Ο Ευαγγέλιος σο Γραφιντάς ο Λουκάς 8:1-56
-
Ο τζουβλιά σο τζάνας παλάλ κο Ιησούς (1-3)
-
Ο παράδειγμας ι τζενέσαρ σο σπειρίνελα (4-8)
-
Σόσκε ο Ιησούς σικλιαρέλας παραδειγματέντζαρ (9, 10)
-
Σο μανγκέλα τι βακερέλ ο παράδειγμας ι τζενέσαρ σο σπειρίνελα (11-15)
-
Ο λυχνάρι δεν πρέπει τι ιτσσαρέν-λες (16-18)
-
Ντάι ντα πφραλά ι Ιησούσκε (19-21)
-
Ο Ιησούς ηρεμίνελα ι μπαρμπάλ (22-25)
-
Μπουτσσαβέλα ι δαιμονέν κο γουρούνια (26-39)
-
Ο Ιάειρος ντα λέσκι τσσάι. Εκ τζουβέλ ασταρέλα ο σέα ι Ιησούσκε (40-56)
8 Χάνικ πο σοράν αρχισάλο τι τζαλ τθεμ τθεμέστε ντα γκαβ γκαβέστε, μουτθαβέλας ντα βακερέλας ο λατσσέ αμπέρια ι Ντεβλέσκε Βασιλειάκερε. Ισινέ λέσαρ ο Δώδεκα
2 ντα μερικά τζουβλιά σο νικίστιλεας λένταρ ο δαίμονες ντα αβιλέας λατσσές νασφαλιματένταρ:* η Μαρία η Μαγδαληνή σο λάταρ νικίστιλεας εφτά δαίμονες,
3 η Ιωάννα σο λάκο ρομ βακέρντιβελας Χουζά ντα ισινέ υπηρέτης ι Ηρωδίσκο, η Σουσάννα ντα μπουτ γιαβερά τζουβλιά σο υπηρετίνενας-λεν πουμαρέ πραγματένταρ.
4 Κάνα γκιντισάλε μπουτ τζενέ γιεκ οντουλέντζαρ σο αβένας λέστε κατάρ-ντα τι μανγκές, βακερντάς εκ παράδειγμας:*
5 «Εκ τζενό γκιλό τι σπειρίνελ πο σπόρος. Οτθέ σο σπειρίνελας, μερικοί σπόροι πελέ κο ντρομ ντα ιστάντιλε, ντα ο τσιρικλέ χαλέ-λεν.
6 Μερικοί πελέ κο μπαρά ντα μπαριλέ, αλλά σοράν σουκιλέ σόσκε να τθερένας πανί.
7 Γιαβερά πελέ αντρέ κο καντρέ, ντα ο καντρέ σο μπαριλέ γιεκ λέντζαρ τασαντέ-λεν.
8 Γιαβερά όμως πελέ κι λατσσί τσικ, μπαριλέ ντα σοράν νικαντέ 100 φαρ πο μπουτ σπόροι οντουλένταρ σο τσσουβντιλέ». Καζόμ βακερέλας-λεν ανταλά, ντινάς βίκος: «Κον τθερέλα κανά για τι ασουνέλ, τι ασουνέλ».
9 Αλλά λέσκε μαθητές πουτσένας-λες σο μανγκέλας τι βακερέλ ανταβά παράδειγμας.
10 Βοβ βακερντάς: «Τουμέν μουκχλάς ο Ντεβέλ τι αγαβέν ο γκεραντέ πράγματα* λέσκε Βασιλειάκε, αλλά κο γιαβερά βακέρντιβενα παραδειγματέντζαρ. Ντα αντικάς βον, παρόλο σο ντικχένα, τι ντικχέν σινανέ. Ντα παρόλο σο ασουνένα, ιτς μα τι αγαβέν.
11 Άκ’ σο μανγκέλα τι βακερέλ ο παράδειγμας: Ο σπόρος ισί ι Ντεβλέσκε λάφια.
12 Ο σπόροι σο πελέ κο ντρομ ισί οντουλά σο ασουντέ, ντα σοράν αβέλα ο Μπενγκ ντα νικαβέλα ο λάφια λένγκε γκίσταρ για μα τι πακιάν ντα μα τι σώντιβεν.
13 Ο σπόροι σο πελέ κο μπαρά ισί οντουλά σο, κάνα ασουνένα ο λάφια, πακιάνα-λεν χαράσαρ, αλλά να τθερένα ρίζα. Πακιάνα για χάνικ, αλλά κάνα δοκιμάντιβενα, νασένα ντουρ.
14 Ο σπόρος σο πελό αντρέ κο καντρέ ισί οντουλά σο ασουντέ. Αλλά επειδή ο άγχος, ο χουλανιπέ ντα ο απολαύσεις ανταλέ ζωγιάκε τσσίντενα-λεν ντουρ, τασάντιβενα ντιπ ντα λένγκο καρπός να αβέλα λατσσό.
15 Αλλά ο σπόρος σο πελό κι λατσσί τσικ ισί οντουλά σο ασουνένα ο λάφια μπουτ λατσσέ γκίσαρ ντα σοράν ατσσικιαρένα-λεν ντα νικαβένα καρπός με υπομονή.
16 »Καέκ κάνα πφαμπαρέλα* λυχνάρι να ιτσσαρέλα-λες εκχέ τσαρέσαρ ντα να τσσουβέλα-λες τελάλ κατά κρεβάτι, αλλά τσσουβέλα-λες εκχέ βουτσσέ τθανέστε, ντα αντικάς οντουλά σο ντένα αντρέ ντικχένα ο φως.
17 Σο-ντα ισί γκεραντέ τθανέστε κα ντικχίντιβελ ντα σο-ντα ισί λατσσές γκεραντό κα μουτθάντιβελ ντα κα λιντιόλ αμπέρι.
18 Οτθάρ, τθερέν τουμαρί γκοντί για τι ασουνέν λατσσές, σόσκε κον τθερέλα, κα ντιντιόλ-λες πο μπουτ, αλλά κον να τθερέλα, ατζέ-ντα ανταβά σο αμντίνελα ότι τθερέλα κα λιντιόλ λέσταρ».
19 Ντα αβιλέ λέστε λέσκι ντάι ντα λέσκε πφραλά, αλλά ναστί τζάνας πασέ λέστε ιτιρί κατά μπουτ τζενέ.
20 Οτθάρ, ο τζενέ βακερντέ λέσκε: «Τι ντάι ντα το πφραλά μπεσένα αβρί ντα μανγκένα τι ντικχέν-τουτ».
21 Βοβ βακερντάς λένγκε: «Μι ντάι ντα μο πφραλά ισί οντουλά σο ασουνένα ο λάφι ι Ντεβλέσκο ντα κερένα-λες».
22 Εκ ντιβές τσσουντάς-πες εκχέ βαρκάτε πι μαθητέντζαρ ντα βακερντάς λένγκε: «Ελάν τι τζας κι γιαβέρ μπάντα». Ντα νασλέ ι βαρκάσαρ.
23 Καζόμ τσσίντενας ι βαρκάσαρ, λιντάς-λες λίντρα ντα σοτάς. Ντα αβιλί εκ μπουτ ζουρανί μπαρμπάλ κι λίμνη, ντα λένγκι βάρκα πφερντιόλας πανί ντα τζάνας τι τασάντιβεν.
24 Οτθάρ, τζανγκαντέ-λες ντα βακερντέ: «Δάσκαλε, Δάσκαλε, χασάρντιβασα!» Αζομάν βοβ ιστίντιλο ντα ντινάς βίκος οπράλ κι μπαρμπάλ ντα κι φουρτούνα. Ντα η μπαρμπάλ ατσσιλί ντα αβιλί-πες μπαρί ηρεμία.
25 Αζομάν βακερντάς λένγκε: «Κατέ ισί τουμαρί πίστη;» Αλλά βον πφερντιλέ νταρ ντα ατσσιλέ πουταρντέ μόσαρ, ντα βακερένας ο εκ ι γιαβερέσκε: «Κον ισί μπαγιά ανταβά σο ντέλα εντολή ατζέ-ντα κι μπαρμπάλ ντα κι φουρτούνα, ντα ντένα-λες καν;»
26 Ντα ερεσλέ ι βαρκάσαρ κο τθανά σο ισινέ ο Γερασηνοί, σο ισί κι γιαβέρ μπάντα κατά Γαλιλαία.
27 Κάνα ο Ιησούς νικίστιλο κατά βάρκα, ντικχλάς εκχέ δαιμονισμέ μουρσές κατά πόλη. Βοβ μπουτ βακίτι να ιρίλας σέα ντα να μπεσέλας κχερέστε, αλλά κο μεζάρια.*
28 Σο ντικχλάς ι Ιησούς, ντινάς βίκος ντα πελό τελέ ανγκλά-λέστε ντα βακερντάς ζουρανές: «Ιησού, τούι ισινάν Τσσαβό ι Ντεβλέσκο σο Ισί Πο Οπρέ Σαριλένταρ. Σο μπουτί τθεράβα με τούσαρ; Μολίναβα-τουτ, μα τιμώρινε-μαν».
29 (Σόσκε ο Ιησούς ντέλας εντολή κο δαίμονας τι νικιόλ κατά τζενό. Ο δαίμονας ντινάας αντρέ λέστε μπουτ φαρ.* Οτθάρ-ντα πφάντενας-λες παλάλ γιαβερέστε τζαντζιρίντζαρ* κο βαστά ντα κο πιντρέ ντα αρακχαβένας-λες, αλλά βοβ πφανγκέλας-λεν, ντα ο δαίμονας γκερέλας-λες κο ερημιές.)
30 Ο Ιησούς πουτσλάς-λες: «Καβά ισί το ναβ;» Βοβ βακερντάς: «Λεγεώνα»,* σόσκε μπουτ δαίμονες ντινέας αντρέ λέστε.
31 Ντα μολίνενας-λες μα τι ντελ-λεν εντολή τι τζαν κι άβυσσος.*
32 Οτθέ οπράλ κο βες ισινέ μπουτ γουρούνια σο χάνας. Οτθάρ, μολιντέ-λες τι μουκχέλ-λεν τι τσσουβέν-πες κο γουρούνια, ντα μουκχλάς-λεν τι τζαν.
33 Αζομάν ο δαίμονες νικίστιλε κατά τζενό ντα τσσουντέ-πες κο γουρούνια, ντα ο γουρούνια γκιλέ ούρια κο γκρεμός, πελέ κι λίμνη ντα τασάντιλε.
34 Κάνα ο τσομπάνια ντικχλέ σο αβιλόας-πες, νασλέ ντα βακερντέ-λες κι πόλη ντα κο τθανά ντονταλάι.
35 Αζομάν ο τζενέ νικίστιλε τι ντικχέν σο αβιλόας-πες. Αβιλέ κο Ιησούς ντα αρακχλέ ι τζενές σο νικίστιλεας ο δαίμονες λέσταρ τι μπεσέλ πασέ κο πιντρέ κι Ιησούσκε, ιριαντό ντα λατσσές κι γκοντί, ντα ασταρντάς-λεν νταρ.
36 Ο τζενέ σο ντικχλέας-λεν σαρέ ανταλά βακερντέ λένγκε σαρ αβιλόας λατσσές ο δαιμονισμέ τζενό.
37 Ντα μπουτ τζενέ κατά τθεμ σο ισινέ ο Γερασηνοί μανγκλέ κατά Ιησούς τι νασέλ οτθάρ, σόσκε πφερντιλέας μπαρί νταρ. Αζομάν βοβ τσσουντάς-πες κι βάρκα για τι νασέλ.
38 Όμως, ο τζενό σο νικίστιλεας ο δαίμονες λέσταρ μολίνελας τι λελ-λες ο Ιησούς πέσαρ, αλλά βοβ βακερντάς λέσκε τι νασέλ ακαλέ λαφίντζαρ:
39 «Βούρτινε τι κχερέστε, ντα τι βακερές σαρέ ανταλά σο κερντάς τούκε ο Ντεβέλ». Ντα βοβ νασλό ντα βακερέλας σαρί κι πόλη οντουλά σο κερντάας λέσκε ο Ιησούς.
40 Κάνα ο Ιησούς βουρτισάλο, ο μπουτ τζενέ σο ισινέ οτθέ κερένας λέσκε σαρ σαρ, σόσκε σαρέ μπεσένας λέσκε.
41 Αλλά αζομάν αβιλό εκ τζενό σο βακέρντιβελας Ιάειρος ντα ισινέ κατά σορέ ι συναγωγιάκε. Ντα πελό κο πιντρέ κι Ιησούσκε ντα μολίνελας-λες τι αβέλ λέσκε κχερέστε,
42 σόσκε λέσκι τσσάι, σο ισινέ πασέ 12 μπρεσένγκι ντα σάντε λα τθερέλας, ισινέ μεριμάσκε.
Σαρ τζάλας ο Ιησούς, ο μπουτ τζενέ σο γκιλέ παλά-λέστε ισινέ σαρέ οπρά-λέστε.
43 Ισινέ εκ τζουβέλ-ντα σο χασαρέλας ρατ 12 μπρεσά, ντα καέκ ναστί κερέλας-λα λατσσές.
44 Βόι γκιλί παλά-λέσταρ ντα ασταρντάς λέσκε σεΐνγκε κρόσσια ντα οντιά στιγμή τσσιναντάς τι χασαρέλ ρατ.
45 Αζομάν ο Ιησούς πουτσλάς: «Κον ασταρντάς-μαν;» Σαρέ βακερένας ότι να ασταρντέ-λες, οτθάρ ο Πέτρος βακερντάς: «Δάσκαλε, τούι ισινάν κο μασκάρ ντα αζόμ τζενέ ισί οπρά-τούτε».
46 Όμως, ο Ιησούς βακερντάς: «Εκ τζενό ασταρντάς-μαν, σόσκε αγαντόμ ότι νικίστιλι ζορ μάνταρ».
47 Κάνα η τζουβέλ ντικχλάς ότι ο Ιησούς αγαντάς-λα, αβιλί ιζραϊμάσαρ ντα πελί λέσκε πιντρέντε ντα βακερντάς ανγκλάλ σαριλέντε σόσκε ασταρντάς-λες ντα ότι αβιλί λατσσές οντιά στιγμή.
48 Αλλά βοβ βακερντάς λάκε: «Μι τσσάι, τι πίστη κερντάς-τουτ λατσσές. Τζα τούκε λατσσιμάσαρ».
49 Καζόμ κερέλας λάφι ατζέκ, αβιλό εκ τζενό κατά κχερ ι Ιαειρόσκο ντα βακερντάς λέσκε: «Τι τσσάι μουλί. Μα ενόχλινε γιαβέρ ι Δασκαλός».
50 Σο ασουντάς-λες ανταβά ο Ιησούς, βακερντάς λέσκε: «Μα ντάρα, σάντε τι πακιάς, ντα κα σώντιβελ».
51 Κάνα ερεσλό κο κχερ, να μουκχλάς καεκχές τι τζαλ αντρέ λέσαρ αλλά σάντε ι Πετρός, ι Ιωαννής, ι Ιακωβός ντα ι χουρντιάκε νταντές ντα νταγιά.
52 Σαρέ ροβένας ντα τσαλαβένας πουμαρό γκέσι* κατά στεναχώρια σο τθερένας λάκε. Οτθάρ, βακερντάς: «Μα ροβέν, σόσκε να μουλί αλλά σοβέλα».
53 Ντα βον ασάνας πουμένγκε λέσαρ, σόσκε τζανένας ότι μουλίας.
54 Αλλά βοβ ασταρντάς-λα κατά βας ντα ντινάς βίκος: «Χουρντίε, ίστι!»
55 Ντα η χουρντί τζουβντιλί* ντα ιστίντιλι οντιά στιγμή, ντα βοβ βακερντάς τι ντεν-λα τι χαλ.
56 Ντα εμ λάκο ντατ εμ λάκι ντάι λιντέ αζόμ χαρά σο να βακέρντιβελας λαφίντζαρ, αλλά βοβ ντινάς-λεν εντολή μα τι μουτθαβέν καεκχέσκε σο αβιλόας-πες.
Υποσημειώσεις
^ Ο λάφι «νασφαλίματα» βακέρντιβελα εμ «πασλίματα» εμ «αμπόριες».
^ Κι Πουρανί Μπαλαμανί βακέρντιβελας «παραβολή».
^ Γιαβέρσοϊ «ο άγια μυστικά».
^ Γιαβέρσοϊ «αλαβέλα».
^ Γιαβέρσοϊ «λιμόρια».
^ Ή μπέκιμ «Μπουτ βακίτι ο δαίμονας ασταρντάας-λες σικίς».
^ Γιαβέρσοϊ «αλυσιδέντζαρ».
^ Γιαβέρσοϊ «Χιλιάδες».
^ Γιαβέρσοϊ «κολίν».
^ Γιαβέρσοϊ «Ντα λάκο πνεύμας (σο ισί η ζορ ι ζωγιάκι) βουρτισάλο λάτε».
