Ο Ευαγγέλιος σο Γραφιντάς ο Λουκάς 24:1-53
24 Αλλά ο πρώτος ντιβές ι εβδομαδάκο, αβιλέ ντιπ πρωί κο μεζάρι* ντα αντέ ο πράγματα σο κχάντενας μίσκι σο ετοιμαντέας.
2 Ντικχλέ όμως ότι ο μπαρ ταρτίντιλοας κατά μεζάρι
3 ντα κάνα ντινέ αντρέ, να αρακχλέ ο σώμας ι Κυριόσκο, ι Ιησούσκο.
4 Καζόμ σαστίνενας ανταλέσκε, ντούι μουρσά σεΐντζαρ σο λένας-πες ατσσιλέ πασέ λέντε.
5 Ο τζουβλιά νταρασάλε ντα ντικχένας τελέ, οτθάρ ο μουρσά βακερντέ λένγκε: «Σόσκε ρόντενα ι τζουβντέσκε κο μουλέ;
6 Νανέ ατθέ, ιστίντιλο. Ντεν-τουμέν γκοντί ότι, καζόμ ισινέ ατζέ κι Γαλιλαία,
7 βακερντάς τουμένγκε ότι ο Τσσαβό ι τζενέσκο πρέπει τι ντιντιόλ κο βαστά αμαρτωλόνγκε ντα τι ιμπλάντιβελ κο κας ντα κο τρίτος ντιβές τι ιστίλ».
8 Αζομάν ντινέ-πες γκοντί λέσκε λάφια
9 ντα βουρτισάλε κατά μεζάρι ντα βακερντέ-λεν σαρέ ανταλά κο Έντεκα ντα σαρέ κο γιαβερά.
10 Βον ισινέ η Μαρία η Μαγδαληνή, η Ιωάννα ντα η Μαρία, σο λάκο τσσαβό ισινέ ο Ιάκωβος. Ντα ο γιαβερά τζουβλιά σο ισινέ λέντζαρ βακερένας ο ίδια λάφια κο απόστολοι.
11 Όμως, ανταλά λάφια ντικχίντιβενας λένγκε ντινιλικανέ ντα να πακιάνας-λεν.
12 Ο Πέτρος όμως ιστίντιλο, τθαβντισάλο κο μεζάρι, κερντάς τελέ ντα ντικχλάς σάντε ο λινά κοτορά. Οτθάρ, νασλό ντα μανγκέλας τι σικλιόλ σο αβιλόας-πες.
13 Οντουβά ντιβές, ντούι λένταρ τζάνας εκχέ γκαβέστε σο βακέρντιβελας Εμμαούς, πασέ 11 χιλιόμετρα* κατά Ιερουσαλήμ,
14 ντα κερένας λάφι σαρέ οντουλένγκε σο αβιλέας-πες.
15 Καζόμ κερένας λάφι οντουλένγκε, ο Ιησούς γκιλό πασέ ντα πφιρέλας λέντζαρ,
16 αλλά λένγκε γιακχά να αγαβένας-λες.
17 Βοβ βακερντάς λένγκε: «Καλέ πραγματένγκε κερένα λάφι καζόμ πφιρένα;» Βον ατσσιλέ ντα ντικχλέ-λες περαντέ μόσαρ.
18 Οντουβά σο βακέρντιβελας Κλεόπας βακερντάς λέσκε: «Ξένος ισινάν, κορκορό μπεσέσα κι Ιερουσαλήμ ντα να τζανέσα* οντουλά σο αβιλέ-πες οτθέ ανταλά ντιβεσά;»
19 Βοβ πουτσλάς-λεν: «Καλά;» Βον βακερντέ λέσκε: «Οντουλά σο αβιλέ-πες κο Ιησούς κο Ναζωραίος. Βοβ σικαντάς ανγκλάλ κο Ντεβέλ ντα σαρό κο λαός ότι ισινέ ζουρανό προφήτης οντουλέντζαρ σο κερέλας ντα βακερέλας.
20 Αμαρέ μπαρέ ιερείς ντα αμαρέ άρχοντες ντινέ-λες για τι δικάντιβελ ντα τι μερέλ ντα ιμπλαντέ-λες κο κας.
21 Αμέν όμως μπεκλεντίναας ότι βοβ ισινέ οντουβά σο κα ανέλας ελευθερία κο Ισραήλ. Ντα εκτός σαρέ ανταλένταρ, αντιβές ισί ο τρίτος ντιβές οτθάρ μπερί σο αβιλέ-πες ανταλά πράγματα.
22 Αλλά μερικά τζουβλιά-ντα αμένταρ μουκχλέ-αμέν πουταρντέ μόσαρ, σόσκε γκιλέ ντιπ πρωί κο μεζάρι,
23 ντα κάνα να αρακχλέ λέσκο σώμας, αβιλέ ντα βακερντέ ότι ντικχλέας εκ μπαρί φαντασία-ντα: αγγελόν σο βακερντέ ότι βοβ ισί τζουβντό.
24 Σοράν μερικοί αμένταρ γκιλέ κο μεζάρι ντα αρακχλέ-λες ντιπ αντικάς σαρ βακερντέας ο τζουβλιά, αλλά λες να ντικχλέ-λες».
25 Οτθάρ, βοβ βακερντάς λένγκε: «Να ισινέν γκοντιαβέρ ντα τουμαρό γκι αργίνελα τι πακιάλ σαρέ οντουλά σο βακερντέ ο προφήτες!
26 Δεν έπρεπε ο Χριστός τι τσσίντελ-λεν σαρέ ανταλά ντα τι δοξάντιβελ;»
27 Ντα ασταρντάς κατά Μωυσής ντα σαρέ κατά Προφήτες ντα ντινάς-λεν τι αγαβέν οντουλά σο ισινέ σαρί κι Γραφή ντα τθερένας τι κερέν λέσαρ.
28 Ντα ερεσλέ πασέ κο γκαβ σο τζάνας, ντα βοβ κερντάς ότι τζάλας πο ντουρ.
29 Αλλά βον μολίνενας-λες τι μπεσέλ ακαλέ λαφίντζαρ: «Μπες αμέντζαρ, σόσκε κάι ισί κα αράτιβελ ντα ο ντιβές ατζεχάνικ κα μπιτίνελ». Αζομάν γκιλό αντρέ για τι μπεσέλ λέντζαρ.
30 Ντα καζόμ χάλας* γιεκ λέντζαρ, λιντάς ο μαντρό, ευλογιντάς-λες, πφανγκλάς-λες ντα ντέλας-λες λέντε.
31 Αζομάν πουτάρντιλε ντιπ λένγκε γιακχά ντα αγαντέ-λες. Αλλά βοβ εξαφανισάλο ανγκλά-λένταρ.
32 Ντα βακερντέ ο εκ κο γιαβέρ: «Να ερεσλέ ο λάφια ντιπ αντρέ αμαρέ γκίστε καζόμ κερέλας αμέντζαρ λάφι κο ντρομ ντα ντέλας-αμέν τι αγαβάς ντιπ ι Γραφή;»
33 Ντα ιστίντιλε ντιπ οντουβά σαάτι ντα βουρτισάλε κι Ιερουσαλήμ, ντα αρακχλέ ι 11 αποστολόν ντα οντουλέν σο ισινέ γκιντιμέ λέντζαρ
34 σο βακερένας: «Μπαγιά, ο Κύριος ιστίντιλο κατά μουλέ ντα σικαντάς-πες κο Σίμωνας!»
35 Αζομάν βον βακερντέ οντουλά σο αβιλέ-πες κο ντρομ ντα σαρ αγαντέ-λες κάνα πφανγκλάς ο μαντρό.
36 Καζόμ κερένας λάφι ανταλένγκε, βοβ αβιλό λέντε ντα βακερντάς λένγκε: «Ειρήνη τι αβέλ τουμέντε».
37 Αλλά επειδή λιντάας-λεν ιζρανί ντα πφερντιλέας νταρ, αμντίνενας ότι ντικχένας φαντασία.*
38 Οτθάρ, βοβ βακερντάς λένγκε: «Σόσκε νταρένα, ντα σόσκε να ισινέν σίγουροι αντρέ τουμαρέ γκίστε;
39 Ντικχέν μο βαστά ντα μο πιντρέ, ότι με ισινόμ. Ασταρέν-μαν ντα ντικχέν, σόσκε άμα ισινόμας φαντασία, να κα τθεράβας σώμας ντα κόκαλα, σαρ ντικχένα ότι τθεράβα με».
40 Ντα κάνα βακερντάς-λες ανταβά, σικαντάς λένγκε πο βαστά ντα πο πιντρέ.
41 Αλλά βον να πακιάνας ατζέ, σόσκε τθερένας χαρά ντα ατσσιλέας πουταρντέ μόσαρ. Οτθάρ, πουτσλάς-λεν: «Τθερένα ατθέ κάτι χαμάσκε;»
42 Ντα ντινέ-λες χάνικ πεκό ματσσό,
43 ντα βοβ λιντάς-λες ντα χαλάς-λες ανγκλάλ λένγκε γιακχίντε.
44 Σοράν βακερντάς λένγκε: «Ανταλά ισί ο λάφια σο βακερντόμ τουμένγκε κάνα ισινόμας ατζέ τουμέντζαρ, ότι σαρέ οντουλά σο τθερένα τι κερέν μάντζαρ ντα γραφισάλε κο Νόμος κι Μωυσίσκο ντα κο Προφήτες ντα κο Ψαλμοί πρέπει τι νικιόν μπαγιά».
45 Αζομάν πουταρντάς ντιπ λένγκι γκοντί για τι αγαβέν οντουλά σο μανγκέλα τι βακερέλ η Γραφή
46 ντα βακερντάς λένγκε: «Ισί γραμμέ ότι ο Χριστός κα τσσίντελας μπουτ ντα κα ιστίλας κατά μουλέ κο τρίτος ντιβές,
47 ντα μάξους λέσκε ναβέσκε κα μουτθάντιβελας πρώτα κι Ιερουσαλήμ ντα σοράν σαρέ κο τθεμά ότι ο τζενέ πρέπει τι μετανιώνεν για τι συγχωρίντιβεν λένγκε αμαρτίες.
48 Τουμέν κα μουτθαβέν ανταλά πράγματα.*
49 Ντα άκ’! Με μπουτσσαβάβα τουμένγκε οντουβά σο ντινάς πο λάφι μο Ντατ. Τουμέν, όμως, ατσσόν κι Ιερουσαλήμ μέχρι τι λεν ζορ κατά ουρανός».
50 Σοράν γκερντάς-λεν αβρί, μέχρι κι Βηθανία, ντα βαντιντάς πο βαστά ντα ντινάς-λεν ζαμ.
51 Καζόμ ντέλας-λεν ζαμ, μουκχλάς-λεν ντα λιντιλό κο ουρανός.
52 Ντα βον πελέ κοτσίντζαρ ανγκλά-λέστε ντα βουρτισάλε κι Ιερουσαλήμ μπαρέ χαράσαρ.
53 Ντα ισινέ συνέχεια κο ναός ντα δοξάνενας ι Ντεβλές.
Υποσημειώσεις
^ Γιαβέρσοϊ «λιμόρι».
^ Κι Πουρανί Μπαλαμανί βακέρντιβελας «60 στάδια». Ο στάδιος ισινέ 185 μέτρα.
^ Ή μπέκιμ «Κατά τζενέ σο αβιλέ κι Ιερουσαλήμ, σάντε τούι να τζανέσα;»
^ Γιαβέρσοϊ «ζαντίνελας ανγκλάλ κο τραπέζι». Ο λάφι «ζαντίναβα» βακέρντιβελα εμ «ξαπλώναβα».
^ Κι Πουρανί Μπαλαμανί βακέρντιβελας «πνεύμας».
^ Γιαβέρσοϊ «κα αβέν μάρτυρες ανταλέ πραγματένγκε».
