Γράμμας σο Μπουτσσάντιλο κο Κολοσσαείς 3:1-25
3 Αλλά άμα ο Ντεβέλ τζουβντιαρντάς-τουμέν γιεκ ι Χριστόσαρ, κερέν σο νακχέλα τουμαρέ βαστένταρ ι πραγματένγκε σο ισί κο ουρανός, οτθέ σο μπεσέλα ο Χριστός δεξιά κατά Ντεβέλ.
2 Τι ατσσικιαρέν τουμαρί γκοντί κο πράγματα σο ισί κο ουρανός, όχι κο πράγματα σο ισί κι πφουβ.
3 Ισινέν μουλέ, ντα τουμαρί ζωή γκεράντιλι γιεκ ι Χριστόσαρ, σόσκε ανταβά μανγκέλα ο Ντεβέλ.
4 Κάνα κα σικάντιβελ ο Χριστός, σο ισί αμαρί ζωή, αζομάν τουμέν-ντα κα σικάντιβεν δοξάσαρ γιεκ λέσαρ.
5 Οτθάρ, μουνταρέν ο μπέτι πράγματα σο μανγκέλα τουμαρό σώμας, για μα τι κερέν λουμνιπέ,* μαγαριπέ, μα τι μανγκέν μπουτ τι κερέν λουμνικανέ πράγματα, μα τι μανγκέν γκεραλέ* πράγματα ντα μα τι αβέν μπίτσαλε γιακχίνγκε, σο ισί σαρ τι ντένα λατρεία κο είδωλα.
6 Ιτιρί ανταλέ πραγματένταρ αβέλα η μπαρί χολί ι Ντεβλέσκι.
7 Τουμέν-ντα κερένας ασακέ πράγματα* κάνα τζουβντιόνας αντικάς.
8 Αλλά ακανά πρέπει τι νασκιαρέν-λεν τουμένταρ σαρέ ανταλά: ι μπαρί χολί, ο γκεραλιπέ, ο μπέτι λάφια* ντα ο μπίλατζανε λάφια τουμαρέ μόσταρ.
9 Μα χουχαβέν ο εκ ι γιαβερές. Νικαβέν οπρά-τουμένταρ ο πουρανό χαρακτήρας* ντα οντουλά σο κερέλα
10 ντα τι ιρίν ο νεβό χαρακτήρας, σο ντέλα ο Ντεβέλ κάνα τζανάσα-λες ντιπ λατσσές. Αντικάς, αμαρό χαρακτήρας αβέλα νεβό για τι μοιάζελ πο μπουτ κο χαρακτήρας κι Ντεβλέσκο.
11 Να τθερέλα σημασία άμα εκ τζενό ισί Μπαλαμό ή Ιουδαίος, άμα κερντάς περιτομή ή να κερντάς, άμα ισί ξένος, Σκύθης,* δούλος ή ελεύθερος. Αλλά ο Χριστός ισί τα πάντα ντα σαριλένγκε.
12 Αφού τραμπιντάς-τουμέν ο Ντεβέλ ντα ισινέν λέσκε άγια ντα αγαπημέ τσσαβέ, τι σικαβέν* ότι μανγκένα αντράλ τουμαρέ γκίσταρ ι γιαβερέν, ότι αγαβένα ι γιαβερένγκι ντουκχ, ότι σικαβένα λατσσιπέ, ότι ισινέν ταπεινοί, ότι τθερένα κοβλό γκι ντα κερένα υπομονή.
13 Τι αντιχίνεν ο εκ ι γιαβερές ντα τι συγχωρίνεν ο εκ ι γιαβερές σαρέ τουμαρέ γκίσαρ, ατζέ-ντα άμα εκ τζενό κα προσβαλίνελ-τουμέν. Σαρ συγχωριντάς-τουμέν ο Ιεχωβά* αντράλ πι γκίσταρ, αντικάς τι κερέν τουμέν-ντα.
14 Εκτός σαρέ ανταλένταρ, σικαβέν* αγάπη, σόσκε η αγάπη ενώνελα ντιπ λατσσές σαρέ ι τζενέν.
15 Η ειρήνη ι Χριστόσκι τι κερέλ κουμάντος τουμαρό γκι,* σόσκε ο Ντεβέλ ντινάς-τουμέν βίκος τι αβέν κι ειρήνη ανταγιά σαρ εκ σώμας. Ντα σικαβέν πάντα εκτίμηση.
16 Ο λάφι ι Χριστόσκο τι πφερέλ ντιπ τουμαρό γκι ντα τι κερέλ-τουμέν γκοντιαβέρ. Κάνα σικλιαρένα ντα ντένα ζορ ο εκ ι γιαβερές, βακερέν ψαλμούς, γκιλιά σο ισαρένα ι Ντεβλές ντα πνευματικούς ύμνους σο βακέρντιβενα με εκτίμηση. Γκιλιαβέν ι Ιεχωβάσκε* ντιπ αντράλ τουμαρέ γκίσταρ.
17 Σαρέ οντουλά σο κερένα ή βακερένα, τι κερέν-λεν κο ναβ κι Κυριόσκο, κι Ιησούσκο, ντα αντράλ λέσταρ τι βακερέν ευχαριστώ κο Ντεβέλ, σο ισί ο Ντατ.
18 Τζουβλιάλεν, τι ντεν καν τουμαρέ ρομές, αντικάς σαρ πρέπει τι κερέν ι Κυριόσκε μαθητές.
19 Μουρσάλεν, τι μανγκέν τουμαρέ ρομνίν ντα μα χολιάνεν λένγκε.*
20 Χουρντάλεν, τι ντεν καν τουμαρέ νταντές ντα τουμαρέ νταγιά σαρέ κο πράγματα, σόσκε ανταβά κερέλα ο γκι ι Κυριόσκο.
21 Νταντάλεν, μα χολιασκιαρέν τουμαρέ τσσαβέν* για μα τι χασαρέν πουμαρί ζορ.
22 Τουμέν σο ισινέν δούλοι, τι ντεν καν τουμαρέ κυριόντε σαρέ κο πράγματα, όχι σάντε κάνα ντικχένα-τουμέν ο γιαβερά, για τι κερέν ι τζενένγκο γκι, αλλά σαρέ τουμαρέ γκίσαρ, από σεβασμός ι Ιεχωβάσκε.*
23 Σο-ντα κερένα, τι κερέν-λες σαρέ τουμαρέ γκίσαρ* σαρ τι κερένα-λες ι Ιεχωβάσκε,* ντα όχι ι τζενένγκε,
24 σόσκε τζανένα ότι κατά Ιεχωβά* κα λεν ι κληρονομιά σαρ ευλογία. Υπηρετίνεν σαρ δούλοι ι Κυριός, ι Χριστός.
25 Αλλά τι ντεν-τουμέν γκοντί ότι οντουβά σο αδικίνελα ι γιαβερέν κα τιμωρίντιβελ οντουλένγκε σο κερντάς, σόσκε ο Ντεβέλ να ξεχωρίνελα ι τζενέν.
Υποσημειώσεις
^ Γιαβέρσοϊ «μπίλατσσε, κακά».
^ Γιαβέρσοϊ «Τουμέν-ντα πφιρένας αντικάς».
^ Ασακέ λάφια προσβαλίνενα ι γιαβερέν ή χαλαβένα ι γιαβερένγκο ναβ, κερένα λένγκε ζιάνι.
^ Κι Πουρανί Μπαλαμανί βακέρντιβελας «ι πουρανέ τζενές».
^ Αντικάς βακέρντιβελας εκ τζενό σο να ισινέ πολιτισμέ.
^ Κι Πουρανί Μπαλαμανί ισινέ ο λάφι «ιρίν».
^ Γιαβέρσοϊ «ιρίν ι».
^ Γιαβέρσοϊ «τουμαρέ γκίστε».
^ Γιαβέρσοϊ «μα συμπεριφερίντιβεν λένγκε μπέτι».
^ Γιαβέρσοϊ «μα κερέν δύσκολη ι ζωή τουμαρέ τσσαβένγκι».
