Ο Ευαγγέλιος σο Γραφιντάς ο Λουκάς 10:1-42
10 Σοράν ανταλένταρ, ο Κύριος τραμπιντάς 70 γιαβερέν ντα μπουτσσαντάς-λεν ντούι ντούι πο τζανγκλέ πέσταρ σαρέ κο πόλεις ντα κο τθανά σο κα τζάλας βοβ.
2 Ντα βακερντάς λένγκε: «Ο χωράφι ισί πφερντό ντα μανγκέλα γκιντιπέ, αλλά ισί χάνικ τζενέ ανταλέ μπουτιάκε. Οτθάρ, μολίνεν ι Αφεντικός ι χωραφίσκο τι μπουτσσαβέλ τζενέν πι γκιντιμάσκε.
3 Τζαν! Μπουτσσαβάβα-τουμέν σαρ μπρακέ κο ρουβά.*
4 Μα λεν λοβέ παλάλ ούτε τσάντα χαμπιματέντζαρ ούτε τεραχά, ντα μα χαιρετίνεν καεκχές* κο ντρομ.
5 Καλέ-ντα κχερέστε κα ντεν αντρέ, βακερέν πρώτα: “Ειρήνη τι αβέλ ανταλέ κχερέστε!”
6 Ντα άμα ισί οτθέ εκ τζενό σο μανγκέλα ι ειρήνη, τουμαρί ειρήνη κα αβέλ λέσαρ. Αλλά άμα νανέ καέκ, κα ατσσόλ τουμέντε.
7 Μπεσέν οντουλέ κχερέστε, χαν ντα πιν σο-ντα ντένα-τουμέν, σόσκε ο τζενό σο κερέλα μπουτί αξίνελα τι ποκίντιβελ. Μα ρόντεν γιαβερέ κχερένγκε για τι μπεσέν.
8 »Ντα άμα κι πόλη σο κα τζαν κα δεχτίνεν-τουμέν, χαν σο-ντα ντένα-τουμέν
9 ντα κερέν λατσσές ι νασφαλέν* σο ισί οτθέ ντα βακερέν λένγκε: “Η Βασιλεία ι Ντεβλέσκι ισί πασέ τουμέντε”.
10 Αλλά άμα κι πόλη σο κα τζαν να κα δεχτίνεν-τουμέν, νικιόν λάκε μπαρέ ντρομέντε ντα βακερέν:
11 “Τινιάνασα ατζέ-ντα ο πράχος σο ατσσιλό αμαρέ πιντρέντε τουμαρέ πολιάταρ. Όμως, τι τζανέν ότι η Βασιλεία ι Ντεβλέσκι ισί πασέ”.
12 Βακεράβα τουμένγκε ότι οντουβά ντιβές ο πράγματα κα αβέν πο εύκολα ι τθεμέσκε Σόδομα παρά οντουλέ πολιάκε.
13 »Τιμωρία κα τσσίντες Χοραζίν! Τιμωρία κα τσσίντες Βηθσαϊδά! Σόσκε, άμα αβιλέας-πες κι Τύρος ντα κι Σιδώνα ο θαύματα σο αβιλέ-πες τουμέντε, βον κα μετανιώνενας κατάρ μπερί ντα κα μπεσένας ραβαλόσαρ ντα πραχόσαρ.
14 Οτθάρ, κάνα κα κρίνελ ο Ντεβέλ ι τζενέν, ο πράγματα κα αβέν πο εύκολα ι τθεμένγκε Τύρος ντα Σιδώνα παρά τουμένγκε.
15 Ντα τούι, Καπερναούμ, αμντίνεσα ότι κα ερεσές κο ουρανός; Κο Μεζάρι* κα γουλίς!
16 »Κον ασουνέλα τουμέν ασουνέλα μαν-ντα. Ντα κον κερέλα πέρα τουμέν κερέλα πέρα μαν-ντα. Ατζέ, κον κερέλα πέρα μαν κερέλα πέρα εμ Οντουλές σο μπουτσσαντάς-μαν».
17 Σοράν ο 70 βουρτισάλε χαράσαρ ντα βακερένας: «Κύριε, ατζέ-ντα ο δαίμονες ντένα-αμέν καν κάνα ντάσα-λεν εντολή τι ναβέστε».
18 Αζομάν βακερντάς λένγκε: «Ντικχάβα ότι ο Μπενγκ πελό μπίλιμα σαρ αστραπή κατά ουρανός.
19 Ντινόμ-τουμέν ι ζορ για τι ισταβέν οπράλ σαπέντε ντα σκορπιόντε, ντα ζορ σο ισί πο μπαρί σαρί κατά ζορ ι ντουσμανίσκι,* ντα ούτε εκ πράγμας να κα κερέλ τουμένγκε ζιάνι.
20 Όμως, μα χαιρίνεν σο ντένα-τουμέν καν ο δαίμονες, αλλά χαιρίνεν σόσκε τουμαρέ ναβά γραφισάλε κο ουρανός».
21 Ντιπ οντουβά σαάτι πουτάρντιλο λέσκο γκι αντράλ κατά άγιος πνεύμας ντα βακερντάς: «Ισαράβα-τουτ ανγκλάλ σαριλέντε, Ντάντε, Κύριε ι ουρανόσκο ντα ι πφουβιάκο, σόσκε γκεραντάν λατσσές ανταλά πράγματα γκοντιαβέρ τζενένταρ ντα σικαντάν-λεν ι χουρντέ μαξιμίνγκε. Βα, Ντάντε, σόσκε αντικάς μανγκλάν τούι τι αβέλ-πες.
22 Σαρέ ο πράγματα ντιντιλέ μάντε μι Νταντέσταρ, ντα καέκ να τζανέλα κον ισί ο Τσσαβό σαρ ο Ντατ. Ντα καέκ να τζανέλα κον ισί ο Ντατ σαρ ο Τσσαβό. Ντα ο γιαβερά να αβέλα-πες τι τζανέν κον ισί ο Ντατ άμα ο Τσσαβό να μανγκλάς τι σικαβέλ-λες λένγκε».
23 Αζομάν μπολντιντάς-πες κάρινγκ κο μαθητές ντα βακερντάς λένγκε κάνα ισινέ κορκορέ: «Ευτυχισμέ ισί ο γιακχά σο ντικχένα οντουλά σο ντικχένα τουμέν.
24 Βακεράβα τουμένγκε: Μπουτ προφήτες ντα βασιλιάδες μανγκλέ τι ντικχέν οντουλά σο ντικχένα τουμέν αλλά να ντικχλέ-λεν, ντα τι ασουνέν οντουλά σο ασουνένα τουμέν αλλά να ασουντέ-λεν».
25 Αζομάν εκ τζενό σο τζανέλας λατσσές ο Νόμος ιστίντιλο τι δοκιμάνελ-λες ντα βακερντάς: «Δάσκαλε, σο χρειαζίντιβελα τι κεράβ για τι λαβ* ζωή για πάντα;»
26 Βοβ πουτσλάς-λες: «Σο ισί γραμμέ κο Νόμος; Σο διαβάνεσα;»
27 Βοβ βακερντάς: «“Μανγκ ι Ιεχωβάς* τι Ντεβλές σαρέ τι γκίσαρ ντα σαρέ τι ψυχιάσαρ* ντα σαρέ τι ζοριάσαρ ντα σαρέ τι γκοντιάσαρ” ντα “ι γιαβερέν* σαρ μανγκέσα τουτ”».
28 Βοβ βακερντάς λέσκε: «Λατσσές βακερντάν. Μα τσσίναβ τι κερές-λες ανταβά ντα κα τζουβντιός».
29 Αλλά βοβ μανγκέλας τι σικαβέλ ότι ισί δίκαιος, οτθάρ βακερντάς ι Ιησούσκε: «Ντα κον ισί οντουλά ο γιαβερά;»*
30 Ο Ιησούς βακερντάς: «Εκ τζενό σο γουλίλας κατά Ιερουσαλήμ ντα τζάλας κι Ιεριχώ πελό κι τσορένγκε* βαστά. Βον νανγκιαρντέ-λες ντα νταπλέ-λες. Σοράν νασλέ ντα μουκχλέ-λες τι μερέλ.
31 Εκ ιερέας τυχισάλο τι γουλίλ οντουλέ ντρομέσταρ, αλλά κάνα ντικχλάς-λες γκιλό οκιά μπάνταρ ντα νασλό.
32 Αντικάς κερντάς εκ Λευίτης-ντα. Κάνα ερεσλό οτθέ ντα ντικχλάς-λες, γκιλό οκιά μπάνταρ ντα νασλό.
33 Αλλά εκ Σαμαρείτης σο νακχέλας οντουλέ ντρομέσταρ αβιλό κάρινγκ λέστε ντα κάνα ντικχλάς-λες τζιτζισάλο λέσκε.
34 Οτθάρ, αβιλό πασέ λέστε, πφαντάς λέσκε πληγές ντα τσσουντάς οπρά-λέντε λάδι ντα μολ. Σοράν τσσουντάς-λες οπράλ πι ζωόστε ντα γκερντάς-λες εκχέ χουρντέ ξενοδοχειόστε* ντα φροντιντάς-λες.
35 Ο γιαβέρ ντιβές νικαντάς ντούι δηνάρια, ντινάς-λεν κο τζενό σο τθερέλας ο ξενοδοχείος ντα βακερντάς: “Φρόντινε-λες, ντα σο γιαβέρ κα χαλαβές κα ποκινάβ-λες τούκε με κάνα κα βουρτίναβ”.
36 Καβά οντουλέ τρινέ τζενένταρ πακιάσα ότι μανγκλάς οντουλέ γιαβερές* σο πελό κι τσορένγκε βαστά;»
37 Βοβ βακερντάς: «Ο τζενό σο σικαντάς οντουλέντζαρ σο κερντάς ότι τζιτζισάλο* λέσκε». Ο Ιησούς αζομάν βακερντάς λέσκε: «Τζα ντα κερ-λες τούι-ντα ανταβά».
38 Καζόμ ισινέ κο ντρομ, γκιλό αντρέ εκχέ γκαβέστε. Ντα εκ τζουβέλ σο βακερένας λάκε Μάρθα πουταρντάς λέσκε πο κχερ.
39 Βόι τθερέλας εκχέ πφενιά-ντα, ι Μαριά, σο μπεσλί πασέ κο πιντρέ κι Κυριόσκε ντα ασουνέλας λέσκο λάφι.
40 Όμως, η γκοντί ι Μαρθάκι ισινέ κο μπουτ μπουτιά σο κερέλας. Οτθάρ, γκιλί πασέ λέστε ντα βακερντάς: «Κύριε, να χάλα-τουτ ανάγκη σο μι πφεν μουκχλάς-μαν κορκορί τι κεράβ ο μπουτιά; Βάκερ λάκε τι αβέλ τι βοηθίνελ-μαν».
41 Ο Κύριος βακερντάς λάκε: «Μάρθα, Μάρθα, τθερέσα μπαρό άγχος μπουτέ πραγματένγκε.
42 Χάνικ όμως χρειαζίντιβενα ή σάντε εκ τανό. Η Μαρία τραμπιντάς ο πο λατσσό, ντα να κα λιντιόλ λάταρ».
Υποσημειώσεις
^ Γιαβέρσοϊ «λύκοι».
^ Γιαβέρσοϊ «μα ντεν ανγκάλι καεκχές για τι χαιρετίνεν-λες».
^ Γιαβέρσοϊ «πασλέ, αμπορεμέ τζενέν».
^ Γιαβέρσοϊ «εχθρόσκι».
^ Κι Πουρανί Μπαλαμανί βακέρντιβελας «κληρονομίναβ».
^ Κι Πουρανί Μπαλαμανί βακέρντιβελας «ι τζενές σο ισί πασέ τούτε». Ανταβά λάφι να μανγκέλας τι σικαβέλ σάντε οντουλέν σο μπεσένας πασέ εκχέ τζενέστε, αλλά ι κάθε τζενές.
^ Κι Πουρανί Μπαλαμανί βακέρντιβελας «ο τζενό σο ισί πασέ μάντε». Ντικχ εδάφιος Λουκ. 10:27, υποσημείωση κο λάφι «γιαβερέν».
^ Γιαβέρσοϊ «τσορνένγκε».
^ Κι Πουρανί Μπαλαμανί ισινέ ο λάφι «πανδοχείος». Ο τζενέ σο κερένας ταξίδι ποκινένας για τι νακχέν ι ιράτ οτθέ.
^ Κι Πουρανί Μπαλαμανί ισινέ ο λάφι «τζενό σο ισί πασέ». Ντικχ εδάφιος Λουκ. 10:27, υποσημείωση κο λάφι «γιαβερέν».
