Ο Ευαγγέλιος σο Γραφιντάς ο Μάρκος 13:1-37
13 Σαρ νικιόλας κατά ναός, εκ λέσκε μαθητένταρ βακερντάς λέσκε: «Δάσκαλε, ντικχ! Σο σουκάρ μπαρά ντα ντουβάρια!»
2 Όμως, ο Ιησούς βακερντάς λέσκε: «Ντικχέσα ανταλά μπαρέ ντουβάρια; Σαρέ ο μπαρά σο ισί ατθέ κα περέν. Καέκ μπαρ να κα ατσσόλ οπράλ γιαβερέστε».
3 Καζόμ μπεσέλας κο Βες κι Ζιτινίνγκο,* απέναντι κατά ναός, ο Πέτρος, ο Ιάκωβος, ο Ιωάννης ντα ο Ανδρέας πουτσλέ-λες χωρίς τι ασουνέν ο γιαβερά:
4 «Βάκερ αμένγκε, κάνα κα αβέν-πες ανταλά, ντα καβά σημάδι κα σικαβέλ αμένγκε ότι ο τέλος σαρέ ανταλέ πραγματένγκο ισί πασέ;»
5 Οτθάρ, ο Ιησούς αρχιντάς τι βακερέλ λένγκε: «Τθερέν τουμαρί γκοντί μα τι χουχαβέλ-τουμέν καέκ.
6 Μπουτ τζενέ κα αβέν, κα λεν μο ναβ ντα κα βακερέν: “Με ισινόμ ανταβά”, ντα κα χουχαβέν μπουτέν.
7 Ατζέ, κάνα τουμέν κα ασουνέν τι αβέν-πες τζένγκια* ντα κα λεν αμπέρι τζενγκίνγκε, μα τι νταρέν. Πρέπει τι αβέν-πες ανταλά, αλλά νανέ ατζέκ ο τέλος.
8 »Κα χαλ-πες τθεμ γιαβερέ τθεμέσαρ ντα βασίλειος γιαβερέ βασιλειόσαρ. Κα αβέν σεισμοί τθαν τθανέστε ντα μποκχ. Ανταλά ισί αρχή ζουρανέ ντουκχένγκι.
9 »Τουμέν, τθερέν τουμαρί γκοντί. Κα γκερέν-τουμέν κο δικαστήρια, κα νταπέν-τουμέν κο συναγωγές ντα ιτιρί μάνταρ κα τσσουβέν-τουμέν ανγκλάλ οντουλέντε σο κερένα κουμάντος ντα κο βασιλιάδες, για τι λεν αμπέρι μάνγκε βον.
10 Ντα σαρέ κο τθεμά πρέπει πρώτα τι μουτθάντιβεν ο λατσσέ αμπέρια.
11 Ντα κάνα κα γκερέν-τουμέν κο δικαστήριος, μα τι αγχώνεν σο κα βακερέν. Όμως, σο-ντα κα ντιντιόλ-τουμέν οντουβά σαάτι, οντουβά τι βακερέν, σόσκε να κερένα λάφι τουμέν αλλά ο άγιος πνεύμας.
12 Ατζέκ, ο πφραλ κα ντελ πι πφραλές τζενέντε σο κα μουνταρέν-λες, ντα ο ντατ πι τσσαβές, ντα ο τσσαβέ κα τζαν κόντρα πουμαρέ νταντέσαρ ντα πουμαρέ νταγιάσαρ ντα κα τσσουβέν τι μουνταρέν-λεν.
13 Ντα σαρέ κα μισίνεν-τουμέν ιτιρί μι ναβέσταρ. Αλλά κον κα νταϊντίνελ μέχρι κο τέλος κα σώντιβελ.
14 »Όμως, κάνα κα ντικχέν ο τζουνγκαλό πράγμας σο ανέλα καταστροφή τι ατσσόλ οτθέ σο να κερέλα τι ατσσόλ (ο τζενό σο διαβάνελα* τι τσσουβέλ πι γκοντί τι κχελέλ), αζομάν οντουλά σο ισί κι Ιουδαία τι νασέν κο βεσά.
15 Κον ισί κι νταράτσα μα τι γουλίλ τελέ ντα μα τι ντελ αντρέ τι λελ κάτι πι κχερέσταρ
16 ντα κον ισί κο χωράφι μα τι βουρτίνελ κο πράγματα σο ισί παλάλ για τι λελ πο αβραϊνέ σέα.
17 Τιμωρία κα τσσίντεν ο κχαμνιά ντα ο τζουβλιά σο ντένα τσουτσί οντουλά ντιβεσά!
18 Προσευχίντιβεν* μα τι αβέλ-πες κο βεν,
19 σόσκε οντουλέ ντιβεσέντε κα αβέλ-πες στεναχώρια, ασακί σο να αβιλί-πες κατά αρχή ι ντουνιάσκι σο κερντάς ο Ντεβέλ μέχρι οντουλέ βακιτίστε, ντα να κα αβέλ-πες γιαβέρ φαρ.
20 Ντα άμα ο Ιεχωβά* να κα κερέλας τι αβέν πο χάνικ οντουλά ντιβεσά, να κα σώντιβελας καέκ τζενό. Αλλά μάξους ι τραμπιμέ τζενένγκε, σο βοβ τραμπιντάς-λεν, κερντάς τι αβέν πο χάνικ ο ντιβεσά.
21 »Ντα αζομάν άμα καέκ τζενό κα βακερέλ τουμένγκε: “Ντικχέν! Ακατέ ισί ο Χριστός” ή “Ντικχέν! Οκουτέ ισί”, μα πακιάν-λες ανταβά.
22 Σόσκε κα αβέν τζενέ σο κα βακερέν ότι ισί ο Χριστός ντα ότι ισί προφήτες. Κα κερέν σαβέ τι μανγκές θαύματα για τι χουχαβέν, άμα αβέλα-πες, ι τραμπιμέ τζενέν.
23 Οτθάρ, τθερέν τουμαρί γκοντί. Σαρέ βακερντόμ-λεν τουμένγκε πο τζανγκλέ.
24 »Αλλά οντουλά ντιβεσά, σοράν οντουλέ στεναχωριάταρ, ο κχαμ κα καλιόλ, ο τσσιμούτ* κα τσσιναβέλ τι λελ-πες,
25 ο τσεργανιά κα περέν κατά ουρανός ντα ο ζουρανέ πράγματα σο ισί κο ουρανός κα ιζράν κατά μπαρό κουνιαϊπέ.
26 Ντα αζομάν ο τζενέ κα ντικχέν ι τζενέσκε Τσσαβές τι αβέλ μπαρέ ζοριάσαρ ντα δοξάσαρ αντρέ κο σύννεφα.
27 Αζομάν βοβ κα μπουτσσαβέλ ι αγγελόν ντα κα γκίντελ ι τραμπιμέ τζενέν κατά σταρ μπαρμπαλιά, εμ κατά πφουβ εμ κατά ουρανός.
28 »Σικλιόν ακανά κατά χχελινγκίν ακαβά παράδειγμας:* Κάνα λάκο νεβό κλαδίς αβέλα κοβλό ντα νικαβέλα φύλλα, τζανένα ότι ο νιλάι ισί πασέ.
29 Αντικάς τουμέν-ντα, κάνα κα ντικχέν τι αβέν-πες ανταλά, τι τζανέν ότι βοβ ισί πασέ, ισί κι πόρτα.
30 Μπαγιά βακεράβα τουμένγκε ότι ο τζενέ σο τζουβντιόνα ανταλέ βακιτίστε* να κα μερέν μέχρι τι αβέν-πες σαρέ ανταλά.
31 Ο ουρανός ντα η πφουβ κα χασάρντιβεν, αλλά μο λάφια να κα χασάρντιβεν.
32 »Οντουλέ ντιβεσέσκε ή οντουλέ σαατίσκε καέκ να τζανέλα, ούτε ο άγγελοι κο ουρανός ούτε ο Τσσαβό, αλλά σάντε ο Ντατ.
33 Τθερέν τουμαρί γκοντί, τι αβέν τζανγκαντέ, σόσκε να τζανένα κάνα ισί ο βακίτι σο τραμπιντάς ο Ντεβέλ.
34 Ισί σαρ εκ τζενό σο γκιλό γιαβερέ τθεμέστε, μουκχλάς πο κχερ πι δουλόνγκε βαστέντε, ντινάς ι κάθε εκχέστε εκ μπουτί ντα βακερντάς κο τζενό σο ισί κι πόρτα τι αβέλ τζανγκαντό.
35 Οντουλέσκε, τι αβέν τζανγκαντέ, σόσκε να τζανένα κάνα αβέλα ο κύριος ι κχερέσκο, ή κο απόγευμας ή αντρέ κι ιράτ ή πριν τι ντισιόλ* ή ντιπ πρωί.
36 Αντικάς, κάνα κα αβέλ οτθέ σο να μπεσένα λέσκε, μα τι αρακχέλ-τουμέν τι σοβέν.
37 Ντα ανταβά σο βακεράβα τουμένγκε βακεράβα-λες σαριλένγκε: Τι αβέν τζανγκαντέ».
Υποσημειώσεις
^ Γιαβέρσοϊ «Όρος των Ελαιών».
^ Γιαβέρσοϊ «πόλεμοι».
^ Δηλαδή σο διαβάνελα ι προφητεία ι Δανιηλίσκι.
^ Ατθέ, ανταβά λάφι μανγκέλα τι βακερέλ «μα τσσιναβέν τι προσευχίντιβεν».
^ Γιαβέρσοϊ «φεγγάρι».
^ Κι Πουρανί Μπαλαμανί βακέρντιβελας «ακαγιά παραβολή».
^ Κι Πουρανί Μπαλαμανί ισινέ ο λάφι «γενιά».
^ Κι Πουρανί Μπαλαμανί βακέρντιβελας «κάνα μπασέλα ο μπασνό».
