Ο Ευαγγέλιος σο Γραφιντάς ο Ματθαίος 14:1-36
14 Οντουβά βακίτι, ο βασιλιάς Ηρώδης λιντάς αμπέρι ι Ιησούσκε
2 ντα βακερντάς πι υπηρετόνγκε: «Ο Ιωάννης σο μπολέλα* ισί. Ιστίντιλο κατά μουλέ. Άκ’ σόσκε τθερέλα ι ζορ τι κερέλ ασακέ θαύματα».
3 Ο Ηρώδης* ασταρντάας ι Ιωαννής, πφαντάας-λες ντα τσσουντάας-λες κι φυλακή ιτιρί κατά Ηρωδιάδα, σο ισινέ λέσκε πφραλέσκι ρομνί ι Φιλιππόσκι.
4 Σόσκε ο Ιωάννης βακερέλας λέσκε: «Νανέ σωστός τι τθερές-λα τούι ρομνί».
5 Ντα παρόλο σο ο Ηρώδης μανγκέλας τι μουνταρέλ-λες, νταρέλας κατά μπουτ τζενέ σο ντικχένας ι Ιωαννής σαρ προφήτης.
6 Αλλά κι Ηρωδίσκε γενέθλια, η τσσάι σο τθερέλας η Ηρωδιάδα κχελντάς ανγκλάλ κο μισαφίρια ντα ο Ηρώδης μπεϊντιντάς-λα* αζόμ μπουτ
7 σο χαλάς σοβέλ τι ντελ-λα σο-ντα κα μανγκέλας λέσταρ.
8 Αζομάν λάκι ντάι τσσουντάς-λα τι βακερέλ: «Ντε-μαν εκχέ τσαρέστε ο σορό ι Ιωαννίσκο».
9 Ο βασιλιάς να μπεϊντιντάς-λες ανταβά, αλλά ιτιρί πι σοβελιάταρ ντα κατά τζενέ σο χάνας* γιεκ λέσαρ, ντινάς διαταγή τι ντιντιόλ λάτε.
10 Οτθάρ, μπουτσσαντάς τζενέν τι τσσινέν ι Ιωαννίσκο σορό κι φυλακή.
11 Ντα αντέ λέσκο σορό εκχέ τσαρέστε, ντινέ-λες κι τσσάι ντα βόι γκερντάς-λες πι νταγιάτε.
12 Σοράν, αβιλέ λέσκε μαθητές, λιντέ λέσκο σώμας ντα πραχουντέ-λες. Πο σοράν, γκιλέ ντα βακερντέ-λες κο Ιησούς.
13 Κάνα ο Ιησούς ασουντάς-λες ανταβά, νασλό οτθάρ βαρκάσαρ ντα γκιλό εκχέ τθανέστε για τι ατσσόλ κορκορό. Αλλά μπουτ τζενέ λιντέ-λες αμπέρι ανταβά, οτθάρ νασλέ πουμαρέ πολιένταρ ντα γκιλέ παλά-λέστε πφιριντός.
14 Κάνα νικίστιλο κατά βάρκα, ντικχλάς μπουτέ τζενέν, τζιτζισάλο λένγκε ντα κερντάς λατσσές λένγκε νασφαλέν.
15 Αλλά κάνα αράτιλο, λέσκε μαθητές γκιλέ πασέ λέστε ντα βακερντέ: «Ατθέ ισί ερημιά ντα ο σαάτι νακχλό. Βάκερ ι τζενένγκε τι τζαν κο γκαβά ντα τι κινέν πουμένγκε χαμπίματα».
16 Αλλά ο Ιησούς βακερντάς λένγκε: «Να χρειαζίντιβελα τι νασέν. Ντεν-λεν τουμέν τι χαν».
17 Βον βακερντέ λέσκε: «Να τθεράσα τίποτα γιαβέρ ατθέ, σάντε παντς μαντρέ ντα ντούι ματσσέ».
18 Βοβ βακερντάς: «Ανέν-λεν ατθέ μάντε».
19 Ντα βακερντάς κο τζενέ τι μπεσέν κι τσαρ. Σοράν λιντάς ο παντς μαντρέ ντα ο ντούι ματσσέ, βαντιντάς πο γιακχά κο ουρανός, κερντάς εκ προσευχή ντα πφανγκλάς ο μαντρέ. Σοράν ντινάς-λεν κο μαθητές ντα ο μαθητές ντινέ-λεν κο τζενέ.
20 Χαλέ σαρέ ντα τσαλιλέ, ντα κάνα γκιντιντέ οντουλά σο ατσσιλέ, πφερντέ 12 σεβλιά.*
21 Ντα ο τζενέ σο χαλέ ισινέ πασέ παντς χιλιάδες μουρσά, εκτός κατά τζουβλιά ντα κατά χουρντέ τσσαβέ.
22 Σοράν ο Ιησούς, χωρίς τι χασαρέλ σαάτι, βακερντάς πι μαθητένγκε τι τσσουβέν-πες κι βάρκα ντα τι τζαν πο τζανγκλέ λέσταρ οκιά μπάνταρ καζόμ βοβ κα μπεσέλας παλάλ μέχρι τι νασέν ο τζενέ.
23 Νασλέ ο τζενέ, ντα σοράν νικλιντάς κορκορό κο βες για τι προσευχίντιβελ. Κάνα αράτιλο, ισινέ οτθέ κορκορό.
24 Ο μαθητές ισινέας ντιπ αντρέ κι ντεριάβ ι βαρκάσαρ ντα τσαλαβένας-λα ο κύματα σόσκε η μπαρμπάλ πφούντελας κόντρα λέντε.
25 Αλλά πριν τι ντισιόλ,* ο Ιησούς πφιρντάς οπράλ κι ντεριάβ ντα αβιλό πασέ λέντε.
26 Κάνα ο μαθητές ντικχλέ-λες τι πφιρέλ οπράλ κι ντεριάβ, νταρασάλε ντα βακερντέ: «Ισί φαντασία!» Ντα ντινέ βίκος ζουρανές πουμαρέ νταριάταρ.
27 Οτθάρ, ο Ιησούς βακερντάς λένγκε: «Με ισινόμ. Μα νταρέν!»
28 Ο Πέτρος βακερντάς λέσκε: «Κύριε, άμα ισινάν τούι, βάκερ τι πφιράβ οπράλ κο πανί για τι αβάβ τούτε».
29 Βοβ βακερντάς: «Έλα!» Αζομάν ο Πέτρος γουλίστιλο κατά βάρκα ντα πφιρντάς οπράλ κο πανί για τι τζαλ κο Ιησούς.
30 Αλλά καζόμ ντικχέλας ι ζουρανί μπαρμπάλ, νταρασάλο. Ντα οτθέ σο τζάλας τι βουλιάνελ, ντινάς βίκος: «Κύριε, σώνε-μαν!»
31 Ο Ιησούς ασταρντάς-λες σουγκό κατά βας ντα βακερντάς λέσκε: «Σο χουρντί ισί τι πίστη! Σόσκε τσσιναντάν τι αβές σίγουρος;»
32 Νικλιντέ κι βάρκα, ντα σοράν η ζουρανί μπαρμπάλ ηρεμισάλι.
33 Αζομάν οντουλά σο ισινέ κι βάρκα πελέ κοτσίντζαρ ανγκλά-λέστε ντα βακερντέ: «Μπαγιά ισινάν Τσσαβό ι Ντεβλέσκο».
34 Ντα νακχλέ ι βαρκάσαρ οκιά μπάνταρ, κι Γεννησαρέτ.
35 Κάνα ο μουρσά οντουλέ τθεμέστε αγαντέ ότι ισινέ ο Ιησούς, μπουτσσαντέ αμπέρι σαρέ κο τθανά ντονταλάι ντα ο τζενέ αντέ λέσκε σαρέ ι νασφαλέν.
36 Ντα μολίνενας-λες τι ασταρέν σάντε λέσκε σεΐνγκε κρόσσια, ντα σαρέ οντουλά σο ασταρένας-λεν αβένας ντιπ λατσσές.
Υποσημειώσεις
^ Γιαβέρσοϊ «Ο Ιωάννης ο Βαφτιστής».
^ Γιαβέρσοϊ «ι Ηρωδίσκε αρεσάλι λέσκε».
^ Γιαβέρσοϊ «ζαντίνενας ανγκλάλ κο τραπέζι». Ο λάφι «ζαντίναβα» βακέρντιβελα εμ «ξαπλώναβα».
^ Γιαβέρσοϊ «κοφίνες».
^ Κι Πουρανί Μπαλαμανί βακέρντιβελας «κι τέταρτη σκοπιά». Αρχίνελας πασέ 3:00 αρατί μέχρι σο νικιόλας ο κχαμ πασέ 6:00 πρωί.
