Ο Ευαγγέλιος σο Γραφιντάς ο Λουκάς 17:1-37
17 Σοράν βακερντάς πι μαθητένγκε: «Ισί μπαγιά ότι κα αβέν πράγματα σο κα κερέν μερικέν τι χασαρέν πουμαρί πίστη.* Όμως, τιμωρία κα τσσίντελ ο τζενό σο ανέλα-λεν!
2 Κα αβέλας πο λατσσό οντουλέ τζενέσκε τι ιμπλαβέν λέσκε κοριάτε εκ μπαρό μπαρ* ντα τι περαβέν-λες κι ντεριάβ παρά τι κερέλ εκχές ανταλένταρ σο ισί σαρ ο χουρντέ τι χασαρέλ πι πίστη.*
3 Τθερέν τουμαρί γκοντί. Άμα το πφραλ κα κερέλ αμαρτία, προειδοποίηνε-λες,* ντα άμα μετανιωσάλο, συγχώρινε-λες.
4 Ατζέ-ντα άμα κα αμαρτίνελ κόντρα τούτε εφτά φαρ αντρέ κο ντιβές ντα κα βουρτίνελ τούτε εφτά φαρ ντα κα βακερέλ: “Μετανιώναβα”, πρέπει τι συγχωρίνες-λες».
5 Ντα ο απόστολοι βακερντέ κο Κύριος: «Ντε-αμέν πο μπουτ πίστη».
6 Αζομάν ο Κύριος βακερντάς: «Άμα τθερένας αζόμ πίστη καζόμ ισί εκ μπουτ χουρντό σπόρος,* κα βακερένας ακαλέ καλέ μουριάκε: “Νίκαβ-τουτ ριζάσαρ ντα φύτινε-τουτ κι ντεριάβ!” ντα βόι κα ντέλας-τουμέν καν.
7 »Κον τουμένταρ σο λέσκο δούλος οργώνελα ή αρακχαβέλα ο ζώα κα βακερέλ λέσκε κάνα κα βουρτίνελ κατά χωράφι: “Έλα σουγκό κο τραπέζι τι χας”;
8 Οκιά μπάνταρ, να κα βακερέλ λέσκε: “Κερ μάνγκε τι χαβ, ντα ιρί εκ ποδιά ντα υπηρέτινε-μαν μέχρι τι χαβ ντα τι πιαβ, ντα σοράν μπορίνεσα τι χας ντα τι πις τούι”;
9 Πακιάνα ότι κα ισαρέλ-λες λέσκο κύριος επειδή απλά κερντάς ι μπουτί σο ντιντιλί-λες;
10 Αντικάς τουμέν-ντα, κάνα τθερένα κερντό σαρέ ο μπουτιά σο ντιντιλέ-τουμέν, τι βακερέν: “Άχρηστοι δούλοι ισινάμ. Κερντάμ ανταβά σο έπρεπε τι κεράς”».
11 Ντα σαρ τζάλας κάρινγκ κι Ιερουσαλήμ, νακχέλας κατά Σαμάρεια ντα κατά Γαλιλαία.
12 Καζόμ τζάλας αντρέ εκχέ γκαβέστε, ντικχλέ-λες 10 μουρσά σο ισινέ λεπροί ντα ατσσιλέ χάνικ ντουρ.
13 Ντα βακερντέ βικόσαρ: «Ιησού, Δάσκαλε, τζίτζινε* αμένγκε!»
14 Κάνα βοβ ντικχλάς-λεν, βακερντάς λένγκε: «Τζαν ντα σικαβέν-τουμέν κο ιερείς». Σοράν, καζόμ τζάνας, νασλί λένταρ η λέπρα.*
15 Εκ ανταλένταρ, κάνα ντικχλάς ότι αβιλό λατσσές, βουρτισάλο ντα δοξάνελας ι Ντεβλές μπαρέ βικόσαρ.
16 Ντα πελό μόσαρ τελέ, κο πιντρέ κι Ιησούσκε, ντα βακερέλας λέσκε ευχαριστώ. Βοβ ισινέ Σαμαρείτης.
17 Ο Ιησούς βακερντάς: «Ντες να αβιλέ λατσσές;* Κατέ ισί ο γιαβερά εννιά;
18 Καέκ γιαβέρ να βουρτισάλο τι ντελ δόξα κο Ντεβέλ εκτός ανταλέ μουρσέσταρ σο ισί γιαβερέ τθεμέσταρ;»
19 Αζομάν βακερντάς λέσκε: «Ίστι ντα τζα τούκε. Τι πίστη κερντάς-τουτ λατσσές».
20 Αζομάν σο πουτσλέ-λες ο Φαρισαίοι κάνα αβέλα η Βασιλεία ι Ντεβλέσκι, βακερντάς λένγκε: «Η Βασιλεία ι Ντεβλέσκι να αβέλα εκχέ τροπόσαρ σο κα αγαβέν-λα σαρέ.
21 Να κα βακερέν ο τζενέ: “Ντικχέν, ακατέ!” ή “Οκουτέ!” Σόσκε άκ’! η Βασιλεία ι Ντεβλέσκι ισί ατθέ τουμέντζαρ».
22 Αζομάν βακερντάς κο μαθητές: «Κα αβέλ ο βακίτι σο κα μανγκέν τι ντικχέν εκ κατά ντιβεσά ι τζενέσκε Τσσαβέσκερε, αλλά να κα ντικχέν-λες.
23 Ντα κα βακερέν τουμένγκε: “Ντικχέν, οκουτέ!” ή “Ντικχέν, ακατέ!” Μα τι τζαν ούτε τι τθάβντεν παλά-λέντε.
24 Σαρ η αστραπή λέλα-πες κατά εκ μπάντα ι ουρανόσκι μέχρι κι γιαβέρ, αντικάς κα αβέλ ο Τσσαβό ι τζενέσκο πι ντιβεσέστε.
25 Πρώτα όμως, πρέπει τι τσσίντελ μπουτ ντα τι κερντιόλ πέρα κατά τζενέ σο τζουβντιόνα ανταλέ βακιτίστε.*
26 Ντα σαρ αβιλό-πες κο ντιβεσά σο τζουβντιόλας ο Νώε, αντικάς κα αβέλ-πες κο ντιβεσά-ντα κι τζενέσκε Τσσαβέσκε:
27 ο τζενέ χάνας, πίνας, ο μουρσά ντα ο τζουβλιά παντρίνενας, μέχρι οντουβά ντιβές σο ο Νώε τσσουντάς-πες κι κιβωτός, ντα αβιλό ο Κατακλυσμός ντα καταστραφιντάς-λεν σαριλέν.
28 Κάτι ασακό αβιλό-πες κο ντιβεσά-ντα σο τζουβντιόλας ο Λωτ: ο τζενέ χάνας, πίνας, κινένας, μπικινένας, φυτίνενας, λατσσαρένας κχερά.
29 Αλλά ο ντιβές σο νικίστιλο ο Λωτ κατά Σόδομα, πελί γιακ* ντα θειάφι κατά ουρανός ντα καταστραφιντάς-λεν σαριλέν.
30 Αντικάς κα αβέν ο πράγματα κο ντιβές-ντα σο κα σικάντιβελ ο Τσσαβό ι τζενέσκο.
31 »Οντουβά ντιβές, κον ισί κι νταράτσα, αλλά τθερέλα πο πράγματα κο κχερ, μα τι γουλίλ τι λελ-λεν. Αντικάς-ντα, κον ισί αβρί κο χωράφι μα τι βουρτίνελ κο πράγματα σο ισί παλάλ.
32 Τι ντεν-τουμέν γκοντί ι Λωτίσκε ρομνιά.
33 Κον μανγκέλα τι ατσσικιαρέλ πι ζωή* αρακχαντί κα χασαρέλ-λα, αλλά κον κα χασαρέλ-λα κα ατσσικιαρέλ-λα τζουβντί.
34 Βακεράβα τουμένγκε: Οντιά ιράτ ντούι τζενέ κα αβέν εκχέ κρεβατίστε. Ο εκ κα λιντιόλ, αλλά ο γιαβέρ να κα λιντιόλ.
35 Ντούι τζουβλιά κα μορέν γκιβ κο ίδιος ντριμένι. Η εκ κα λιντιόλ, αλλά η γιαβέρ να κα λιντιόλ».
36 ——
37 Οτθάρ βον βακερντέ: «Κατέ, Κύριε;» Βοβ βακερντάς λένγκε: «Κάι ισί ο σώμας, οτθέ κα γκιντίντιβεν ο αετοί-ντα».
Υποσημειώσεις
^ Γιαβέρσοϊ «τι περέν».
^ Ανταλέ μπαρέσαρ μορένας ο γκιβ.
^ Γιαβέρσοϊ «τι περέλ».
^ Γιαβέρσοϊ «ντε-λες τεμπί ή ντε-λες ορμήνια».
^ Γιαβέρσοϊ «σπόρος σο βακέρντιβελα σινάπι». Ανταβά σπόρος ισί κο Ισραήλ. Μπορίνελα τι αβέλ σταρ μέτρα βουτσσό ντα νικαβέλα κλαδιά.
^ Κι Πουρανί Μπαλαμανί βακέρντιβελας «αβιλέ πάκι».
^ Κι Πουρανί Μπαλαμανί βακέρντιβελας «πάκι».
^ Κι Πουρανί Μπαλαμανί ισινέ ο λάφι «γενιά».
^ Γιαβέρσοϊ «γιανγκ».
^ Γιαβέρσοϊ «ψυχή».
