Ο Ευαγγέλιος σο Γραφιντάς ο Λουκάς 5:1-39
5 Εκ φαρ, κάνα μπουτ τζενέ ισινέ σαρέ οπρά-λέστε ντα ασουνένας ο λάφι ι Ντεβλέσκο, βοβ ισινέ πασέ κι λίμνη κι Γεννησαρέτ.*
2 Ντα ντικχλάς ντούι βάρκες αραγμέ κι νάκρη κι λίμνη, αλλά ο ψαράδες νικίστιλεας λένταρ ντα τθοβένας πουμαρέ δίχτυα.
3 Κάνα τσσουντάς-πες κι εκ βάρκα, σο ισινέ ι Σιμωνάσκι, μανγκλάς λέσταρ τι γκερέλ-λα χάνικ πο αντρέ. Σοράν μπεσλό ντα σικλιαρέλας ι τζενέν κατά βάρκα.
4 Κάνα τσσιναντάς τι κερέλ λάφι, βακερντάς κο Σίμωνας: «Τζα ντιπ αντρέ ντα τσσουβέν τουμαρέ δίχτυα για τι ασταρέν ματσσέν».
5 Αλλά ο Σίμωνας βακερντάς: «Δάσκαλε, σαρί ι ιράτ μαράας-αμέν ντα να ασταρντάμ τίποτα, αλλά αφού βακερέσα-λες τούι κα τσσουβάβ ο δίχτυα».
6 Κάνα κερντέ-λες ανταβά, ασταρντέ αζόμ μπουτέ ματσσέν σο λένγκε δίχτυα πφαράντιβενας.
7 Οτθάρ, κερντέ νόημας πουμαρέ αμαλέντε κι γιαβέρ βάρκα τι τζαν τι βοηθίνεν-λεν. Ντα βον γκιλέ ντα πφερντέ ο ντούι-ντα βάρκες αζόμ μπουτ σο αρχισάλε τι βουλιάνεν.
8 Κάνα ντικχλάς σο αβιλό-πες, ο Σίμωνας Πέτρος πελό κο κοτσά κι Ιησούσκε ντα βακερντάς: «Νας μάνταρ, Κύριε, σόσκε με ισινόμ αμαρτωλός τζενό».
9 Εμ βοβ εμ οντουλά σο ισινέ λέσαρ σαστισάλε μπουτ σο ασταρντέ αζόμ μπουτέ ματσσέν,
10 ντα ανταβά αβιλό-πες εμ κο Ιάκωβος εμ κο Ιωάννης, κο τσσαβέ κι Ζεβεδαιόσκε, σο κερένας μπουτί γιεκ ι Σιμωνάσαρ. Αλλά ο Ιησούς βακερντάς κο Σίμωνας: «Μα ντάρα. Από ακανά κα ασταρές τζουβντέ τζενέν».
11 Οτθάρ, νικαντέ ο βάρκες αβρί, μουκχλέ σαρέ ο πράγματα ντα γκιλέ παλά-λέστε.
12 Εκ γιαβέρ φαρ, κάνα βοβ ισινέ εκχέ πολιάτε, αρακχλέ εκχέ τζενές πφερντό λέπρα. Κάνα ντικχλάς ι Ιησούς, πελό τελέ μόσαρ ντα μολιντάς-λες: «Κύριε, άμα μανγκέσα τούι, μπορίνεσα τι κερές-μαν λατσσές».*
13 Ο Ιησούς τσσουντάς πο βας οπρά-λέστε ντα βακερντάς λέσκε: «Μανγκάβα! Τι αβές λατσσές».* Οντιά στιγμή νασλί λέσταρ η λέπρα.
14 Αζομάν ντινάς-λες εντολή μα τι βακερέλ-λες καεκχέσκε. Βακερντάς ακαβά-ντα: «Αλλά τζα τι σικαβές-τουτ κο ιερέας ντα ντε οντουλά σο βακερντάς ο Μωυσής. Αντικάς κα σικάντιβελ κο ιερείς ότι αβιλάν λατσσές».
15 Αλλά καζόμ νακχένας ο ντιβεσά, λένας αμπέρι λέσκε ατζέ πο μπουτ, ντα μπουτ τζενέ γκιντίντιβενας για τι ασουνέν ντα τι αβέν λατσσές πουμαρέ νασφαλιματένταρ.*
16 Βοβ, όμως, τζάλας μπουτ φαρ τθανέντε σο κα αβέλας κορκορό για τι προσευχίντιβελ.
17 Εκ οντουλέ ντιβεσένταρ, σαρ σικλιαρέλας, μπεσένας οτθέ Φαρισαίοι ντα τζενέ σο σικλιαρένας ο Νόμος. Βον αβιλέας κάθε γκαβέσταρ σο ισί κι Γαλιλαία ντα κι Ιουδαία ντα κατά Ιερουσαλήμ. Ντα τθερέλας κατά Ιεχωβά* ι ζορ τι κερέλ λατσσές γιαβερέν.
18 Ντα ισινέ τζενέ σο βάντενας εκχέ μπανγκές οπράλ εκχέ κρεβατίστε ντα μανγκένας τι ανέν-λες αντρέ ντα τι τσσουβέν-λες ανγκλάλ κο Ιησούς.
19 Αλλά ναστί ανένας-λες αντρέ ιτιρί κατά μπουτ τζενέ. Οτθάρ, νικλιντέ κι σκεπή ντα γουλιαρντέ-λες ι κρεβατίσαρ αντράλ κατά κεραμίδια, αντρέ οντουλέντε σο ισινέ ανγκλάλ κο Ιησούς.
20 Κάνα βοβ ντικχλάς λένγκι πίστη, βακερντάς ι μπανγκέσκε: «Το αμαρτίες συγχωρισάλε».
21 Αζομάν ο γραμματείς ντα ο Φαρισαίοι αρχισάλε τι βακερέν αντρέ πουμέντε ντα ο εκ ι γιαβερέσκε: «Κον ισί ακαβά τζενό σο τζάλα κόντρα κο Ντεβέλ πι λαφίντζαρ; Κον μπορίνελα τι συγχωρίνελ αμαρτίες εκτός κατά Ντεβέλ;»
22 Αλλά ο Ιησούς αγαντάς σο τθερένας πουμαρέ γκίστε ντα σο λάφι κερένας ο εκ ι γιαβερέσαρ, οτθάρ βακερντάς λένγκε: «Σο βακερένα αντρέ τουμαρέ γκίστε;
23 Σο ισί πο εύκολος τι κεράβ; Τι βακεράβ: “Το αμαρτίες συγχωρισάλε” ή τι βακεράβ: “Ίστι ντα πφιρ”;
24 Αλλά για τι σικλιόν ότι κο Τσσαβό κι τζενέσκο ντιντιλί η ζορ τι συγχωρίνελ αμαρτίες κι πφουβ—» βακερντάς ι μπανγκέσκε: «Βακεράβα τούκε: Ίστι, λε το κρεβάτι ντα τζα τι κχερέστε».
25 Αζομάν βοβ ιστίντιλο ανγκλά-λέντε, λιντάς πο κρεβάτι ντα δοξάνελας ι Ντεβλές σαρ τζάλας πι κχερέστε.
26 Οτθάρ, σαρέ σαστισάλε ντα δοξάνενας ι Ντεβλές ντα πφερντιλέ νταρ ντα βακερένας: «Ντικχλάμ θαύματα αντιβές!»
27 Σοράν νικίστιλο αβρί ντα ντικχλάς εκχέ τζενές σο γκίντελας ο φόροι, ι Λευίς, τι κερέλ μπουτί οτθέ σο γκιντίντιβενας ο φόροι, ντα βακερντάς λέσκε: «Έλα παλά-μάντε».
28 Ντα βοβ μουκχλάς-λεν σαρέ παλάλ, ιστίντιλο ντα γκιλό παλά-λέστε.
29 Σοράν ο Λευί κερντάς λέσκε εκ μπαρό τραπέζι πι κχερέστε, ντα μπουτ οντουλένταρ σο γκίντενας ο φόροι ντα γιαβερά τζενέ χάνας* γιεκ λέντζαρ.
30 Αζομάν ο Φαρισαίοι ντα λένγκε γραμματείς γκρινιάνενας ντα βακερένας λέσκε μαθητένγκε: «Σόσκε χάνα ντα πίνα τζενέντζαρ σο γκίντενα ο φόροι ντα αμαρτωλόντζαρ;»
31 Ο Ιησούς βακερντάς λένγκε: «Να χρειαζίντιβενα γιατρός ο ζουρανέ, αλλά ο νασφαλέ.
32 Με να αβιλόμ τι βικίναβ* δίκαιε τζενέν, αλλά αμαρτωλόν για τι μετανιώνεν».
33 Βον βακερντέ λέσκε: «Ο μαθητές ι Ιωαννίσκε κερένα νηστεία μπουτ φαρ ντα μολίνενα ι Ντεβλές,* εμ ο μαθητές ι Φαρισαιόνγκε, αλλά τιρέ χάνα ντα πίνα».
34 Ο Ιησούς βακερντάς λένγκε: «Αβέλα-πες τι τσσουβέν ι τζαμουτρέσκε αμαλέν* τι κερέν νηστεία καζόμ ισί λέντζαρ ο τζαμουτρό;
35 Αλλά κα αβέν ντιβεσά σο μπαγιά ο τζαμουτρό να κα αβέλ λέντζαρ.* Οντουλά ντιβεσά κα κερέν νηστεία λέσκε αμαλά».
36 Ντα βακερντάς λένγκε εκ παράδειγμας:* «Καέκ να τσσινέλα κοτόρ νεβέ σεΐνταρ για τι σουβέλ-λες κο πουρανέ, σόσκε ο νεβό κοτόρ γκιντίντιβελα ντα να ερεσέλα κο πουρανέ σέα.
37 Ντα καέκ να τσσουβέλα νεβί μολ πουρανέ ραβαλόντε κερντέ κατά μορτθί, σόσκε η νεβί μολ κα πφαραβέλ ο ράβαλα ντα κα τσσορντιόλ, ντα ο ράβαλα κα χαλάντιβεν ντιπ.
38 Αλλά ι νεβί μολ πρέπει τι τσσουβέν-λα νεβέ ραβαλόντε.
39 Καέκ να μανγκέλα νεβί μολ άμα πιλάς πουρανί, σόσκε βακερέλα: “Η πουρανί ισί λατσσί”».
Υποσημειώσεις
^ Δηλαδή κι Ντεριάβ κι Γαλιλαία.
^ Κι Πουρανί Μπαλαμανί βακέρντιβελας «πάκι».
^ Κι Πουρανί Μπαλαμανί βακέρντιβελας «πάκι».
^ Ο λάφι «νασφαλίματα» βακέρντιβελα εμ «πασλίματα» εμ «αμπόριες».
^ Γιαβέρσοϊ «ζαντίνενας ανγκλάλ κο τραπέζι». Ο λάφι «ζαντίναβα» βακέρντιβελα εμ «ξαπλώναβα».
^ Γιαβέρσοϊ «τι καλίναβ».
^ Κι Πουρανί Μπαλαμανί ισινέ ο λάφι «δέηση». Ντικχ εδάφιος Λουκ. 1:13, υποσημείωση.
^ Γιαβέρσοϊ «φιλόν».
^ Κι Πουρανί Μπαλαμανί βακέρντιβελας «ο τζαμουτρό κα λιντιόλ ντουρ λένταρ».
^ Κι Πουρανί Μπαλαμανί βακέρντιβελας «παραβολή».
