Ο Ευαγγέλιος σο Γραφιντάς ο Μάρκος 11:1-33
11 Καζόμ ερεσένας πασέ κι Ιερουσαλήμ, κι Βηθφαγή ντα κι Βηθανία σο ισινέ κο Βες κι Ζιτινίνγκο,* μπουτσσαντάς ντουέν πι μαθητένταρ
2 ντα βακερντάς λένγκε: «Τζαν κο γκαβ σο ντικχένα. Σο κα ντεν οτθέ αντρέ, κα αρακχέν εκχέ κχουρές* πφαντό σο οπρά-λέστε καέκ να μπεσλό μέχρι ακανά. Πουτρέν-λες ντα ανέν-λες ατθέ.
3 Ντα άμα καέκ τζενό κα πουτσέλ-τουμέν: “Σόσκε κερένα-λες ανταβά;” βακερέν: “Ο Κύριος μανγκέλα-λες ντα κα μπουτσσαβέλ-λες πάλι ατθέ σουγκό”».
4 Οτθάρ, γκιλέ ντα αρακχλέ ι κχουρές πφαντό εκχέ πορτάτε, αβρί κο ντρομ, ντα πουταρντέ-λες.
5 Αλλά μερικοί σο ισινέ οτθέ βακερντέ λένγκε: «Σο κερένα οτθέ ντα πουτρένα ι κχουρές;»
6 Βον βακερντέ λένγκε οντουβά σο βακερντάας ο Ιησούς, ντα ο τζενέ μουκχλέ-λεν τι νασέν.
7 Ντα αντέ ι κχουρές κο Ιησούς ντα τσσουντέ πουμαρέ αβραϊνέ σέα οπράλ κο κχουρό, ντα ο Ιησούς μπεσλό οπρά-λέστε.
8 Ατζέ, μπουτ τζενέ μπουγαρντέ πουμαρέ αβραϊνέ σέα τελέ κο ντρομ. Γιαβερά τσσιντέ κλαδιά κατά χωράφια.
9 Εμ οντουλά σο τζάνας ανγκλάλ εμ οντουλά σο αβένας παλάλ ντένας βίκος: «Σώνε,* μολίνασα-τουτ! Ευλογημέ ισί οντουβά σο αβέλα κο ναβ κι Ιεχωβάσκο!*
10 Ευλογημέ ισί αμαρέ νταντέσκι ι Δαβιδίσκι Βασιλεία σο αβέλα! Σώνε,* μολίνασα-τουτ, τούι σο μπεσέσα οπρέ κο ουρανός!»
11 Ντα ντινάς αντρέ κι Ιερουσαλήμ, γκιλό κο ναός ντα ντικχλάς σο-ντα ισινέ ντονταλάι, αλλά επειδή ο σαάτι νακχλόας, νασλό κι Βηθανία ι 12 αποστολόντζαρ.
12 Ο γιαβέρ ντιβές, καζόμ νασένας κατά Βηθανία, μποκχάλιλο.
13 Ντικχλάς ντουράλ εκ χχελινγκίν σο τθερέλας φύλλα, ντα γκιλό τι ντικχέλ άμα κα αρακχέλας καέκ χχελί. Αλλά κάνα αβιλό πασέ λάτε, να αρακχλάς χχελιά αλλά σάντε φύλλα, σόσκε να ισινέ ο βακίτι ι χχελίνγκο.
14 Οτθάρ, βακερντάς λάκε: «Ποτές μα τι χαλ καέκ τζενό χχελιά τούταρ». Ντα λέσκε μαθητές ασουνένας.
15 Σοράν αβιλέ κι Ιερουσαλήμ. Ντα ντινάς αντρέ κο ναός ντα αρχιντάς τι πάλντελ οντουλέν σο μπικινένας ντα κινένας οτθέ. Περαντάς ο τραπέζια οντουλένγκε σο αλλάνενας ο λοβέ* ντα ο πάγκοι οντουλένγκε σο μπικινένας περιστέρια,
16 ντα να μουκχέλας καεκχές τι νακχαβέλ πο πράγματα αντράλ κατά ναός.
17 Σικλιαρέλας ντα βακερέλας λένγκε: «Νανέ γραμμέ ακαβά: “Μο κχερ κα βακέρντιβελ κχερ προσευχιάκο σαρέ ι τθεμένγκε”; Αλλά τουμέν κερντέν-λες σπηλιά τσορένγκι».*
18 Ντα ο μπαρέ ιερείς ντα ο γραμματείς ασουντέ-λες ανταβά ντα ρόντενας σαρ τι μουνταρέν-λες, σόσκε νταρένας λέσταρ, επειδή σαρέ ο τζενέ ατσσόνας πουταρντέ μόσαρ λέσκε σικλιαριμάσταρ.
19 Κάνα αράτιλο, νικίστιλε κατά Ιερουσαλήμ.
20 Αλλά ντιπ πρωί, σαρ νακχένας, ντικχλέ ότι η χχελινγκίν σουκιλίας μπίλιμα μέχρι κο ρίζες.
21 Ο Πέτρος ντινάς-πες γκοντί σο αβιλόας-πες ντα βακερντάς λέσκε: «Ραββί, ντικχ! Η χχελινγκίν σο ντινάν αρμανιά σουκιλί».
22 Ο Ιησούς βακερντάς λένγκε: «Τθερέν πίστη κο Ντεβέλ.
23 Μπαγιά βακεράβα τουμένγκε ότι κον κα βακερέλ ακαλέ βεσέσκε: “Ίστι ντα περ κι ντεριάβ”, ντα ισί ντιπ σίγουρος αντρέ πι γκίστε ντα τθερέλα πίστη ότι ανταβά σο βακερέλα κα αβέλ-πες, μπαγιά κα αβέλ-πες.
24 Οτθάρ βακεράβα τουμένγκε: Σαρέ οντουλά σο μανγκένα κι προσευχή, τθερέν πίστη ότι ντιντιλέ τουμέντε, ντα κα λεν-λεν.
25 Ντα κάνα ατσσόνα οπράλ κο πιντρέ ντα προσευχίντιβενα, συγχωρίνεν σο-ντα κερντάς τουμένγκε εκ τζενό, ντα αντικάς τουμαρό Ντατ-ντα σο ισί κο ουρανός τι συγχωρίνελ τουμαρέ λάθη».
26 ——
27 Αβιλέ πάλι κι Ιερουσαλήμ. Ντα καζόμ πφιρέλας κο ναός, γκιλέ πασέ ο μπαρέ ιερείς ντα ο γραμματείς ντα ο πρεσβύτεροι
28 ντα βακερντέ λέσκε: «Κάσκε ζοριάσαρ κερέσα ανταλά πράγματα; Ή κον ντινάς-τουτ ι ζορ τι κερές ανταλά πράγματα;»
29 Ο Ιησούς βακερντάς λένγκε: «Κα πουτσάβ-τουμέν κάτι. Βακερέν μάνγκε, ντα κα βακεράβ τουμένγκε κάσκε ζοριάσαρ κεράβα ανταλά πράγματα.
30 Ο μπολντιπέ ι Ιωαννίσκο ισινέ κατά Ντεβέλ* ή κατά τζενέ; Βακερέν μάνγκε».
31 Οτθάρ, βον βακερένας ο εκ κο γιαβέρ: «Άμα κα βακεράς: “Κατά Ντεβέλ”,* κα βακερέλ: “Ντα σόσκε να πακιαντέν-λες;”
32 Αλλά κοτίνασα τι βακεράς: “Κατά τζενέ”;» Νταρένας ι τζενένταρ, σόσκε σαρέ πακιάνας ότι ο Ιωάννης ισινέ μπαγιά προφήτης.
33 Οτθάρ βακερντέ κο Ιησούς: «Να τζανάσα». Ο Ιησούς βακερντάς λένγκε: «Με-ντα να βακεράβα τουμένγκε κάσκε ζοριάσαρ κεράβα ανταλά πράγματα».
Υποσημειώσεις
^ Γιαβέρσοϊ «Όρος των Ελαιών».
^ Γιαβέρσοϊ «πουλαρίς, χουρντέ χχερές».
^ Ανταλά τζενέ μολίνενας ι Ντεβλές τι σώνελ ι Ιησούς.
^ Ανταλά τζενέ μολίνενας ι Ντεβλές τι σώνελ ι Ιησούς.
^ Ανταλά τζενέ αλλάνενας ο λοβέ για τι νικαβέν κιάρι.
^ Γιαβέρσοϊ «τσορνένγκι».
^ Κι Πουρανί Μπαλαμανί βακέρντιβελας «ουρανός».
^ Κι Πουρανί Μπαλαμανί βακέρντιβελας «ουρανός».
