Ο Ευαγγέλιος σο Γραφιντάς ο Λουκάς 18:1-43
18 Σοράν βακερντάς λένγκε εκ παράδειγμας* για τι σικαβέλ καζόμ ανάγκη ισί τι προσευχίντιβεν πάντα ντα μα τι μουκχέν-πες:
2 «Εκχέ τθεμέστε ισινέ εκ δικαστής σο να νταρέλας κατά Ντεβέλ ντα να σεβάνελας καεκχέ τζενές.
3 Ισινέ εκ χήρα-ντα οντουλέ τθεμέστε σο εμ τζάλας λέστε ντα βακερέλας λέσκε: “Ντικχ τι αρακχάβ μο δίκιος οντουλέσταρ σο τζάλα μάντζαρ κόντρα”.
4 Για μπουτ βακίτι βοβ να μανγκέλας, αλλά σοράν βακερντάς αντρέ πέστε: “Παρόλο σο να νταράβα κατά Ντεβέλ ντα να σεβάναβα καεκχέ τζενές,
5 κα ντικχάβ τι αρακχέλ πο δίκιος ακαγιά χήρα για μα τι αβέλ εμ τι κχινιαρέλ-μαν ανταλέσαρ σο μανγκέλα,* σόσκε να τσσιναβέλα τι ανέλ μάνγκε προβλήματα”».
6 Αζομάν ο Κύριος βακερντάς: «Ασουντέν σο βακερντάς ο δικαστής, παρόλο σο ισί άδικος;
7 Άρα, να κα ανέλ ο Ντεβέλ δικαιοσύνη πι τραμπιμέ τζενέντε σο ντένα-λες βίκος ζουρανές ντισάρα ντα ιράτ, παρόλο σο σικαβέλα υπομονή λέντε;
8 Βακεράβα τουμένγκε ότι κα ανέλ δικαιοσύνη λέντε σουγκό. Αλλά κάνα κα αβέλ ο Τσσαβό ι τζενέσκο, κα αρακχέλ ασακί πίστη κι πφουβ;»
9 Ντα μερικέ τζενένγκε σο πακιάνας ότι ισινέ δίκαιοι ντα αμντίνενας ότι ο γιαβερά να αξίνενας τίποτα βακερντάς ακαβά παράδειγμας:
10 «Ντούι τζενέ γκιλέ κο ναός τι προσευχίντιβεν, ο εκ τανό ισινέ Φαρισαίος ντα ο γιαβέρ οντουλένταρ σο γκίντενας ο φόροι.
11 Ο Φαρισαίος ατσσιλό πι πιντρέντε, προσευχίντιβελας αντρά-πέσταρ ντα βακερέλας: “Ντέβλα μου, ευχαριστώ σο να ισινόμ σαρ ο γιαβερά, σο ισί τσορά,* άδικοι, κερένα λουμνιπέ οπράλ κο μπιαβ, ή ατζέ-ντα σαρ ακαβά τζενό σο γκίντελα ο φόροι.
12 Κεράβα νηστεία ντούι φαρ κι εβδομάδα. Ντάβα χάνικ* σαρέ κατά πράγματα σο λάβα”.
13 Αλλά ο τζενό σο γκίντελας ο φόροι ατσσόλας χάνικ ντουρ ντα να μανγκέλας ούτε τι βάντελ πο γιακχά κάρινγκ κο ουρανός, αλλά τσαλαβέλας πο γκέσι* ντα βακερέλας: “Ντέβλα μου, τζίτζινε μάνγκε, σόσκε ισινόμ αμαρτωλός”.
14 Βακεράβα τουμένγκε ότι κάνα βοβ γκιλό πι κχερέστε ισινέ πο δίκαιος οντουλέ Φαρισαιόσταρ. Σόσκε ο Ντεβέλ κα περαβέλ τελέ ι τζενές σο ισαρέλα-πες, αλλά κα βάντελ οπρέ οντουλές σο ισί ταπεινός».
15 Ντα μερικά τζενέ ανένας λέσκε πουμαρέ μαξιμίν για τι τσσουβέλ πο βαστά οπρά-λέντε. Αλλά κάνα ο μαθητές ντικχλέ-λες ανταβά, ντένας βίκος οπράλ κο τζενέ.
16 Ο Ιησούς όμως ντινάς βίκος ι μαξιμίν ντα βακερντάς λένγκε: «Μουκχέν ι χουρντέν τι αβέν μάντε ντα μα τσσιναβέν-λεν, σόσκε ασακέ τζενένγκε ισί η Βασιλεία ι Ντεβλέσκι.
17 Μπαγιά βακεράβα τουμένγκε: Κον να κα δεχτίνελ ι Βασιλεία ι Ντεβλέσκι σαρ εκ χουρντό να αβέλα-πες τι νακχέλ λάτε».
18 Ντα εκ άρχοντας πουτσλάς-λες: «Δάσκαλε σο ισινάν λατσσό, σο πρέπει τι κεράβ για τι λαβ ζωή για πάντα;»
19 Ο Ιησούς βακερντάς λέσκε: «Σόσκε βακερέσα ότι ισινόμ λατσσό; Καέκ νανέ λατσσό, σάντε εκ τανό, ο Ντεβέλ.
20 Τζανέσα ο εντολές: “Μα κερ λουμνιπέ οπράλ τι μπιαβέστε, μα μούνταρ, μα τσορ, μα χούχαβ,* σέβανε τι νταντές ντα τι νταγιά”».
21 Αζομάν βοβ βακερντάς: «Σαρέ ανταλά κεράβα-λεν χουρντιαρέλα μπερί».
22 Κάνα ασουντάς-λες ανταβά, ο Ιησούς βακερντάς λέσκε: «Εκ πράγμας ατσσόλα τι κερές ατζέκ: Μπίκινε οντουλά σο τθερέσα ντα ίλιαβ ο λοβέ κο τσορορέ, ντα κα τθερές θησαυρός κο ουρανός. Σοράν, έλα παλά-μάντε».
23 Κάνα βοβ ασουντάς-λες ανταβά, πφανγκιλό μπουτ λέσκο γκι, σόσκε ισινέ μπουτ χουλανό.
24 Ο Ιησούς ντικχλάς-λες ντα βακερντάς: «Καζόμ δύσκολος κα αβέλ τι νακχέν κι Βασιλεία κι Ντεβλέσκι οντουλά σο τθερένα λοβέ!
25 Ισί πο εύκολος τι νακχέλ εκ γκαμήλα αντράλ κατά σουβ παρά εκ χουλανό κι Βασιλεία κι Ντεβλέσκι».
26 Οντουλά σο ασουντέ-λες ανταβά βακερντέ: «Άμα ισί αντικάς, κον κα σώντιβελ;»
27 Βοβ βακερντάς: «Οντουλά σο να αβένα-πες ι τζενένγκε αβένα-πες ι Ντεβλέσκε».
28 Αζομάν ο Πέτρος βακερντάς: «Ντικχ! Αμέν μουκχλάμ αμαρέ πράγματα ντα αβιλάμ παλά-τούτε».
29 Βοβ βακερντάς λένγκε: «Μπαγιά βακεράβα τουμένγκε: Σαρέ οντουλά σο μουκχλέ κχερ ή ρομνιά ή πφραλέν ή νταντές ντα νταγιά ή τσσαβέν μάξους ι Ντεβλέσκε Βασιλειάκε,
30 κα λεν μπουτ φαρ πο μπουτ, ανταλέ βακιτίστε, ντα κο ντουνιάς* σο κα αβέλ ζωή για πάντα».
31 Σοράν λιντάς ι 12 αποστολόν χάνικ πο οκόρινγκ ντα βακερντάς λένγκε: «Σαρ ντικχένα, τζάσα κι Ιερουσαλήμ, ντα κα νικιόν μπαγιά σαρέ οντουλά σο γραφισάλε κατά προφήτες ντα τθερένα τι κερέν ι τζενέσκε Τσσαβέσαρ.
32 Για παράδειγμας, ο τζενέ κα ντεν-λες κο βαστά οντουλένγκε σο ισί γιαβερέ τθεμένταρ ντα κα πρασάν-λες ντα κα κερέν πράγματα για τι λατζάλ ντα κα τσσουνγκιαρέν-λες.
33 Κα νταπέν-λες βουρδαλόσαρ* ντα σοράν κα μουνταρέν-λες, αλλά κο τρίτος ντιβές κα ιστίλ».
34 Όμως, να αγαντέ τίποτα, σόσκε ανταλά λάφια ισινέ γκεραντέ λένταρ, ντα να αγαβένας σο μανγκέλας τι βακερέλ.
35 Καζόμ ερεσέλας ο Ιησούς κι Ιεριχώ, εκ κορορό μπεσέλας ντιπ πασέ κο ντρομ ντα μανγκέλας λοβέ.
36 Βοβ ασουντάς τι νακχέν τζενέ, οτθάρ πουτσέλας σο αβέλας-πες.
37 Βακερντέ λέσκε: «Ο Ιησούς ο Ναζωραίος νακχέλα!»
38 Αζομάν βοβ ντινάς βίκος: «Ιησού, σο ισινάν Τσσαβό ι Δαβιδίσκο, τζίτζινε* μάνγκε!»
39 Ντα οντουλά σο τζάνας πο ανγκλάλ ντένας βίκος οπρά-λέστε ντα βακερένας λέσκε μα τι κερέλ λάφι, αλλά βοβ ντέλας βίκος ατζέ πο μπουτ: «Τούι σο ισινάν Τσσαβό ι Δαβιδίσκο, τζίτζινε* μάνγκε!»
40 Αζομάν ο Ιησούς σαρ πφιρέλας ατσσιλό ντα βακερντάς τι ανέν ι τζενές πασέ λέστε. Κάνα ο τζενό γκιλό πασέ, ο Ιησούς πουτσλάς-λες:
41 «Σο μανγκέσα τι κεράβ τούκε;» Βοβ βακερντάς: «Κύριε, τι ντικχάβ πάλι».
42 Οτθάρ, ο Ιησούς βακερντάς λέσκε: «Ντικχ πάλι. Τι πίστη κερντάς-τουτ λατσσές».
43 Μπουτ σουγκό ντικχλάς πάλι ντα τζάλας παλά-λέστε ντα δοξάνελας ι Ντεβλές. Ντα κάνα σαρό ο λαός ντικχλάς-λες ανταβά, ισαρντάς ι Ντεβλές.
Υποσημειώσεις
^ Κι Πουρανί Μπαλαμανί βακέρντιβελας «παραβολή».
^ Γιαβέρσοϊ «μα τι αβέλ εμ τι ντελ-μαν μπουνιές μέχρι τι μερικιαρέλ-μαν».
^ Γιαβέρσοϊ «σο χουχαβένα ι γιαβερέν για τι λεν λένγκε πράγματα». Ο λάφι «τσορά» βακέρντιβελα εμ «τσορνέ».
^ Κι Πουρανί Μπαλαμανί βακέρντιβελας «ο δέκατος».
^ Γιαβέρσοϊ «κολίν».
^ Γιαβέρσοϊ «μα βάκερ ψεύτικα λάφια ντα κατηγορίες».
^ Γιαβέρσοϊ «μαστιγιόσαρ».
^ Ντικχ εδάφιος Λουκ. 18:38, υποσημείωση.
