Ο Ευαγγέλιος σο Γραφιντάς ο Ματθαίος 1:1-25
1 Ο βιβλίος σο σικαβέλα κατάρ αστάρντιβελα ο Ιησούς Χριστός,* ο τσσαβό ι Δαβιδίσκο, ο τσσαβό ι Αβρααμίσκο:
2 Κατά Αβραάμ αβιλό ο Ισαάκ.Κατά Ισαάκ αβιλό ο Ιακώβ.Κατά Ιακώβ αβιλό ο Ιούδας ντα λέσκε πφραλά.
3 Κατά Ιούδας αβιλό ο Φαρές ντα ο Ζερά ντα λένγκι ντάι ισινέ η Θάμαρ.Κατά Φαρές αβιλό ο Εσρών.Κατά Εσρών αβιλό ο Ραμ.
4 Κατά Ραμ αβιλό ο Αμμιναδάβ.Κατά Αμμιναδάβ αβιλό ο Ναασών.Κατά Ναασών αβιλό ο Σαλμών.
5 Κατά Σαλμών αβιλό ο Βοόζ ντα λέσκι ντάι ισινέ η Ραάβ.Κατά Βοόζ αβιλό ο Ωβήδ ντα λέσκι ντάι ισινέ η Ρουθ.Κατά Ωβήδ αβιλό ο Ιεσσαί.
6 Κατά Ιεσσαί αβιλό ο Δαβίδ, ο βασιλιάς.
Κατά Δαβίδ αβιλό ο Σολομώντας ντα λέσκι ντάι ισινέ η ρομνί σο ανγκλέ τθερέλας-λα ο Ουρίας.
7 Κατά Σολομώντας αβιλό ο Ροβοάμ.Κατά Ροβοάμ αβιλό ο Αβιά.Κατά Αβιά αβιλό ο Ασά.
8 Κατά Ασά αβιλό ο Ιωσαφάτ.Κατά Ιωσαφάτ αβιλό ο Ιωράμ.Κατά Ιωράμ αβιλό ο Οζίας.
9 Κατά Οζίας αβιλό ο Ιωθάμ.Κατά Ιωθάμ αβιλό ο Άχαζ.Κατά Άχαζ αβιλό ο Εζεκίας.
10 Κατά Εζεκίας αβιλό ο Μανασσής.Κατά Μανασσής αβιλό ο Αμών.Κατά Αμών αβιλό ο Ιωσίας.
11 Κατά Ιωσίας αβιλό ο Ιεχονίας ντα λέσκε πφραλά, κο βακίτι σο ο Ιουδαίοι λιντιλέ ζορίσαρ πουμαρέ τθεμέσταρ κι Βαβυλώνα.
12 Καζόμ ισινέ κι Βαβυλώνα, κατά Ιεχονίας αβιλό ο Σαλαθιήλ.Κατά Σαλαθιήλ αβιλό ο Ζοροβάβελ.
13 Κατά Ζοροβάβελ αβιλό ο Αβιούδ.Κατά Αβιούδ αβιλό ο Ελιακείμ.Κατά Ελιακείμ αβιλό ο Αζώρ.
14 Κατά Αζώρ αβιλό ο Σαδώκ.Κατά Σαδώκ αβιλό ο Αχείμ.Κατά Αχείμ αβιλό ο Ελιούδ.
15 Κατά Ελιούδ αβιλό ο Ελεάζαρ.Κατά Ελεάζαρ αβιλό ο Ματθάν.Κατά Ματθάν αβιλό ο Ιακώβ.
16 Κατά Ιακώβ αβιλό ο Ιωσήφ, ο ρομ ι Μαριάκο, ντα η Μαρία μπιαντάς ι Ιησούς σο βακέρντιβελα Χριστός.
17 Αντικάς, σαρέ ο γενιές κατά Αβραάμ μέχρι κο Δαβίδ ισινέ 14 γενιές. Κατά Δαβίδ μέχρι σο ο Ιουδαίοι λιντιλέ ζορίσαρ πουμαρέ τθεμέσταρ κι Βαβυλώνα 14 γενιές. Κατά βακίτι σο λιντιλέ κι Βαβυλώνα μέχρι κο Χριστός 14 γενιές.
18 Ο Ιησούς Χριστός μπιάντιλο αντικάς: Ο βακίτι σο λέσκι ντάι, η Μαρία, ισινέ νισανλίς ι Ιωσηφίσαρ, ατσσιλί κχαμνί αντράλ κατά άγιος πνεύμας* πριν βον τι σοβέν γιεκ.
19 Αλλά λάκο ρομ, ο Ιωσήφ, ισινέ δίκαιος ντα να μανγκέλας τι ανέλ λάκε λατζ ανγκλάλ κο τζενέ. Οτθάρ, τθερέλας πι γκοντιάτε τι χαλαβέλ ο νισανλίκια* αποτσοράλ.
20 Όμως, σκεφτιντάς-λεν λατσσές σαρέ ανταλά, ντα σοράν αβιλό λέσκε κο σουνό άγγελος ι Ιεχωβάσκο* ντα βακερντάς λέσκε: «Ιωσήφ, σο ισινάν τσσαβό ι Δαβιδίσκο, μα ντάρα τι λες κο κχερ τι ρομνιά, ι Μαριά, σόσκε βόι ατσσιλί κχαμνί αντράλ κατά άγιος πνεύμας.
21 Κα μπιανέλ μουρσές, ντα κα ντες-λες ο ναβ Ιησούς,* σόσκε βοβ κα σώνελ πι λαός λένγκε αμαρτιένταρ».
22 Σαρέ ανταλά αβιλέ-πες για τι νικιόλ μπαγιά οντουβά σο βακερντάας ο Ιεχωβά* αντράλ πι προφητίσταρ:
23 «Άκ’! Η τσσάι* κα ατσσόλ κχαμνί ντα κα μπιανέλ μουρσές, ντα κα νικαβέν λέσκε Εμμανουήλ», σο μανγκέλα τι βακερέλ «αμέντζαρ ισί ο Ντεβέλ».
24 Σοράν ο Ιωσήφ τζανγκάντιλο ντα κερντάς αντικάς σαρ βακερντάας λέσκε ο άγγελος ι Ιεχωβάσκο,* ντα λιντάς πι ρομνιά πι κχερέστε.
25 Αλλά να σοτάς λάσαρ μέχρι τι μπιανέλ η Μαρία μουρσές. Ντα βοβ ντινάς-λες ο ναβ Ιησούς.
Υποσημειώσεις
^ Γιαβέρσοϊ «ο Μεσσίας» ή «Οντουβά σο τραμπίντιλο κατά Ντεβέλ».
^ Κι Πουρανί Μπαλαμανί βακέρντιβελας «τι λελ διαζύγιος». Ο έθιμος ι Ιουδαιόνγκο ισινέ τι λεν διαζύγιος για τι χαλάντιβεν ο νισανλίκια.
^ Ανταγιά ισί η πρώτη κατά 237 φαρ κο Χριστιανικά Βιβλία κι Γραφιάκε σο ισί γραμμέ ι Ντεβλέσκο ναβ, Ιεχωβά, ανταλέ μεταφρασιάτε. Ντικχ Λεξικός.
^ Νικιόλα κατά εβραϊκός ναβ Γεσούα, σο μανγκέλα τι βακερέλ «ο Ιεχωβά ισί οντουβά σο σώνελα».
^ Ο πουρανό μπαλαμανό λάφι μανγκέλα τι σικαβέλ εκχέ τζουβλιά σο να σοτάς μουρσέσαρ.
