Ο Ευαγγέλιος σο Γραφιντάς ο Μάρκος 6:1-56
6 Ο Ιησούς νασλό οτθάρ ντα γκιλό πι τθεμέστε, ντα λέσκε μαθητές γκιλέ παλά-λέστε.
2 Κο Σάββατος, σικλιαρέλας κι συναγωγή, ντα ο πο μπουτ τζενέ σο ασουνένας-λες ατσσόνας πουταρντέ μόσαρ ντα βακερένας: «Κάι αρακχλάς-λεν βοβ ανταλά πράγματα; Ντα σόσκε αβιλό αζόμ γκοντιαβέρ, ντα αβένα-πες ασακέ θαύματα λέσκε βαστένταρ;
3 Ανταβά νανέ ο ξυλουργός, ο τσσαβό ι Μαριάκο ντα ο πφραλ ι Ιακωβόσκο, ι Ιωσηφίσκο, ι Ιουδάσκο ντα ι Σιμωνάσκο; Ντα νανέ ατθέ αμέντζαρ λέσκε πφενιά;» Οτθάρ, να μανγκλέ τι πακιάν λέστε.
4 Αλλά ο Ιησούς βακερντάς λένγκε: «Σαρέ κο τθεμά εκτιμίνενα ι προφητής εκτός λέσκε τθεμέσταρ ντα λέσκε τζενένταρ ντα λέσκε κχερέσταρ».
5 Οτθάρ, ναστί κερέλας καέκ θαύμας οτθέ. Σάντε χάνικ νασφαλέν σαστιαρντάς* κάνα τσσουντάς πο βαστά οπρά-λέντε.
6 Ντα σαστισάλο σο να τθερένας πίστη. Σοράν γκιλό κο γκαβά σο ισινέ ντονταλάι ντα σικλιαρέλας.
7 Ατζέ, ντινάς βίκος ι 12 αποστολόν ντα αρχιντάς τι μπουτσσαβέλ-λεν ντούι ντούι ντα ντινάς-λεν ι ζορ τι νικαβέν ι δαιμονέν.
8 Ντα βακερντάς λένγκε μα τι λεν τίποτα ι ντρομέσκε, αλλά σάντε εκ μαγκούρα, ούτε μαντρό ούτε τσάντα χαμπιματέντζαρ ούτε λοβέ πουμαρέ κουστικάτε.*
9 Αλλά τι ιρίν τεραχά ντα μα τι ιρίν ντούι σέα.*
10 Ατζέ, βακερντάς λένγκε: «Καλέ κχερέστε κα τζαν, μπεσέν οτθέ μέχρι τι νασέν οντουλέ τθεμέσταρ.
11 Άμα κο τθεμ σο κα τζαν να κα δεχτίνεν-τουμέν ή να κα ασουνέν-τουμέν, τινιάνεν ο πράχος τουμαρέ πιντρένταρ κάνα κα νικιόν οτθάρ για τι σικάντιβελ λένγκε ότι πρέπει τι τθερέν πουμαρί γκοντί».*
12 Αζομάν, γκιλέ ντα βακερένας ι τζενένγκε ότι έπρεπε τι μετανιώνεν
13 ντα νικαβένας μπουτέ δαιμονέν ντα μακχένας λαδίσαρ μπουτέ νασφαλέν ντα κερένας-λεν λατσσές.
14 Ο βασιλιάς Ηρώδης λιντάς-λες αμπέρι ανταβά, σόσκε σαρέ τζανένας ι Ιησούσκε ναβέσκε, ντα ο τζενέ βακερένας: «Ο Ιωάννης σο μπολέλα* ιστίντιλο κατά μουλέ, άκ’ σόσκε τθερέλα ι ζορ τι κερέλ θαύματα».
15 Γιαβερά βακερένας: «Ισί ο Ηλίας». Ντα γιαβερά βακερένας: «Ισί προφήτης σαρ εκ τανό κατά πουρανέ προφήτες».
16 Αλλά κάνα ο Ηρώδης ασουντάς-λες ανταβά, βακερντάς: «Ο Ιωάννης σο τσσιντόμ λέσκο σορό, ιστίντιλο».
17 Σόσκε ο Ηρώδης μπουτσσαντάας τζενέν ντα ασταρντάας ι Ιωαννής, πφαντάας-λες ντα τσσουντάας-λες κι φυλακή ιτιρί κατά Ηρωδιάδα, σο ισινέ λέσκε πφραλέσκι ρομνί ι Φιλιππόσκι, επειδή παντρισάλοας λάσαρ.
18 Σόσκε ο Ιωάννης βακερέλας κο Ηρώδης: «Νανέ σωστός τι τθερές τι πφραλέσκε ρομνιά».
19 Οτθάρ, η Ηρωδιάδα ασταρέλας λέσκε χολί ντα μανγκέλας τι μουνταρέλ-λες, αλλά ναστί κερέλας-λες.
20 Ο Ηρώδης νταρέλας κατά Ιωάννης, σόσκε τζανέλας ότι ισινέ δίκαιος ντα άγιος τζενό, ντα ατσσικιαρέλας-λες τζουβντό. Κάνα-ντα τι ασουνέλας-λες, να τζανέλας σο τι κερέλ, αλλά μπεϊντίνελας* τι ασουνέλ-λες.
21 Όμως, η Ηρωδιάδα αρακχλάς ο ντιβές τι κερέλ οντουβά σο μανγκέλας κάνα ο Ηρώδης τθερέλας πο γενέθλια. Αζομάν ο Ηρώδης κερντάς τραπέζι οντουλένγκε σο κερένας κουμάντος κο τθεμ ντα οντουλένγκε σο κερένας κουμάντος κο στρατός ντα ι τζενένγκε σο τθερένας μπαρό ναβ κι Γαλιλαία.
22 Ντα γκιλί η τσσάι σο τθερέλας η Ηρωδιάδα, κχελντάς ντα μπεϊντιντάς-λα ο Ηρώδης ντα οντουλά σο χάνας* λέσαρ. Αζομάν ο βασιλιάς βακερντάς ι τσσαγιάκε: «Μανγκ μάνταρ σο-ντα ντέλα το γκι ντα με κα νταβ-λες τούτε».
23 Ατζέ-ντα χαλάς λάκε σοβέλ: «Σο-ντα τι μανγκές μάνταρ κα νταβ-λες τούτε, μέχρι μο επκάς βασίλειος».
24 Οτθάρ, βόι νικίστιλι αβρί ντα πουτσλάς πι νταγιά: «Σο τι μανγκάβ;» Λάκι ντάι βακερντάς: «Ο σορό ι Ιωαννίσκο».
25 Βόι γκιλί τθαβντιμάσαρ αντρέ, κο βασιλιάς, ντα βακερντάς: «Μανγκάβα τι ντες-μαν ακαγιά στιγμή εκχέ τσαρέστε ο σορό ι Ιωαννίσκο».
26 Ο βασιλιάς να μπεϊντιντάς-λες ιτς ανταβά, αλλά ασουντάς-λα ιτιρί πι σοβελιάταρ ντα πι μισαφιρίνταρ.*
27 Οτθάρ, μπουτσσαντάς σουγκό εκχέ στρατιωτής ντα ντινάς-λες ι εντολή τι ανέλ ο σορό ι Ιωαννίσκο. Βοβ γκιλό ντα τσσιντάς λέσκο σορό κι φυλακή
28 ντα αντάς λέσκο σορό εκχέ τσαρέστε, ντινάς-λες κι τσσάι ντα η τσσάι ντινάς-λες πι νταγιάτε.
29 Κάνα λέσκε μαθητές ασουντέ-λες, αβιλέ ντα λιντέ λέσκο σώμας ντα τσσουντέ-λες εκχέ μεζαρίστε.*
30 Ο απόστολοι γκιντισάλε ντονταλάι κατά Ιησούς ντα βακερντέ λέσκε σαρέ οντουλά σο κερντέας ντα σικλιαρντέας.
31 Ντα βοβ βακερντάς λένγκε: «Ελάν κορκορέ εκχέ τθανέστε σο νανέ τζενέ ντα μπεσέν τουμένγκε χάνικ». Σόσκε μπουτ τζενέ τζάνας ντα αβένας, ντα να ερεσαβένας ούτε τι χαν.
32 Οτθάρ, γκιλέ ι βαρκάσαρ εκχέ τθανέστε σο να ισινέ τζενέ για τι αβέν κορκορέ.
33 Αλλά ντικχλέ-λεν τι νασέν ντα λιντέ-λες αμπέρι μπουτ τζενέ, ντα σαρέ κατά πόλεις τθαβντισάλε μέχρι οτθέ πφιριντός ντα ερεσαντέ-λεν.
34 Κάνα γουλίστιλο, ντικχλάς μπουτέ τζενέν ντα τζιτζισάλο λένγκε, σόσκε ισινέ σαρ μπρακέ σο να τθερένα τσομπανής. Ντα αρχισάλο τι σικλιαρέλ-λεν μπουτ πράγματα.
35 Ο σαάτι νακχλόας, ντα λέσκε μαθητές γκιλέ πασέ λέστε ντα βακερντέ: «Ατθέ ισί ερημιά ντα ο σαάτι νακχλό.
36 Βάκερ λένγκε τι τζαν κο αγορές ντονταλάι ντα κο γκαβά ντα τι κινέν πουμένγκε τι χαν».
37 Βοβ βακερντάς λένγκε: «Ντεν-λεν τουμέν τι χαν». Βον βακερντέ λέσκε: «Τι τζας ντα τι κινάς μαντρέ σο κερένα 200 δηνάρια ντα τι ντας-λεν τι χαν;»
38 Βοβ βακερντάς λένγκε: «Καζόμ μαντρέ τθερένα; Τζαν τι ντικχέν!» Βον ντικχλέ ντα βακερντέ: «Παντς, ντα ντούι ματσσέ».
39 Ντα βοβ βακερντάς σαριλένγκε τι μπεσέν ομάδες ομάδες κι τσαρ.
40 Ντα μπεσλέ ομαδέντε σο τθερένας 100 ντα 50 τζενέν.
41 Αζομάν λιντάς ο παντς μαντρέ ντα ο ντούι ματσσέ, βαντιντάς πο γιακχά κο ουρανός ντα κερντάς εκ προσευχή. Σοράν πφανγκλάς ο μαντρέ ντα ντέλας-λεν κο μαθητές για τι τσσουβέν-λεν ανγκλάλ κο τζενέ, ντα ιλιαντάς ο ντούι ματσσέ σαριλένγκε.
42 Αντικάς χαλέ σαρέ ντα τσαλιλέ,
43 ντα γκιντιντέ 12 σεβλιά* πφερντέ, εκτός κατά ματσσέ.
44 Οντουλά σο χαλέ ο μαντρέ ισινέ παντς χιλιάδες μουρσά.
45 Σοράν ο Ιησούς, χωρίς τι χασαρέλ σαάτι, βακερντάς πι μαθητένγκε τι τσσουβέν-πες κι βάρκα ντα τι τζαν πο τζανγκλέ λέσταρ οκιά μπάνταρ κάρινγκ κι Βηθσαϊδά καζόμ βοβ κα μπεσέλας παλάλ μέχρι τι νασέν ο τζενέ.
46 Ντα κάνα νασλέ ο τζενέ, γκιλό εκχέ βεσέστε τι προσευχίντιβελ.
47 Κάνα αράτιλο, η βάρκα ισινέ κο μασκάρ κι ντεριάβ, αλλά βοβ ισινέ ατζέκ οτθέ κορκορό.
48 Ντα ντικχλάς-λεν τι νασέν μπουτ πφαρές ι βαρκάσαρ σόσκε η μπαρμπάλ πφούντελας κόντρα λέντε. Αντικάς, πριν τι ντισιόλ* πφιρντάς οπράλ κι ντεριάβ ντα αβιλό κάρινγκ λέντε αλλά τθερέλας πι γκοντιάτε* τι νακχαβέλ-λεν.
49 Κάνα ντικχλέ-λες τι πφιρέλ οπράλ κι ντεριάβ, σκεφτιντέ: «Ισί φαντασία!» Ντα ντινέ βίκος ζουρανές.
50 Σόσκε ντικχλέ-λες σαρέ ντα νταρασάλε. Οτθάρ, βοβ βακερντάς λένγκε: «Με ισινόμ. Μα νταρέν!»
51 Σοράν νικλιντάς κι βάρκα λέντζαρ, ντα η μπαρμπάλ ηρεμισάλι. Αζομάν ατσσιλέ πουταρντέ μόσαρ,
52 σόσκε να αγαντέας σο μανγκένας τι σικαβέν ο μαντρέ, αλλά λένγκο γκι ατζέ να αγαβέλας.
53 Κάνα νακχλέ κι γιαβέρ μπάντα κι ντεριαβάκι, αβιλέ κι Γεννησαρέτ ντα μουκχλέ ι βάρκα οτθέ πασέ.
54 Αλλά σο νικίστιλε κατά βάρκα, ο τζενέ αγαντέ ι Ιησούς.
55 Τθαβντισάλε σαρό κο τθεμ ντα ανένας οπράλ κρεβατίντε ι νασφαλέν, κο τθαν σο λένας αμπέρι ότι ισινέ βοβ.
56 Ντα κάι-ντα τζάλας, κο γκαβά ή κο πόλεις ή κο τθανά ντονταλάι, τσσουβένας ι νασφαλέν κο αγορές ντα μολίνενας-λες τι ασταρέν σάντε λέσκε σεΐνγκε κρόσσια. Ντα σαρέ οντουλά σο ασταρένας-λεν αβένας λατσσές.
Υποσημειώσεις
^ Γιαβέρσοϊ «χάνικ πασλέ, αμπορεμέ τζενέν κερντάς λατσσές».
^ Γιαβέρσοϊ «μπουγλέ καϊσίστε, μπουγλέ ζωνιάτε».
^ Γιαβέρσοϊ «μα τι λεν αλλαξιά».
^ Γιαβέρσοϊ «ότι ο Ντεβέλ ντινάς-λεν τεμπί, δηλαδή προειδοποίηση».
^ Γιαβέρσοϊ «Ο Ιωάννης ο Βαφτιστής».
^ Γιαβέρσοϊ «αρέζελας λέσκε».
^ Γιαβέρσοϊ «ζαντίνενας ανγκλάλ κο τραπέζι». Ο λάφι «ζαντίναβα» βακέρντιβελα εμ «ξαπλώναβα».
^ Γιαβέρσοϊ «ντα οντουλένταρ σο ζαντίνενας ανγκλάλ κο τραπέζι».
^ Γιαβέρσοϊ «λιμορίστε».
^ Γιαβέρσοϊ «κοφίνες».
^ Κι Πουρανί Μπαλαμανί βακέρντιβελας «πασέ κι τέταρτη σκοπιά». Αρχίνελας πασέ 3:00 αρατί μέχρι σο νικιόλας ο κχαμ πασέ 6:00 πρωί.
^ Γιαβέρσοϊ «αλλά τζάλας».
