Ο Ευαγγέλιος σο Γραφιντάς ο Λουκάς 2:1-52
2 Οντουλά ντιβεσά ο Καίσαρας Αύγουστος νικαντάς νόμος τι δηλώνεν-πες σαρέ ο τζενέ σο μπεσένας κι πφουβ.
2 (Ανταγιά ισινέ η πρώτη φαρ σο δηλωντέ-πες κάνα ο Κυρήνιος κερέλας κουμάντος κι Συρία.)
3 Ντα σαρέ τζάνας τι δηλώνεν-πες, ο κάθε εκ πι τθεμέστε.
4 Οτθάρ, γκιλό ο Ιωσήφ-ντα κατά πόλη Ναζαρέτ σο ισί κι Γαλιλαία κι πόλη κι Δαβιδίσκι, κι Βηθλεέμ σο ισί κι Ιουδαία, σόσκε βοβ-ντα αστάρντιβελας κατά Δαβίδ.
5 Γκιλό τι δηλώνελ-πες ι Μαριάσαρ, πι ρομνιάσαρ,* σο αζομάν ισινέ τι μπιανέλ.
6 Καζόμ ισινέ οτθέ, αβιλό ο σαάτι τι μπιανέλ.
7 Ντα μπιαντάς πι πρώτε τσσαβές, πακιαρντάς-λες παταβέντζαρ ντα τσσουντάς-λες κι φάτνη,* σόσκε να αρακχλέ τθαν τι μπεσέν.
8 Οντουλέ τθεμέστε ισινέ τσομπάνια-ντα σο μπεσένας αβρί ντα αρακχαβένας πουμαρέ μπρακέν ι ιράτ.
9 Ντα εκ άγγελος ι Ιεχωβάσκο* ατσσιλό ανγκλά-λέντε, ντα εκ μπαρό φως* κατά Ιεχωβά* λέλας-πες ντονταλάι λένταρ, ντα βον νταρασάλε μπουτ.
10 Αλλά ο άγγελος βακερντάς λένγκε: «Μα νταρέν, σόσκε μουτθαβάβα τουμένγκε λατσσέ αμπέρια σο κα ανέν μπαρί χαρά σαρό κο λαός.
11 Σόσκε αντιβές μπιάντιλο τουμέντε κι πόλη κι Δαβιδίσκι οντουβά σο κα σώνελ-τουμέν. Βοβ ισί Χριστός ο Κύριος.
12 Ντα άκ’ αντικάς κα αγαβέν-λες: Κα αρακχέν εκχέ μαξιμίς πακιαρντό παταβέντζαρ ντα ζαντιμέ* κι φάτνη».
13 Αζομάν σικαντέ-πες γιεκ ι αγγελόσαρ μπουτ γιαβερά-ντα άγγελοι* σο ισαρένας ι Ντεβλές ντα βακερένας:
14 «Δόξα κο Ντεβέλ οτθέ οπρέ, ντα κι πφουβ ειρήνη κο τζενέ σο κερένα λέσκο γκι».
15 Οτθάρ, κάνα ο άγγελοι νασλέας για τι βουρτίνεν κο ουρανός, ο τσομπάνια βακερένας ο εκ ι γιαβερέσκε: «Ελάν τι τζας ακανά κι Βηθλεέμ για τι ντικχάς σο αβιλό-πες οτθέ, αντικάς σαρ βακερντάς αμένγκε ο Ιεχωβά».*
16 Ντα γκιλέ σουγκό ντα αρακχλέ ι Μαριά ντα ι Ιωσηφίς, ντα ι μαξιμίς ζαντιμέ κι φάτνη.
17 Κάνα ντικχλέ-λες ανταβά, βακερντέ οντουλά σο ασουντέας ι χουρντέσκε.
18 Ντα σαρέ ο τζενέ σο ασουντέ ι τσομπανίν ατσσιλέ πουταρντέ μόσαρ οντουλένταρ σο βακερντέ λένγκε,
19 αλλά η Μαρία γκεραβέλας σαρέ ανταλά λάφια αντρέ πι γκίστε ντα σκεφτίνελας μπουτ λατσσές σο μανγκένας τι βακερέν.
20 Σοράν, σαρ βουρτίνενας ο τσομπάνια, δοξάνενας ντα ισαρένας ι Ντεβλές σαρέ οντουλένγκε σο ασουντέας ντα ντικχλέας, αντικάς σαρ βακέρντιλοας λένγκε.
21 Σοράν οχτώ ντιβεσένταρ, κάνα αβιλό ο σαάτι τι κερέν λέσκε περιτομή, τσσουντέ λέσκε ο ναβ Ιησούς, ο ναβ σο βακερντάας ο άγγελος πριν τι ατσσόλ λέσκι ντάι κχαμνί λέστε.
22 Ατζέ, κάνα αβιλό ο βακίτι για τι καθαρίντιβεν αντικάς σαρ βακερέλα ο Νόμος ι Μωυσίσκο, γκερντέ-λες κι Ιερουσαλήμ ντα αντέ-λες ανγκλάλ κο Ιεχωβά,*
23 σαρ ισί γραμμέ κο Νόμος κι Ιεχωβάσκο:* «Κάθε πρώτος μουρς σο μπιάντιβελα πρέπει τι αβέλ άγιος ι Ιεχωβάσκε».*
24 Ντα ντινέ θυσία αντικάς σαρ βακερέλα ο Νόμος ι Ιεχωβάσκο:* «Ντούι τρυγόνια ή ντούι χουρντέ περιστέρια».
25 Ντα ισινέ εκ τζενό κι Ιερουσαλήμ σο βακέρντιβελας Συμεών. Βοβ ισινέ δίκαιος, νταρέλας κατά Ντεβέλ ντα μπεσέλας τι αβέλ ο βακίτι σο κα κοβλιόλ ι Ισραηλίσκι ντουκχ,* ντα άγιος πνεύμας ισινέ οπρά-λέστε.
26 Ατζέ, ο Ντεβέλ σικαντάας λέσκε αντράλ κατά άγιος πνεύμας ότι να κα μερέλας άμα να κα ντικχέλας ι Χριστός ι Ιεχωβάσκο.*
27 Οτθάρ, ο πνεύμας ι Ντεβλέσκο κερντάς-λες τι αβέλ κο ναός, ντα κάνα ο ντατ ντα η ντάι αντέ αντρέ ι χουρντές, ι Ιησούς, για τι κερέν λέσκε οντουβά σο βακερέλας ο Νόμος,
28 λιντάς ι τσσαβές πι ανγκαλιάτε, δοξαντάς ι Ντεβλές ντα βακερντάς:
29 «Κύριε, σο ισινάν ο Πο Μπαρό, ακανά να χάλα-μαν ανάγκη τι μεράβ αφού κερντάν οντουβά σο βακερντάν,
30 σόσκε μο γιακχά ντικχλέ οντουλές σο ντέσα για τι σώνελ ι τζενέν,
31 οντουλές σο μπουτσσαντάν για τι ντικχέν-λες σαρέ ο λαοί.
32 Βοβ ισί φως για τι νασκιαρέλ ο καρανίκι σο ιτσσαρέλα ι τθεμέν ντα ισί δόξα τι λαόσκι ι Ισραηλίσκι».
33 Ντα κάνα ασουνένας ο λάφια σο βακέρντιβενας ι τσσαβέσκε, ο ντατ ντα η ντάι σαστίνενας.
34 Ατζέ, ο Συμεών ντινάς-λεν ζαμ ντα βακερντάς κι Μαρία, κι ντάι κι τσσαβέσκι: «Ιτιρί ανταλέ τσσαβέσταρ μπουτ τζενέ κο Ισραήλ κα περέν ή κα ιστίν. Βοβ κα αβέλ σημάδι σο ο τζενέ κα τζαν λέσαρ κόντρα πουμαρέ λαφίντζαρ
35 (βα, μπαρί τσσουρί κα νακχαβέλ-τουτ*), για τι σικάντιβελ σο ισί αντρέ κο γκι μπουτένγκο».
36 Ντα ισινέ εκ προφήτισσα, η Άννα, σο λάκο ντατ ισινέ ο Φανουήλ, κατά φάρα Ασήρ. Λάκε μπρεσά νακχλέας, ντα τζουβντιλίας πι ρομέσαρ σάντε εφτά μπρεσά οτθάρ μπερί σο παντρισάλεας
37 μέχρι σο μουλό λάκο ρομ. Ντα ερεσλίας ακανά 84 μπρεσένγκι. Να λειπίνελας ποτές κατά ναός, ντα για τι ντελ λατρεία* ντισάρα ντα ιράτ, κερέλας νηστεία ντα μολίνελας ι Ντεβλές.*
38 Ντιπ οντουβά σαάτι, γκιλί πασέ ντα αρχισάλι τι βακερέλ ευχαριστώ κο Ντεβέλ ντα τι κερέλ λάφι ι τσσαβέσκε σαρέ κο τζενέ σο μπεσένας τι ελευθερώντιβελ η Ιερουσαλήμ.
39 Ντα κάνα κερντέας-λεν σαρέ αντικάς σαρ βακερέλας ο Νόμος ι Ιεχωβάσκο,* βουρτισάλε κι Γαλιλαία, πουμαρέ πολιάτε κι Ναζαρέτ.
40 Ντα ο χουρντό μπαριόλας ντα ζουράνιβελας, ντα καζόμ τζάλας αβέλας πο γκοντιαβέρ, ντα αβέλας ο γκι ι Ντεβλέσκο λέσαρ.
41 Λέσκο ντατ ντα λέσκι ντάι τζάνας κάθε μπρες κι Ιερουσαλήμ για τι κερέν ο Πάσχας.
42 Ντα κάνα βοβ ισινέ 12 μπρεσένγκο, γκιλέ οτθέ αντικάς σαρ ισινέ σικλέ τι κερέν κο μπαρό ντιβές.
43 Κάνα νακχλέ ο μπαρέ ντιβεσά ντα βον βουρτίνενας, ο τσσαβό, ο Ιησούς, ατσσιλό παλάλ κι Ιερουσαλήμ, αλλά λέσκο ντατ ντα λέσκι ντάι να αγαντέ-λες ανταβά.
44 Αμντίνενας ότι ισινέ αντρέ κο τζενέ σο βουρτίνενας γιεκ λέντζαρ. Αφού κερντέ εκ ντιβές ντρομ, αρχισάλε τι ρόντεν λέσκε πουμαρέ τζενέντε ντα πουμαρέ γνωστόντε.
45 Αλλά να αρακχλέ-λες, οτθάρ βουρτισάλε κι Ιερουσαλήμ ντα ρόντενας λέσκε.
46 Ντα σοράν τρινέ ντιβεσένταρ αρακχλέ-λες κο ναός τι μπεσέλ ι δασκαλόντζαρ ντα τι ασουνέλ-λεν ντα τι κερέλ λένγκε ερωτήσεις.
47 Αλλά σαρέ οντουλά σο ασουνένας-λες ατσσόνας πουταρντέ μόσαρ κατά μπουτ πράγματα σο αγαβέλας ντα κατά απαντήσεις σο ντέλας.
48 Οτθάρ, κάνα λέσκο ντατ ντα λέσκι ντάι ντικχλέ-λες, σαστισάλε, ντα λέσκι ντάι βακερντάς λέσκε: «Μο τσσαβό, σόσκε κερντάν-λες αμένγκε ανταβά; Το ντατ ντα με νταρασάλαμ μπουτ ντα ρόνταας τούκε».
49 Αλλά βοβ βακερντάς λένγκε: «Σόσκε ρόντενας μάνγκε; Να τζανένας ότι πρέπει τι αβάβ κο κχερ μι Νταντέσκο;»
50 Όμως, βον να αγαντέ οντουβά σο βακερντάς λένγκε.
51 Σοράν βουρτισάλο λέντζαρ κι Ναζαρέτ ντα ντέλας καν λέντε. Ντα λέσκι ντάι γκεραβέλας σαρέ ανταλά λάφια μπουτ λατσσές αντρέ πι γκίστε.
52 Ντα ο Ιησούς καζόμ τζάλας αβέλας πο γκοντιαβέρ, μπαριόλας, ντα αβέλας ο γκι εμ ι Ντεβλέσκο εμ ι τζενένγκο λέσαρ.
Υποσημειώσεις
^ Γιαβέρσοϊ «ι Μαριάσαρ, σο αφού νισανλισάλεας, ισινέ λέσαρ παντριμέ».
^ Κι κοπάνια σο χάνας ο ζώα.
^ Κι Πουρανί Μπαλαμανί ισινέ ο λάφι «δόξα».
^ Γιαβέρσοϊ «ξαπλωμέ».
^ Γιαβέρσοϊ «σικαντάς-πες γιεκ ι αγγελόσαρ μπαρό στρατός κατά ουρανός».
^ Γιαβέρσοϊ «κα λοκχιόλ ι Ισραηλίσκο γκι».
^ Γιαβέρσοϊ «κα νακχαβέλ τιρί ψυχή».
^ Γιαβέρσοϊ «άγια υπηρεσία».
^ Κι Πουρανί Μπαλαμανί ισινέ ο λάφι «δέηση». Ντικχ εδάφιος Λουκ. 1:13, υποσημείωση.
