Ο Ευαγγέλιος σο Γραφιντάς ο Μάρκος 7:1-37
7 Ο Φαρισαίοι ντα μερικοί γραμματείς σο αβιλέας κατά Ιερουσαλήμ γκιντισάλε ντονταλάι λέσταρ.
2 Ντα ντικχλέ μερικέν λέσκε μαθητένταρ τι χαν μαγαριμέ βαστέντζαρ, γιαβέρσοϊ μπίτθοντε βαστέντζαρ.*
3 (Σόσκε ο Φαρισαίοι ντα σαρέ ο Ιουδαίοι να χάνα άμα να τθοντέ πουμαρέ βαστά μέχρι κι επκάς μουσί. Αντικάς ατσσικιαρένα οντουλά σο σικλιαρντέ-λεν ο πουρανέ τζενέ,
4 ντα κάνα αβένα κατά αγορά να χάνα άμα να τθοντέ-πες. Σικλιαρντέ-λεν μπουτ γιαβερά-ντα πράγματα ντα βον ατσσικιαρένα-λεν, σαρ ισί ότι τσσουβένα σαστέ αντρέ κο πανί ποτήρια, πιριά ντα χάλκινα σκεύη.)
5 Ο Φαρισαίοι ντα ο γραμματείς πουτσλέ-λες: «Σόσκε το μαθητές να κερένα οντουλά σο σικλιαρντέ-αμέν ο πουρανέ τζενέ, αλλά χάνα μαγαριμέ βαστέντζαρ;»
6 Βοβ βακερντάς λένγκε: «Ντουέ μουένγκε ισινέν! Δίκιος τθερέλας τουμένγκε ο προφήτης Ησαΐας, σαρ ισί γραμμέ: “Ανταβά λαός σεβάνελα-μαν πι βουστέντζαρ, αλλά λέσκο γκι ισί μπουτ ντουρ μάνταρ.
7 Σινανέ ντένα-μαν λατρεία, σόσκε σικλιαρένα τζενένγκε λάφια σαρ τι αβένας μιρέ”.
8 Μουκχλέν ι Ντεβλέσκι εντολή ντα ατσσικιαρένα οντουλά σο σικλιαρντέ-τουμέν ο τζενέ».
9 Ατζέ, βακερντάς λένγκε: «Τζανένα λατσσές σαρ μα τι ντεν καν κι εντολή κι Ντεβλέσκι για τι ατσσικιαρέν οντουλά σο σικλιαρντέ-τουμέν τι κερέν.
10 Για παράδειγμας, ο Μωυσής βακερντάς: “Σέβανε τι νταντές ντα τι νταγιά” ντα “Κον βακερέλα μπέτι λάφια πι νταντέσκε ή πι νταγιάκε πρέπει τι μερέλ”.
11 Αλλά τουμέν σικλιαρένα ότι άμα εκ τζενό κα βακερέλ πι νταντέσκε ή πι νταγιάκε: “Σο-ντα τθεράβα σο κα μπορίνελας τι κερέλ τούκε λατσσιπέ ισί κορβάν (γιαβέρσοϊ ντινόμ μο λάφι τι νταβ-λες κο Ντεβέλ)”,
12 να μουκχένα-λες τι κερέλ ούτε εκ πράγμας πι νταντέσκε ή πι νταγιάκε.
13 Ντα αντικάς κερένα πέρα ο λάφι ι Ντεβλέσκο αντράλ οντουλένταρ σο σικλιαρντέ-τουμέν τι κερέν ντα σικλιαρντέν-λεν τουμέν-ντα γιαβερέντε. Ντα κερένα μπουτ ασακέ πράγματα».
14 Οτθάρ, ντινάς βίκος ατζέκ φαρ ι μπουτέ τζενέν σο ισινέ οτθέ ντα βακερντάς λένγκε: «Ασουνέν-μαν σαρέ ντα αγαβέν.
15 Τίποτα σο τσσουβέλα ο τζενό πι μόστε ναστί μαγαρίνελα-λες, αλλά οντουλά σο νικιόνα κατά τζενό ισί σο μαγαρίνενα-λες».
16 ——
17 Ντα κάνα ντινάς αντρέ εκχέ κχερέστε ντουρ κατά τζενέ, λέσκε μαθητές πουτσένας-λες ι παραδειγμάσκε.*
18 Οτθάρ, βοβ βακερντάς λένγκε: «Τουμέν-ντα ναστί αγαβένα; Να τζανένα ότι τίποτα σο τσσουβέλα ο τζενό πι μόστε ναστί μαγαρίνελα-λες,
19 αφού να ντέλα αντρέ λέσκε γκίστε, αλλά λέσκε περέστε, ντα νικαβέλα-λες κο κινέφι;» Ανταλέ λαφίντζαρ, σικαντάς ότι σαρέ ο χαμπίματα ισί πάκι.
20 Ατζέ, βακερντάς: «Οντουβά σο νικιόλα κατά τζενό ισί σο μαγαρίνελα-λες.
21 Σόσκε αντράλ, κατά τζενένγκο γκι, νικιόνα σκέψεις σο κερένα ζιάνι: λουμνίματα,* τσορίματα, μουνταρίματα,
22 λουμνίματα οπράλ κο μπιαβά,* μπίτσαλι γιακχ, μπέτι πράγματα, χουχαϊπέ, μπίλατζανε πράγματα,* γιακχ σο τθερέλα ζήλια πφερντί μίσος, γκεραλέ* λάφια, μπαρικανιπέ ντα ντινιλιπέ.
23 Σαρέ ανταλά πφιρνικανέ* πράγματα νικιόνα αντράλ ντα μαγαρίνενα ι τζενές».
24 Νασλό οτθάρ ντα γκιλό κο τθεμά Τύρος ντα Σιδώνα. Οτθέ ντινάς αντρέ εκχέ κχερέστε ντα να μανγκέλας τι σικλιόλ-λες καέκ, αλλά λιντέ-λες αμπέρι.
25 Σο ερεσλό ο Ιησούς, εκ τζουβέλ σο λάκι τσσαγιορί ισινέ δαιμονισμέ ασουντάς λέσκε ντα αβιλί ντα πελί λέσκε πιντρέντε.
26 Η τζουβέλ ισινέ Μπαλαμνί κατά Συροφοινίκη.* Ντα μανγκέλας λέσταρ τι νικαβέλ λάκε τσσαγιάταρ ι δαιμονάς.
27 Αλλά βοβ βακερντάς λάκε: «Μουκχ πρώτα τι τσαλιόν ο χουρντέ, σόσκε νανέ σωστός τι λελ εκ τζενό ο μαντρό ι χουρντένγκο ντα τι τσσουβέλ-λες κι τζουκλένγκε χουρντέ».
28 Βόι όμως βακερντάς λέσκε: «Βα, κύριε, αλλά ατζέ-ντα ι τζουκλένγκε χουρντέ τελάλ κατά τραπέζι χάνα ο κιρίκια* σο περένα κατά χουρντέ τσσαβέ».
29 Αζομάν βακερντάς λάκε: «Επειδή βακερντάν-λες ανταβά, τζα τούκε. Ο δαίμονας νικίστιλο τι τσσαγιάταρ».
30 Οτθάρ, βόι γκιλί πι κχερέστε ντα αρακχλάς ι χουρντιά ζαντιμέ* κο κρεβάτι, ντα ο δαίμονας νασλόας.
31 Κάνα ο Ιησούς βουρτισάλο κατά Τύρος, γκιλό αντράλ κατά Σιδώνα κάρινγκ κι Ντεριάβ κι Γαλιλαία ντα νακχλό κατά Δεκάπολη.*
32 Οτθέ αντέ λέσκε εκχέ κασουκέ τζενές σο ναστί κερέλας λάφι λατσσές, ντα μολίνενας-λες τι τσσουβέλ πο βας οπρά-λέστε.
33 Ντα βοβ λιντάς-λες χάνικ πο οκόρινγκ, ντουρ κατά τζενέ. Σοράν τσσουντάς πο δάχτυλα αντρέ κο κανά κι τζενέσκε, τσσουνγκιαρντάς ντα σοράν ασταρντάς λέσκι τσσιπ.
34 Βαντιντάς πο γιακχά κο ουρανός, τσσιντιντάς γκίσαρ ντα βακερντάς λέσκε: «Εφφαθά», γιαβέρσοϊ: «Τι πουτάρντιβες».
35 Οντουβά σαάτι λέσκε κανά πουτάρντιλε, ντα ο πρόβλημας σο τθερέλας κι τσσιπ νασλό, ντα αρχιντάς τι κερέλ λάφι λατσσές.
36 Αζομάν ντινάς-λεν εντολή μα τι μουτθαβέν-λες καεκχέσκε, αλλά καζόμ πο μπουτ βακερέλας λένγκε, αζόμ πο μπουτ κερένας-λες νταμντουλίκι.
37 Ατσσόνας πουταρντέ μόσαρ ντα βακερένας: «Σαρέ κερντάς-λεν λατσσές. Κερέλα ατζέ-ντα ι κασουκέν τι ασουνέν ντα ι λαλορέν τι κερέν λάφι».
Υποσημειώσεις
^ Ο Φαρισαίοι ντα ο γιαβερά Ιουδαίοι ισινέ σικλέ τι τθοβέν πουμαρέ βαστά εκχέ συγκεκριμέ τροπόσαρ σαρ βακερέλας λένγκο έθιμος.
^ Κι Πουρανί Μπαλαμανί βακέρντιβελας «παραβολιάκε».
^ Γιαβέρσοϊ «μπίλατσσε, κακά».
^ Γιαβέρσοϊ «γκεραλέ, μπίλατσσε».
^ Γιαβέρσοϊ «σο μπιάντιλι κι Συροφοινίκη».
^ Γιαβέρσοϊ «ψίχουλα».
^ Γιαβέρσοϊ «ξαπλωμέ».
^ Γιαβέρσοϊ «κατά Ντες Πόλεις».
