Ο Ευαγγέλιος σο Γραφιντάς ο Ματθαίος 16:1-28
16 Αβιλέ πασέ λέστε ο Φαρισαίοι ντα ο Σαδδουκαίοι. Ντα για τι δοκιμάνεν-λες, μανγκλέ λέσταρ τι σικαβέλ λένγκε σημάδι κατά Ντεβέλ.*
2 Βοβ βακερντάς λένγκε: «Κάνα αράτιβελα, βακερένα: “Γιαβίν κα τθερέλ λατσσό ντιβές, σόσκε ο ουρανός ισί λολό σαρ γιακ”,*
3 ντα πρωί βακερένα: “Αντιβές κα κερέλ σιλ ντα κα ντελ μπρισίμ, σόσκε ο ουρανός ισί λολό σαρ γιακ αλλά τθερέλα σύννεφα”. Τζανένα τι βακερέν σο ντιβές κα τθερέλ κάνα ντικχένα ο ουρανός, αλλά ναστί βακερένα σο μανγκένα τι σικαβέν ι βακιτίνγκε σημάδια.
4 Ο τζενέ σο τζουβντιόνα ανταλέ βακιτίστε* ισί πφιρνέ* ντα να ντένα καν* κο Ντεβέλ. Βον να τσσιναβένα τι μανγκέν τι ντικχέν εκ σημάδι, αλλά να κα ντικχέν καέκ σημάδι εκτός κατά σημάδι ι Ιωνάσκο». Σοράν μουκχλάς-λεν ντα νασλό.
5 Ο μαθητές νακχλέ οκιά μπάνταρ ντα μπισταρντέ τι λεν μαντρό παλά-πουμέντε.
6 Ο Ιησούς βακερντάς λένγκε: «Τι τθερέν πουταρντέ τουμαρέ γιακχά ντα τι αρακχαβέν-τουμέν κατά μαγιά ι Φαρισαιόνγκι ντα ι Σαδδουκαιόνγκι».
7 Οτθάρ αρχισάλε τι κερέν λάφι ο εκ ι γιαβερέσαρ ντα τι βακερέν: «Να λιντάμ μαντρό».
8 Ο Ιησούς αγαντάς-λες ανταβά ντα βακερντάς: «Σόσκε βακερένα ότι να τθερένα μαντρό; Σο χουρντί ισί τουμαρί πίστη!
9 Ατζέ να αγαβένα σο βακεράβα ντα να ντένα-τουμέν γκοντί σο παντς μαντρέντζαρ τσαλιλέ παντς χιλιάδες ντα καζόμ σεβλιά* γκιντιντέν;
10 Ή να ντένα-τουμέν γκοντί σο εφτά μαντρέντζαρ τσαλιλέ σταρ χιλιάδες ντα καζόμ μπαρέ σεβλιά γκιντιντέν;
11 Σαρ αβέλα-πες μα τι αγαβέν ότι να κεράβας τουμένγκε λάφι μαντρέσκε; Τι αρακχαβέν-τουμέν κατά μαγιά ι Φαρισαιόνγκι ντα ι Σαδδουκαιόνγκι».
12 Αζομάν αγαντέ ότι να βακερέλας λένγκε τι αρακχαβέν-πες κατά μαντρέσκι μαγιά, αλλά κατά σικλιαριπέ ι Φαρισαιόνγκο ντα ι Σαδδουκαιόνγκο.
13 Κάνα ο Ιησούς αβιλό κι Καισάρεια κι Φιλιππόσκι, πουτσλάς πι μαθητέν: «Κάνα ο τζενέ κερένα λάφι ι τζενέσκε Τσσαβέσκε, κον βακερένα ότι ισί;»
14 Βον βακερντέ: «Ισί τζενέ σο βακερένα ο Ιωάννης,* γιαβερά βακερένα ο Ηλίας ντα γιαβερά ο Ιερεμίας ή εκ κατά προφήτες».
15 Βοβ βακερντάς λένγκε: «Τουμέν όμως κον βακερένα ότι ισινόμ;»
16 Ο Σίμωνας Πέτρος βακερντάς: «Ισινάν ο Χριστός, ο Τσσαβό ι τζουβντέ Ντεβλέσκο».
17 Ντα ο Ιησούς βακερντάς λέσκε: «Ευτυχισμέ ισινάν, Σίμωνα, τσσαβό ι Ιωνάσκο, σόσκε ανταβά να σικαντάς-λες τούκε εκ τζενό, αλλά μο Ντατ σο ισί κο ουρανός.
18 Ντα βακεράβα τούκε: Τούι ισινάν ο Πέτρος, ντα οπράλ ανταλέ μπαρέστε κα κεράβ μι κχανγκιρί, ντα ο Μεζάρι να κα τθερέλ* πο μπαρί ζορ λάταρ.
19 Κα νταβ-τουτ ο κλειδιά ι ουρανόσκε Βασιλειάκε, ντα σο-ντα κα πφάντες κι πφουβ κα αβέλ πφαντό πο τζανγκλέ κο ουρανός, ντα σο-ντα κα πουτρές κι πφουβ κα αβέλ πουταρντό πο τζανγκλέ κο ουρανός».
20 Αζομάν ντινάς πι μαθητέν εντολή μα τι βακερέν καεκχέσκε ότι βοβ ισινέ ο Χριστός.
21 Από αζομάν ο Ιησούς αρχισάλο τι βακερέλ πι μαθητένγκε ότι πρέπει τι τζαλ κι Ιερουσαλήμ, τι τσσίντελ μπουτ κατά πρεσβύτεροι, κατά μπαρέ ιερείς ντα κατά γραμματείς, τι μερέλ ντα κο τρίτος ντιβές τι ιστίλ.
22 Αζομάν ο Πέτρος λιντάς-λες χάνικ πο οκόρινγκ ντα ντινάς βίκος οπρά-λέστε ακαλέ λαφίντζαρ: «Τζίτζινε τούκε, Κύριε. Να κα αβέλ-πες τούκε κάτι ασακό».
23 Αλλά βοβ βουρτιντάς πο ντουμό ντα βακερντάς ι Πετρόσκε: «Τζα παλά-μάντε, Μπενγκ! Τσσιναβέσα-μαν, σόσκε να τθερέσα τι γκοντιάτε ι Ντεβλέσκε πράγματα, αλλά ι τζενένγκε».
24 Αζομάν ο Ιησούς βακερντάς πι μαθητένγκε: «Άμα εκ τζενό μανγκέλα τι αβέλ παλά-μάντε, τι τσσιναβέλ τι τζουβντιόλ πέσκε, τι βάντελ πι ντουκχένγκο κας* ντα μα τι τσσιναβέλ τι πφιρέλ παλά-μάντε.
25 Σόσκε κον μανγκέλα τι σώνελ πι ζωή* κα χασαρέλ-λα, αλλά κον κα χασαρέλ μάνγκε πι ζωή* κα αρακχέλ-λα.
26 Μπαγιά, σο λατσσιπέ κα ντικχέλ ο τζενό άμα κα αβέλ λέσκο σαρό ο ντουνιάς αλλά κα χασαρέλ πι ζωή;* Ή σο μπορίνελα τι ντελ ο τζενό για τι λελ παλάλ πι ζωή;*
27 Ο Τσσαβό ι τζενέσκο κα αβέλ πι Νταντέσκε ζοριάσαρ* γιεκ πι αγγελόντζαρ, ντα αζομάν κα ντελ παλάλ κο κάθε εκ οντουλά σο κερντάς.
28 Μπαγιά βακεράβα τουμένγκε ότι ισί τζενέ ατθέ σο να κα μερέν, μέχρι τι ντικχέν ι τζενέσκε Τσσαβές τι αβέλ πι Βασιλειάτε».
Υποσημειώσεις
^ Κι Πουρανί Μπαλαμανί βακέρντιβελας «ουρανός».
^ Γιαβέρσοϊ «γιανγκ».
^ Κι Πουρανί Μπαλαμανί ισινέ ο λάφι «γενιά».
^ Γιαβέρσοϊ «γκεραλέ, μπίλατσσε».
^ Γιαβέρσοϊ «νανέ πιστοί».
^ Γιαβέρσοϊ «κοφίνες».
^ Γιαβέρσοϊ «ο Ιωάννης ο Βαφτιστής».
^ Γιαβέρσοϊ «ο πόρτες ι Αδίσκε να κα τθερέν». Ο λάφι «Μεζάρι» βακέρντιβελα εμ «Λιμόρι». Ντικχ Λεξικός.
^ Γιαβέρσοϊ «ψυχή».
^ Γιαβέρσοϊ «ψυχή».
^ Γιαβέρσοϊ «ψυχή».
^ Γιαβέρσοϊ «ψυχή».
^ Κι Πουρανί Μπαλαμανί βακέρντιβελας «δοξάσαρ».
