Ο Ευαγγέλιος σο Γραφιντάς ο Λουκάς 15:1-32
15 Σαρέ ο τζενέ σο γκίντενας ο φόροι ντα ο αμαρτωλοί γκιντίντιβενας ντονταλάι λέσταρ για τι ασουνέν-λες.
2 Εμ ο Φαρισαίοι εμ ο γραμματείς μουρμουρίνενας: «Βοβ ισί αμάλ* αμαρτωλόντζαρ ντα χάλα γιεκ λέντζαρ».
3 Αζομάν βοβ βακερντάς λένγκε ακαβά παράδειγμας:*
4 «Κον τουμένταρ, άμα τθερέλα 100 μπρακέν ντα κα χασαρέλ εκχές λένταρ, να κα μουκχέλ ο 99 παλάλ κι ερημιά για τι τζαλ τι ρόντελ οντουλέσκε σο χασάρντιλο μέχρι τι αρακχέλ-λες;
5 Ντα κάνα αρακχέλα-λες, τσσουβέλα-λες οπρά-πέστε ντα χαιρίνελα.
6 Ντα κάνα ερεσέλα κο κχερ, ντέλα βίκος πι αμαλέν ντα πι γειτονέν ντα βακερέλα λένγκε: “Χαιρίνεν μάντζαρ, σόσκε αρακχλόμ μι μπρακές σο χασάρντιλοας”.
7 Αντικάς-ντα, βακεράβα τουμένγκε ότι, κα αβέλ πο μπαρί χαρά κο ουρανός εκχέ αμαρτωλέ τζενέσκε σο μετανιώνελα παρά 99 δίκαιε τζενένγκε σο να χρειαζίντιβελα τι μετανιώνεν.
8 »Ή καγιά τζουβέλ σο τθερέλα 10 ντραμάς, άμα κα χασαρέλ ι εκ, να πφαμπαρέλα* λυχνάρι ντα να σουλαβέλα πο κχερ ντα να ρόντελα λατσσές μέχρι τι αρακχέλ-λα;
9 Ντα κάνα κα αρακχέλ-λα, ντέλα βίκος πι αμαλινέν ντα πι γειτονισσέν ντα βακερέλα λένγκε: “Χαιρίνεν μάντζαρ, σόσκε αρακχλόμ ι ντραμάς σο χασαρντόμας”.
10 Αντικάς-ντα, βακεράβα τουμένγκε, λένα χαρά ι Ντεβλέσκε άγγελοι εκχέ αμαρτωλέ τζενέσκε σο μετανιώνελα».
11 Σοράν βακερντάς: «Εκ τζενό τθερέλας ντουέ τσσαβέν.
12 Ντα ο πο χουρντό βακερντάς πι νταντέσκε: “Ντάντε, ντε-μαν σο-ντα ισί τι λαβ κατά κληρονομιά”. Οτθάρ, βοβ ιλιαντάς λένγκε πο πράγματα.
13 Χάνικ ντιβεσά πο σοράν, ο πο χουρντό τσσαβό γκιντιντάς σαρέ πο πράγματα ντα γκιλό εκχέ τθεμέστε ντουρ. Οτθέ χαλαντάς σο-ντα τθερέλας ντα κερέλας μπέτι πράγματα πι ζωγιάτε.*
14 Κάνα χαλαντάς σαρέ πο λοβέ, πελί μπαρί μποκχ σαρέ οντουλέ τθεμέστε, ντα βοβ να τθερέλας τι χαλ.
15 Γκιλό ατζέ-ντα τι μανγκέλ μπουτί εκχέ τζενέσταρ οντουλέ τθεμέστε, ντα βοβ μπουτσσαντάς-λες πι χωραφίντε τι αρακχαβέλ γουρούνια.
16 Ντα μανγκέλας τι τσαλιαρέλ-πες οντουλέντζαρ σο χάνας ο γουρούνια, αλλά καέκ να ντέλας-λες τίποτα.
17 »Κάνα αγαντάς-πες, βακερντάς: “Αζόμ τζενέ κερένα μπουτί μι νταντέστε ντα τθερένα μπερεκέτι μαντρό, όμως με μεράβα ακατέ μποκχάταρ!
18 Κα ιστιάβ ντα κα τζαβ μι νταντέστε ντα κα βακεράβ λέσκε: «Ντάντε, αμαρτιντόμ κόντρα κο Ντεβέλ* ντα κόντρα τούτε.
19 Να ισινόμ άξιος τι βακέρντιβαβ το τσσαβό. Κερ-μαν σαρ εκ οντουλένταρ σο κερένα μπουτί τούτε»”.
20 Οντουλέσκε, ιστίντιλο τι τζαλ πι νταντέστε. Λέσκο ντατ ντικχλάς-λες ντουράλ ντα τζιτζισάλο λέσκε, ντα τθαβντισάλο ντα ντινάς-λες ανγκάλι* ντα τσσουμιντάς-λες γκουλντές.
21 Αζομάν ο τσσαβό βακερντάς λέσκε: “Ντάντε, αμαρτιντόμ κόντρα κο Ντεβέλ* ντα κόντρα τούτε. Να ισινόμ άξιος τι βακέρντιβαβ το τσσαβό”.
22 Αλλά ο ντατ βακερντάς πι δουλόνγκε: “Σουγκό! Ανέν σέα, ο πο λατσσέ, ντα ιριαβέν-λες, ντα τσσουβέν ανγκρουσνί λέσκε βαστέστε ντα τεραχά λέσκε πιντρέντε.
23 Ανέν ι παρβαρντέ χουρντέ γκουρουβές-ντα, τσσινέν-λες, ντα ελάν τι χας ντα τι γλεντίνας,
24 σόσκε ακαβά τσσαβό μιρό ισινέ μουλό αλλά αβιλό πάλι κι ζωή, χασάρντιλοας ντα αρακχλάμ-λες”. Ντα αρχισάλε τι νακχέν λατσσές.
25 »Όμως, λέσκο πο μπαρό τσσαβό ισινέ κο χωράφι. Κο βουρτιπέ, κάνα ερεσλό πασέ κο κχερ, ασουντάς γκιλιά ντα κχελιπέ.
26 Οτθάρ, ντινάς βίκος εκχές κατά υπηρέτες ντα πουτσλάς σο αβέλας-πες.
27 Βοβ βακερντάς λέσκε: “Αβιλό το πφραλ, ντα το ντατ τσσιντάς ι παρβαρντέ χουρντέ γκουρουβές, σόσκε αβιλό λέσκε παλάλ ζουρανό”.*
28 Αλλά βοβ χολιασάλο ντα να μανγκλάς τι τζαλ αντρέ. Αζομάν νικίστιλο αβρί λέσκο ντατ ντα μολίνελας-λες.
29 Βοβ βακερντάς πι νταντέσκε: “Αζόμ μπρεσά υπηρετίναβα-τουτ σαρ δούλος ντα ούτε εκ φαρ να γκιλόμ κόντρα τι εντολέντε. Όμως, μάντε να ντινάν ούτε εκ φαρ εκχέ χουρντέ μπουσνιά για τι νακχάβ λατσσές μι αμαλέντζαρ.
30 Αλλά κάνα ερεσλό ανταβά τσσαβό τιρό, σο χαλαντάς* ι λουμνίντζαρ σο-ντα ντινάν-λες, τσσιντάν λέσκε ι παρβαρντέ χουρντέ γκουρουβές”.
31 Αζομάν βοβ βακερντάς λέσκε: “Μο τσσαβό, τούι ισινάν πάντα μάντζαρ, ντα σαρέ οντουλά σο τθεράβα ισί τιρέ.
32 Όμως, έπρεπε τι γλεντίνας ντα τι χαιρίνας, σόσκε το πφραλ ισινέ μουλό αλλά αβιλό κι ζωή, χασάρντιλοας ντα αρακχλάμ-λες”».
Υποσημειώσεις
^ Γιαβέρσοϊ «φίλος».
^ Κι Πουρανί Μπαλαμανί βακέρντιβελας «ακαγιά παραβολή».
^ Γιαβέρσοϊ «αλαβέλα».
^ Γιαβέρσοϊ «ντα τζουβντιόλας χωρίς όρια».
^ Κι Πουρανί Μπαλαμανί βακέρντιβελας «ουρανός».
^ Κι Πουρανί Μπαλαμανί βακέρντιβελας «πελό λέσκε κοριάτε».
^ Κι Πουρανί Μπαλαμανί βακέρντιβελας «ουρανός».
^ Γιαβέρσοϊ «αβιλό λέσκε ντα να παθισάλο τίποτα».
^ Γιαβέρσοϊ «χαλάς».
