Ο Ευαγγέλιος σο Γραφιντάς ο Μάρκος 2:1-28
2 Όμως, σοράν χάνικ ντιβεσένταρ ντινάς πάλι αντρέ κι Καπερναούμ, ντα λιντιλό αμπέρι ότι ισί κο κχερ.
2 Ντα γκιντισάλε αζόμ μπουτ τζενέ σο να ισινέ τθαν ατζέ-ντα πασέ κι πόρτα, ντα μουτθαβέλας λένγκε ι Ντεβλέσκο λάφι.
3 Ντα αντέ λέσκε εκχέ μπανγκές σο βάντενας-λες σταρ μουρσά.
4 Αλλά ναστί ανένας-λες κο Ιησούς ιτιρί κατά μπουτ τζενέ. Οτθάρ, νικαντέ ι σκεπή οπράλ κατά τθαν σο ισινέ ο Ιησούς, χαντζουντέ εκ γούρνα οτθέ ντα γουλιαρντέ ο κρεβάτι σο ισινέ ζαντιμέ* ο μπανγκό.
5 Κάνα ο Ιησούς ντικχλάς λένγκι πίστη, βακερντάς ι μπανγκέσκε: «Μο τσσαβό, το αμαρτίες συγχωρισάλε».
6 Ισινέ οτθέ μερικοί γραμματείς-ντα σο μπεσένας ντα βακερένας αντρέ πουμαρέ γκίστε:
7 «Σόσκε κερέλα λάφι αντικάς ανταβά τζενό; Τζάλα κόντρα κο Ντεβέλ πι λαφίντζαρ. Κον γιαβέρ μπορίνελα τι συγχωρίνελ αμαρτίες εκτός κατά Ντεβέλ;»
8 Αλλά ο Ιησούς μπουτ σουγκό αγαντάς σο τθερένας πουμαρέ γκίστε ντα σο λάφι κερένας ο εκ ι γιαβερέσαρ ντα βακερντάς λένγκε: «Σόσκε βακερένα ανταλά πράγματα αντρέ τουμαρέ γκίστε;
9 Σο ισί πο εύκολος τι κεράβ; Τι βακεράβ ι μπανγκέσκε: “Το αμαρτίες συγχωρισάλε” ή τι βακεράβ: “Ίστι, λε το κρεβάτι ντα πφιρ”;
10 Αλλά για τι σικλιόν ότι κο Τσσαβό κι τζενέσκο ντιντιλί η ζορ τι συγχωρίνελ αμαρτίες κι πφουβ—» βακερντάς ι μπανγκέσκε:
11 «Βακεράβα τούκε: Ίστι, λε το κρεβάτι ντα τζα τι κχερέστε».
12 Αζομάν βοβ ιστίντιλο ντα οντιά στιγμή λιντάς πο κρεβάτι ντα νασλό πφιριντός ανγκλάλ σαριλέντε. Οτθάρ, σαρέ ατσσιλέ πουταρντέ μόσαρ ντα δοξαντέ ι Ντεβλές ακαλέ λαφίντζαρ: «Ποτές να ντικχλάμ ασακό πράγμας».
13 Πάλι νικίστιλο αβρί, πασέ κι ντεριάβ, ντα σαρέ ο τζενέ τζάνας λέστε, ντα βοβ σικλιαρέλας-λεν.
14 Ντα καζόμ τζάλας πο τελέ, ντικχλάς ι Λευίς, ι Αλφαιόσκε τσσαβές, τι κερέλ μπουτί οτθέ σο γκιντίντιβενας ο φόροι, ντα βακερντάς λέσκε: «Έλα παλά-μάντε». Αζομάν βοβ ιστίντιλο ντα γκιλό παλά-λέστε.
15 Πο σοράν, ο Ιησούς χάλας* λέσκε κχερέστε, ντα μπουτ τζενέ σο γκίντενας ο φόροι ντα αμαρτωλοί χάνας* γιεκ λέσαρ ντα λέσκε μαθητέντζαρ, σόσκε μπουτ λένταρ τζάνας παλά-λέστε.
16 Αλλά κάνα ο γραμματείς ι Φαρισαιόνγκε ντικχλέ ότι βοβ χάλας γιεκ ι αμαρτωλόντζαρ ντα οντουλέντζαρ σο γκίντενας ο φόροι, βακερντέ λέσκε μαθητένγκε: «Τζενέντζαρ σο γκίντενα ο φόροι ντα αμαρτωλόντζαρ χάλα;»
17 Κάνα ο Ιησούς ασουντάς-λες ανταβά, βακερντάς λένγκε: «Να χρειαζίντιβενα γιατρός ο ζουρανέ, αλλά ο νασφαλέ.* Με να αβιλόμ τι βικίναβ* δίκαιε τζενέν, αλλά αμαρτωλόν».
18 Ο μαθητές ι Ιωαννίσκε ντα ο Φαρισαίοι κερένας νηστεία. Οτθάρ, αβιλέ ντα βακερντέ λέσκε: «Σόσκε ο μαθητές ι Ιωαννίσκε ντα ο μαθητές ι Φαρισαιόνγκε κερένα νηστεία, αλλά τιρέ να κερένα;»
19 Ντα ο Ιησούς βακερντάς λένγκε: «Καζόμ ο τζαμουτρό ισί πι αμαλέντζαρ,* αβέλα-πες βον τι κερέν νηστεία; Καμπόρ τθερένα πουμέντζαρ ι τζαμουτρές, ναστί κερένα νηστεία.
20 Αλλά κα αβέν ντιβεσά σο ο τζαμουτρό να κα αβέλ λέντζαρ.* Οντουβά ντιβές κα κερέν νηστεία λέσκε αμαλά.
21 Κάνα ο πουρανέ σέα πφαράντιβενα, καέκ να σουβέλα οπρά-λέντε κοτόρ σο να γκιντισάλο κο τθοϊπέ, σόσκε κάνα ο κοτόρ κα γκιντίντιβελ, ο σέα κα πφαράντιβεν ατζέ πο μπουτ.
22 Ντα καέκ να τσσουβέλα νεβί μολ πουρανέ ραβαλόντε κερντέ κατά μορτθί, σόσκε η μολ κα πφαραβέλ ο ράβαλα. Αντικάς η μολ κα τσσορντιόλ ντα ο ράβαλα κα χαλάντιβεν. Αλλά ι νεβί μολ τσσουβένα-λα νεβέ ραβαλόντε».
23 Εκ Σάββατος, καζόμ ο Ιησούς νακχέλας χωραφίνταρ σο τθερένας γκιβ, λέσκε μαθητές τσσιντέ γκιβ σαρ πφιρένας.
24 Οτθάρ, ο Φαρισαίοι βακερντέ λέσκε: «Ντικχ-τα ακατέ! Σόσκε το μαθητές κερένα ανταβά σο νανέ σωστός τι αβέλ-πες κο Σάββατος;»
25 Αλλά βοβ βακερντάς λένγκε: «Ποτές να διαβαντέν σο κερντάς ο Δαβίδ κάνα να τθερέλας τι χαλ ντα μποκχάλιλο βοβ ντα λέσκε μουρσά;
26 Η ιστορία ι Αβιαθαρίσκι, ι μπαρέ ιερεάσκι,* βακερέλα ότι ντινάς αντρέ κο κχερ κι Ντεβλέσκο, χαλάς ο μαντρέ σο ισινέ ανγκλάλ κο Ντεβέλ ντα ντινάς πι μουρσέντε-ντα, παρόλο σο σάντε ο ιερείς ισί σωστός τι χαν-λεν».
27 Σοράν ο Ιησούς βακερντάς λένγκε: «Ο Σάββατος κερντιλό μάξους ι τζενέσκε, να κερντιλό ο τζενό μάξους ι Σαββατόσκε.
28 Οτθάρ, ο Τσσαβό ι τζενέσκο ισί Κύριος ατζέ-ντα ι Σαββατόσκο».
Υποσημειώσεις
^ Γιαβέρσοϊ «ξαπλωμέ».
^ Γιαβέρσοϊ «ζαντίνελας ανγκλάλ κο τραπέζι».
^ Γιαβέρσοϊ «ζαντίνενας ανγκλάλ κο τραπέζι».
^ Γιαβέρσοϊ «πασλέ, αμπορεμέ».
^ Γιαβέρσοϊ «τι καλίναβ».
^ Γιαβέρσοϊ «πι φιλόντζαρ».
^ Κι Πουρανί Μπαλαμανί βακέρντιβελας «ο τζαμουτρό κα λιντιόλ ντουρ λένταρ».
