Ο Ευαγγέλιος σο Γραφιντάς ο Μάρκος 4:1-41
-
ΠΑΡΑΔΕΙΓΜΑΤΑ Ι ΒΑΣΙΛΕΙΑΚΕ (1-34)
-
Ο τζενό σο σπειρίνελα (1-9)
-
Σόσκε ο Ιησούς σικλιαρέλας παραδειγματέντζαρ (10-12)
-
Σο μανγκέλα τι βακερέλ ο παράδειγμας ι τζενέσαρ σο σπειρίνελα (13-20)
-
Ο λυχνάρι να τσσουβένα-λες τελάλ κατά σεβλί (21-23)
-
Καζόμ ντένα (24, 25)
-
Ο τζενό σο σπειρίνελα σοβέλα (26-29)
-
Ο μπουτ χουρντό σπόρος (30-32)
-
Ο Ιησούς σικλιαρέλα παραδειγματέντζαρ (33, 34)
-
-
Ο Ιησούς ηρεμίνελα ι μπαρμπάλ (35-41)
4 Ο Ιησούς αρχιντάς πάλι τι σικλιαρέλ πασέ κι ντεριάβ, ντα γκιντισάλε αζόμ μπουτ τζενέ πασέ λέστε σο τσσουντάς-πες αντρέ εκχέ βαρκάτε. Μπεσλό οτθέ ντα γκερντάς-λα χάνικ πο αντρέ, αλλά σαρέ ο τζενέ ισινέ ανγκλάλ κι ντεριάβ.
2 Ντα σικλιαρέλας-λεν μπουτ πράγματα παραδειγματέντζαρ.* Καζόμ σικλιαρέλας-λεν, βακερντάς λένγκε:
3 «Ασουνέν. Εκ τζενό γκιλό τι σπειρίνελ.
4 Οτθέ σο σπειρίνελας, μερικοί σπόροι πελέ κο ντρομ, αβιλέ ο τσιρικλέ ντα χαλέ-λεν.
5 Γιαβερά πελέ κο μπαρά. Οτθέ να ισινέ μπουτ τσικ ντα μπαριλέ μπουτ σουγκό, σόσκε η τσικ να ισινέ αχόρτ.
6 Αλλά κάνα νικίστιλο ο κχαμ, πφαμπιλέ ντα σουκιλέ σόσκε να τθερένας ρίζα.
7 Γιαβερά σπόροι πελέ αντρέ κο καντρέ, ντα ο καντρέ μπαριλέ ντα τασαντέ-λεν, ντα λένταρ να νικίστιλε γιαβερά σπόροι.
8 Γιαβερά όμως πελέ κι λατσσί τσικ. Καζόμ μπαριόνας ντα αβγατίντιβενας, νικαντέ πο μπουτ σπόροι οντουλένταρ σο τσσουβντιλέ. Ντα κερντέ 30, 60 ντα 100 φαρ πο μπουτ».
9 Ντα βακερντάς: «Κον τθερέλα κανά για τι ασουνέλ, τι ασουνέλ».
10 Ντα κάνα ατσσιλό κορκορό, οντουλά σο ισινέ ντονταλάι λέσταρ ντα ο Δώδεκα πουτσένας-λες ι παραδειγματένγκε.
11 Βοβ βακερντάς λένγκε: «Τουμέντε ντιντιλό ο γκεραντό πράγμας* ι Ντεβλέσκε Βασιλειάκο, αλλά κο γιαβερά σαρέ βακέρντιβενα παραδειγματέντζαρ.
12 Ντα αντικάς βον, παρόλο σο ντικχένα, τι ντικχέν αλλά μα τι αγαβέν σο ντικχλέ. Ντα παρόλο σο ασουνένα, τι ασουνέν αλλά ιτς μα τι αγαβέν. Ντα να κα βουρτίνεν μάντε ποτές για τι συγχωρίντιβεν».
13 Ατζέ, βακερντάς λένγκε ακαβά: «Τουμέν να τζανένα ανταβά παράδειγμας. Άρα, σαρ κα αγαβέν σαρέ ο γιαβερά παραδείγματα;
14 »Ο τζενό σο σπειρίνελα ισί οντουβά σο μουτθαβέλα ι Βασιλειάκε λάφια.
15 Ο σπόροι σο περένα κο ντρομ ισί οντουλά σο λένγκε γκίστε τσσουβντιόνα ο λάφια, αλλά κάνα ασουνένα-λεν, μπουτ σουγκό αβέλα ο Μπενγκ ντα νικαβέλα ο λάφια σο τσσουβντιλέ λέντε.
16 Αντικάς ο σπόροι-ντα σο περένα κο μπαρά ισί οντουλά σο ασουνένα ο λάφια ντα μπουτ σουγκό πακιάνα-λεν χαράσαρ.
17 Όμως, να τθερένα ρίζα αντρέ πουμαρέ γκίστε, αλλά ατσσόνα χάνικ βακίτι. Σοράν, κάνα αβέλα στεναχώρια ή τζάνα λέντζαρ κόντρα ιτιρί κατά Βασιλειάκε λάφια, μπουτ σουγκό τσσιναβένα τι πακιάν-λεν.*
18 Γιαβερά σπόροι περένα αντρέ κο καντρέ. Βον ισί οντουλά σο ασουντέ ο λάφια,
19 αλλά ο άγχος κατά προβλήματα σο ισί ανταλέ ντουνιάστε* ντα η ζορ σο τθερέλα ο χουλανιπέ τι χουχαβέλ ντα σο γιαβέρ μανγκέλα λένγκο γκι, ντένα αντρέ ντα τασαβένα ο λάφια, ντα αντικάς να νικαβένα καρπός.
20 Ντα ο σπόροι σο πελέ κι λατσσί τσικ ισί οντουλά σο ασουνένα ο λάφια ντα πακιάνα-λεν γκίσαρ ντα νικαβένα πο μπουτ σπόροι οντουλένταρ σο τσσουβντιλέ, 30, 60 ντα 100 φαρ πο μπουτ».
21 Ατζέ, βακερντάς λένγκε: «Ο τζενέ να ανένα ο λυχνάρι για τι τσσουβέν-λες τελάλ κατά σεβλί* ή τελάλ κατά κρεβάτι. Αλλά ανένα-λες για τι τσσουβέν-λες εκχέ βουτσσέ τθανέστε, αντικάς νανέ;
22 Σο-ντα ισί γκεραντέ τθανέστε κα ντικχίντιβελ, σο-ντα ισί λατσσές γκεραντό κα λιντιόλ αμπέρι.
23 Κον τθερέλα κανά για τι ασουνέλ, τι ασουνέλ».
24 Βακερντάς λένγκε ακαβά-ντα: «Τθερέν τουμαρί γκοντί κο λάφια σο ασουνένα. Καζόμ ντένα, αζόμ κα λεν.* Βα, κα ντιντιόλ-τουμέν ατζέ πο μπουτ.
25 Σόσκε κον τθερέλα, κα ντιντιόλ-λες πο μπουτ, αλλά κον να τθερέλα, ατζέ-ντα ανταβά σο τθερέλα κα λιντιόλ λέσταρ».
26 Σοράν βακερντάς: «Η Βασιλεία ι Ντεβλέσκι ισί σαρ εκ τζενό σο τσσουβέλα σπόροι τελέ κι πφουβ.
27 Βοβ σοβέλα αρατί ντα ιστίλα ντισάρα, ντα κατά σπόροι νικιόλα χουρντί τσαρ ντα μπαριόλα. Σαρ αβέλα-πες ανταβά, να τζανέλα.
28 Κορκορί η πφουβ νικαβέλα καρπός χάνικ χάνικ. Πρώτα νικιόλα η χουρντί τσαρ, σοράν ο στάχυ ντα πο σοράν ο σαστό γκιβ οπράλ κο στάχυ.
29 Αλλά κάνα αβέλα ο καρπός, βοβ τσσουβέλα ούρια ι τσσουρί, σόσκε αβιλό ο βακίτι ι γκιντιμάσκο».
30 Σοράν βακερντάς: «Καλέ πραγμάσαρ τι μοιασκιαράς ι Βασιλεία ι Ντεβλέσκι, ή καλέ παραδειγμάσαρ τι εξηγίνας-λα;
31 Ισί σαρ εκ μπουτ χουρντό σπόρος* σο κάνα τσσουβντιόλα κι τσικ ισί ο πο χουρντό σαρέ κατά σπόροι κι πφουβ.
32 Αλλά μπαριόλα ντα αβέλα μπουτ μπαρό φυτός ντα νικαβέλα μπαρέ κλαδιά. Αντικάς, ο τσιρικλέ αβένα ντα κερένα πουμαρέ φωλιές λέσκε βουτσσαλιάτε».
33 Μπουτέ ασακέ παραδειγματέντζαρ βακερέλας λένγκε ι Βασιλειάκε λάφια, μέχρι οτθέ σο μπορίνενας τι αγαβέν.
34 Ντα σάντε παραδειγματέντζαρ σικλιαρέλας-λεν, αλλά πι μαθητένγκε εξηγίνελας-λεν σαρέ.
35 Ντα οντουβά ντιβές, κάνα αράτιλο, βακερντάς λένγκε: «Ελάν τι τζας κι γιαβέρ μπάντα κι ντεριαβάκι».
36 Οτθάρ, μουκχλέ ι τζενέν ντα σοράν λιντέ-λες αντρέ κι βάρκα αντικάς σαρ ισινέ. Οτθέ ισινέ γιαβερά-ντα βάρκες.
37 Αζομάν αβιλί εκ μπαρί ντα μπουτ ζουρανί μπαρμπάλ, ντα ο κύματα ντένας ούρια αντρέ κι βάρκα σο τζάλας τι πφερντιόλ πανιά.
38 Αλλά βοβ ισινέ παλάλ κι βάρκα ντα σοβέλας κο γιαστίκι. Οτθάρ, τζανγκαντέ-λες ντα βακερντέ λέσκε: «Δάσκαλε, να χάλα-τουτ ανάγκη σο χασάρντιβασα;»
39 Αζομάν ιστίντιλο ντα ντινάς βίκος οπράλ κι μπαρμπάλ ντα βακερντάς κι ντεριάβ: «Άτσσουβ! Ηρέμινε!» Ντα η μπαρμπάλ ατσσιλί ντα αβιλί-πες μπαρί ηρεμία.
40 Ντα βακερντάς λένγκε: «Σόσκε νταρένα αζόμ μπουτ; Ατζέ να τθερένα πίστη;»
41 Αλλά λιντάς-λεν αζόμ μπαρί νταρ, ντα βακερένας ο εκ ι γιαβερέσκε: «Κον ισί μπαγιά ανταβά σο ατζέ-ντα η μπαρμπάλ ντα η ντεριάβ ντένα-λες καν;»
Υποσημειώσεις
^ Κι Πουρανί Μπαλαμανί βακέρντιβελας «παραβολέντζαρ».
^ Γιαβέρσοϊ «ο άγιος μυστικός».
^ Γιαβέρσοϊ «περένα».
^ Γιαβέρσοϊ «σεβλί γκινιμάσκε». Ο λάφι «σεβλί» βακέρντιβελα εμ «κοφίνα».
^ Γιαβέρσοϊ «Σαρ τουμέν γκινένα αντικάς κα γκιντιόλ τουμένγκε».
^ Γιαβέρσοϊ «σπόρος σο βακέρντιβελα σινάπι». Ανταβά σπόρος ισί κο Ισραήλ. Μπορίνελα τι αβέλ σταρ μέτρα βουτσσό ντα νικαβέλα κλαδιά.
