Ο Ευαγγέλιος σο Γραφιντάς ο Λουκάς 19:1-48
19 Σοράν γκιλό αντρέ κι Ιεριχώ ντα πφιρέλας κι πόλη.
2 Οτθέ ισινέ εκ τζενό σο βακέρντιβελας Ζακχαίος. Βοβ ισινέ σορό οντουλένγκο σο γκίντενας ο φόροι ντα χουλανό.
3 Μανγκέλας τι ντικχέλ κον ισινέ ανταβά Ιησούς, αλλά ναστί ντικχέλας ιτιρί κατά μπουτ τζενέ σο ισινέ οτθέ, σόσκε ισινέ χαρνό.
4 Οντουλέσκε, τθαβντισάλο ανγκλάλ ντα νικλιντάς εκχέ χχελινγκινάτε* για τι ντικχέλ-λες, σόσκε κα νακχέλας οτθάρ.
5 Κάνα ο Ιησούς ερεσλό οτθέ, βαντιντάς πο γιακχά ντα βακερντάς λέσκε: «Ζακχαίε, γούλι σουγκό, σόσκε αντιβές πρέπει τι μπεσάβ τι κχερέστε».
6 Αζομάν βοβ γουλίστιλο σουγκό ντα πουταρντάς λέσκε πο κχερ χαράσαρ.
7 Κάνα ντικχλέ-λες ανταβά, σαρέ μουρμουρίνενας: «Γκιλό τι μπεσέλ κο κχερ εκχέ αμαρτωλόσκο».
8 Αλλά ο Ζακχαίος ιστίντιλο ντα βακερντάς κο Κύριος: «Ντικχ! Ο επκάς οντουλένταρ σο τθεράβα, Κύριε, ντάβα-λεν κο τσορορέ, ντα σαρέ οντουλά σο καπτιντόμ* κατά τζενέ, ντάβα-λεν παλάλ σταρ φαρ πο μπουτ».
9 Αζομάν ο Ιησούς βακερντάς λέσκε: «Αντιβές ο Ντεβέλ σωντάς ανταβά κχερ, σόσκε τούι-ντα ισινάν τσσαβό ι Αβρααμίσκο.
10 Ο Τσσαβό ι τζενέσκο αβιλό τι ρόντελ ντα τι σώνελ οντουλέν σο χασάρντιλε».
11 Σαρ ασουνένας-λεν ανταλά, βακερντάς εκ γιαβέρ-ντα παράδειγμας,* σόσκε ισινέ πασέ κι Ιερουσαλήμ ντα βον αμντίνενας ότι η Βασιλεία ι Ντεβλέσκι κα σικάντιβελας ατζεχάνικ.
12 Οτθάρ βακερντάς: «Εκ τζενό σο αστάρντιβελας βασιλιάσκε φαράταρ γκιλό εκχέ τθεμέστε ντουρ για τι αβέλ βασιλιάς ντα τι βουρτίνελ.
13 Ντινάς βίκος 10 πι δουλόνταρ ντα σοράν ντινάς-λεν μπουτ λοβέ* ντα βακερντάς λένγκε: “Κερέν μπουτί ανταλέ λοβέντζαρ μέχρι τι αβάβ”.
14 Αλλά ο τζενέ λέσκε τθεμέσταρ μισίνενας-λες ντα μπουτσσαντέ παλά-λέστε τζενέν τι βακερέν: “Να μανγκάσα τι αβέλ βοβ αμαρό βασιλιάς”.
15 »Ντα κάνα βουρτισάλο ντα αβιλόας βασιλιάς, ντινάς βίκος ι δουλόν σο λέντε ντινάας ο λοβέ* για τι ντικχέλ καζόμ κιάρι νικαντέας κατά μπουτί σο κερντέ.
16 Γκιλό ανγκλά-λέστε ο εκ ντα βακερντάς: “Κύριε, το λοβέ αβιλέ 10 φαρ πο μπουτ”.
17 Βοβ βακερντάς: “Μπουτ λατσσές κερντάν. Ισινάν λατσσό δούλος! Σικαντάν ότι ισινάν πιστός εκχέ μπουτ χουρντέ πραγμάστε, οτθάρ κερ κουμάντος 10 πόλεις”.
18 Σοράν αβιλό ο γιαβέρ ντα βακερντάς: “Το λοβέ, Κύριε, αβιλέ παντς φαρ πο μπουτ”.
19 Βακερντάς εμ λέσκε: “Κερ τούι-ντα κουμάντος παντς πόλεις”.
20 Αβιλό όμως εκ γιαβέρ-ντα σο βακερντάς: “Κύριε, άκ’ το λοβέ. Γκεραντόμας-λεν εκχέ κοτορέστε.
21 Νταράβας τούταρ, σόσκε ισινάν τζενό σουκέ γκίσκο. Λέσα οντουβά σο να ντινάν ντα γκίντεσα οντουβά σο να σπειριντάν”.
22 Βοβ βακερντάς λέσκε: “Τι λαφίνταρ κρίναβα-τουτ. Ισινάν πφιρνό* δούλος. Αφού τζανέας ότι ισινόμ τζενό σουκέ γκίσκο ντα λάβα οντουβά σο να ντινόμ ντα γκίνταβα οντουβά σο να σπειριντόμ,
23 σόσκε να τσσουντάν μο λοβέ* εκχέ τραπεζάτε για τι λάβας παλάλ πο μπουτ κάνα κα αβάβας;”
24 »Ντα βακερντάς οντουλένγκε σο ισινέ οτθέ: “Λεν λέσταρ ο λοβέ ντα ντεν-λεν οντουλέστε σο κερντάς-λεν 10 φαρ πο μπουτ”.
25 Αλλά βον βακερντέ λέσκε: “Κύριε, βοβ τθερέλα 10 φαρ πο μπουτ!”—
26 “Βακεράβα τουμένγκε: Κο κάθε εκ σο τθερέλα κα ντιντιόλ πο μπουτ. Αλλά οντουλέσταρ σο να τθερέλα κα λιντιόλ ατζέ-ντα ανταβά σο τθερέλα.
27 Ντα μι ντουσμανίν* σο να μανγκένας τι αβάβ λένγκο βασιλιάς, ανέν-λεν ατθέ ντα μουνταρέν-λεν ανγκλά-μάντε”».
28 Κάνα βακερντάς-λεν ανταλά, νασλό ντα τζάλας κι Ιερουσαλήμ.
29 Ντα κάνα ερεσλό πασέ κι Βηθφαγή ντα κι Βηθανία, κο βες σο βακέρντιβελας Βες ι Ζιτινίνγκο,* μπουτσσαντάς ντουέν πι μαθητένταρ
30 ντα βακερντάς λένγκε: «Τζαν κο γκαβ σο ντικχένα. Κάνα κα ντεν οτθέ αντρέ, κα αρακχέν εκχέ κχουρές* πφαντό σο οπρά-λέστε να μπεσλό ποτές καέκ. Πουτρέν-λες ντα ανέν-λες ατθέ.
31 Αλλά άμα κα πουτσέλ-τουμέν καέκ: “Σόσκε πουτρένα-λες;” βακερέν λέσκε: “Ο Κύριος μανγκέλα-λες”».
32 Οτθάρ, βον γκιλέ ντα αρακχλέ-λες αντικάς σαρ βακερντάς λένγκε.
33 Αλλά, σαρ πουτρένας ι κχουρές, οντουλά σο τθερένας-λες βακερντέ λένγκε: «Σόσκε πουτρένα ι κχουρές;»
34 Βον βακερντέ: «Ο Κύριος μανγκέλα-λες».
35 Ντα αντέ-λες κο Ιησούς ντα φουρτιντέ πουμαρέ αβραϊνέ σέα οπράλ κο κχουρό ντα τσσουντέ ι Ιησούς οπρά-λέστε.
36 Καζόμ βοβ τζάλας, βον μπουγαρένας πουμαρέ αβραϊνέ σέα τελέ κο ντρομ.
37 Κάνα ερεσλό πασέ κο ντρομ σο γουλίλας κατά Βες ι Ζιτινίνγκο, ο μπουτ μαθητές σο ισινέ οτθέ χαιρίνενας σαρέ ντα ισαρένας ι Ντεβλές μπαρέ βικόσαρ σαρέ ι θαυματένγκε σο ντικχλέας
38 ντα βακερένας: «Ευλογημέ ισί οντουβά σο αβέλα σαρ βασιλιάς κο ναβ κι Ιεχωβάσκο!* Ειρήνη κο ουρανός, ντα δόξα οντουλέστε σο μπεσέλα οπρέ!»
39 Όμως, μερικοί Φαρισαίοι κατά μπουτ τζενέ σο ισινέ οτθέ βακερντέ λέσκε: «Δάσκαλε, ντε βίκος οπράλ τι μαθητέντε».
40 Αλλά βοβ βακερντάς λένγκε: «Βακεράβα τουμένγκε: Άμα βον να κερντέ λάφι, κα ντεν βίκος ο μπαρά».
41 Ντα κάνα ερεσλό πασέ, ντικχλάς ι πόλη ντα ροντάς λάκε
42 ντα βακερντάς: «Σο σουκάρ τι τθερέας αγαντό τούι-ντα ανταβά ντιβές ο πράγματα σο ανένα ειρήνη! Αλλά ακανά γκεραντέ-πες τι γιακχίνταρ.
43 Σόσκε κα αρακχέν-τουτ ντιβεσά κάνα το ντουσμάνια κα τσσουβέν ντονταλάι τούταρ φράχτης μπαρέ καστέντζαρ σο τσσινένα. Κα πφάντεν-τουτ ντα κα αβέν οπρά-τούτε* σαρέ κατά μπάντες.
44 Κα περαβέν-τουτ ντα κα καταστραφίνεν τι τσσαβέν, ντα να κα μουκχέν τούκε καέκ μπαρ τι ατσσόλ οπράλ γιαβερέστε, σόσκε να αγαντάν ο βακίτι σο κρίντιβεσα».
45 Σοράν ντινάς αντρέ κο ναός ντα αρχιντάς τι πάλντελ οντουλέν σο μπικινένας
46 ντα βακερέλας λένγκε: «Ισί γραμμέ: “Μο κχερ κα αβέλ κχερ προσευχιάκο”, αλλά τουμέν κερντέν-λες σπηλιά τσορένγκι».*
47 Ντα σικλιαρέλας κάθε ντιβές κο ναός. Αλλά ο μπαρέ ιερείς ντα ο γραμματείς ντα ο μπαρέ σορέ ι λαόσκε ρόντενας σαρ τι μουνταρέν-λες,
48 αλλά να αρακχένας καέκ τρόπος τι κερέν-λες ανταβά, σόσκε σαρό ο λαός ατσσόλας πασέ λέστε ντα ιμπλάντιβελας λέσκε βουστένταρ.
Υποσημειώσεις
^ Κι Πουρανί Μπαλαμανί βακέρντιβελας «συκομουριάτε».
^ Γιαβέρσοϊ «σο καπτιντόμ ψεύτικε λαφίντζαρ ντα κατηγοριέντζαρ».
^ Κι Πουρανί Μπαλαμανί βακέρντιβελας «παραβολή».
^ Κι Πουρανί Μπαλαμανί βακέρντιβελας «10 μνες». Η μπαλαμανί μνα ζυγίνελας 340 γραμμάρια ντα ισινέ 100 ντραμάς.
^ Κι Πουρανί Μπαλαμανί βακέρντιβελας «ο ασήμι».
^ Γιαβέρσοϊ «γκεραλό, μπίλατσσο».
^ Κι Πουρανί Μπαλαμανί βακέρντιβελας «ο ασήμι».
^ Γιαβέρσοϊ «εχθρόν».
^ Γιαβέρσοϊ «Όρος των Ελαιών».
^ Γιαβέρσοϊ «πουλαρίς, χουρντέ χχερές».
^ Γιαβέρσοϊ «κα ανέν τούκε ντουκχ».
^ Γιαβέρσοϊ «τσορνένγκι».
