συνεχίνεν τι πφιρέν γιεκ λέσαρ.
7 Τι αβέν λατσσές ριζωμέ σαρ εκ μπαρό δέντρος ντα χτισμέ οπράλ κο θεμέλιος σο ισί ο Χριστός ντα σταθεροί κι πίστη, σαρ σικλιλέν. Ντα μα τσσιναβέν τι βακερέν ευχαριστώ κο Ντεβέλ ι κάθε πραγμάσκε.
8 Τθερέν τουμαρί γκοντί για μα τι χουχαβέλ-τουμέν* καέκ τζενό αντράλ κατά φιλοσοφία ντα κατά ψεύτικα λάφια σο αβένα οντουλένταρ σο σικλιαρένα ο τζενέ. Βον να ντικχένα ο πράγματα σαρ ντικχέλα-λεν ο Χριστός αλλά σαρ ντικχέλα-λεν ο ντουνιάς.
9 Ο Χριστός ισί ντιπ πφερντό σαρέ με το ιδιότητες ι Ντεβλέσκε.
10 Αντράλ λέσταρ να λειπίνελα τουμένταρ τίποτα.* Βοβ ισί πο οπρέ σαρέ κατά κυβερνήσεις ντα οντουλένταρ σο κερένα κουμάντος.
11 Αντράλ κατά Χριστός αβιλί-πες τουμένγκε εκ περιτομή σο νανέ τζενένταρ. Ανταγιά περιτομή ισί ι Χριστόσκι ντα ελευθερώνελα-τουμέν κατά αμαρτία ι σωμάσκι.
12 Πραχούντιλεν γιεκ λέσαρ αντράλ εκχέ μπολντιμάσταρ σο ισί σαρ λέσκο. Αντράλ λέσταρ ντα κατά πίστη σο τθερένα κι ζορ κι Ντεβλέσκι, ο Ντεβέλ σο τζουβντιαρντάς ι Χριστός κατά μουλέ, τζουβντιαρντάς-τουμέν γιεκ λέσαρ.
13 Παρόλο σο ισινένας σαρ μουλέ ιτιρί τουμαρέ αμαρτιένταρ ντα επειδή να κερντένας περιτομή, ο Ντεβέλ τζουβντιαρντάς-τουμέν ντα ενωντάς-τουμέν λέσαρ. Ο Ντεβέλ συγχωριντάς λατσσιμάσαρ σαρέ αμαρέ αμαρτίες
14 ντα σβηντάς* ο Νόμος σο ισινέ γραμμέ ντα σο σικαβέλας ότι ισινάμ αμαρτωλοί. Τσσουντάς τέλος κο Νόμος αντράλ κατά μεριπέ ι Χριστόσκο οπράλ κι ντουκχένγκο κας.*
15 Αντράλ κατά ντουκχένγκο κας* νανγκιαρντάς ο κυβερνήσεις ντα οντουλέν σο κερένα κουμάντος. Ντα για τι σικαβέλ ότι νικιντάς-λεν, γκερέλα-λεν ανγκλάλ σαριλέντε σαρ τι αβένας σε εκ παρέλαση σο κερένα ο στρατιώτες για τι γιορτάνεν πουμαρί νίκη.
16 Οτθάρ, καέκ να τθερέλα ο δικαίωμας τι βακερέλ τουμένγκε σο τι χαν ντα σο τι πιν ή άμα κα κερέν ο μπαρέ ντιβεσά, ο νεβό τσσιμούτ* ή ο σάββατος.
17 Σαρέ ανταλά σικαβένα καλά πράγματα* κα αβένας-πες, αλλά οντουβά σο ισί μπαγιά ισί ο Χριστός.
18 Μα μουκχέν καεκχέ τζενές τι λελ τουμαρό βραβείος, ατζέ-ντα άμα κερέλα-πες ότι ισί ταπεινός ντα άμα ντέλα λατρεία κο άγγελοι.* Εκ ασακό τζενό ισαρέλα-πες ι πραγματένγκε* σο ντικχλάς. Ισί πφερντό μπαρικανιπέ, σόσκε οδηγίντιβελα κατά τζενένγκο τρόπος σκέψης.
19 Να ατσσόλα σταθερός κο Χριστός, σο ισί αμαρό σορό. Ο Χριστός ισί οντουβά σο ντέλα σαρό κο σώμας, σο ισί η κχανγκιρί, οντουβά σο χρειαζίντιβελα για τι κερέλ πι μπουτί σωστά. Ντα βοβ κερέλα τι αβέν σαρέ ο μέρη λατσσές ενωμέ ντα τι μπαριόλ ο σώμας αντικάς σαρ μανγκέλα ο Ντεβέλ.
20 Μουλέν γιεκ ι Χριστόσαρ ντα ελευθερωσάλεν κατά τρόπος σκέψης ι ντουνιάσκο. Άρα, σόσκε τζουβντιόνα σαρ τι ισινέν ατζέ σαρ ο ντουνιάς; Σόσκε συνεχίνενα τι ντεν καν κο κανόνες ακαλά:
21 «Μα λε ούτε τι χας ούτε τι ασταρές»;
22 Ανταλά ισί σάντε εντολές ντα λάφια σο σικλιαρένα ο τζενέ ι πραγματένγκε σο χάνα ντα πίνα, ντα σοράν ανταλά πράγματα χασάρντιβενα.
23 Ανταλά κανόνες ντικχίντιβενα γκοντιαβέρ. Αλλά οντουλά σο κερένα ανταλά κανόνες τραμπίνενα κορκορέ σαρ τι ντεν λατρεία ι Ντεβλές. Τιμωρίνενα πουμαρό σώμας για τι σικαβέν κο τζενέ ότι ισί ταπεινοί. Αλλά ανταλά σο κερένα να βοηθίνενα-λεν τι τζαν κόντρα κο μπέτι πράγματα σο μανγκέλα λένγκο σώμας.
Υποσημειώσεις
^ Γιαβέρσοϊ «να ντικχλέ μο μούι».
^ Γιαβέρσοϊ «τι κοβλιόλ λένγκι ντουκχ».
^ Κι Πουρανί Μπαλαμανί ισινέ ο λάφι «χουλανιπέ».
^ Γιαβέρσοϊ «ο άγιος μυστικός».
^ Κι Πουρανί Μπαλαμανί ισινέ ο λάφι «πνεύμας».
^ Γιαβέρσοϊ «μα τι καπτίνελ-τουμέν ντα τι κερέλ-τουμέν τι αβέν δούλοι».
^ Γιαβέρσοϊ «Αντράλ λέσταρ ισινέν πφερντέ».
^ Γιαβέρσοϊ «νασκιαρντάς».
^ Γιαβέρσοϊ «φεγγάρι».
^ Γιαβέρσοϊ «ανταλά ισί βουτσσάλ ι πραγματένγκι σο».
^ Γιαβέρσοϊ «άμα ντέλα λατρεία σαρ ο άγγελοι».
^ Κι Πουρανί Μπαλαμανί βακέρντιβελας «ισταβέλα οντουλέντε». Ανταβά λάφι τθερέλα τι κερέλ με μπενγκαλέ γιορτές σο κερένας οντουλά σο ντένας λατρεία κο είδωλα. Κο γιορτές ανταλά μπορεί τι ντικχένας φαντασίες-ντα.
