Ο Ευαγγέλιος σο Γραφιντάς ο Μάρκος 16:1-8
-
Ο Ιησούς ιστίλα κατά μουλέ (1-8)
16 Κάνα νακχλόας ο Σάββατος, η Μαρία η Μαγδαληνή, η Μαρία σο λάκο τσσαβό ισινέ ο Ιάκωβος ντα η Σαλώμη κιντέ πράγματα σο κχάντενας μίσκι για τι αβέν ντα τι μακχέν ο σώμας ι Ιησούσκο.
2 Ντα ντιπ πρωί ο πρώτος ντιβές ι εβδομαδάκο, σο νικίστιλο ο κχαμ, αβιλέ κο μεζάρι.*
3 Ντα βακερένας η εκ ι γιαβεράκε: «Κον κα ταρτίνελ αμένγκε ο μπαρ ανγκλάλ κατά μεζάρι;»
4 Αλλά κάνα βαντιντέ πουμαρέ γιακχά, ντικχλέ ότι ο μπαρ ταρτίντιλοας, παρόλο σο ισινέ μπουτ μπαρό.
5 Κάνα ντινέ αντρέ κο μεζάρι, ντικχλέ εκχέ τερνέ μουρσές ιριαντό παρνέ σεΐντζαρ τι μπεσέλ κι δεξιά μπάντα, ντα σαστισάλε.
6 Βοβ βακερντάς λένγκε: «Μα σαστίνεν. Ρόντενα ι Ιησούσκε σο ισί κατά Ναζαρέτ ντα ιμπλαντέ-λες κο κας. Ιστίντιλο. Νανέ ατθέ. Άκ’ ο τθαν σο τσσουντέ-λες.
7 Αλλά τζαν ντα βακερέν λέσκε μαθητένγκε ντα ι Πετρόσκε: “Τζάλα πο τζανγκλέ τουμένταρ κι Γαλιλαία. Οτθέ κα ντικχέν-λες, σαρ βακερντάς τουμένγκε”».
8 Ο τζουβλιά κάνα νικίστιλε αβρί, νασλέ κατά μεζάρι ιζραϊμάσαρ ντα πουταρντέ μόσαρ. Ντα να βακερντέ τίποτα καεκχέσκε, σόσκε νταρένας.*
Υποσημειώσεις
^ Γιαβέρσοϊ «λιμόρι».
^ Σαρ σικαβένα πουρανέ Γραφές σο μπορίνασα τι ντας λένγκε μπέσα, ο Ευαγγέλιος σο γραφιντάς ο Μάρκος μπιτίνελα ι λαφίντζαρ κο εδάφιος 8.