Ο Ευαγγέλιος σο Γραφιντάς ο Μάρκος 3:1-35
3 Πάλι γκιλό αντρέ εκχέ συναγωγιάτε, ντα ισινέ οτθέ εκ τζενό σουκέ* μουσιάσαρ.
2 Οτθάρ, τθερένας πουμαρέ γιακχά οπρά-λέστε για τι ντικχέν άμα κα σαστιαρέλας-λες* Σάββατος. Κερντέ-λες ανταβά για τι κατηγορίνεν-λες.
3 Βοβ βακερντάς κο τζενό ι σουκέ* μουσιάσαρ: «Ίστι ντα έλα κο μασκάρ».
4 Σοράν βακερντάς λένγκε: «Κο Σάββατος, ισί σωστός εκ τζενό τι κερέλ λατσσιπέ ή τι κερέλ γκεραλιπέ,* τι σώνελ εκ ζωή* ή τι μουνταρέλ;» Αλλά βον να κερντέ λάφι.
5 Ο Ιησούς ντικχλάς-λεν σαριλέν χολιάσαρ ντα τθερέλας μπουτ μπαρί ντουκχ αντρέ πέστε, σόσκε λένγκο γκι να αγαβέλας. Ντα βακερντάς ι τζενέσκε: «Πούταρ τι μουσί». Βοβ πουταρντάς-λα, ντα λέσκι μουσί αβιλί λατσσές.
6 Σο νικίστιλε αβρί ο Φαρισαίοι, κερντέ λάφι ι τζενέντζαρ σο τσσίντενας κατά Ηρώδης για τι ντικχέν σαρ τι μουνταρέν ι Ιησούς.
7 Αλλά ο Ιησούς γκιλό κάρινγκ κι ντεριάβ γιεκ πι μαθητέντζαρ, ντα αβιλέ παλά-λέστε μπουτ τζενέ κατά Γαλιλαία ντα κατά Ιουδαία.
8 Ατζέ-ντα κατά Ιερουσαλήμ ντα κατά Ιδουμαία ντα κατά γιαβέρ μπάντα κατά Ιορδάνης ντα ντονταλάι κατά Τύρος ντα κατά Σιδώνα αβιλέ λέσκε μπουτ τζενέ κάνα ασουντέ ι μπουτέ πραγματένγκε σο κερέλας.
9 Ντα βακερντάς πι μαθητένγκε τι τθερέν λέσκε έτοιμη εκ χουρντί βάρκα για μα τι αβέν αζόμ μπουτ τζενέ οπρά-λέστε.
10 Επειδή κερντάς λατσσές μπουτέν, σαρέ οντουλά σο τθερένας πφαρέ νασφαλίματα* γκιντίντιβενας ντονταλάι λέσταρ για τι ασταρέν-λες.
11 Ατζέ-ντα ο δαίμονες, κάνα-ντα τι ντικχένας-λες, περένας ανγκλά-λέστε ντα ντένας βίκος: «Τούι ισινάν ο Τσσαβό ι Ντεβλέσκο».
12 Αλλά βοβ μπουτ φαρ ντέλας-λεν εντολή μα τι μουτθαβέν κον ισί.
13 Ντα νικλιντάς εκχέ βεσέστε, ντινάς βίκος οντουλέν σο μανγκέλας, ντα γκιλέ λέστε.
14 Ντα τραμπιντάς 12 μουρσέν σο ντινάς-λεν ο ναβ απόστολοι. Βον κα αβένας λέσαρ ντα κα μπουτσσαβέλας-λεν τι μουτθαβέν ο λατσσέ αμπέρια
15 ντα τι τθερέν ι ζορ τι νικαβέν ι δαιμονέν.
16 Ντα ο 12 μουρσά σο τραμπιντάς ισινέ ο Σίμωνας, σο ντινάς-λες ο ναβ-ντα Πέτρος,
17 ο Ιάκωβος ο τσσαβό ι Ζεβεδαιόσκο ντα ο Ιωάννης ο πφραλ ι Ιακωβόσκο (λέντε ντινάς ο ναβ-ντα Βοανεργές, σο μανγκέλα τι βακερέλ «τσσαβέ σο ισί σαρ βροντή»),
18 ο Ανδρέας, ο Φίλιππος, ο Βαρθολομαίος, ο Ματθαίος, ο Θωμάς, ο Ιάκωβος σο λέσκο ντατ ισινέ ο Αλφαίος, ο Θαδδαίος, ο Σίμωνας ο Καναναίος*
19 ντα ο Ιούδας ο Ισκαριώτης σο πο σοράν προδοντάς-λες.
Σοράν ντινάς αντρέ εκχέ κχερέστε,
20 ντα γκιντισάλε πάλι αζόμ μπουτ τζενέ σο να μπορίνενας ούτε τι χαν.
21 Κάνα ασουντέ-λες ανταβά λέσκε τζενέ, γκιλέ τι λεν-λες οτθάρ, σόσκε βακερένας: «Χασαρντάς πι γκοντί».
22 Ατζέκ, ο γραμματείς σο γουλίστιλε κατά Ιερουσαλήμ βακερένας: «Τθερέλα ι Μπενγκές* ντα ο αρχηγός ι δαιμονένγκο ντέλα-λες ι ζορ τι νικαβέλ ι δαιμονέν».
23 Ο Ιησούς ντινάς-λεν βίκος ντα κερντάς λέντζαρ λάφι παραδειγματέντζαρ:* «Σαρ αβέλα-πες ο Μπενγκ τι νικαβέλ ι Μπενγκές;
24 Άμα ο τζενέ εκχέ τθεμέσκε τζάνα κόντρα ο εκ ι γιαβερέσαρ, ο τθεμ ναστί ατσσόλα.
25 Ντα άμα ο τζενέ εκχέ κχερέσκε τζάνα κόντρα ο εκ ι γιαβερέσαρ, ο κχερ ναστί κα ατσσόλ.
26 Οτθάρ, άμα ο Μπενγκ γκιλό κόντρα πέσαρ, ντα οντουλά σο ισί λέσκε τθερένα διχόνοια, βοβ ναστί ατσσόλα, αλλά ισί πασέ λέσκο τέλος.
27 Καέκ ναστί τσσουβέλα-πες κο κχερ εκχέ ζουρανέ μουρσέσκο ντα τι τσορέλ λέσκε πράγματα άμα να πφαντάς-λες πρώτα. Σάντε αζομάν κα τσορέλ λέσκο κχερ.
28 Μπαγιά βακεράβα τουμένγκε ότι σαρέ οντουλά σο κα κερέν ο τζενέ κα συγχωρίντιβεν, σο-ντα αμαρτίες κα κερέν ντα σο-ντα γκεραλέ λάφια* κα βακερέν.
29 Αλλά κον κα βακερέλ γκεραλέ λάφια σο τζάνα κόντρα κο άγιος πνεύμας, να κα συγχωρίντιβελ ποτές, αλλά ο βάρετα λέσκε αμαρτιάκε ισί οπρά-λέστε για πάντα».
30 Ανταβά βακερντάς-λες σόσκε βον βακερένας: «Τθερέλα δαιμονάς».
31 Αζομάν αβιλί λέσκι ντάι ντα λέσκε πφραλά, ντα καζόμ μπεσένας αβρί, μπουτσσαντέ αντρέ εκχέ τζενές τι ντελ-λες βίκος.
32 Ντονταλάι λέσταρ μπεσένας μπουτ τζενέ, ντα βακερντέ λέσκε: «Ντικχ! Τι ντάι ντα το πφραλά ισί αβρί ντα μανγκένα-τουτ».
33 Αλλά βοβ βακερντάς λένγκε: «Κον ισί μι ντάι ντα κον ισί μο πφραλά;»
34 Αζομάν ντικχλάς οντουλέν σο μπεσένας ντονταλάι λέσταρ ντα βακερντάς: «Άκ’ μι ντάι ντα μο πφραλά!
35 Κον κερέλα ανταβά σο μανγκέλα ο Ντεβέλ, βοβ ισί μο πφραλ ντα μι πφεν ντα μι ντάι».
Υποσημειώσεις
^ Γιαβέρσοϊ «μπανγκέ».
^ Γιαβέρσοϊ «κερέλας-λες λατσσές».
^ Γιαβέρσοϊ «μπανγκέ».
^ Γιαβέρσοϊ «μπίλατσσιπε, κακός».
^ Γιαβέρσοϊ «ψυχή».
^ Γιαβέρσοϊ «πασλίματα, αμπόριες».
^ Γιαβέρσοϊ «οντουβά σο κερέλα πράγματα σαρέ πι γκίσαρ».
^ Κι Πουρανί Μπαλαμανί ισινέ ο λάφι «Βεελζεβούλ». Ανταβά ισί εκ γιαβέρ ναβ ι Μπενγκέσκο.
^ Κι Πουρανί Μπαλαμανί βακέρντιβελας «παραβολέντζαρ».
^ Δηλαδή λάφια σο βακέρντιβενα για τι τζαν κόντρα κο Ντεβέλ ή κο άγια πράγματα.
