Ο Ευαγγέλιος σο Γραφιντάς ο Λουκάς 23:1-56
23 Οτθάρ, ιστίντιλε σαρέ γιεκ ντα γκερντέ-λες κο Πιλάτος.
2 Αζομάν κατηγορίνενας-λες ακαλέ λαφίντζαρ: «Ντικχλάμ ότι ακαβά τζενό χουχαβέλα αμαρέ λαός, να μουκχέλα ι τζενέν τι ποκινέν φόρος κο Καίσαρας ντα βακερέλα ότι βοβ ισί ο Χριστός ο βασιλιάς».
3 Ο Πιλάτος πουτσλάς-λες: «Τούι ισινάν ο βασιλιάς ι Ιουδαιόνγκο;» Βοβ βακερντάς: «Τούι κορκορό βακερέσα-λες».
4 Αζομάν ο Πιλάτος βακερντάς κο μπαρέ ιερείς ντα κο μπουτ τζενέ σο ισινέ οτθέ: «Να αρακχάβα κάτι ακαλέ τζενέστε για τι κατηγορίναβ-λες».
5 Αλλά βον να τσσιναβένας τι βακερέν: «Ανέλα βαβούρα κο λαός ανταλέντζαρ σο σικλιαρέλα σαρί κι Ιουδαία. Ασταρντάς κατά Γαλιλαία ντα ερεσλό μέχρι ατθέ».
6 Κάνα ο Πιλάτος ασουντάς-λες ανταβά, πουτσλάς άμα ο Ιησούς ισινέ Γαλιλαίος.
7 Κάνα σικλιλό ότι ισινέ κατά τθεμ σο κερέλας κουμάντος ο Ηρώδης, μπουτσσαντάς-λες κο Ηρώδης, σο ισινέ βοβ-ντα κι Ιερουσαλήμ οντουλά ντιβεσά.
8 Κάνα ο Ηρώδης ντικχλάς ι Ιησούς, χαιρισάλο μπουτ. Σόσκε μπουτ βακίτι μανγκέλας τι ντικχέλ-λες, επειδή ασουντάας μπουτ λέσκε, ντα μπεσέλας τι ντικχέλ-λες τι κερέλ εκ θαύμας.
9 Οτθάρ πουτσέλας-λες μπουτ πράγματα, αλλά βοβ να βακερντάς λέσκε τίποτα.
10 Αλλά ο μπαρέ ιερείς ντα ο γραμματείς ιστίνας ντα κατηγορίνενας-λες χολιάσαρ.
11 Αζομάν ο Ηρώδης γιεκ πι στρατιωτέντζαρ κερντάς πράγματα για τι λατζάλ ο Ιησούς ντα πρασαντάς-λες, ιριαντάς-λες σεΐντζαρ σο λένας-πες, ντα σοράν μπουτσσαντάς-λες πάλι κο Πιλάτος.
12 Ο Ηρώδης ντα ο Πιλάτος αβιλέ αμαλά* οντουβά ντιβές. Πο τζανγκλέ ισινέ ντουσμάνια.*
13 Αζομάν ο Πιλάτος γκιντιντάς ι μπαρέ ιερεόν, ι αρχοντέν ντα ι λαός
14 ντα βακερντάς λένγκε: «Αντέν μάνγκε ακαλέ τζενές ντα βακερένα ότι κερέλα ι λαός μα τι ντελ καν. Οτθάρ, με κερντόμ λέσκε ερωτήσεις ανγκλά-τουμέντε, αλλά να αρακχλόμ λέστε κάτι σαρέ ανταλένταρ σο κατηγορίνενα-λες τουμέν.
15 Ούτε ο Ηρώδης αρακχλάς, σόσκε μπουτσσαντάς-λες αμένγκε παλάλ. Τίποτα να κερντάς για τι αξίνελ τι μερέλ.
16 Οτθάρ, κα τιμωρίναβ-λες ντα κα μουκχάβ-λες».
17 ——
18 Αλλά σαρέ ο τζενέ ντινέ βίκος: «Μούνταρ-λες* ντα νίκαβ αμένγκε ι Βαραββάς!»
19 (Βοβ ισινέ κι φυλακή σόσκε γκιλόας κόντρα κο μπαρέ σορέ κι τθεμέσκε ντα μουνταρντάας.)
20 Πάλι κερντάς λένγκε λάφι ο Πιλάτος, σόσκε μανγκέλας τι μουκχέλ ι Ιησούς.
21 Αζομάν βον βακερένας μπαρέ βικόσαρ: «Ιμπλάβ-λες κο κας! Ιμπλάβ-λες κο κας!»
22 Ατζέκ εκ φαρ βακερντάς λένγκε: «Σόσκε; Σο γκεραλιπέ* κερντάς; Να αρακχλόμ λέστε τίποτα για τι αξίνελ τι μερέλ. Οτθάρ, κα τιμωρίναβ-λες ντα κα μουκχάβ-λες».
23 Αζομάν βον να τσσιναβένας τι ντεν βίκος ζουρανές ντα τι μανγκέν τι ιμπλάντιβελ κο κας, οντουλέσκε-ντα λένγκο λάφι νακχλό.
24 Οτθάρ, ο Πιλάτος λιντάς ι απόφαση τι κερέλ οντουβά σο μανγκλέ.
25 Νικαντάς ι μουρσές σο μανγκένας, οντουλές σο ισινέ κι φυλακή σόσκε γκιλόας κόντρα κο μπαρέ σορέ κι τθεμέσκε ντα μουνταρντάας, αλλά ντινάς ι Ιησούς για τι μουνταρέν-λες, αντικάς σαρ μανγκένας.
26 Λιντέ-λες ντα σοράν ασταρντέ εκχέ τζενές, ι Σιμωνάς κατά Κυρήνη, σο αβέλας αβριάλ κατά πόλη, ντα τσσουντέ-λες τι ακχαρέλ ο κας ι ντουκχένγκο* παλάλ κατά Ιησούς.
27 Παλά-λέστε τζάνας μπουτ τζενέ. Λέντζαρ ισινέ τζουβλιά-ντα σο τσαλαβένας πουμαρό γκέσι* κατά στεναχώρια ντα ροβένας ζουρανές λέσκε.
28 Ο Ιησούς μπολντιντάς-πες κάρινγκ λέντε ντα βακερντάς: «Τζουβλιάλεν σο μπεσένα κι Ιερουσαλήμ, μα ροβέν μάνγκε. Ροβέν τουμένγκε ντα τουμαρέ τσσαβένγκε.
29 Σόσκε αβένα ντιβεσά σο κα βακερέν ο τζενέ: “Ευτυχισμέ ισί ο τζουβλιά σο ναστί κερντέ τσσαβέν, σο να μπιαντέ ντα να ντινέ τσουτσί!”
30 Αζομάν ο τζενέ κα βακερέν κο μπαρέ βεσά: “Περέν οπρ’ αμέντε!” ντα κο χουρντέ βεσά: “Ιτσσαρέν-αμέν!”
31 Άμα ανταλά κερένα-λεν κάνα ο δέντρος ισί κοβλό, σο κα αβέλ-πες κάνα κα σουκιόλ;»
32 Ντα γκερένας γιαβερέ ντουέ μουρσέν, σο ισινέ τσορά,* για τι μουνταρέν-λεν γιεκ λέσαρ.
33 Κάνα ερεσλέ κο τθαν σο βακέρντιβελας Μουλικανό Σορό, ιμπλαντέ ι Ιησούς οτθέ κο κας ντα πασέ λέστε ι τσορέν, εκχές δεξιά ντα εκχές αριστερά.
34 Αλλά ο Ιησούς βακερέλας: «Ντάντε, συγχώρινε-λεν, σόσκε να τζανένα σο κερένα». Ατζέ, τσσουντέ κλήρος για τι ιλιαβέν λέσκε σέα.
35 Ντα ο λαός μπεσέλας ντα ντικχέλας. Αλλά ο άρχοντες ασάνας πουμένγκε λέσαρ ντα βακερένας: «Γιαβερέν σωντάς-λεν. Πες-ντα τι σώνελ άμα ισί ο Χριστός σο τραμπιντάς ο Ντεβέλ».
36 Ατζέ-ντα ο στρατιώτες κχελένας πουμένγκε λέσαρ. Τζάνας πασέ λέστε ντα ντένας-λες σουταλί μολ
37 ντα βακερένας: «Άμα ισινάν ο βασιλιάς ι Ιουδαιόνγκο, σώνε-τουτ».
38 Ισινέ εκ ταμπέλα-ντα οπρά-λέσταρ: «Ανταβά ισί ο βασιλιάς ι Ιουδαιόνγκο».
39 Αζομάν εκ κατά τσορά σο ισινέ ιμπλαντέ οτθέ αρχισάλο τι πρασάλ-λες ντα τι βακερέλ: «Τούι να ισινάν ο Χριστός; Σώνε εμ τουτ εμ αμέν!»
40 Ο γιαβέρ ντινάς βίκος οπρά-λέστε ντα βακερντάς λέσκε: «Να νταρέσα ιτς κατά Ντεβέλ, ακανά σο λιντάν ι ίδια τιμωρία ανταλέ τζενέσαρ;
41 Αμέν αξίνασα τι τσσίντας-λεν ανταλά σαρέ οντουλένγκε σο κερντάμ. Αλλά βοβ να κερντάς καέκ γκεραλό πράγμας».
42 Αζομάν βακερντάς: «Ιησού, μα τι μπιστρές-μαν κάνα κα αβές τι Βασιλειάτε».
43 Ντα βοβ βακερντάς λέσκε: «Μπαγιά βακεράβα τούκε αντιβές, κα αβές μάντζαρ κο Παράδεισος».
44 Ακανά ισινέ πασέ 12:00 κο μεσημέρι,* όμως πελό καρανίκι οπράλ σαρό κο τθεμ μέχρι πασέ 3:00 κο μεσημέρι,*
45 σόσκε ο φως ι κχαμέσκο χασάρντιλο. Αζομάν η κουρτίνα ι ναόσκι πφαράντιλι κο μασκάρ.
46 Ντα ο Ιησούς ντινάς βίκος ζουρανές ντα βακερντάς: «Ντάντε, τι βαστέντε μουκχάβα μι ζωή». Κάνα βακερντάς-λες ανταβά, μουλό.*
47 Κάνα ο αρχηγός ι στρατόσκο ντικχλάς σο αβιλό-πες, δοξάνελας ι Ντεβλές ακαλέ λαφίντζαρ: «Μπαγιά, ανταβά τζενό ισινέ δίκαιος».
48 Ντα κάνα σαρέ ο τζενέ σο γκιντισάλεας οτθέ για τι ντικχέν ο μεριπέ ι Ιησούσκο ντικχλέ οντουλά σο αβιλέ-πες, βουρτισάλε πουμαρέ κχερέστε ντα τσαλαβένας πουμαρό γκέσι.
49 Ντα σαρέ οντουλά σο τζανένας-λες ατσσόνας χάνικ ντουρ. Ατζέκ, ισινέ οτθέ μερικά τζουβλιά σο γκιλέας παλά-λέστε κάνα νασλόας κατά Γαλιλαία ντα ντικχένας-λεν ανταλά.
50 Ισινέ εκ μουρς-ντα σο βακέρντιβελας Ιωσήφ, τθερέλας θέση αντρέ κο Σάνχεδριν* ντα ισινέ λατσσό ντα δίκαιος.
51 (Βοβ να συμφωνιντάας τι βοηθίνελ-λεν για τι κερέν οντουβά σο μανγκένας ι Ιησούσκε.) Ισινέ κατά Αριμαθαία, εκ πόλη ι Ιουδαιόνγκι, ντα μπεσέλας ι Ντεβλέσκε Βασιλειάκε.
52 Βοβ γκιλό ανγκλάλ κο Πιλάτος ντα μανγκλάς ο σώμας ι Ιησούσκο.
53 Ντα γουλιαρντάς-λες ντα πακιαρντάς-λες εκχέ μπουτ λατσσέ λινέ κοτορέσαρ. Ντα τσσουντάς-λες εκχέ μεζαρίστε* σο ισινέ χαντζουντό κο βες ντα να τσσουντέας ατζέ καεκχές οτθέ.
54 Ισινέ Προετοιμασία,* ντα ατζεχάνικ κα αβέλας ο Σάββατος.
55 Ντα γκιλέ ο τζουβλιά-ντα σο αβιλέας γιεκ ι Ιησούσαρ κατά Γαλιλαία. Βον ντικχλέ χάνικ ο μεζάρι ντα σαρ τσσουντέας λέσκο σώμας.
56 Σοράν βουρτισάλε παλάλ τι ετοιμάνεν πράγματα σο κχάντενας μίσκι ντα λάδια. Αλλά κο Σάββατος να κερντέ μπουτιά αντικάς σαρ βακερέλας ο Νόμος.
Υποσημειώσεις
^ Γιαβέρσοϊ «φίλοι».
^ Γιαβέρσοϊ «εχθροί».
^ Κι Πουρανί Μπαλαμανί βακέρντιβελας «Λε ακαλές ακατάρ».
^ Γιαβέρσοϊ «μπίλατσσιπε, κακός».
^ Γιαβέρσοϊ «κολίν».
^ Γιαβέρσοϊ «τσορνέ».
^ Κι Πουρανί Μπαλαμανί βακέρντιβελας «πασέ ο έκτος σαάτι».
^ Κι Πουρανί Μπαλαμανί βακέρντιβελας «μέχρι κο ένατος σαάτι».
^ Γιαβέρσοϊ «τσσιναντάς τι λελ πο σουλούι».
^ Ισινέ ο πο μπαρό δικαστήριος ι Ιουδαιόνγκο.
^ Γιαβέρσοϊ «λιμορίστε».
