Γράμμας σο Μπουτσσάντιλο κο Κολοσσαείς 4:1-18
4 Τουμέν, σο τθερένα δουλόν, τι συμπεριφερίντιβεν τουμαρέ δουλόνγκε λατσσές ντα με δίκαιος τρόπος, σόσκε τζανένα ότι τουμέν-ντα τθερένα Κυριός κο ουρανός.
2 Μα τσσιναβέν τι κερέν προσευχή, ντα καζόμ κερένα-λες ανταβά, ατσσόν τζανγκαντέ ντα βακερέν ευχαριστώ κο Ντεβέλ.
3 Προσευχίντιβεν αμένγκε-ντα, για τι πουτρέλ αμένγκε ο Ντεβέλ εκ ντρομ για τι μουτθαβάς λέσκο λάφι, ντα αντικάς τι μπορίνας τι βακεράς ι γκεραντέ πραγμάσκε* σο τθερέλα τι κερέλ ι Χριστόσαρ. Με ισινόμ κι φυλακή ανταλέ γκεραντέ πραγμάσκε.
4 Προσευχίντιβεν τι μουτθαβάβ-λες ντιπ λατσσές αντικάς σαρ πρέπει.
5 Τζουβντιόν γκοντιαβέρ τροπόσαρ κάνα ισινέν τζενέντζαρ σο νανέ κατά κχανγκιρί ντα χρησιμοποιήνεν τουμαρό χρόνος καζόμ πο λατσσές αβέλα-πες.*
6 Τουμαρέ λάφια τι αβέν πάντα σουκάρ, σαρ ο λον σο κερέλα γκουλντό ο χαμπέ, για τι τζανέν σαρ πρέπει τι απαντίνεν ι κάθε εκχέσκε.
7 Ο Τυχικός, σο ισί αμαρό αγαπημέ πφραλ ντα πιστός υπηρέτης ι Κυριόσκο γιεκ μάντζαρ, κα βακερέλ τουμένγκε σο κεράβα.
8 Μπουτσσαβάβα-λες τουμένγκε για τι σικλιόν σαρ ισινάμ ντα τι λοκχιαρέλ τουμαρό γκι.*
9 Γιεκ λέσαρ κα αβέλ ο Ονήσιμος, μο πιστός ντα αγαπημέ πφραλ, σο ισί οτθάρ. Βον κα βακερέν τουμένγκε σαρέ οντουλά σο αβένα-πες ακατέ.
10 Κερέλα τουμένγκε σελιάμι* ο Αρίσταρχος, σο ισί φυλακή γιεκ μάντζαρ, εμ ο Μάρκος, σο ισί ξάδελφος ι Βαρναβάσκο (λέσκε βακεράας τουμένγκε κάνα ντινάμ-τουμέν ο οδηγίες τι δεχτίνεν-λες λατσσιμάσαρ άμα κα αβέλ τουμέντε)
11 εμ ο Ιησούς σο βακέρντιβελα Ιούστος-ντα. Βον ισί οντουλένταρ σο κερντέ περιτομή. Σάντε γιεκ λέντζαρ μουτθαβάβα ι Ντεβλέσκε Βασιλειάκε, ντα βον λοκχιαρντέ μπουτ μο γκι.*
12 Κερέλα τουμένγκε σελιάμι ο Επαφράς, σο ισί δούλος ι Χριστόσκο, ι Ιησούσκο, ντα ισί οτθάρ. Βοβ να τσσιναβέλα τι προσευχίντιβελ τουμένγκε αντράλ πι γκίσταρ, για τι ατσσόν πνευματικά ζουρανέ* ντα τι τθερέν μπαρί σιγουριά σαρέ ι πραγματένγκε σο μανγκέλα τι κερέλ ο Ντεβέλ.
13 Βακεράβα τουμένγκε ότι κερέλα σο νακχέλα λέσκε βαστένταρ τουμένγκε ντα οντουλένγκε σο ισί κι Λαοδίκεια ντα κι Ιεράπολη.
14 Κερέλα τουμένγκε σελιάμι ο Λουκάς, σο ισί γιατρός ντα μανγκάσα-λες μπουτ, ντα ο Δημάς.
15 Κερέν σελιάμι εμ κο πφραλά σο ισί κι Λαοδίκεια εμ κι πφεν Νύμφα εμ κι κχανγκιρί σο ισί λάκε κχερέστε.
16 Κάνα κα διαβάνεν τουμέν ανταβά γράμμας, μπουτσσαβέν-λες κι κχανγκιρί κι Λαοδίκεια για τι διαβάντιβελ οτθέ-ντα, ντα μανγκέν ο γράμμας σο μπουτσσαντόμ λένγκε για τι διαβάντιβελ τουμέντε-ντα.
17 Ντα βακερέν κο Άρχιππος: «Τι τθερές τι γκοντιάτε ι υπηρεσία σο ντινάς-τουτ ο Κύριος για τι μπορίνες τι κερές-λα σωστά».
18 Με ο Παύλος γραφίναβα-λες τουμένγκε ανταβά μι βαστέσαρ για τι μπουτσσαβάβ τουμένγκε σελιάμι. Τι ντεν-τουμέν γκοντί ότι ισινόμ κι φυλακή. Ο μπαρό λατσσιπέ ι Ντεβλέσκο τι αβέλ τουμέντζαρ.
Υποσημειώσεις
^ Γιαβέρσοϊ «ι άγιε μυστικόσκε».
^ Κι Πουρανί Μπαλαμανί βακέρντιβελας «(ντα) κινέν ο βακίτι».
^ Γιαβέρσοϊ «ντα τι κοβλιαρέλ τουμαρί ντουκχ».
^ Γιαβέρσοϊ «Μπουτσσαβέλα τουμένγκε χαιρετίσματα».
^ Γιαβέρσοϊ «κοβλιαρντέ μπουτ μι ντουκχ, ντινέ-μαν μπουτ ζορ».
^ Γιαβέρσοϊ «τι ατσσόν ώριμοι».
