Ο Ευαγγέλιος σο Γραφιντάς ο Λουκάς 16:1-31
16 Σοράν βακερντάς κο μαθητές-ντα: «Εκ χουλανό τζενό τθερέλας εκχέ υπηρετής* σο κατηγορισάλο ότι χαλαβέλας λέσκε λοβέ σινανέ.
2 Οτθάρ, ντινάς-λες βίκος ντα βακερντάς λέσκε: “Σο ισί ανταβά σο ασουνάβα τούκε; Γράφινε μάνγκε σο κερντάν μι λοβέντζαρ, σόσκε ακανά τσσιναβέσα τι κερές κουμάντος κο κχερ”.
3 Αζομάν ο υπηρέτης βακερντάς αντρέ πέστε: “Σο τι κεράβ ακανά σο μο κύριος κα νασκιαρέλ-μαν ντα να κα αβάβ λέσκο υπηρέτης; Τι χαντζουβάβ να ισινόμ αζόμ ζουρανό, τι τζαβ μανγκιμάσκε λατζάβα.
4 Α! Τζανάβα σο κα κεράβ για τι τσσουβέν-μαν ο τζενέ πουμαρέ κχερέντε κάνα κα τσσιναβάβ τι κεράβ κουμάντος κο κχερ”.
5 Ντα κάνα ντινάς βίκος ι κάθε εκχές σο τθερέλας εκ μπόρτζι* λέσκε κυριόσκε, βακερντάς κο εκ: “Καζόμ μανγκέσα μι κυριόσκε;”
6 Ο τζενό βακερντάς: “Μανγκάβα λέσκε 2.200 λίτρα* λάδι”. Βοβ βακερντάς λέσκε: “Λε παλάλ ο χαρτίς σο τσσουντάν τι υπογραφή ντα μπες ντα γράφινε σουγκό 1.100”.
7 Σοράν βακερντάς εκχέ γιαβερέσκε: “Τούι καζόμ μανγκέσα μι κυριόσκε;” Ο τζενό βακερντάς: “Μανγκάβα λέσκε 17 χιλιάδες κιλά* γκιβ”. Βοβ βακερντάς λέσκε: “Λε παλάλ ο χαρτίς σο τσσουντάν τι υπογραφή ντα γράφινε 14 χιλιάδες”.
8 Ντα λέσκο κύριος ισαρντάς ι υπηρετής, παρόλο σο ισινέ άδικος, σόσκε κερντάς γκοντιαβέρ πράγματα.* Επειδή ο τσσαβέ ανταλέ ντουνιάσκε* συμπεριφερίντιβενα κο γιαβερά* πο γκοντιαβέρ τροπόσαρ κατά τσσαβέ σο ισί κο φως.
9 »Ντα με βακεράβα τουμένγκε: Κερέν αμαλέν* αντράλ κατά άδικος χουλανιπέ, για τι δεχτίνεν-τουμέν οτθέ σο βον μπεσένα για πάντα κάνα βοβ κα χασάρντιβελ.
10 Ο πιστός κο χουρντέ πράγματα ισί πιστός κο μπαρέ-ντα, ντα ο άδικος κο χουρντέ πράγματα ισί άδικος κο μπαρέ-ντα.
11 Άρα, άμα να σικαντέν ότι ισινέν πιστοί κο πράγματα σο τθερένα τι κερέν ι άδικε χουλανιμάσαρ, κον κα τθερέλ τουμένγκε μπέσα για τι ντελ-τουμέν οντουβά σο ισί αληθινός;
12 Ντα άμα να σικαντέν ότι ισινέν πιστοί κο πράγματα σο τθερένα τι κερέν οντουλέσαρ σο ισί εκχέ γιαβερέσκο, κον κα ντελ-τουμέν κάτι τουμένγκε;
13 Καέκ υπηρέτης ναστί αβέλα δούλος ντουέ κυριόνγκο, σόσκε ή κα μισίνελ ι εκχές ντα κα μανγκέλ ι γιαβερές ή κα ατσσόλ πασέ κο εκ ντα να κα σεβάνελ ι γιαβερές. Αντικάς τουμέν-ντα ναστί αβένα δούλοι εμ ι Ντεβλέσκε εμ ι Χουλανιμάσκε».
14 Ο Φαρισαίοι όμως, σο μανγκένας μπουτ ο λοβέ, ασουνένας-λεν σαρέ ανταλά ντα ασάνας πουμένγκε λέσαρ.
15 Οτθάρ, βακερντάς λένγκε: «Τουμέν βακερένα ανγκλάλ κο τζενέ ότι ισινέν δίκαιοι, αλλά ο Ντεβέλ τζανέλα τουμαρό γκι. Σόσκε σο-ντα ισί σημαντικός κι τζενένγκε γιακχά ισί τζουνγκαλό ι Ντεβλέσκε.
16 »Ο Νόμος ντα ο Προφήτες ισινέ μέχρι κο Ιωάννης. Οτθάρ μπερί μουτθάντιβενα ο λατσσέ αμπέρια ι Ντεβλέσκε Βασιλειάκερε, ντα σαβέ τι μανγκές τζενέ μαρένα-πες τι νακχέν λάτε.
17 Μπαγιά, ισί πο εύκολος τι χασάρντιβελ ο ουρανός ντα η πφουβ παρά μα τι νικιόλ μπαγιά εκ χουρντί γραμμή εκχέ γραμμάσταρ σο ισί κο Νόμος.
18 »Κον μουκχέλα πι ρομνιά* ντα παντρίνελα γιαβεράσαρ, κερέλα λουμνιπέ οπράλ πι μπιαβέστε.* Ντα κον κα παντρίνελ εκχέ ασακέ τζουβλιάσαρ σο μουκχλάς-λα λάκο ρομ κερέλα βοβ-ντα λουμνιπέ οπράλ κο μπιαβ.
19 »Ισινέ εκ χουλανό τζενό σο ιριαβέλας-πες μοβ ντα λινέ σεΐντζαρ σο ισινέ πααλίς, ντα κάθε ντιβές νακχέλας λατσσές αντρέ κο χουλανιπέ.
20 Όμως, λέσκε μπαρέ πορτάτε τσσουβένας εκχέ τζενές σο μανγκέλας λοβέ ντα βακέρντιβελας Λάζαρος. Βοβ ισινέ πφερντό πληγές
21 ντα μανγκέλας τι τσαλιαρέλ-πες οντουλέντζαρ σο περένας κατά χουλανέσκο τραπέζι. Ντα αβένας ο τζουκελά ντα ατσαρένας* λέσκε πληγές.
22 Ο τζενό σο μανγκέλας λοβέ μουλό εκ ντιβές, ντα ο άγγελοι γκερντέ-λες πασέ κο Αβραάμ.*
»Ο χουλανό-ντα μουλό ντα πραχουντέ-λες.
23 Ντα κο Μεζάρι* βαντιντάς πο γιακχά, καζόμ τσσίντελας μπουτ, ντα ντικχλάς ντουράλ ι Αβρααμίς ντα ι Λαζαρός πασέ λέστε.*
24 Οτθάρ ντινάς βίκος ντα βακερντάς: “Ντάντε Αβραάμ, τζίτζινε* μάνγκε ντα μπούτσσαβ ι Λαζαρός τι μπολέλ πι δαχτυλόσκι νάκρη κο πανί ντα τι σουρντιαρέλ μι τσσιπ, σόσκε τσσίνταβα μπουτ αντρέ ανταλέ μπουτ μπαρέ γιακάτε”.*
25 Αλλά ο Αβραάμ βακερντάς: “Μο τσσαβό, ντε-τουτ γκοντί ότι τούι τσαλιλάν λατσσέ πραγματέντζαρ κάνα τζουβντιόας, αλλά ι Λαζαρός αρακχλέ-λες γκεραλέ* πράγματα. Ακανά όμως, λοκχιόλα λέσκο γκι* ατθέ, αλλά τούι τσσίντεσα μπουτ.
26 Ντα εκτός σαρέ ανταλένταρ, ισί εκ μπαρό κενός σο χωρίνελα αμέν τουμένταρ, ντα αντικάς οντουλά σο μανγκένα τι νακχέν ακατάρ τουμέντε ναστί νακχένα, ντα οντουλά σο ισί οτθέ ναστί αβένα αμέντε”.
27 Αζομάν βοβ βακερντάς: “Άμα ισί αντικάς, μολίναβα-τουτ, ντάντε, τι μπουτσσαβές-λες κο κχερ μι νταντέσκο,
28 σόσκε τθεράβα παντζέ πφραλέν, για τι βακερέλ λένγκε τι τθερέν πουμαρί γκοντί* ντα αντικάς μα τι αβέν βον-ντα ανταλέ τθανέστε ντα τι τσσίντεν μπουτ”.
29 Αλλά ο Αβραάμ βακερντάς: “Τθερένα ι Μωυσής ντα ι Προφητέν, λεν τι ασουνέν”.
30 Αζομάν βοβ βακερντάς: “Νάα, ντάντε Αβραάμ. Αλλά άμα κα τζαλ λέντε εκ τανό κατά μουλέ, κα μετανιώνεν”.
31 Βοβ όμως βακερντάς λέσκε: “Άμα να ασουνένα ι Μωυσής ντα ι Προφητέν, να κα πακιάν ατζέ-ντα άμα κα ιστίλ εκ τανό κατά μουλέ”».
Υποσημειώσεις
^ Γιαβέρσοϊ «εκχέ υπευθυνός ι κχερέσκο».
^ Γιαβέρσοϊ «χρέος».
^ Κι Πουρανί Μπαλαμανί βακέρντιβελας «100 βαθ». Εκ βαθ ισινέ 22 λίτρα.
^ Κι Πουρανί Μπαλαμανί βακέρντιβελας «100 κορ». Εκ κορ γκιβ ισινέ πασέ 170 κιλά.
^ Γιαβέρσοϊ «σόσκε ντικχλάς ανγκλάλ».
^ Κι Πουρανί Μπαλαμανί βακέρντιβελας «πουμαρέ γενιάκε».
^ Γιαβέρσοϊ «φιλόν».
^ Μανγκέλα τι βακερέλ «νόμιμε ρομνιά».
^ Ο λάφι «ατσαράβα» βακέρντιβελα εμ «μουτσσαράβα».
^ Κι Πουρανί Μπαλαμανί βακέρντιβελας «κο γκέσι κι Αβρααμίσκο». Ο λάφι «γκέσι» βακέρντιβελα εμ «κολίν».
^ Κι Πουρανί Μπαλαμανί βακέρντιβελας «ι Λαζαρός λέσκε γκεσίστε».
^ Γιαβέρσοϊ «γιανγκάτε».
^ Γιαβέρσοϊ «μπίλατσσε, κακά».
^ Γιαβέρσοϊ «κοβλιόλα λέσκι ντουκχ».
^ Γιαβέρσοϊ «για τι ντελ-λεν τεμπί, δηλαδή προειδοποίηση».
